1. Kumbi apapi Achikhristu akhumbika kusimikizanji ŵana ŵawu ŵechendabatiziki?

BLOSSOM BRANDT wangukonkhoska vo vinguchitika pa nyengu yo wakhumbanga kubatizika. Iyu wangukamba kuti: “Kwa myezi yinandi ndakambiyanga Ada ndi Ama kuti ndikhumba kubatizika, ndipu kanandi akambiskananga nani nkhani yeniyi. Yiwu akhumbanga kusimikiza asani ndaziŵanga kuti ubatizu ndi nkhani yikulu.” Blossom wangukamba kuti wangubatizika pa 31 December, 1934. Mazuŵa nganu, apapi wo Mbakhristu nawu atesesa kuwovya ŵana ŵawu kuti asankhengi vinthu mwazeru. Kuswera kubatizika kwambula chifukwa chakuvwika, vingachitiska kuti ubwezi wa mwana ndi Yehova utimbanyiziki. (Yako. 4:17) Kweni ŵechendabatiziki, apapi azeru akhumba dankha kusimikiza asani ŵana ŵawu mbakunozgeka kuja akusambira aku Khristu.

2. (a) Ntchifukwa wuli akuwonere dera anyaki adandawula? (b) Kumbi tikambiskanengenji mu nkhani iyi?

² Akuwonere dera anyaki adandawula kuti akumana ndi ŵana  ŵa Akaboni wo ŵepafupi kufika vyaka 20 pamwenga wo afika vyaka va m’ma 20 kweni aja kuti ŵechendabatiziki. Kanandi, ŵana ŵenaŵa aluta ku maunganu nga mpingu kweniso asere mu uteŵeti. Yiwu atijiwona kuti Mbakaboni aku Yehova. Chinanga kuti ve viyo, akhumba cha kujipatuliya kwaku Yehova kweniso kubatizika. Ntchifukwa wuli yiwu akhumba cha? Nyengu zinyaki apapi ŵawu ndiwu atiŵagongoweska kuti aleki kubatizika liŵi. Mu nkhani iyi, tikambiskanengi vinthu vinayi vo vichitiska kuti apapi anyaki wo Mbakhristu, aleki kovya ŵana ŵawu kuluta panthazi kuti abatiziki.

3. Kumbi apapi aku Blossom afipanga mtima ndi vinthu wuli?

³ Apapi aku Blossom, wo taŵazumbuwa mu ndimi yakwamba, afipanga mtima asani mwana wawu wangufika pa msinkhu wakuti wavwisa kukhumbika kwa ubatizu kweniso vo ung’anamuwa. Kumbi apapi angaziŵa wuli asani mwana wawu ngwakunozgeka kujipatuliya kwaku Yehova?

4. Kumbi dangu lo Yesu wangupereka pa Mateyu 28:19, 20 lingaŵawovya wuli apapi po asambiza ŵana ŵawu?

⁴ Ŵerengani Mateyu 28:19, 20. Nge mo nkhani yajumpha yingukambiya, Bayibolu likamba cha vyaka vo munthu watenere kubatizikiya. Chinanga kuti ve viyo, apapi akhumbika kuŵanaŵaniyapu ukongwa vo vikulembeka pa Mateyu 28:19. Pa lemba ili, Yesu wangulamula akusambira ŵaki kuti ‘akasambizengi ŵanthu . . . kuti aje akusambira.’ Ivi ving’anamuwa kuti tikhumbika kusambiza munthu kuti waje wakusambira. Wakusambira ndi munthu mweniyo wasambira ndi kuvwisa vo Yesu wasambizanga, ndipu wakhumbisiska kuvisunga. Mwaviyo, apapi wo Mbakhristu atenere kusambiza ŵana ŵawu kutuliya pa ulitema kuti aŵawovyi kuja akusambira aku Khristu ndi kubatizika. Mbuneneska kuti litema lingabatizika cha. Kweni Bayibolu lilongo kuti ŵana anamana angavwisa uneneska wa mu Bayibolu.

5, 6. (a) Kumbi vo Bayibolu likamba vakukwaskana ndi Timote vititikambiyanji zaku iyu? (b) Kumbi apapi azeru angaŵawovya wuli ŵana ŵawu?

