“Munthu Wakupaska Watumbikikengi”

JULANI

KWAMBA kali, sembi zakukhumbika pakusopa kwauneneska. Ayisirayeli aperekanga sembi za nyama ndipu Akhristu nyengu zosi apereka “sembi yakulumba” Yehova. Kweni pe so sembi zinyaki zo Chiuta wakondwa nazu. (Ahe. 13:15, 16) Sembi izi zichitisa kuti ŵanthu akondwengi kweniso atumbikikengi nge mo tiwoniyengi mu vakuyeruzgiyapu va munkhani iyi.

Hana, yo wenga muteŵeti wakugomezgeka waku Chiuta, wakhumbisiskanga ukongwa kuti waje ndi mwana munthurumi kweni wabalanga cha. Iyu wanguromba ndipu wangulayizga Yehova kuti asani wazibala mwana munthurumi, ‘wazakumupereka kwaku Yehova mazuŵa ngosi nga umoyu waki.’ (1 Samu. 1:10, 11) Mukuluta kwa nyengu, Hana wangume nthumbu ndipu wangubala mwana munthurumi zina laki Samuyeli. Wati wamulekeska kuwonkha, Hana wanguluta ndi Samuyeli kuchihema, nge mo wangulayizgiya. Yehova wangutumbika Hana chifukwa cha mtima waki wakupaska. Iyu wangubala so ŵana anyaki ankhondi ndipu Samuyeli wanguzija mchimi kweniso wangulembaku Bayibolu.—1 Samu. 2:21.

Nge Hana ndi Samuyeli, Akhristu mazuŵa nganu ŵe ndi mwaŵi wakugwiriskiya ntchitu umoyu wawu pakuteŵete Mulengi wawu. Yesu wangulayizga kuti tazamutumbikika chifukwa cha vosi vo tichita pakuteŵete Yehova.—Mariko 10:28-30.

Mu nyengu ya akutumika, munthukazi munyaki zina laki Dorika waziŵikanga chifukwa cha “vinthu vamampha” vo wachitanga ndipuso chifukwa chakuti ‘waperekanga mphasu zalisungu’ ku ŵanthu. Chakupaska chitima ntchakuti “wangutama ndipu wangufwa.” Ivi vinguchitisa kuti mpingu uje ndi chitima. Akusambira ŵati ŵavwa kuti Peturo we mutawuni ya pafupi, angumupempha kuti wazi. Tikayika cha kuti yiwu angukondwa ukongwa Peturo wati waza ndi kuyuska Dorika. Ichi chenga chiyuka chakwamba kuchitika ndi wakutumika cho chikulembeka m’Bayibolu. (Machi. 9:36-41) Chiuta wanguluwa cha vinthu vamampha vo Dorika wachitanga. (Ahe. 6:10) Nkhani yaki yakuti wenga munthu wakupaska yikulembeka mu Mazu ngaku Chiuta kuti nasi tiyezgengi vo wachitanga.

Wakutumika Paulo nayu wakulongo chakuwoniyapu chamampha pa nkhani yakupaska. Iyu waperekanga nyengu yaki kweniso waŵanaŵaniyanga ŵanthu. Paulo wangukambiya Akhristu a ku Korinto kuti: “Ini ndikondwengi ukongwa kugwiriskiya ntchitu vinthu vangu, ndipu ndijiperekengi ukongwa chifukwa chaku yimwi.” (2 Akori. 12:15) Kuziya mu vo wangukumana navu, Paulo wangusambira kuti kuteŵete ŵanthu kuchitisa kuti munthu wakondwengi. Kweni chakukhumbika ukongwa ntchakuti, Yehova wakondwa nayu ndipu watimutumbika.—Machi. 20:24, 35.

Yehova wakondwa asani tigwiriskiya ntchitu nyengu yidu ndi nthazi zidu kuti tilutisi panthazi ntchitu za Ufumu kweniso kuti tiwovyi Akhristu anyidu. Kumbi pe nthowa zinyaki zo tingawovye pa ntchitu yakupharazga? Hinya! Pade pa ntchitu zamampha zo tichita tingatumbika Chiuta mwakupereka ndalama. Ndalama zitovya pa ntchitu yakupharazga pacharu chosi nge kovye amishonale kweniso abali ndi azichi anyaki wo achita uteŵeti wa nyengu zosi. Zitovya so pakunozgeke kulemba ndi kufwatuliya mabuku ndipuso mavidiyo, kuzenga Nyumba za Ufumu kweniso asani kwachitika ngozi zachilengedu. Tikayika cha kuti “munthu wakupaska watumbikikengi.” Asani tipereka vinthu vakuzirwa kwaku Yehova, titimutumbika.—Nthanthi 3:9; 22:9.

