1, 2. (a) Kumbi apapi anyaki Achikhristu atuvwa wuli asani mwana wawu wakhumba kubatizika? (b) Ntchifukwa wuli wo akhumba kubatizika atiŵafumba mafumbu? (Wonani chithuzi cho che pachanya.)

APAPI aku Mariya ŵengapu penipo mwana wawu wanguma wima pamoza ndi anyaki wo akhumbanga kubatizika. Yo wakambanga nkhani wangufumba mafumbu ngaŵi. Mariya wangumuka mwakukweza ndipu pavuli paki wangubatizika.

² Apapi aku Mariya angukondwa ukongwa mwana wawu wati wajipatuliya kwaku Yehova ndi kubatizika. Kweni Mariya wechendabatiziki, anyina ajifumbanga kuti: ‘Kumbi Mariya weche munamana ukongwa kuti wabatiziki? Kumbi iyu waziŵa kuti kujipatuliya kwaku Yehova ndi nkhani yikulu? Kumbi vingaja umampha cha kuti walindizgepu dankha?’ Apapi anandi atijifumba mafumbu ngenanga asani mwana wawu wakhumba kubatizika. (Waku. 5:5) Ivi vakuvwika chifukwa kujipatuliya ndipuso ubatizu vakukhumbika ukongwa pa umoyu wa Mkhristu.—Wonani bokosi la mutu wakuti, “ Kumbi Mukujipatuliya Kwaku Yehova?”

3, 4. (a) Kumbi wakutumika Peturo wangulongo wuli kuti ubatizu ngwakukhumbika? (b) Ntchifukwa wuli ubatizu tingawuyeruzgiya ndi ntchitu yakukhoma chingaraŵa?

 ³ Wakutumika Peturo wanguyeruzgiya ubatizu ndi ntchitu ya kukhoma chingaraŵa yo Nowa wangugwira. Iyu wangukamba kuti: “Ubatizu uyanana ndi chingaraŵa chenichi, ndipu nawu so utikutaskani sonu.” (Ŵerengani 1 Peturo 3:20, 21.) Ntchitu yakukhoma chingaraŵa yingulongo kuti Nowa wangujipereka pakuchita khumbu laku Chiuta. Nowa wangugwira mwakugomezgeka ntchitu yo Yehova wangumupaska. Chifukwa cha chivwanu cho Nowa wenga nachu, Yehova wangumutaska pamoza ndi banja laki pa nyengu ya Chigumula. Kumbi tisambiranjipu pa chakuyeruzgiyapu cho Peturo wangukamba?

⁴ Chingaraŵa cho Nowa wangupanga chalongonga kuti wenga ndi chivwanu mwaku Chiuta. Mwakuyanana ŵaka, asani ŵanthu awona munthu wabatizika, aziŵa kuti iyu wakujipatuliya kwaku Yehova chifukwa cha kugomezga sembi yaku Khristu. Akhristu wo akujipatuliya kwaku Yehova, alutirizga kugwira ntchitu yo Chiuta wakuŵapaska nge mo Nowa wanguchitiya. Panyengu yo wazamunanga charu chaku Satana, Yehova wazamutaska Akhristu akubatizika wo mbakugomezgeka, nge mo wangutaskiya Nowa. (Mariko 13:10; Chivu. 7:9, 10) Fundu iyi, yilongo kuti kujipatuliya ndipuso ubatizu vakukhumbika ukongwa. Asani munthu waswere dala kubatizika, wangazilonde cha umoyu wamuyaya.

5. Kumbi tikambiskanengenji mu nkhani iyi?

⁵ Chifukwa chakuti sonu taziŵa kuti ubatizu ngwakukhumbika ukongwa, tiyeni tikambiskani mafumbu yanga: Kumbi Bayibolu likambanji pankhani ya ubatizu? Kumbi ndi vinthu wuli vo munthu wakhumbika kuchita wechendabatiziki? Ntchifukwa wuli tikhumbika kukumbuka  kukhumbika kwa ubatizu asani tisambiza ŵana ŵidu pamwenga munthu munyaki?

6, 7. (a) Ntchifukwa wuli ŵanthu abatizikanga ndi Yohane? (b) Kumbi ndi ubatizu wapade nuwu wo Yohane wanguchita?

⁶ Mu Bayibolu, munthu wakwamba yo wangubatizapu ŵanthu, wenga Yohane Mubatizi. (Mate. 3:1-6) Ŵanthu azanga kwaku Yohane kuti abatiziki kulongo kuti alapa maubudi ngawu ngo anguchita chifukwa chakuleka kuvwiya Dangu lo Chiuta wangupereka kuziya mwaku Mozesi. Kweni Yohane wangubatiza munthu munyaki yo wenga wakwenere cha kulapa. Yohane wenga ndi mwaŵi wapade wakubatiza Yesu Mwana wakufikapu waku Chiuta. (Mate. 3:13-17) Yesu wenga wambula ubudi ndipu wakhumbikanga kulapa cha. (1 Petu. 2:22) Iyu wangubatizika kulongo kuti wenga wakunozgeka kuchita khumbu laku Chiuta.—Ahe. 10:7.

