Kuvuli uku takonkhoskanga viyo mumabuku ngidu. Ivi vikoliyana ndi vo tiŵerenga pa Aheberi 12:16. Vesi ili likamba kuti Esawu ‘wanguwonga [cha] vinthu vakupaturika’ ndipu “wangupereka wanangwa waki wakuja mwana wakwamba [kwaku Yakobe] mwakusinthana ndi chakurya chakuryapu kamoza pe.” Lemba ili lilongo nge kuti Yakobe wati wagula ‘wanangwa wakuja mwana wakwamba,’ wanguja so mupapi waku Mesiya.—Mate. 1:2, 16; Luka 3:23, 34.

Kweni Bayibolu lilongo kuti munthu wakhumbikanga kuja mwana wakwamba pe cha kuti wazije mupapi waku Mesiya. Tiyeni tiwoni maukaboni ngamanavi:

Mwana wakwamba waku Yakobe (Yisirayeli), wenga Rubeni yo wangubaliya paku Leya. Pavuli paki, mwana wakwamba yo Yakobe wangubaliya paku Rakelu wenga Yosefi. Chifukwa cha vo Rubeni wanguchita, wanangwa waki wakuja mwana wakwamba ungupaskika kwaku Yosefi. (Chiya. 29:31-35; 30:22-25; 35:22-26; 49:22-26; 1 Miko. 5:1, 2) Kweni Mesiya wanguwiya mubanja laku Rubeni pamwenga laku Yosefi cha. Wanguwiya mubanja laku Yuda, yo wenga mwana wachinayi waku Yakobe yo wangubaliya paku Leya.—Chiya. 49:10.

Pa lemba la Luka 3:32 pe mundandanda wa apapi ankhondi aku Mesiya. Vilongo kuti weyosi  wa apapi yaŵa, wenga mwana wakwamba. Bowazi wangubala Obedi ndipu Obedi wangubala Jese.—Ruti 4:17, 20-22; 1 Miko. 2:10-12.

Chinanga kuti venga viyo, Davidi wenga mwana wakwamba cha waku Jese. Iyu wenga kwangu pa ŵana 8 aku Jese. Kweni Mesiya wanguziwiya mubanja laku Davidi. (1 Samu. 16:10, 11; 17:12; Mate. 1:5, 6) Mwakuyanana ŵaka, Mesiya wanguziwiya mubanja laku Solomoni chinanga kuti wenga mwana wakwamba cha waku Davidi.—2 Samu. 3:2-5.

Ivi ving’anamuwa kuti kuja mwana wakwamba kwenga kwambula kukhumbika cha. Mwana munthurumi wakwamba watumbikikanga ndipu ndiyu walongozganga vakuchitika pa banja la awisi asani yiwu ŵafwa. Iyu walondiyanga so vigaŵa viŵi va katundu wa awisi.—Chiya. 43:33; Mara. 21:17; Yoswa 17:1.

Kweni wanangwa wakuja mwana wakwamba wasinthikanga. Abrahamu wati wadikiska Yishumaele, wanangwa wakuja mwana wakwamba unguluta kwaku Isaki. (Chiya. 21:14-21; 22:2) Nge mo takambiyapu kali, Yosefi ndiyu wenga ndi wanangwa wakuja mwana wakwamba m’malu mwaku Rubeni.

Sonu tiyeni tiwere so ku lemba la Aheberi 12:16 lo likamba kuti: “Muwonesesi kuti paŵevi wakuchita malusu ngaheni ngakugonana pamwenga weyosi yo waleka kuwonga vinthu vakupaturika, nge Esawu, yo wangupereka wanangwa waki wakuja mwana wakwamba kuwaku mwakusinthana ndi chakurya chakuryapu kamoza pe.” Kumbi pa lemba ili Paulo wakambanganji?

Yapa Paulo wakambanga za mukoka waku Mesiya cha. Iyu wangukamba mazu yanga wati wamala ŵaka kuchiska Akhristu kuti ‘anyoloski nthowa za maphazi ngawu.’ Kuchita viyo kwatingi kuŵawovyengi kuti aleki ‘kutondeka kulonde wezi ukulu waku Chiuta.’ Ivi ndivu vatingi vichitikengi asani anguchita ureŵi. (Ahe. 12:12-16) Asani anguchita ureŵi atingi ayananengi ndi Esawu. Iyu wangutondeka “kuwonga vinthu vakupaturika” ndipu wangwanja vinthu vakuliŵavu.

Munyengu yaku Esawu ŵanthu aperekanga sembi ndipu nayu watenere kuti waperekanga sembi zenizi. (Chiya. 8:20, 21; 12:7, 8; Jobu 1:4, 5) Kweni chifukwa cha kwanja vinthu vakuliŵavu, Esawu wangutaya vitumbiku vosi ivi chifukwa cha mbali yimoza ya chakurya. Panyaki wakhumbanga cha kuti wazikumani ndi masuzgu ngo Chiuta wangukamba kuti mphapu yaku Abrahamu yazamukumana nangu. (Chiya. 15:13) Esawu wangulongo so kuti wayanjanga vinthu vakuliŵavu kweniso kuti wawonganga cha vinthu vakupaturika mwa kuto anthukazi ŵaŵi, wo asopanga achiuta aboza ndi kuchitiska chitima apapi ŵaki. (Chiya. 26:34, 35) Iyu wenga wakupambana ndi Yakobe yo wanguto munthukazi yo wasopanga Chiuta wauneneska.—Chiya. 28:6, 7; 29:10-12, 18.

Kutuliya pa vo takambiskana, kumbi tingakambanji vakukwaskana ndi mukoka waku Yesu yo ndi Mesiya? Anyaki mwa apapi wo Yesu wanguwiyamu ŵenga ŵana akwamba kuwaku kweni anyaki ŵenga akwamba cha. Ayuda aziŵanga venivi ndipu angukoliyana navu. Mwakuyeruzgiyapu, yiwu angukana cha kuti Khristu wenga mphapu yaku Davidi, yo wenga mwana wakumaliya waku Jese.—Mate. 22:42.