1-3. (a) Kumbi Akhristu alongo wuli kuti atanja kuwungana? (Wonani chithuzi cho che pachanya.) (b) Kumbi tikambisanengenji mu nkhani iyi?

PA NYENGU yo Corinna wenga ndi vyaka 17, anyina angumangika ndipu anguŵatuma kutali kuchigwira jeri. Pavuli paki, Corinna nayu wangutoreke ku Siberia, kutali ukongwa ndi kwaki. Nyengu zinyaki, amuchichizanga kuti wakagwirengi ntchitu kubwalu ko kwaziziranga ukongwa, kwambula kuvwala champhepu. Chinanga kuti venga viyo, Corinna ndi mzichi munyaki alekanga cha kuwungana.

² Iyu wangukamba kuti: “Tingutuwa ko tajanga ndi mazulu ndipu tingwenda makilomita 25 kuchifika ko kwenga siteji ya sitima ya pamtunda. Sitima yingunyamuka 2 koloku usiku. Yingwenda kwa maora 6. Ndipu tati tafika pasiteji, tingwenda so makilomita 10 kuchifika ko tawungananga.” Corinna wangukondwa ukongwa kuti wanguluta ku mawunganu. Iyu wangukamba kuti: “Ku mawunganu, tingusambira Chigongwi cha Alinda ndi kumba sumu za Ufumu. Mawunganu ngangutichisa ukongwa ndipu  ngangutiwovya kuti chivwanu chidu chikho.” Chinanga kuti azichi yaŵa anguwere ko angutuwa pati pajumpha mazuŵa ngatatu, kweni bwana wawu wanguziŵa cha kuti angutuwapu.

³ Kwambiya kali, ateŵeti aku Yehova atanja kuwungana pamoza. Mpingu wachikhristu wati wapangika waka, akusambira aku Yesu angwamba ‘kuwungana pamoza.’ (Mac. 2:42) Tikayika cha kuti namwi mukhumba kuwungana nyengu zosi. Kweni nge mo viliri ndi abali wosi, nyengu zinyaki vitikusuzani kuwungana nyengu zosi. Panyaki mukhumbika kugwira ntchitu kwa maora nganandi, mwe ndi vakuchita vinandi pamwenga muvuka chifukwa cha ntchitu. Ntchinthu wuli cho chingakuwovyani kuti mumalani ndi masuzu yanga alinga kuti muwunganengi nyengu zosi? ^[1] Kumbi tingaŵawovya wuli ŵanthu wo tisambira nawu Bayibolu ndi anyaki kuti awonengi kukhumbika kwa kuwungana? Mu nkhani iyi tikambisanengi vifukwa 8 vo tikhumbikiya kuwungana pamoza kuti tisopengi Chiuta. Vifukwa ivi tingavigaŵa patatu: mo mukwasikiya, mo anyinu akwasikiya kweniso mo Yehova wakwasikiya asani muwungana. ^[2]

4. Kumbi mawunganu ngatitiwovya wuli?

⁴ Mawunganu ngatitisambiza. Unganu wewosi wa mpingu utitiwovya kusambira vinandi vakukwasana ndi Yehova. Mwakuyeruziyapu, mipingu yinandi yasambiranga buku la Yandikirani kwa Yehova pa Sambiru la Bayibolu la Mpingu. Kumbi mijalidu yaku Chiuta yo mwasambiranga ndi fundu zakutuliya pasi pa mtima zo abali aperekanga zingukuwovyani cha kuŵayanja ukongwa Awiskemwi akuchanya? Pa mawunganu, tisambira so vinandi asani tivwisiya nkhani, vakuwoniyapu ndipuso asani Bayibolu liŵerengeka. (Neh. 8:8) Mwakuyeruziyapu, tisambira fundu zakuzirwa sabata yeyosi asani tinozeke ndi kuvwisiya fundu zikulu za m’Bayibolu.

