1, 2. Mu chaka chinu cha 2018, kumbi ntchakuchitika wuli cho chitiwovyengi kuti tikoliyani mu nthowa yapade, ndipu ntchifukwa wuli? (Wonani chithuzi cho che pachanya.)

ASANI lumwi lasere pa 31 March, 2018, ŵanthu aku Chiuta ndi anyaki anandi azamuwungana pa mwambu wa Chakurya Chamazulu cha Ambuya. Yiwu azamuwungana kuti azikumbukiyi nyifwa yaku Khristu. Chaka chechosi, mwambu uwu wo uchitika pacharu chosi ndiwu utovya ukongwa kuti ŵanthu aku Chiuta akoliyanengi.

² Tingaŵanaŵaniya mo Yehova ndi Yesu akondwe asani awona ŵanthu mamiliyoni achita chakuchitika chapade chenichi pacharu chosi. Bayibolu lingukambiya limu kuti “mzinda ukulu wo pengavi munthu yo [wangafiska] kuwuŵerenga, weniwo watuliyanga mumitundu yosi, mumafuku ngosi, mu ŵanthu wosi ndipuso mu malilimi ngosi” wazamudaniriza kuti: “Utaski widu watuliya kwaku Chiuta widu mweniyo waja pampandu waufumu kweniso ku Mwanawambereri.” (Chivu. 7:9, 10) Ntchakukondwesa ukongwa kuwona kuti chaka chechosi pa Chikumbusu, ŵanthu anandi apaska ulemu Yehova  ndi Yesu chifukwa cha vinthu vikulu vo akuchita!

3. Kumbi nkhani iyi yimukengi mafumbu nanga?

³ Nkhani iyi yimukengi mafumbu yanga: (1) Kumbi weyosi pakuyija wanganozgeke wuli Chikumbusu ndi kuyanduwa nachu? (2) Kumbi Chikumbusu chitovya wuli kuti ŵanthu aku Chiuta akoliyanengi? (3) Kumbi isi pakutija tingawovya wuli kuti ŵanthu aku Chiuta akoliyanengi? (4) Kumbi zuŵa linyaki tazamuchita Chikumbusu chakumaliya? Asani ndi viyo, chazamuchitika zuŵanji?

4. Ntchifukwa wuli nkhwakukhumbika kusanirika pa Chikumbusu asani palivi chakukutondekesani?

⁴ Muŵanaŵaniyengi kukhumbika kwa kufika pa Chikumbusu. Mungaluwanga cha kuti maunganu ngampingu ntchigaŵa cha kusopa Chiuta. Tikhumba kuti Yehova ndi Yesu awonengi kuti tikhumbisisa kusanirikapu pa Chikumbusu asani palivi masuzgu nganyaki ngo ngangatitondekesa. Asani tilongo mu vakuchita vidu kuti maunganu ngakukhumbika, titimupaska chifukwa chinyaki Yehova chakusungiya zina lidu mu “buku la chikumbusu” pamwenga kuti “buku laumoyu.” Mu buku ili mukulembeka mazina ngaku wo mbakwenere kuzilonde umoyu wamuyaya.—Mala. 3:16; Chivu. 20:15.

5. Asani kwaja kamanavi kuti Chikumbusu chichitiki, kumbi ‘tingajiyesa wuli kuti tiwoni asani te mu chivwanu’?

⁵ Asani kwaja kamanavi kuti Chikumbusu chichitiki, tikhumbika kusaniya nyengu yakurombe ndi kujisanda kuti tiziŵi mo ubwezi widu ndi Yehova uliri. (Ŵerengani 2 Akorinto 13:5.) Kumbi tingachita wuli ivi? ‘Mwakujiyesa kuti tiwoni asani te mu chivwanu.’ Kuti tijiyesi, tingajifumba kuti: ‘Kumbi ndigomezga nadi kuti ndenili pe gulu lo Yehova wagwiriskiya ntchitu kuti wafiski khumbu laki? Kumbi ndichita vosi vo ndingafiska kuti ndipharazgi ndi kusambiza uthenga wamampha wa Ufumu? Kumbi vo ndichita vilongo kuti ndigomezga nadi kuti te munyengu yakumaliya ndipu ulamuliru waku Satana wepafupi kumala? Kumbi chivwanu changu mwaku Yehova ndi Yesu cheche chikulu nge mo chenge pa nyengu yo ndajipatuliyanga?’ (Mate. 24:14; 2 Timo. 3:1; Ahe. 3:14) Vo tisaniyengi asani tajifumba mafumbu yanga, vingatiwovya kuti tiziŵi kuti te ŵanthu amtundu wuli.

