1-3. Kumbi kupambana maŵanaŵanu ko kwengapu pakati paku Euodia ndi Suntuke kutenere kuti kungwamba wuli, nanga tingachita wuli kuti venivi vileki kuchitika pakati pidu? (Wonani chithuzi cho che pachanya.)

ATEŴETI aku Yehova atumbika Bayibolu lo ndi buku lakupaturika. Chifukwa chakuti ndisi ambula kufikapu, nyengu zinyaki tipasika ulongozgi wa m’Malemba. Kumbi tichita wuli asani tapasika ulongozgi? Ŵanaŵaniyani vo vinguchitikiya Euodia ndi Suntuke, Akhristu a mu nyengu ya akutumika. Anthukazi akusankhika ŵenaŵa, angupambana maŵanaŵanu pa nkhani yinyaki. Kumbi yenga nkhani wuli? Bayibolu likamba cha. Tiyeni tiyeruzgiyi kuti ivi ndivu vinguchitika.

² Euodia wangudaniya abali ndi azichi anyaki kunyumba kwaki kuti akaryi chakurya kweniso akachezi kweni Suntuke wangumudana cha. Iyu wanguvwa ŵaka kuti Euodia wangudaniya abali ndi azichi kunyumba kwaki ndipu weyosi wangukondwa. Panyaki Suntuke wangukamba kuti: ‘Ntchifukwa wuli Euodia wanguleka kundidana? Ndatingi kuti ndi munyangu ukongwa?’ Chifukwa chakuguŵa, Suntuke wangwamba kumuwona umampha cha Euodia ndipu wangwamba kumukhwecha. Pavuli paki, Suntuke nayu wangudana abali ndi  azichi ŵeniŵa kuti akachezi kunyumba kwaki kweni Euodia wangumudaniyaku cha. Kupambana maŵanaŵanu ko kwengapu pakati paku Euodia ndi Suntuke kutenere kuti kungutimbanyiza chimangu mumpingu. Bayibolu likamba cha vo vinguchitika pavuli paki, kweni azichi ŵenaŵa atenere kuti anguvwiya ulongozgi wachanju wo wakutumika Paulo wanguŵapasa.—Ŵaf. 4:2, 3.

³ Vo vinguchitikiya azichi ŵenaŵa, vingachitisa kuti mumipingu ya ŵanthu aku Yehova mazuŵa nganu muyambi masuzgu. Chinanga kuti ve viyo, masuzgu ngaviyo, ngangamala pamwenga ngangachitika cha asani tigwirisiya ntchitu ulongozgi wa m’Bayibolu lo ndi Mazu ngaku Chiuta. Asani titumbika Mazu ngaku Yehova, tivwiyengi vo ngakamba.—Sumu 27:11.

4, 5. Kumbi ndi ulongozgi nuwu wo Mazu ngaku Chiuta ngatitipasa pa nkhani ya kuleka kukwiya liŵi?

⁴ Kutuŵa kwakusuzga kuleka kukwiya liŵi asani munthu munyaki watiguŵisa pamwenga watichitiya vinthu mwambula urunji. Tingaguŵa asani ŵanthu atichitiya vinthu viheni chifukwa chakuti tipambana ko tikutuliya, kawonekeru ka khungu pamwenga mo tiwoneke. Vija vakupweteka ukongwa asani Mkhristu munyidu ndiyu watiguŵisa. Kumbi Mazu ngaku Chiuta nge ndi ulongozgi wo ungatiwovya asani vinthu venivi vachitika chifukwa chakuti ndisi ambula kufikapu?

⁵ Kwambiya po Yehova wakulenge ŵanthu, iyu wawona mo ajaliya. Iyu ŵaziŵa mo tivwiya kweniso vo tichita. Asani takwiya ukongwa, tingakamba mazu ndi kuchita vinthu vo pavuli paki tingadandawula navu. Mwaviyo, chingaŵa chazeru kugwirisiya ntchitu ulongozgi wa m’Bayibolu wo ungatiwovya kuti tilekengi kukwiya liŵi ndipuso kuweze. (Ŵerengani Nthanthi 16:32; Wakutaula 7:9.) Mwambula kukayika, tosi tikhumbika kuyesesa kuti tilekengi kukwiya liŵi kweniso tigowokengi. Yehova ndi Yesu awona kuti kugowoka nkhwakukhumbika ukongwa. (Mat. 6:14, 15) Kumbi imwi muwona kuti mukhumbika kuyesesa kugowoke anyinu ndipuso kuleka kukwiya liŵi?