5. Kumbi mawunganu ngakuwovyani wuli kuti mugwirisiyengi ntchitu fundu za m’Bayibolu ndipuso kuti mupharazgengi mwalusu?

⁵ Mawunganu ngatitiwovya kuti tigwirisiyengi ntchitu fundu za m’Bayibolu pa umoyu widu. (1 Ŵat. 4:9, 10) Mwakuyeruziyapu, unganu wa Chigongwi cha Alinda utitiwovya kuti tichitengi vinandi pakuteŵete Yehova, tigowokiyengi anyidu ndipuso tipempherengi umampha. Unganu wa Umoyu Widu Wachikhristu Ndipuso Uteŵeti utitisambiza mo tingachitiya mu uteŵeti. Utitiwovya mo tingapharazgiya uthenga wamampha kweniso mo tingasambiziya mwalusu fundu za m’Malemba.​—Mat. 28:19, 20.

6. Kumbi mawunganu ngatitichiska wuli ndipuso ngatitiwovya wuli kuti tije akukho?

⁶ Mawunganu ngatitichisa. Charu ichi chideweza chivwanu chidu. Ndipu tingasuzika maŵanaŵanu ndi kugongowa. Kweni mawunganu ngatitichisa. (Ŵerengani Machitidu 15:30-32.) Nyengu zinandi, pa mawunganu tisambira mauchimi nga m’Bayibolu. Ivi vititiwovya kuti tisimikizi kuti vo Yehova wakukamba kuti wazamuchita kunthazi vazamufisika. Ndi wo akamba nkhani pe cha wo atitichisa. Abali ndi azichi nawuso atitichisa asani amuka kutuliya pasi pa mtima kweniso asani atumba sumu ndi mtima wosi. (1 Ŵakor. 14:26) Ndipu asani ticheza ndi abali ndi azichi mawunganu ngechendayambi ndipuso pa ngamala, tisisipulika chifukwa chakuti te ndi mabwezi nganandi ngo ngatitifipiya mtima.​—1 Ŵakor. 16:17, 18.

7. Ntchifukwa wuli kuwungana nkhwakukhumbika ukongwa?

⁷ Pa mawunganu tilonde mzimu wakupaturika waku Chiuta. Yesu Khristu  wangukamba kuti: “Yo we ndi makutu wavwi vo mzimu ukambiya mipingu.” (Chiv. 2:7) Yesu wagwirisiya ntchitu mzimu wakupaturika kulongoza mpingu. Nasi tikhumbika mzimu wakupaturika. Mzimu uwu ungatiwovya mu uteŵeti, kuti tisankhengi mwazeru vakuchita ndipuso asani titeseka. Mwaviyo, tikhumbika kuchita vosi vo tingafisa kuti tisanirikengi ku mawunganu ndi kulonde mzimu wenuwu.

8. Kumbi abali ndi azichi atovyeka wuli asani taza ku mawunganu, timukapu ndipuso timbaku sumu? (Wonani so bokosi lakuti “Watuvwa Umampha Pakumaliya pa Mawunganu.”)

⁸ Pa mawunganu tija ndi mipata yakulongore kuti titanja abali. Abali ndi azichi anyaki mumpingu winu akumana ndi masuzu ngakulu. Ndichu chifukwa chaki Paulo wangukamba kuti: “Tiŵanaŵaniyanengi.” Iyu wangukamba kuti tingalongo kuti tiŵanaŵaniya anyidu asani ‘tileka cha kuwungana pamoza.’ (Ŵah. 10:24, 25) Asani tiluta ku mawunganu, tilongo abali kuti tikhumba kuja nawu pamoza, kucheza nawu ndipuso kuti tikhumba kuziŵa vo akumana navu. Kweniso titiŵachiska asani timukapu ndi kumba sumu.​—Ŵakol. 3:16.

