1, 2. Kumbi Yehova walongo wuli kuti ngwakupaska?

YEHOVA ndi Chiuta wakupaska. Chechosi cho tenachu chikutuwa kwaku iyu. Yehova ndiyu mweneku wa golidi ndi siliva kweniso vinthu vinyaki vosi vo ve pacharu chapasi. Iyu wagwiriskiya ntchitu vinthu ivi kuti waphwere vinthu vamoyu. (Sumu 104:13-15; Haga. 2:8) M’Bayibolu mwe nkhani zinandi zo zikonkhoska mo Yehova wagwiriskiyanga ntchitu vinthu vaki mwakuziziswa kuti waphwere ŵanthu ŵaki.

² Kwa vyaka 40, Yehova wangupereka mana ndi maji kwa Ayisirayeli pa nyengu yo ŵenga muchipululu. (Chitu. 16:35) Ivi vinguchitiska kuti ‘aleki kusoŵa kanthu.’ (Nehe. 9:20, 21) Yehova wangupaska nthazi Elisha. Iyu wanguchitiska kuti mafuta ngamanavi nga choko ngaje nganandi. Wati waguliska mafuta yanga, munthukazi uyu wanguweza ngongoli ndipu ndalama zo zingujaku zingumuwovya ndi ŵana ŵaki kuti alutirizgi kuja ndi umoyu. (2 Ŵakaro. 4:1-7) Yesu wachitanga vakuziziswa mwakuwovyeka ndi Yehova. Iyu waperekanga chakurya ndi ndalama asani vikhumbika.—Mate. 15:35-38; 17:27.

3. Kumbi mu nkhani iyi tikambiskanengenji?

 ³ Yehova wangagwiriskiya ntchitu chechosi kuti wawovyi vo wakulenga panu pasi. Kweni wapempha ateŵeti ŵaki kuti agwiriskiyengi ntchitu vinthu vawu kuti awovye gulu laki. (Chitu. 36:3-7; ŵerengani Nthanthi 3:9.) Ntchifukwa wuli Yehova wakhumba kuti timuweziyengi vinthu vo wakutipaska? Kumbi ŵanthu akugomezgeka a mu nyengu yakali awovyanga wuli ntchitu yaki? Kumbi gulu laku Yehova ligwiriskiya wuli ntchitu ndalama zo abali ndi azichi apereka mazuŵa nganu? Mafumbu yanga ngamukikengi mu nkhani iyi.

4. Kumbi titimulongonji Yehova asani titovya ntchitu yaki?

⁴ Tipaska Yehova kuti tilongo kuti titimuyanja kweniso tiwonga vo watitichitiya. Tisoŵa chakukamba asani tiŵanaŵaniya vosi vo Yehova watitichitiya. Fumu Davidi yati yakonkhoska kukhumbika kwa kuzenga nyumba yakusopiyamu, yingukamba kuti chechosi cho tilonde chituliya kwaku Yehova ndipu chechosi cho tipaska Yehova, chituliya pa vo iyu wakutipaska kali.—Ŵerengani 1 Mikoka 29:11-14.

5. Kumbi Malemba ngalongo wuli kuti kupaska ndi mtima wosi, ndi nthowa yimoza yo tisope Chiuta?

⁵ Tipaska Yehova chifukwa ndi nthowa yimoza yo titimusope. Mu chiwona, wakutumika Yohane wanguvwa ateŵeti aku Yehova kuchanya achikamba kuti: “Wakwenere ndimwi Yehova Chiuta widu kulonde unkhankhu, ulemu ndipuso nthazi, chifukwa mukulenga vinthu vosi, ndipu chifukwa cha khumbu linu vikuŵaku kweniso vikulengeka.” (Chivu. 4:11) Palivi yo wangakana kuti Yehova ngwakwenere unkhankhu wosi ndi ulemu wo tingamupaska mwakumupaska vinthu vamampha ukongwa vo tenavu. Kuziya mwaku Mozesi, Yehova wangulamula Ayisirayeli kuti akawonekiyengi kwaku Iyu katatu pachaka. Nge nthowa yimoza yakumusope, Ayisirayeli akhumbikanga cha ‘kuchiwoneke pamasu paku Yehova ndi manja ngaŵaka.’ (Mara. 16:16) Mazuŵa nganu napu, nthowa yimoza yo tisope Yehova nkhumupaska vinthu vo tenavu. Asani tichita viyo tilongo kuti tiwonga vo gulu laku Yehova lititichitiya ndipu tikhumba kuwovyaku.