⁵ Timote wangukhorwa kuti wasaniya uneneska weche munamana. Wakutumika Paulo wangukamba kuti Timote wangusambira uneneska wa mu Malemba kutuliya pa ulitema. Chinanga kuti awisi aku Timote ateŵetiyanga Yehova cha, kweni anyina ndi ambuyaki wo ŵenga Ayuda angumuwovya kuti wayanjengi Mazu ngaku Chiuta. Ivi vingumuwovya kuja ndi chivwanu chakukho. (2 Timo. 1:5; 3:14, 15) Timote wati wafika vyaka pafupifupi 20, Paulo wangumuto kuti wayendengi nayu mu uteŵeti waki wa umishonale.—Machi. 16:1-3.

⁶ Kweni ŵana apambana, anyaki akhwima liŵi ndipu anyaki asweliyapu. Ŵana anyaki angavwisa uneneska, kusankha vinthu mwazeru ndipuso kukhumba kubatizika ŵeche anamana. Anyaki angakhumbika kuti akuweku dankha kuti abatiziki. Mwaviyo, apapi azeru atiŵachichiza cha ŵana ŵawu kuti abatiziki. Mumalu mwaki, atovya mwana weyosi pakuyija kuti waluti panthazi mwauzimu mwakukoliyana ndi msinkhu waki kweniso mo wachitiya. Apapi akondwa asani mwana wawu wachita vinthu mwazeru. (Ŵerengani Nthanthi 27:11.) Kweni angaluwanga cha kuti akhumbika kuwovya ŵana ŵawu kuja akusambira aku Khristu. Mwaviyo, apapi angachita umampha kujifumba kuti, ‘Kumbi mwana wangu waziŵa vinandi mwakuti wangajipereka kwaku Chiuta ndi kubatizika?’

7. Kumbi munthu wakhumbika kuziŵa vosi vo Bayibolu lisambiza kuti wabatiziki? Konkhoskani.

⁷ Apapi asambiza ŵana ŵawu kuti awuziŵi umampha uneneska. Ivi vingaŵawovya kuti ajipereki kwaku Chiuta. Kweni ivi ving’anamuwa kuti munthu wakhumbika kuziŵa vosi cha vo Bayibolu lisambiza kuti wajipereki kwaku Chiuta ndi kubatizika. Wakusambira weyosi waku Khristu watenere kulutirizga kusambira asani wabatizika. (Ŵerengani Akolose 1:9, 10.) Mwaviyo, kumbi munthu wakhumbika kuziŵa vinthu vinandi wuli kuti wabatiziki?

8, 9. Kumbi tisambiranjipu pa nkhani yaku Paulo ndi mulonda wa jeri?

⁸ Vo vinguchitikiya banja linyaki mu nyengu ya akutumika, vingawovya apapi mazuŵa nganu. (Machi. 16:25-33) Pa ulendu waki wachiŵi wa umishonale cha mu 50 C.E., Paulo wanguluta ku Filipi. Ŵe kwenuku, Paulo ndi Sila anguŵapusikiziya, anguŵamanga ndi kuŵaŵika mujeri. Pakati pa usiku, chidilirisi chingusukunyiska fawundeshoni ya jeri ndipu visasa vosi vingujulika. Mulonda wa jeri wakhumbanga kujibaya chifukwa waŵanaŵananga kuti akayidi athaŵa. Kweni Paulo wangumukaniza. Paulo ndi Sila angupharazgiya mulonda wa jeri ndi a munyumba yaki. Kumbi yiwu anguchitanji ŵati aziŵa uneneska wakukwaskana ndi Yesu? Angubatizika nyengu yeniyo. Kumbi tisambiranjipu pa nkhani iyi?

⁹ Mulonda wa jeri watenere kuti wenga msilikali yo wangupumuwa pa ntchitu. Iyu wangaziŵanga cha Malemba. Kuti wangaziŵi, wakhumbikanga kusambira uneneska wa mu Bayibolu, kuvwisa vo kuja mteŵeti waku Chiuta kung’anamuwa ndipuso kukhumbisiska kuvwiya vo Yesu wasambizanga. Vo wangusambira mu kanyengu kamanavi vingumuwovya kuti wakhumbi kubatizika. Tikayika cha kuti iyu wangulutirizga kusambira wati wabatizika. Po muŵanaŵaniya chakuyeruzgiyapu cha munthu uyu, kumbi mungachita wuli asani mwana winu yo walongo kuti watanja Yehova kweniso waziŵa vo kujipatuliya ndipuso ubatizu ving’anamuwa, watikukambiyani kuti wakhumba kubatizika? Mungamukambiya kuti wakakumani ndi ŵara kuti awoni asani ngwakwenere kubatizika. * Nge mo Akhristu wosi akubatizika achitiya, nayu walutirizgengi kusambira vinandi vakukwaskana ndi khumbu laku Yehova kwa umoyu waki wosi pamwenga kwamuyaya.—Aro. 11:33, 34.