6. Ntchifukwa wuli tikhumbika cha kuja ndi jalidu la ukari?

⁶ Ŵanthu wo atondeka kujiko kanandi akwiya liŵi. Ivi vingachitisa kuti anyawu alekengi kucheza nawu. Munthu yo wakwiya liŵi wangachitisa kuti anyaki mumpingu aje ndi jalidu lenili. Iyu wangabisa jalidu laki lakukwiya pamwenga wangabisa kuti watinkha munthu munyaki kweni maŵanaŵanu ngaheni ngo nge mumtima mwaki, “ngaziŵikengi mumpingu.” (Nthanthi 26:24-26) Ŵara angawovya ŵanthu aviyo kuziŵa kuti munthu yo we mugulu laku Chiuta wakhumbika cha kuja ndi jalidu la ukari, kutinkha ŵanthu kweniso kusunga vifukwa. Mazu ngaku Yehova ngakonkhosa mwakuvwika umampha za mijalidu yeniyi. (Ŵal. 19:17, 18; Ŵar. 3:11-18) Kumbi imwi muvwiya ulongozgi waki?

7, 8. (a) Kumbi Yehova walongozga wuli chigaŵa cha pacharu chapasi cha gulu laki? (b) Kumbi ndi ulongozgi unyaki nuwu wo usanirika m’Bayibolu, nanga ntchifukwa wuli tikhumbika kuwuvwiya?

⁷ Yehova walongozga ndipuso waryisa chigaŵa cha pacharu chapasi cha gulu laki mwakugwirisiya ntchitu “muŵanda wakugomezeka ndi wakuwamu” yo walongozgeka ndi Khristu, “mutu wa mpingu.” (Mat. 24:45-47; Ŵaef. 5:23) Nge mo wupu wakulongozga wa munyengu ya akutumika wachitiyanga, muŵanda mwenuyu wavwiya Mazu ngaku Chiuta ndipu watingatumbika ukongwa. (Ŵerengani 1 Ŵatesalonika 2:13.) Kumbi ndi ulongozgi nuwu wa m’Bayibolu wo utitiwovya?

⁸ Bayibolu lititichiska kuti tiwunganengi nyengu zosi. (Ŵah. 10:24, 25) Lititiwovya kuti tigomezengi fundu zakuyanana. (1 Ŵakor. 1:10) Mazu ngaku Chiuta ngatitikambiya kuti tiŵikengi  Ufumu pa malu ngakwamba pa umoyu widu. (Mat. 6:33) Malemba ngakamba so kuti mbudindu kweniso ndi mwaŵi widu kupharazga kunyumba ndi nyumba, mumalu ngo musanirika ŵanthu anandi ndipuso peposi po takumana ndi ŵanthu. (Mat. 28:19, 20; Mac. 5:42; 17:17; 20:20) Bayibolu lichiska ŵara kuti awonesesengi kuti mpingu ujengi wakutowa. (1 Ŵakor. 5:1-5, 13; 1 Tim. 5:19-21) Yehova wakamba kuti weyosi yo we mugulu laki wajengi wakutowa kweniso wajengi pa ubwezi wamampha ndi iyu.—2 Ŵakor. 7:1.

9. Kumbi ndi nthowa yimoza pe niyi yo yigwirisikiya ntchitu kuti yitiwovyi kuvwisa umampha Bayibolu?

⁹ Anyaki awona kuti angalivwisisa Bayibolu pakuŵija. Kweni Yesu wakusankha ‘muŵanda wakugomezeka’ yo ndi nthowa yimoza pe yo watitisambiziya. Kwambiya m’chaka cha 1919, Yesu Khristu yo wakupasika mazaza wagwirisiya ntchitu muŵanda mwenuyu pakovya akusambira ŵaki kuti avwisengi Mazu ngaku Chiuta ndi kuvwiya ulongozgi waki. Asani tivwiya ulongozgi wo usanirika m’Bayibolu, titovya kuti abali ndi azichi mumpingu alutirizi kuja akutowa, achimangu ndipuso akukoliyana. Weyosi wakhumbika kujifumba kuti, ‘Kumbi nde wakugomezeka ku muŵanda yo Yesu wagwirisiya ntchitu mazuŵa nganu?’