6. Kumbi kupaska kutitiwovya wuli? (Wonani chithuzi cho che pa peji 17.)

⁶ Tiyanduwa asani tipaska. Kupaska nkhwamampha kuluska kulonde ŵaka. (Ŵerengani Machitidu 20:35.) Tingaŵanaŵaniya za mwana yo wapaska apapi ŵaki mphasu kutuliya pa ndalama zimanavi zo yiwu atimupaska. Apapi angawonga ukongwa mphasu iyi. Mwana yo wachitiya upayiniya pa nyumba ya apapi ŵaki, wangaŵapaska ndalama apapi ŵaki kuti ziŵawovyi kuguliya vakukhumbika pa nyumba. Chinanga kuti apapi angakhazga kuti mwana wawu wachiti viyo cha, angalonde ndalama izi chifukwa ndi nthowa yo mwana wangalongore kuti wawonga vosi vo atimuchitiya. Mwakuyanana ŵaka, Yehova waziŵa kuti tiyanduwa asani titimupaska vinthu vo tenavu.

7, 8. Kumbi ŵanthu aku Yehova a mu nyengu yakali akutipaska chakuwoniyapu wuli pa nkhani yakupereka ndalama ndi vinthu kuti viwovyi pa ntchitu yaku Chiuta?

⁷ Kwamba kali, Malemba ngalongo kuti ŵanthu aperekanga vinthu vo ŵenga navu kuti viwovyi pa ntchitu yaku Chiuta. Nyengu zinyaki, ŵanthu aku Yehova aperekanga ndalama pamwenga vinthu kuti viwovyi pa ntchitu yinyaki. Mwakuyeruzgiyapu, Mozesi wangupempha Ayisirayeli kuti apereki ndalama ndi vinthu vinyaki kuti viwovyi kupangiya chihema. Pavuli paki, Davidi nayu wangupempha ŵanthu kuti apereki ndalama ndi vinthu vinyaki kuti  azizenge nyumba yakusopiyamu. (Chitu. 35:5; 1 Miko. 29:5-9) Mu nyengu ya Fumu Yoashi, asembi angugwiriskiya ntchitu ndalama zo ŵanthu angupereka kuti anozge nyumba yaku Yehova. (2 Ŵakaro. 12:4, 5) Akhristu a mu nyengu ya akutumika ŵati aziŵa kuti abali ŵawu akhumbika chovyu chifukwa cha nja yo yengaku, ‘angusimikiza kutumiza chovyu kwa abali wo ajanga ku Yudeya, mwakukoliyana ndi vo angafiska.’—Machi. 11:27-30.

⁸ Nyengu zinyaki ŵanthu aku Yehova aperekanga ndalama ku ŵanthu wo alongozganga ntchitu yaku Chiuta. Mwakuyanana ndi Dangu lo Chiuta wangupereka kuziya mwaku Mozesi, Alevi alondiyanga chihara cha, nge mo mitundu yinyaki yachitiyanga. M’malu mwaki, yiwu alondiyanga chatchumi pamwenga kuti chigaŵa chimoza cha vigaŵa 10 kutuliya kwa Ayisirayeli. Ivi vaŵawovyanga kuŵika maŵanaŵanu ngawu pa uteŵeti wo achitanga pachihema. (Maŵe. 18:21) Yesu ndi akutumika ŵaki nawu ayanduwanga ndi mtima wakupaska wa anthukazi wo “aŵateŵetiyanga ndi chuma chawu.”—Luka 8:1-3.