6. (a) Kumbi ndi nthowa yimoza pe niyi yo yingatiwovya kuti tizisaniyi umoyu wamuyaya? (b) Kumbi mura munyaki wanozgeke wuli Chikumbusu chaka chechosi, ndipu namwi mungachita wuli mwakuyanana ŵaka?

⁶ Muŵerengengi ndi kuŵanaŵaniyapu nkhani zo zikonkhoska kukhumbika kwa Chikumbusu. (Ŵerengani Yohane 3:16; 17:3.) Nthowa yimoza pe yo tingazisaniriya umoyu wamuyaya ‘nkhuziŵa’ Yehova ndi ‘kuvwana mwaku’ Yesu, Mwana waki wakuwa yija. Kuti munozgeke chikumbusu mukhumbika kusankha nkhani zo zingakuwovyani kuja pa ubwezi ndi Yehova kweniso Yesu. Ivi ndivu mubali munyaki yo wateŵete nge mura kwanyengu yitali wachita. Kwa vyaka vinandi, iyu waja wachisankha nkhani za mu Chigongwi cha Alinda zo zikonkhoska za Chikumbusu ndi chanju cho Yehova ndi Yesu akutilongo. Asani kwaja masabata ngamanavi kuti Chikumbusu chichitiki, waŵerenga so nkhani zenizi ndi kuŵanaŵaniyapu kukhumbika kwa kusanirika pa mwambu uwu. Nyengu zinyaki wasazgiyapu nkhani yimoza pamwenga ziŵi za mu magazini ngo ngatuwa sonu. Mura uyu wawona kuti asani waŵerenga so ndi kuŵanaŵaniyapu nkhani zenizi kweniso malemba ngo ngakhumbika kuŵerengeka pa nyengu ya Chikumbusu, wasambira vinthu vinyaki vasonu chaka chechosi. Chakukhumbika ukongwa ntchakuti iyu wawona kuti chanju chaki paku Yehova ndi Yesu chikuwa chaka chechosi. Kusambira mu nthowa iyi, kungakuwovyani kuti muŵayanjengi Yehova ndi Yesu kweniso kuti  muŵawongengi. Ivi vingakuwovyani kuti mupinduwengi ukongwa ndi Chikumbusu.

7. (a) Kumbi Yesu wangurombanji pa mwambu wakwamba wa Chakurya Chamazulu cha Ambuya? (b) Ntchinthu wuli cho chilongo kuti Yehova wakumuka rombu laku Yesu?

⁷ Pa mwambu wakwamba wa Chakurya Chamazulu cha Ambuya, Yesu wangupemphera kuti akusambira ŵaki azije akukoliyana nge mo iyu ndi Awisi aliri. (Ŵerengani Yohane 17:20, 21.) Yehova wakumuka pempheru lo Mwana waki wakwanjiwa wangupemphera ndipu mazuŵa nganu ŵanthu mamiliyoni agomezga kuti Yehova wangutuma Mwana waki. Kuluska maunganu ngosi ngo ŵanthu aku Chiuta achita, Chikumbusu chilongo ukaboni wambura kususkika wakuti Akaboni aku Yehova mbakukoliyana. Ŵanthu amitundu yosi awungana mumalu ngakupambanapambana pacharu chosi chapasi. Mu vigaŵa vinyaki, vichitika cha kuti ŵanthu amitundu yakupambanapambana awungani pamoza kuti asopi Chiuta penipo mu vigaŵa vinyaki awona kuti kuchita viyo ntchakwenere cha. Kweni Yehova ndi Yesu akondwa ukongwa asani tiwungana pamoza.