10. Kumbi chigaŵa chakuchanya cha gulu laku Yehova chikonkhoseka wuli mubuku la Ezekiele?

¹⁰ Mazu ngaku Yehova ngatitiwovya kuchiziŵa umampha chigaŵa chakuchanya cha gulu laki. Mwakuyeruzgiyapu, mchimi Ezekiele wanguwona galeta lakuchanya lo limiya chigaŵa chakuchanya cha gulu laku Chiuta. (Ezek. 1:4-28) Yehova ndiyu watendesa galeta lenili ndipu liluta kwekosi ko mzimu waki ukhumba kuti liluti. Venivi vichitisa kuti chigaŵa chakuchanya chilongozgengi chigaŵa cha pacharu chapasi. Kukamba uneneska, galeta lenili litchimbiya ukongwa! Ŵanaŵaniyani vinthu vinandi vo vasintha mugulu laku Yehova mu vyaka 10 vajumpha. Titenere kuziŵa kuti Yehova ndiyu wachitisa kuti vinthu venivi visinthi. Chifukwa chakuti Khristu limoza ndi angelu ŵaki ŵe pafupi kunanga charu chiheni ichi, galeta laku Yehova litchimbiya ukongwa kuti watowesi zina laki kweniso walongo kuti ngwakwenere kulamuliya.

11, 12. Kumbi ndi vinthu nivi vinyaki vo gulu laku Yehova lichita?

¹¹ Ŵanaŵaniyani vo chigaŵa cha pacharu chapasi cha gulu laku Chiuta chichita mazuŵa nganu ngakumaliya. Kuzenga. Abali ndi azichi anandi angugwira ntchitu mwaphamphu pakuzenga likulu lasonu la Akaboni aku Yehova mutawuni ya Warwick ku New York mucharu cha U.S.A. Pacharu chosi chapasi, pe so abali ndi azichi anandi akujipereka wo agwira ntchitu yakuzenga Nyumba za Ufumu kweniso kusaziyaku maofesi nga nthambi. Yiwu alongozgeka ndi Dipatimenti ya Pacharu Chosi Yakupanga Mapulani ndi Kuzenga. Titawonga ukongwa abali ŵenaŵa wo agwira ntchitu zenizi ndi mtima wosi ndipu avuka cha. Titenere kuziŵa kuti Yehova watumbika apharazgi wosi pacharu chapasi wo  apereka ndalama zawu ndi mtima wosi ndipuso mwakugomezeka kuti awovyi pa ntchitu zenizi.—Luka 21:1-4.

¹² Masambiru. Ŵanaŵaniyani so masukulu ngo tenangu, ngo tisambiraku zaku Yehova. (Yes. 2:2, 3) Te ndi Sukulu ya Uteŵeti wa Upayiniya, Sukulu ya Apharazgi a Ufumu, Sukulu ya Giliyadi, Sukulu ya Ateŵeti a pa Beteli Asonu, Sukulu ya Akuwonere Madera ndi Awolu Ŵawu, Sukulu ya Ŵara a Mpingu, Sukulu ya Uteŵeti wa Ufumu ndipuso Sukulu ya Abali a mu Komiti ya Nthambi ndi Awolu Ŵawu. Yehova watanja ukongwa kusambiza ŵanthu ŵaki. Ŵanthu asambira so Bayibolu kuziya pa webusayiti yidu ya jw.org po pasanirika mabuku nga vineneru vinandi. Pamalu ngenanga pe so nkhani zakukwaskana ndi ŵana, mabanja kweniso zo zachitika ŵaka. Kumbi imwi mugwirisiya ntchitu jw.org pakupharazga ndipuso pa kusopa kwa pabanja?