9. Kumbi vinthu vo ŵanthu aperekanga munyengu yakali, atuwanga navu pani?

⁹ Vinthu vo ŵanthu aperekanga avisaniyanga munthowa zakupambanapambana. Vo Ayisirayeli aperekanga muchipululu kuti azenge chihema, vinyaki atenere kuti angutuwa navu ku Ijipiti. (Chitu. 3:21, 22; 35:22-24) Mu nyengu ya akutumika, Akhristu anyaki angugulisa vinthu vawu, nge minda ndi nyumba ndipu ndalama azanga nazu kwa akutumika. Akutumika, agaŵanga ndalama izi ku ŵanthu wo akhumbikanga chovyu. (Machi. 4:34, 35) Ŵanthu anyaki aŵikanga pamphepeti ndalama kuti ziwovyi pa ntchitu yaku Chiuta. (1 Akori. 16:2) Mwaviyo, kwali wenga mukavu pamwenga wakukhupuka, weyosi waperekanga.—Luka 21:1-4.

10, 11. (a) Kumbi tingachita wuli nge ateŵeti a mu nyengu yakali wo ŵenga ndi mtima wakupaska? (b) Kumbi mutuvwa wuli kuti mwe ndi mwaŵi wakuwovya ntchitu ya Ufumu?

¹⁰ Mazuŵa nganu, nasi tingapempheka kuti tipereki ndalama kuti ziwovyi pa ntchitu yinyaki. Mwakuyeruzgiyapu, mpingu widu ungakhumba kuzenga Nyumba ya Ufumu pamwenga yingakhumbika kuyinozga. Ofesi ya nthambi yingakhumbika kunozgeka. Tingakhumbika so kupereka ndalama kuti zikawovyi pa unganu wachigaŵa wo uchitikengi mudera lidu pamwenga kuwovya abali wo akwaskika ndi ngozi yachilengedu. Tingapereka so ndalama kuti ziwovyi pa ntchitu yo yichitika ku likulu lidu pamwenga pa maofesi nga nthambi pacharu chosi chapasi. Ndalama zo tipereka zitovya so amishonale, apayiniya apade ndi wo awonere madera. Mpingu winu utenere so kuti utumiza ndalama mwezi wewosi ku ofesi ya nthambi kuti ziwovyi pa ntchitu yakuzenga Nyumba za Ufumu ndi Malu Ngakuchitiyapu Unganu.

¹¹ Tosi tingapereka chinthu chinyaki cho chingawovya pa ntchitu yaku Yehova mazuŵa nganu ngakumaliya. Vinthu vinandi vo viperekeka tiziŵa cha wo apereka. Asani tiponya ndalama mubokosi pamwenga titumiza kuziya pa jw.org , tikambiya munthu cha unandi wa ndalama zo tapereka.Tingaŵanaŵana kuti ndalama zimanavi zo tipereka zilivi ntchitu. Kweni ndalama zo gulu ligwiriskiya ntchitu mazuŵa nganu zinandi zija mphasu zimana zimana zo abali ndi azichi apereka. Mbamanavi wo apereka ndalama zinandi. Abali ndi azichi, chinanga ndi wo mbakavu, nawu achita nge mo anguchitiya Akhristu akwambiriya aku Makedoniya wo ŵenga ‘akavu’ ukongwa kweni angupempha kuti awovyeku ndipu angupereka ndi mtima wosi.—2 Akori. 8:1-4.