8. Kumbi Yehova wangumukambiya uthenga wuli Ezekiyeli wakukwaskana ndi kukoliyana?

⁸ Ŵanthu aku Yehova azizwa cha kuti mbakukoliyana. Yehova wangukambiya limu kuti ivi vazamuchitika. Wonani uthenga wo wangukambiya mchimi Ezekiele wakukwaskana ndi kubanyika kwa timiti tiŵi: Kamiti “kaku Yuda” ndi “Kaku Yosefi.” (Ŵerengani Ezekiele 37:15-17.) Nkhani yakuti “Vo Akuŵerenga Afumba” yo ye mu Chigongwi cha Alinda cha July 2016, yingukamba kuti: “Kuziya mwaku Ezekiele, Yehova wangulayizga kuti ŵanthu ŵaki azamuwere ku Charu Chakulayizgika ndipuso kuti azamukoliyana nge mtundu umoza. Uchimi uwu ung’anamuwa so kuti ŵanthu aku Chiuta azamuja gulu limoza mu mazuŵa ngakumaliya.”

9. Kumbi uchimi wo Ezekiele wangukamba ufiskika wuli chaka chechosi pa Chikumbusu?

⁹ Kwambiya mu 1919, Yehova kamanakamana wangwamba kuwovya Akhristu akusankhika kuti aje akukoliyana kweniso kusintha mo ayendesiyanga vinthu. Yiwu amiya kamiti “kaku Yuda.” Pavuli paki, Akhristu anandi wo alindizga kuzija pacharu chapasi wo amiya kamiti “Kaku Yosefi,” angukoliyana ndi Akhristu akusankhika. Magulu ngaŵi yanga nganguja “mskambu umoza.” (Yoha. 10:16; Zeka. 8:23) Yehova wangulayizga kuti watibanyengi pamoza timiti tiŵi teniti ndi kuŵa kamoza mujanja laki. (Ezeki. 37:19) Mazuŵa nganu, magulu ngaŵi ngenanga ngateŵete mwakukoliyana. Yiwu alongozgeka ndi Fumu yimoza, Yesu Khristu yo Mazu ngaku Chiuta ngatimudana kuti “Davidi” mteŵeti waku Chiuta. (Ezeki. 37:24, 25) Kukoliyana ko kukambika mu buku la Ezekiele kuwoneka chaka chechosi pa nyengu yo Akhristu akusankhika wo ŵeche pacharu chapasi ndi a “mbereri zinyaki” awungana kuti achiti Chikumbusu cha nyifwa yaku Khristu. Kumbi ndi vinthu wuli vo weyosi wangachita kuti tilutirizgi kukoliyana?

10. Kumbi tingawovya wuli kuti ŵanthu aku Chiuta aje akukoliyana?

¹⁰ Nthowa yimoza yo tingawovye kuti ŵanthu aku Chiuta akoliyanengi, nkhujiyuyuwa. Yesu wanguchiska akusambira ŵaki kuti aje akujiyuyuwa. (Mate. 23:12) Asani te akujiyuyuwa, tijiwonengi kuti te apachanya cha kuluska anyidu nge mo ŵanthu a m’charu ichi achitiya. Kweni asani te akujiyuyuwa, tivwiyengi wo alongozga mumpingu. Kuvwiya nkhwakukhumbika kuti mpingu uje wakukoliyana. Kuluska vosi, kujiyuyuwa kukondwesa Chiuta chifukwa iyu “wasuska akujikuzga, kweni wapereka wezi ukulu ku ŵanthu akujiyuyuwa.”—1 Petu. 5:5.