13. Nge ateŵeti akugomezeka aku Yehova, kumbi tikhumbika kuchitanji?

¹³ Ndi mwaŵi kuja mugulu laku Yehova. Chifukwa chakuti tiziŵa vo iyu wakhumba ndipuso fundu zaki, vititichitisa kuti tichitengi cho ntchamampha kweniso tiwovyengi Ufumu waki. Po mijalidu ya ŵanthu mucharu ichi yilutiriya kunangika, tikhumbika “kutinkha cho ntchiheni” nge mo Yehova wachitiya. (Sumu 97:10) Tikana kuja ndi maŵanaŵanu ngo ŵanthu ambula kopa Chiuta ŵe nangu ndi kukamba kuti: “Chamampha ntchiheni ndipu chiheni ntchamampha.” (Yes. 5:20) Titesesa kuja achanda, amijalidu yamampha kweniso tija pa ubwezi wamampha ndi Chiuta chifukwa tikhumba kuti timukondwesengi. (1 Ŵakor. 6:9-11) Titimuyanja Yehova ndipuso titimugomeza. Tichita vinthu mwakukoliyana ndi fundu zaki zo ze m’Bayibolu kuti tilongo kuti ndisi akugomezeka kwaku iyu. Titesesa kugwirisiya ntchitu fundu zenizi, asani te kunyumba, kumpingu, kuntchitu, kusukulu ndipuso kwekosi ko tingaŵa. (Nthanthi 15:3) Tiyeni tiwoni so nthowa zinyaki zo tingalongole kuti ndisi akugomezeka kwaku Chiuta.

14. Kumbi apapi achikhristu angalongo wuli kuti mbakugomezeka kwaku Chiuta?

¹⁴ Kulera ŵana. Apapi achikhristu alongo kuti mbakugomezeka kwaku Yehova asani asambiza ŵana ŵawu mwakukoliyana ndi vo Mazu ngaki ngakamba. Apapi wo atopa Chiuta alongozgeka cha ndi midawuku ya kwawu pa nkhani yakulera ŵana. Mabanja nga Chikhristu ngakhumbika cha kuja ndi maŵanaŵanu nga ŵanthu a mucharu ichi. (Ŵaef. 2:2) Munthurumi yo ndi Kaboni wakhumbika cha kuja ndi maŵanaŵanu ngakuti, ‘Ini ndingaŵasambiza cha ŵana chifukwa kunu kwidu anthukazi ndiwu asambiza ŵana.’ Bayibolu likamba mwakuvwika umampha pa nkhani iyi kuti: ‘Ada, . . . mulerengi [ŵana ŵinu] mwakugwirisiya ntchitu marangu ndipuso ulongozgi waku Yehova.’ (Ŵaef. 6:4) Apapi wo atopa Chiuta akhumba kuti ŵana ŵawu aje nge Samuele chifukwa wachitanga vo Yehova wakhumbanga kutuliya pa unamana waki.—1 Sam. 3:19.

15. Kumbi tingalongo wuli kuti ndisi akugomezeka kwaku Yehova asani tikhumba kusankha vinthu vikuluvikulu pa umoyu widu?

¹⁵ Kusankha vinthu. Tingalongo kuti ndisi akugomezeka kwaku Chiuta asani tipenja ulongozgi m’Mazu ngaki ndipuso kutuliya ku gulu laki pa nyengu yo tikhumba kusankha vinthu vikuluvikulu vo tikhumba kuchita. Mwakuyeruzgiyapu, ŵanaŵaniyani nkhani yinyaki yo yisuzga apapi anandi. Ŵanthu anandi wo aluta ku vyaru vinyaki, asani abala ŵaka mwana, atanja kumutumiza kwa abali ŵawu kuti ndiwu akamuleri. Yiwu achita viyo chifukwa akhumba kuti alutirizi kugwira ntchitu ndipuso asaniyengi ndalama. Mbuneneska kuti ntchakusankha cha munthu weyosi kweni tikhumbika kukumbuka kuti tazamumuka mulandu kwaku Chiuta pa chinthu chechosi cho tingasankha. (Ŵerengani Ŵaroma 14:12.) Mwaviyo, asani tikhumba kusankha vinthu vakukwaskana ndi banja  lidu kweniso ntchitu, chingaŵa chazeru kufufuza dankha m’Bayibolu. Tikhumbika Ada ŵidu akuchanya kuti atiwovyi chifukwa tingafiska cha kujilongozga.—Yer. 10:23.

16. Kumbi munthukazi munyaki wakhumbanga kuchitanji wati wabala mwana waki munthurumi, nanga ntchinthu wuli cho chingumuwovya kuti wasankhi vinthu umampha?