12. Kumbi gulu lichita wuli kuti ndalama zo abali apereka zigwirengi ntchitu mwakwenere?

 ¹² Wupu Wakulongozga uchita vinthu mwakugomezgeka ndi mwazeru pa nkhani ya mo ugwiriskiya ntchitu ndalama. (Mate. 24:45) Yiwu aromba kuti agwiriskiyi ntchitu umampha ndalama izi. (Luka 14:28) Mu nyengu yakali, ŵanthu akugomezgeka wo awoneriyanga ndalama zo ŵanthu aperekanga awonesesanga kuti atizigwiriskiya ntchitu pa ntchitu yo yakhumbikanga pe. Mwakuyeruzgiyapu, Ezra wanguwere ku Yerusalemu ndi vinthu vo fumu yaku Perese yingupereka nge golidi, siliva ndi vinthu vinyaki, vo mazuŵa nganu vingakwana ndalama zakujumpha 72 biliyoni kwacha. Ezra wanguwona kuti vinthu ivi venga mphasu zo zinguperekeka kwaku Yehova. Ndichu chifukwa chaki wangupereka ulongozgi wakuvwika umampha wakuti vinthu ivi vipingiki umampha po ayendanga m’malu ngakofya. (Ezra 8:24-34) Wakutumika Paulo wangusonkheska ndalama kuti zikawovyi abali a mpingu waku Yudeya wo akhumbikanga chovyu. Wanguwonesesa kuti wo anguchipereka ndalama izi anguchita “vinthu vosi mwauneneska, pa masu paku Yehova, ndi pa masu pa ŵanthu.” (Ŵerengani 2 Akorinto 8:18-21.) Nge mo Ezra ndi Paulo anguchitiya, gulu laku Yehova mazuŵa nganu liwonesesa kuti ndalama zo abali apereka zigwiriskikiya ntchitu mwakwenere.

13. Ntchifukwa wuli gulu lasintha vinthu vinyaki pambula kuswera yapa?

¹³ Banja lingasintha mo ligwiriskiya ntchitu ndalama kuti lileki kugwiriskiya ntchitu ndalama zinandi kuluska zo lisaniya. Pamwenga lingaleka kugula vinthu vinandi kuti lichiti vinandi pakuteŵete Yehova. Ndimu so gulu laku Yehova lichitiya. Pambula kuswera yapa, gulu layamba kuchita vinthu vinandi vakukondwesa. Ivi vachitiska kuti nyengu zinyaki ligwiriskiyi ntchitu ndalama zinandi kuluska zo lisaniya. Ndichu chifukwa chaki gulu lisaniya nthowa kuti lileki kunanga ndalama zinandi ndi kugwiriskiya ntchitu mwakwenere ndalama zo abali apereka.

14-16. (a) Ndi vinthu wuli vinyaki vo gulu lichita ndi ndalama zo mupereka? (b) Kumbi imwi mupinduwa wuli ndi vinthu ivi?

¹⁴ Abali ndi azichi anandi wo ateŵete Yehova kwa nyengu yitali, akamba kuti ŵechendawonepu chakurya chauzimu chinandi viyo pa umoyu wawu. Mwakuyeruzgiyapu, vyaka vimanavi vo vajumpha, gulu likwambisa jw.org ndi TV ya JW Broadcasting. Bayibolu la New World Translation of the Holy Scriptures lafwatulika mu vineneru vinyaki vinandi. Mu 2014 ndi mu 2015, mu masitediyamu ngakulungakulu ukongwa mu matawuni 14 pacharu chosi chapasi, munguchitikiya  unganu wa mazuŵa ngatatu wa mutu wakuti: “Lutirizgani Kupenja Dankha Ufumu Waku Chiuta!” Wo ŵengapu pa unganu uwu angukondwa ukongwa.

¹⁵ Anandi awonga chifukwa cha vinthu ivi vo gulu laku Yehova lititipaska. Pakukamba za TV ya JW Broadcasting, banja linyaki lo liteŵete ku charu chinyaki ku Asia lingukamba kuti: “Titeŵete mu tawuni yimana. Ivi vichitiska kuti tiwonengi nge te kutali ndi abali ndi azichi ndipu tiluwa liŵi vo vichitika mu gulu laku Yehova. Kweni asani tiwona mapulogilamu nga pa TV ya JW Broadcasting, tikumbuka kuti te chigaŵa cha banja la pacharu chosi. Abali ndi azichi ako tija akondwa ukongwa ndi TV ya JW Broadcasting. Asani awonere pulogilamu ya pa mwezi ya JW Broadcasting, kanandi titiŵavwa achikamba kuti, awona kuti ŵe pafupi ndi Wupu Wakulongozga. Sonu amalika ukongwa kuti ŵe mu gulu laku Chiuta.”