10, 11. (a) Kumbi apapi anyaki ŵe ndi maŵanaŵanu wuli? (b) Kumbi ntchinthu wuli cho chingavikiliya mwana winu?

¹⁰ Apapi anyaki aŵanaŵana kuti vingaŵa umampha kuti mwana wawu wazibatiziki asani wamaliza dankha masambiru ngo ngangamuwovya kusaniya ntchitu yamampha. Yiwu angachita ivi chifukwa chakumukhumbiya vamampha mwana wawu. Kweni kumbi kuchita viyo kungawovya mwana wawu kuti vinthu vizimuyende umampha? Kumbi ivi vikoliyana ndi vo Malemba ngakamba? Kumbi Mazu ngaku Yehova ngatitichiska kuti tichitengenji ndi umoyu widu?—Ŵerengani Wakutaula 12:1.

¹¹ Tikhumbika kukumbuka kuti charu chaku Satana ndipuso vinthu vosi vo vilimu, vikoliyana cha ndi maŵanaŵanu ngaku Yehova kweniso vo wakhumba. (Yako. 4:7, 8; 1 Yoha. 2:15-17; 5:19) Kuja pa ubwezi ndi Yehova ndiku kungavikiliya mwana winu kwaku Satana, charu chaki ndi maŵanaŵanu ngaheni  nga charu. Asani mpapi waŵika masambiru ndi ntchitu pakwamba, vingachitiska mwana kuŵanaŵana kuti vinthu vamucharu ndivu vakukhumbika ukongwa kuphara ubwezi waki ndi Yehova. Kumbi apapi wo atanja ŵana ŵawu angayanja kuti ŵana ŵawu aje ndi maŵanaŵanu ngaku charu pa nkhani ya vo vichitiska munthu kuti wakondwengi? Uneneska ngwakuti vinthu vititiyende umampha kweniso tikondwa asani tiŵika Yehova pakwamba.—Ŵerengani Sumu 1:2, 3.

12. Ntchifukwa wuli apapi anyaki akhumba cha kuti mwana wawu wabatiziki luŵi?

¹² Mzichi munyaki wangukonkhoska chifukwa cho wakhumbiyanga cha kuti mwana waki wabatiziki. Iyu wangukamba kuti: “Ndichita soni kukamba, kweni chifukwa chikulu chenga chakuti ndawopanga kuti mwana wangu wangazisezgeka.” Nge vo mzichi uyu wanguchita, apapi anyaki akhumba cha kuti mwana wawu wabatiziki luŵi. Yiwu akhumba kuti mwana wawu wazibatiziki asani waleka uzeleza. (Chiya. 8:21; Nthanthi 22:15) Yiwu angaŵanaŵana kuti, ‘Mwana wangu wangasezgeka cha asani wechendabatiziki.’ Ntchifukwa wuli kuŵanaŵana viyo nkhujipusika?—Yako. 1:22.

13. Kumbi munthu waŵavi mulandu kwaku Yehova asani wechendabatiziki? Konkhoskani.

¹³ Mpapi yo ndi Mkhristu, wangakhumba cha kuti mwana waki wabatiziki wechendanozgeki kujipatuliya kwaku Yehova. Kweni kungaŵa kunanga kuŵanaŵana kuti mwana waŵavi mulandu pamasu paku Yehova asani wechendabatiziki. Ntchifukwa wuli tikamba viyo? Mwana watuŵa ndi mulandu kwaku Yehova chifukwa chakuti wabatizika cha. Mumalu mwaki, watuŵa ndi mulandu asani waziŵa vo Yehova watanja ndi vo watinkha. (Ŵerengani Yakobe 4:17.) Mwaviyo, mumalu mwakumugongoweska kuti waleki dankha kubatizika, apapi azeru ayesesa kuchita vinthu vamampha kuti mwana wawu watoliyeku. Yiwu asambiza mwana wawu kutuliya pa ulitema kuti wayanjenji vo Yehova wakamba kuti vamampha ndi kutinkha vo wakamba kuti viheni. (Luka 6:40) Ivi vingamuvikiliya kuti waleki kuchita ubudi ukulu chifukwa wakhumbisiskengi kuchita vo Yehova wakhumba.—Yesa. 35:8.