11. Kumbi kuŵanaŵaniya vo chiŵandi ndi vinyu vimiya pa Chikumbusu kungatiwovya wuli kuti tikoliyanengi?

 ¹¹ Nthowa yachiŵi yo yingatiwovya kuti tikoliyanengi, nkhuŵanaŵaniyapu vo chiŵandi ndi vinyu vimiya pa Chikumbusu. Tikhumbika kuchita viyo asani kwaja mazuŵa ngamanavi kuti Chikumbusu chichitiki kweniso pa zuŵa la chikumbusu. (1 Akori. 11:23-25) Chiŵandi chimiya liŵavu lambula ubudi laku Yesu lo wangupereka sembi ndipu vinyu wamiya ndopa zaki. Kweni tikhumbika kuchita vinandi pade pa kuziŵa ŵaka vo vinthu ivi vimiya. Kumbukani kuti sembi yaku Khristu yilongo kuti Yehova ndi Mwana waki atitiyanja ukongwa. Yehova wangulongo chanju ichi pakutipaska Mwana waki ndipu Yesu wangulongo kuti watitiyanja pakuzomera ndi mtima wosi kuti wazitifwiyi. Kuŵanaŵaniya chanju chawu kungatiwovya kuti nasi tiŵayanjengi. Chanju cho isi ndi Akhristu anyidu te nachu paku Yehova che nge chingwi cho chititimanga pamoza kuti tikoliyanengi ukongwa.

12. Mu ntharika yakukwaskana ndi fumu yo yakhumbanga kulonda ngongoli, kumbi Yesu wangulongo wuli kuti Yehova wakhumba kuti tigowokiyengi anyidu?

¹² Nthowa yachitatu yo yingatiwovya kuti tikoliyanengi, nkhugowoke anyidu ndi mtima wosi. Asani tigowoke ŵanthu wo atinangiya, tilongo kuti tiwonga kuti Yehova watitigowoke chifukwa cha sembi yaku Khristu. Ŵanaŵaniyani ntharika yo Yesu wangukamba pa Mateyu 18:23-34. Jifumbeni kuti: ‘Kumbi ndikhumbisisa kuchita vo Yesu wangukamba? Kumbi ndizikira ndi abali ndi azichi kweniso kuŵavwisa? Kumbi nde wakunozgeka kugowoke wo andinangiya?’ Mbuneneska kuti maubudi ngapambana. Maubudi nganyaki ngangaŵa ngakusuzga kugowoke wo atinangiya. Kweni ntharika yo Yesu wangukamba yititisambiza vo Yehova wakhumba kuti tichitengi. (Ŵerengani Mateyu 18:23-34.) Yesu wangukonkhoska umampha kuti Yehova wangatigowoke cha asani tileka kugowoke wo atinangiya. Tikhumbika kuyiŵanaŵaniya ukongwa fundu iyi. Kuti tilutirizgi kuja akukoliyana, titenere kugowoke wo atinangiya nge mo Yesu wakutisambiziya.

13. Kumbi kwanja chimangu kutovya wuli kuti tikoliyanengi ndi anyidu?

¹³ Asani tigowoke anyidu tilongo kuti titanja chimangu. Kumbukani kuti wakutumika Paulo wangukamba kuti tikhumbika ‘kuyesesa  kusunga umoza wa mzimu, mwakuja ndi chimangu cho chimanga pamoza.’ (Aefe. 4:3) Pa nyengu ya Chikumbusu, ukongwa pa zuŵa lo chazamuchitikiya, muziŵanaŵaniyepu ukongwa mo muchitiya vinthu ndi anyinu. Mungajifumba kuti: ‘Kumbi anyangu awona kuti ndisunga vifukwa cha? Kumbi ŵanthu atindiziŵa kuti nditesesa kukoliyana ndi anyangu ndi kuja nawu pa chimangu?’ Mafumbu yanga ngakukhumbika ukongwa kuŵanaŵaniyapu pa nyengu ya Chikumbusu.