¹⁶ Pacharu chosi, Nyumba za Ufumu pafupifupi 2,500, zikhumbika kuzengeka pamwenga kunozgeka. Abali ndi azichi ku Honduras ŵati ayamba kuwungana mu Nyumba ya Ufumu yasonu, angukamba kuti: “Tikondwa ukongwa kuti te mu gulu laku Yehova kweniso ndi ubali widu wa pacharu chosi. Ivi vawovya kuti Nyumba ya Ufumu yo takhumbanga yizengeki mu chigaŵa chidu.” Anandi awonga so asani alonde Bayibolu ndi mabuku nganyaki mu chineneru chawu, awovyeka pa nyengu yo akumana ndi ngozi ya chilengedu pamwenga asani awona vinthu vamampha vo vichitika chifukwa cha kupharazga kumalu ngo kusanirika ŵanthu anandi.

17. Kumbi vo vichitika mu gulu laku Yehova mazuŵa nganu, vilongo wuli kuti Yehova ndiyu watitiwovya?

¹⁷ Ŵanthu wo Mbakaboni cha angavwisa cha kuti tichita vosi ivi ndi ndalama zo abali apereka mwakukhumba kwawu. Bwana wa kampani yinyaki yikulu wanguluta kuchiwona ofesi ya kusindikiza mabuku. Iyu wanguzizwa wati wavwa kuti ntchitu yosi yichitika ndi ŵanthu akujipereka ŵaka kweniso ndi ndalama zo ŵanthu apereka mwakukhumba kwawu kwambula kuchita bizinesi yeyosi. Wangukamba kuti tichita vinthu vakuti vingachitika cha. Tosi tizomereza fundu iyi. Tiziŵa kuti ivi vichitika chifukwa chakuti Yehova ndiyu watitiwovya.—Jobu 42:2.

18. (a) Kumbi titumbikika wuli asani titovya pa ntchitu za Ufumu? (b) Kumbi tingasambiza wuli ŵana widu ndi wo ayamba sonu uneneska kuti nawu aŵi ndi mtima wakupaska?

¹⁸ Yehova watitipaska mwaŵi wakuwovya pa ntchitu yikulu yo yichitika mazuŵa nganu. Iyu watitisimikiziya kuti watitumbikengi asani tiwovya pa ntchitu za Ufumu. (Mala. 3:10) Yehova wakamba kuti yo wapereka ndi mtima wosi, watumbikikengi. (Ŵerengani Nthanthi 11:24, 25.) Kweniso tikondwa asani tipaska chifukwa “kupaska kuchitiska kuti munthu wakondwengi ukongwa kuluska kulonde.” (Machi. 20:35) Kuziya mu vo tikamba ndi kuchita, te ndi mwaŵi wakusambiza ŵana ŵidu ndi wo ayamba sonu uneneska kuziŵa mo angawovye pa ntchitu yaku Yehova kuti nawu alonde vitumbiku.

19. Kumbi nkhani iyi yakuchiskani wuli?

¹⁹ Vosi vo tenavu vituwa kwaku Yehova. Asani titimuweze vinthu ivi, tilongo kuti titimuyanja kweniso kuti tiwonga vosi vo watitichitiya. (1 Miko. 29:17) Pa nyengu yo Ayisirayeli aperekanga vinthu vakuzenge nyumba yakusopiyamu, “ŵanthu angukondwa chifukwa cha kupereka vinthu ivi, pakuti angupereka ndi mtima wosi kweniso mwakukondwa kwaku Yehova.” (1 Miko. 29:9) Nasi so tikhumbika kumuweze Yehova vo wakutipaska kuti tilutirizgi kukondwa.