Mo Anyaki Atovye Pa Ntchitu Ya Pacharu Chosi

Nge mo venge mu nyengu ya wakutumika Paulo, ŵanthu anandi mazuŵa nganu ‘asunga vinthu vinyaki’ pamwenga ndalama kuti akaponyi mukabokosi ko kasanirika mu Nyumba ya Ufumu ko kakulembeka kuti, “Nchitu ya Pacharu Chosi.” (1 Akori. 16:2) Mwezi wewosi, mipingu yitumiza ndalama zenizi ku ofesi ya Akaboni aku Yehova ya mucharu chawu. Ndalama izi mungatumiza so kuziya ku wupu wakuzomerezeka wo Akaboni aku Yehova agwiriskiya ntchitu. Asani mukhumba kuziŵa wupu wo agwiriskiya ntchitu, fumbani ku ofesi yawu. Adiresi ya ofesi ya nthambi yisanirika pa www.pr418.com. Vinthu vo mungapereka ndi ivi:

NDALAMA NDI VINTHU VINYAKI

Mungatumiza ndalama kuziya ku banki. Muvyaru vinyaki munthu wangatumiza ndalama ku ofesi ya nthambi kuziya pa jw.org pamwenga webusayiti yinyaki yo akusankha.
Mungapereka ndalama, vibangili, ndeŵereŵi pamwenga vinthu vinyaki vamampha. Pakutumiza vinthu ivi mutenere kulemba kalata yakulongo kuti mwapereka nge mphasu.

KUBWEREKESA NDALAMA

Izi ndi ndalama zo munthu wabwerekesa ofesi ya nthambi ndipu yitimuwezge asani watizikhumba.
Pakupereka ndalama izi mutenere kulemba kalata yakulongo kuti mwabwerekesa ŵaka.

NTHOWA ZINYAKI

Kusazgiyapu pakupereka ndalama ndi vinthu vinyaki vamampha, pe so nthowa zinyaki zo mungagwiriskiya ntchitu kuti mupereki vinthu vinyaki vo vingawovya pa ntchitu ya Ufumu yo yichitika pacharu chosi. Mutenere kufumba dankha ku ofesi ya nthambi kuti muziŵi nthowa zo ŵanthu agwiriskiya ntchitu mucharu cho muja. Chifukwa chakuti vyaru vipambana pa nkhani ya marangu ndipuso mo mungapereke musonkhu, mukhumbika kufumba ŵanthu wo aziŵa za msonkhu ndipuso marangu, mwechendasankhi nthowa yo mukhumba kugwiriskiya ntchitu. Mungapereka vinthu ivi:

Inshulansi Ndipuso Peshoni: Mungasankha kuti asani mwafwa ofesi ya nthambi ya Akaboni aku Yehova ndiyu yizilonde ndalama zinu za inshulansi pamwenga za peshoni.

Ndalama zo Musunga ku Banki: Mungasankha kuti ofesi ya nthambi ndiyu yizito ndalama zinu za ku banki asani mwafwa ndipu mutenere kuchita ivi mwakulondo marangu nga banki ya mucharu chinu.

Masheya: Asani mwe ndi masheya kukampani, mungasankha kuti masheya nginu ngaziperekeki ku ofesi ya nthambi asani mwafwa ndipu mungachita venivi mwakusayiniya.

Malu Pamwenga Nyumba: Mungasankha kupereka nyumba pamwenga malu ku ofesi ya nthambi. Mungasankha so kuti nyumba yinu yiziperekeki ku ofesi ya nthambi asani mwafwa.

Chuma cho Munthu yo Wafwa Wasiya: Mungalemba wilu yakuzomerezeka ndi boma kuti chuma chinu chiziperekeki ku ofesi ya nthambi asani mwafwa.

Kuti muziŵi mo mungapereke mphasu, julani po palembeka kuti: “Perekani Ndalama Mwakukhumba Kwinu Kuti Muwovyi pa Ntchitu Yidu.” Kamutu yaka ke pamphata papeji lakwamba la webusayiti yidu ya jw.org pamwenga fumbani ofesi ya nthambi ya mucharu chinu.

Mungayanja Kuŵerenga so Nkhani Izi

Mo Mungapereke Vawanangwa Kuziya pa Intaneti

Wonani nthowa zakupambanapambana za mo mungapereke vawanangwa.

CHIGONGWI CHA MLINDA—CHAKUSAMBIRA