9, 10. (a) Kumbi vo Yesu wangukamba pa Yohane 10:16 vititiwovya wuli kuvwisa chifukwa cho kuwungana nkhwakukhumbika? (b) Asani tiwungana nyengu zosi, kumbi tingaŵawovya wuli abali ndi azichi wo banja lawu likuŵakana?

⁹ Asani tiwungana, tiwovya mpingu kuti uje wakukoliyana. (Ŵerengani Yohane 10:16.) Yesu wangukamba kuti iyu ndi mliska ndipu akusambira ŵaki ndi mskambu wa mbereri. Asani mbereri ziŵi ze paphiri, zinyaki ziŵi ze mudambu ndipu yinyaki yiturya uteka kumalu nganyaki, kumbi tingakamba kuti mbereri zinkhondi izi ndi mskambu? Awa, chifukwa mskambu wa mbereri utuŵa pamoza ndipu ulondo mliska. Mwakuyanana waka, tingalondo cha Yesu yo ndi Mliska widu asani tileka kuwungana. Tikhumbika kuwungana pamoza ndi Akhristu anyidu kuti tije “mskambu umoza, mliska yumoza.”

¹⁰ Mawunganu ngatitiwovya kuti tije akukoliyana nge banja. (Sumu 133:1) Abali ndi azichi anyaki apapi ŵawu, aku ŵawu, avurwa ŵawu ndipuso azichi ŵawu akuŵakana. Kweni Yesu wangukamba kuti waŵapasengi avurwa ŵawu, aku ŵawu, azichi ŵawu ndi anyinawu wo aŵayanjengi ndi kuŵaphwere. (Marko 10:29, 30) Mwaviyo, asani muwungana nyengu zosi, mungaŵa ada, ama, aku ŵawu, avurwa ŵawu ndipuso azichi ŵawu. Fundu iyi yitenere kutichiska kuti tichitengi vosi vo tingafiska kuti tiwunganengi nyengu zosi.

11. Kumbi asani tiwungana titimupasa wuli Yehova vo vitimuyenere?

¹¹ Asani tiwungana tipasa Yehova vo vitimuyenere. Yehova ndiyu wakulenga vinthu vosi. Mwaviyo, titenere kumuthamika, kumuwonga ndi kumutumbika. (Ŵerengani Chivumbuzi 7:12.) Tingachita ivi pa mawunganu asani tiromba, titumba sumu ndi kumukapu. Ndi mwaŵi ukulu ukongwa kusopa Yehova sabata yeyosi!

12. Kumbi Yehova watuvwa wuli mumtima asani tivwiya dangu laki lakuti tiwunganengi?

¹² Yehova wakhumbika so kumuvwiya. Iyu wakutikambiya kuti tingalekanga cha kuwungana pamoza, ukongwa sonu po tija mu nyengu yakumaliya. Asani tivwiya dangu lenili, Yehova wakondwa ukongwa. (1 Yoh. 3:22) Iyu wawona phamphu lidu asani tiwungana nyengu zosi.​—Ŵah. 6:10.

13, 14. Kumbi tindere wuli kufupi ndi Yehova kweniso Yesu pa mawunganu?

¹³ Asani tiluta ku mawunganu, tilongo Yehova ndi Mwana waki kuti tikhumba kuja nawu pafupi. Pa mawunganu, Musambizi widu Mula watitisambiza mo tingachitiya vinthu kuziya m’Bayibolu. (Yes. 30:20, 21) Chinanga mbanthu wo mbakaboni cha wo atuza ku mawunganu angakamba kuti: “Chiuta we nadi pakati pinu.” (1 Ŵakor. 14:23-25) Yehova walongoza mawunganu ndi mzimu wakupaturika, ndipu vo tisambira vituliya kwaku iyu. Mwaviyo asani tiluta ku mawunganu, tituvwa mazu ngaku Yehova, tiwona mo watitiyanjiya ndipu tindere kufupi ndi iyu.