14. Kumbi ŵara mumpingu angawovya wuli apapi wo atovya ŵana ŵawu kuti abatiziki?

¹⁴ Ŵara mumpingu angawovya apapi asani akambiya ŵana umampha wakuteŵete Yehova. Mzichi munyaki wangukumbuka vo wangukambiskana ndi Mubali Charles T. Russell panyengu yo wenga ndi vyaka 6. Mzichi uyu wangukamba kuti: “Iyu wangukambiskana nani kwa maminiti 15 vo ndakhumbanga kuchita pakuteŵete Chiuta.” Kumbi ivi vingumuwovya wuli? Mzichi uyu wanguchita upayiniya kwa vyaka vakujumpha 70. Ivi vilongo kuti mazu ngamampha kweniso ngakuchiska ngangawovya munthu kwa umoyu waki wosi. (Nthanthi 25:11) Ŵara angawovya so asani apempha apapi ndi ŵana ŵawu kuti awovyi pa ntchitu zo zichitika pa Nyumba ya Ufumu. Yiwu angapaska ŵana ntchitu zakukoliyana ndi msinkhu kweniso malusu ngawu.

15. Kumbi ndi nthowa zinyaki nizi zo Abali ndi azichi mumpingu angawovye ŵana?

¹⁵ Abali ndi azichi mumpingu nawu angawovya asani alongo kuti aŵanaŵaniya ŵana. Nthowa yimoza yo angachitiya viyo nkhuwona mo alutiya panthazi mwauzimu. Kumbi mwana munyaki wangumuka fundu yamampha pa maunganu pamwenga kukamba nkhani pa Unganu wa Umoyu Widu  Wachikhristu Ndipuso Uteŵeti? Kumbi wangupharazgiya munthu ku sukulu pamwenga wanguthera cha wati wayeseka kuti wachiti vinthu viheni? Asani ndi viyo, mukhumbika kumuwonga ndi mtima wosi. Mungalongo so kuti muŵanaŵaniya ŵana asani mucheza nawu maunganu ngechendayambi pamwenga asani ngamala. Asani muchitengi viyo, ŵana ajivwengi kuti nawu ntchigaŵa cha “mpingu.”—Sumu 35:18.

16, 17. (a) Kumbi ubatizu ungazimuwovya wuli munthu kunthazi? (b) Kumbi apapi angakondwa ukongwa asani achitanji? (Wonani chithuzi cho che papeji 8)

¹⁶ ‘Kusambiza [mwana] ndi kumulunguchizga nge mo Yehova wakhumbiya’ ndi mwaŵi ukulu ukongwa kwa apapi wo Mbakhristu. (Aefe. 6:4; Sumu 127:3) Mu nyengu ya Ayisirayeli, ŵana ajanga ŵanthu aku Yehova asani awaku ŵaka. Kweni ndimu viliri cha ndi ŵana ŵidu. Kusazgiyapu yapa, tichita kuhara cha kwanja Chiuta ndi uneneska. Kutuliya pa zuŵa lo mwana wawiyaku ŵaka, apapi akhumbika kumusambiza kuti waje wakusambira waku Yesu. Yiwu atenere kumuwovya kuti wajipatuliyi kwaku Yehova ndi kubatizika. Palivi chinthu chinyaki chakuzirwa kuluska kusambiza mwana kuziŵa Yehova. Kujipatuliya kwaku Chiuta, kubatizika kweniso kuteŵete Yehova mwakugomezgeka ndivu vazamuwovya munthu weyosi pakuyija kuti wazitaskiki pa chisuzgu chikulu.—Mate. 24:13.

¹⁷ Panyengu yo Blossom Brandt wapenjanga kubatizika, apapi ŵaki akhumbanga kusimikiza asani mwana wawu wenga wakunozgeka kubatizika. Ŵati asimikiza kuti ngwakunozgeka, angumuwovya kuti wafiski vo wakhumbanga. Usiku wakuti mawa wabatizikengi, awisi anguchita chinthu chamampha ukongwa. Blossom wangukamba kuti: “Angutikambiya kuti tosi tigwadi ndipu pavuli paki angupemphera. Yiwu angukambiya Yehova kuti mbakukondwa ukongwa kuti mwana wawu wajipereka kwaku Iyu.” Pati pajumpha vyaka vakujumpha 60, Blossom wangukamba kuti: “Ndililuwengi cha zuŵa ili umoyu wangu wosi!” Namwi mukondwengi ukongwa asani muwovyengi ŵana ŵinu kuti ajipatuliyi kwaku Yehova ndi kubatizika.