14. Kumbi tingalongo wuli kuti ‘tivwisisana mu chanju’?

¹⁴ Nthowa yachinayi yo yingatiwovya kuti tikoliyanengi, nkhulondo chanju chaku Yehova. Iyu ndi Chiuta wachanju. (1 Yoha. 4:8) Tikhumbika cha kukamba Akhristu anyidu kuti, “Ndikhumbika kuŵayanja kweni uneneska ngwakuti nditiŵayanja cha.” Kuŵanaŵana viyo kupambana ndi vo Paulo wangukamba. Iyu wangukamba kuti titenere “kuvwisisana mu chanju.” (Aefe. 4:2) Wonani kuti iyu wangukamba kuti tikhumbika “kuvwisisana” ŵaka cha. Kweni wangusazgiyapu kuti tikhumbika kuchita viyo “mu chanju.” Pe mphambanu pakati pa kuvwisisana ŵaka ndi kuvwisisana mu chanju. Mumpingu musanirika ŵanthu amitundu yakupambanapambana wo Yehova wakuŵaguza. (Yoha. 6:44) Chifukwa chakuti Yehova ndiyu wakuŵaguza, watenere kuti we ndi vifukwa vamampha vakuŵayanjiya. Mwaviyo, kumbi pe chifukwa chakuwone Akhristu anyidu kuti mbakwenere cha kuŵayanja? Tikhumbika kwanja anyidu nge mo Yehova wakutilamuliya.—1 Yoha. 4:20, 21.

15. Kumbi tiziŵa wuli kuti zuŵa linyaki tazamuchita Chikumbusu chakumaliya?

¹⁵ Zuŵa linyaki tazamuchita Chikumbusu chakumaliya. Kumbi tiziŵa wuli? Mukalata yakwamba yaku Korinto, Paulo wangulembe Akhristu akusankhika kuti asani akumbukiya nyifwa yaku Yesu chaka chechosi, ‘apharazga nyifwa ya Ambuya mpaka po aziyengi.’ (1 Akori. 11:26) Yesu wangukamba so za ‘kuza’ kwaki mu uchimi waki wakukwaskana ndi nyengu yakumaliya. Pakukamba za chisuzgu chikulu cho chepafupi kuchitika, iyu wanguti: “Chisimikizu cha Mwana wa munthu chazamuwoneka kuchanya, mafuku ngosi nga ŵanthu pacharu chapasi ngazakujipuma pachifuŵa chifukwa cha chitima, kweniso azamuwona Mwana wa munthu wachiza mu mitambu yakuchanya ndi nthazi ndipuso unkhankhu ukulu. Ndipu [Yesu] wazamutuma angelu ŵaki ndi mbata yikulu, ndipu azamuwunganiska akusankhika kutuliya ku mphepu zosi zinayi, kwamba kuvigoti va kuchanya mpaka kuvigoti vinyaki va kuchanya.” (Mate. 24:29-31) Yesu ‘wazamuwunganiska akusankhika’ asani wazito Akhristu wosi akusankhika wo ŵeche pacharu chapasi ndi kuluta nawu kuchanya. Ivi vazamuchitika asani chisuzgu chikulu chaziyambapu kweni nkhondu ya Aramagedoni yechendayambi. Pavuli paki, Akhristu wosi a 144,000 pamoza ndi Yesu azamuchita nkhondu ndi mafumu nga pacharu chapasi. (Chivu. 17:12-14) Chikumbusu chakumaliya cho tazamuchita asani kwaja kamanavi kuti Yesu ‘wazi’ kuziwunganiska akusankhika, chazamuja chakumaliya.

16. Ntchifukwa wuli tikhumbika kuyesesa kuti tikasanilikepu pa Chikumbusu cho chichitikengi chaka chinu?

¹⁶ Tiziyesesi kuti tikasanilikepu pa Chikumbusu pa 31 March, 2018. Tikhumbika kupempha Yehova kuti watiwovyi kuchita vo tingafiska kuti ŵanthu ŵaki alutirizgi kukoliyana. (Ŵerengani Sumu 133:1.) Kumbukani kuti zuŵa linyaki tazamuchita Chikumbusu chakumaliya. Pasonu panu, titenere kuchita vosi vo tingafiska kuti tisanilikengepu chaka chechosi ndipu tiwonengi kuti kukoliyana ko kutuŵa pa Chikumbusu nkhwakuzirwa.