NYENGU zinyaki zawovyanga. Wonani chakuyeruzgiyapu ichi. Pa Marangu 24:14, 15 pakamba kuti: “Ungamuchitiyanga chinyengu cha waganyu yo ngwakusoŵa ndi mukavu, kwali njumoza mwa abali ŵaku pamwenga mulendu yo waja mucharu chinu. . . Iyu wangaliriya kwaku Yehova chifukwa cha vo wamuchitiya ndipu iwi uŵengi ndi mlandu.”

Nkhani yo yikamba za munthu yo wanguchidandawulapu pa nkhani iyi yingulembeka mu vyaka va m’ma 600 B.C.E. Yingusanirika kufupi ndi tawuni ya Ashdod ku Israel. Yitenere kuti yikamba za wantchitu yo wangutondeka kumaliza kuvuna mbewu zo wakhumbikanga kuti wavuni pa zuŵa. Nkhani iyi, yo yingulembeka pa chidinga yikamba kuti: “Nda mteŵeti winu ndati ndamaliza kuŵika vo ndinguvuna mu malu ngaki mazuŵa ngamanavi ngo ngajumpha, Hoshayahu mwana waku Shobay, wanguza kuzito chakuvwara changu. . . . Wosi wo ndavunanga nawu mu chilumwi, angandichitiya ukaboni . . . kuti vo ndakamba vauneneska. Palivi cho ndingunangisapu. . . . Nditikupemphani a nduna kuti mundiwovyi kuti munthu uyu wandiweze chakuvwala changu ndipu muchiti ivi chifukwa cha lisungu linu. Mungajangapu ŵaka cheti cha asani mteŵeti winu walivi chakuvwara.”

Munthu munyaki wakulemba mbiri, zina laki Simon Schama, wangukamba kuti pemphu ili “lititikambiya waka za mlimi yo wakhumbanga kuti amuweze [chakuvwara chaki] cha. Kweni lilongo so kuti munthu yo wadandawulanga waziŵanga vo malangu ngakambanga, ukongwa ngo nge mu mabuku nga Ŵalevi ndi Marangu ngo ngakana kuchitiya nkhaza akavu.”