¹⁶ Munthukazi munyaki wangubala mwana munthurumi po wenga kucharu chinyaki. Iyu wakhumbanga kutumiza mwana yo kumuzi kuti wakaleleki ndi ambuyaki. Munthukazi yo, wangwamba kusambira Bayibolu ndi Akaboni aku Yehova pa nyengu yo mwana waki wanguwiya. Iyu wangulutiriza kusambira ndipu wanguziŵa kuti Chiuta wakumupasa udindu wakusambiza mwana waki kuti wasopengi Yehova. (Sumu 127:3; Nthanthi 22:6) Munthukazi yo, wangupemphera kwaku Yehova nge mo Malemba ngakambiya. (Sumu 62:7, 8) Pavuli paki, wangukonkhose munthu yo wamusambizanga Bayibolu ndipu wangukambiya so abali ndi azichi anyaki mumpingu. Chinanga kuti abali ŵaki kweniso anyaki wo wachezanga nawu amuchichizanga kuti watumizi mwana yo kwa ambuyaki, iyu wanguwona kuti kuchita viyo kwenga kwambula kwenere. Murumu waki wanguzizwa ndi mo mpingu unguwovye muwolu waki ndi mwana. Ivi vinguchitisa kuti wazomeri kusambira Bayibolu ndipu wangwamba kulutiya limoza ku maunganu ndi muwolu waki ndipuso mwana wawu. Kumbi muŵanaŵana kuti munthukazi mwenuyu wanguwona kuti Yehova wangumuka rombu laki lakutuliya pasi pa mtima? Mwambula kukayika wanguwona viyo.

17. Kumbi tipasika ulongozgi wuli wakukwaskana ndi ŵanthu wo tisambira nawu Bayibolu?

¹⁷ Kuvwiya ulongozgi. Kuvwiya ulongozgi wo gulu laku Chiuta lipereka ndi nthowa yimoza yakukhumbika ukongwa yo tingalongole kuti ndisi akugomezeka kwaku iyu. Mwakuyeruzgiyapu, ŵanaŵaniyani masachizgu ngo tipasika ngakukwaskana ndi ŵanthu wo tisambira nawu Bayibolu. Gulu lititikambiya kuti asani tayamba ŵaka kusambira ndi munthu buku lakuti, Kumbi Bayibolo Lisambizanji Weniukongwa? nyengu yeyosi yo tisambira nayu, tikhumbika kumukonkhose kwa nyengu yimanavi za gulu laku Yehova. Tingachita venivi mwakugwirisiya ntchitu vidiyo yakuti, Kumbi ndi Vinthu Wuli vo Vichitika pa Nyumba ya Ufumu? ndipuso kabuku kakuti, Kumbi Mbayani Wo Achita Khumbu Laku Chiuta Mazuŵa Nganu? Pe sachizu lakuti asani tamala kusambira buku lakuti, Bayibolo Lisambizanji ndi munthu yo tiwona kuti wagwirisiya ntchitu vo wasambira, tisambirengi nayu so buku lakuti, “Mujisungi mu Chanju Chaku Chiuta” chinanga kuti wabatizika. Gulu lipereka ulongozgi wenuwu kuti wo tisambira nawu ‘ajengi ndi chivwanu chakukho.’ (Ŵakol. 2:7) Kumbi imwi muvwiya ulongozgi wo gulu laku Yehova lipereka?

18, 19. Kumbi ndi vifukwa vinyaki nivi vo tikhumbikiya kuwonga Yehova?

¹⁸ Pe vifukwa vinandi vo tikhumbikiya kuwonga Yehova! Iyu ndiyu wakutipasa umoyu, kwambula Yehova tingayenda cha ndipuso tingaja cha ndi umoyu. (Mac. 17:27, 28) Yehova wakutipasa mphasu yapade ukongwa yo ndi Mazu ngaki, Bayibolu. Mwaviyo, titingawona kuti ndi uthenga wakutuliya kwaku iyu, nge mo Akhristu a ku Tesalonika anguwulondere ndi kuwugwirisiya ntchitu.—1 Ŵat. 2:13.

¹⁹ Kuŵerenga Bayibolu kutitiwovya kundere kwaku Yehova ndipu nayu wandere kwaku isi. (Yak. 4:8) Tiwonga ukongwa kuti Ada ŵidu akuchanya atipasa mwaŵi wakuja mugulu lawu. Yo wakulembaku buku la sumu nayu wakulongo kuwonga po wangumba kuti: “Wongani Yehova chifukwa ngwamampha; chanju chaki ntchamuyaya.” (Sumu 136:1) Mubuku la Sumu chaputala 136, tisaniyamu mazu ngakuti “chanju chaki ntchamuyaya” maulendu ngakukwana 26. Asani tija akugomezeka kwaku Yehova kweniso ku gulu laki, tazamuwona kufiskika kwa mazu ngakuchiska ngenanga chifukwa tazamuja kwamuyaya.