¹⁴ Yesu wangukamba kuti: “Po ŵanthu ŵaŵi pamwenga atatu awungana mu zina langu, nani nde nawu penipo.” (Mat. 18:20) Nge mutu wa mpingu, Khristu “watenda pakati” pa mipingu ya ŵanthu aku Chiuta. (Chiv. 1:20–2:1) Ivi viwoneke limu kuti Yehova ndi Yesu atuŵa nasi pa mawunganu ndipu atitichisa. Kumbi muwona kuti Yehova watuvwa wuli asani wawona kuti mufwiyapu kuti mundere kufupi ndi iyu kweniso Mwana waki?

15. Kumbi asani tiwungana tilongo wuli kuti te kuchigaŵa chaku Chiuta?

¹⁵ Asani tiluta ku mawunganu tilongo Chiuta kuti te kuchigaŵa chaki. Chinanga kuti Yehova watitilamula kuti tiwunganengi, kweni wachita kutichichiza cha. (Yes. 43:23) Mwaviyo, ve kwaku isi kulongo Yehova kuti titimuyanja kutuliya pasi pa mtima kweniso tikhumba kuti iyu ndiyu watiwusengi. (Ŵar. 6:17) Mwakuyeruziyapu, bwana widu wangakhumba kuti tigwirengi ntchitu nyengu yo tiwungana. Boma lingatiwofya kuti asani tiwungana litimangengi, kutilipilisa ndalama pamwenga kutipasa chilangu chikulu kujumpha yapa. Pamwenga tingakhumba kuchita chinthu chinyaki m’malu mwakuluta ku mawunganu. Mu vakuchitika vosi ivi, Yehova watitipasa mwaŵi wakusankha. (Mac. 5:29) Asani tisankha kuja kuchigaŵa chaku Yehova, iyu wakondwa ukongwa.​—Nthanthi 27:11.

16, 17. (a) Kumbi tiziŵa wuli kuti mawunganu ngenga ngakukhumbika kwa Akhristu akwamba? (b) Kumbi M’bali George Gangas wangawonanga wuli mawunganu?

¹⁶ Akhristu akwamba ŵati awungana pa Pentekoste wa mu 33 C.E., anguleke penapa cha. ‘Yiwu angulutiriza kusambira kwa akutumika ndi kuwungana pamoza.’ (Mac. 2:42) Yiwu anguleka cha kuwungana chinanga  mphanyengu yo boma la Aroma ndi alongozi achiyuda aŵatombozanga. Chinanga kuti venga vakusuza, kweni angufwiyapu kuwungana.

¹⁷ Mazuŵa nganu napu, ateŵeti aku Yehova aziŵa kuti mawunganu ngakukhumbika ndipu akondwa asani ŵe pa mawunganu. M’bali George Gangas, yo wanguteŵete mu Wupu Wakulongoza kwa vyaka vakujumpha 22 wangukamba kuti: “Ndiwona kuti kuwungana ndi abali ntchinthu chakukondwesa ukongwa ndipuso chakuchiska. Nditanja kufika liŵi pa Nyumba ya Ufumu ndipuso kumaliya kutuwapu. Ndituvwa umampha mumtima asani ndicheza ndi ŵanthu aku Chiuta. Asani nde ndi yiwu, ndija nge nde kunyumba kwidu.” Wangukamba so kuti: “Ndikhumbisisa ukongwa kuwungana.”

18. Kumbi mutingawona wuli mawunganu, ndipu muchitengenji?

¹⁸ Kumbi namwi mutingawona viyo mawunganu? Asani ndi viyo, lutirizani kufwiyapu kuti muŵengi ndi abali ŵinu pa mawunganu, chinanga vingaŵa vakusuza. Asani muchitengi viyo, muyananengi ndi Fumu Davidi yo yingukamba kuti: “Yehova, nditanja nyumba yo muja.”—Sumu 26:8.