⁷ Pa nyengu yo Yesu wachitanga uteŵeti waki pacharu chapasi, akusambira ŵaki nawu abatizanga ŵanthu. (Yoha. 3:22; 4:1, 2) Mwakuyanana ndi ubatizu waku Yohane, ŵanthu wo abatizikanga ndi akusambira aku Yesu, alongonga kuti alapa maubudi ngawu ngo angubudiya Dangu lo Chiuta wangupereka kuziya mwaku Mozesi. Kweni Yesu wati wafwa ndi kuyuskika, ŵanthu wo akhumbanga kulondo Yesu akhumbikanga kubatizika pa chifukwa chinyaki.

8. (a) Kumbi Yesu wangupereka dangu wuli wati wayuskika? (b) Ntchifukwa wuli Mkhristu wakhumbika kubatizika?

⁸ Mu 33 C.E., Yesu wanguwoneke ku gulu la ŵanthu akujumpha 500. Pa gulu ili penga anthurumi, anthukazi kweniso panyaki ndi ŵana. Ndipu patenere kuti mphanyengu yeniyi po wangukamba kuti: “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi mu zina la Ada, la Mwana, ndipuso la mzimu wakupaturika. Mukaŵasambizengi kuti asungengi vinthu vosi vo ndikukulamulani.” (Mate. 28:19, 20; 1 Akori. 15:6) Pa nyengu yo Yesu walamulanga akusambira ŵaki kuti akasambizi ŵanthu, patenere kuti penga akusambira anandi. Mwaviyo, Yesu wangulongo kuti weyosi yo wakhumba kuja wakusambira waki, pamwenga kuti kupinga goli laki, wakhumbika kubatizika dankha. (Mate. 11:29, 30) Weyosi yo wakhumba kuteŵete Chiuta wakhumbika kuziŵa kweniso kuzomereza kuti Yehova wagwiriskiya ntchitu Yesu pakufiska khumbu laki. Pavuli paki, wangabatizika mumaji. Ubatizu wenuwu pe ndiwu Yehova watiwuzomereza. Bayibolu le ndi ukaboni wakukwana wakuti mu nyengu ya akutumika, akusambira asonu aku Khristu aziŵanga kukhumbika kwa ubatizu. Yiwu asweranga cha kubatizika.—Machi. 2:41; 9:18; 16:14, 15, 32, 33.

9, 10. Kumbi ubatizu waku Paulo ndi nduna ya ku Ifiyopiya utitisambizanji?

⁹ Ŵerengani Machitidu 8:35, 36. Munthu munyaki wa ku Ifiyopiya yo wangung’anamukiya kuchiyuda, waweliyanga kwawu kutuwa ku Yerusalemu ko wachisopanga. Mungelu waku Yehova wangulongozga Filipu kuti wakakumani ndi munthu uyu ndipu “wangumupharazgiya uthenga wamampha wakukwaskana ndi Yesu.” Kumbi ntchinthu wuli cho munthu uyu wanguchita? Vo wanguchita vingulongo kuti wanguvwisa uneneska wo wangusambira. Iyu wangukhumbisiska kuchita vo Yehova wakhumba kuti ateŵeti ŵaki achitengi. Mwaviyo, wanguswera cha kubatizika.

¹⁰ Chakuyeruzgiyapu chinyaki ndi Saulo yo watombozganga Akhristu. Iyu wanguwiya mumtundu wachiyuda, wo ŵenga ŵanthu aku Chiuta. Kweni yiwu angutaya mwaŵi wakuja pa ubwezi ndi Yehova. Saulo wajiperekanga pakuchita midawuku ya Chiyuda kweni  wangusintha. Zuŵa linyaki Yesu Khristu yo wanguyuskika, wangumupharazgiya kutuliya kuchanya. Kumbi Saulo wanguchita wuli? Iyu wanguzomera kuwovyeka ndi Hananiya yo wenga wakusambira waku Yesu. Bayibolu lititi: “Pavuli paki [Saulo] wangusoka ndipu wangubatizika.” (Machi. 9:17, 18; Aga. 1:14) Saulo wangwamba kudanika kuti wakutumika Paulo. Wonani kuti wati waziŵa kuti Chiuta wagwiriskiya ntchitu Yesu pakufiska khumbu laki, Paulo wanguchitapu kanthu. Iyu wanguswera cha kubatizika.—Ŵerengani Machitidu 22:12-16.

11. (a) Kumbi ntchinthu wuli cho chichitiska wo tisambira nawu Bayibolu kuti abatiziki? (b) Kumbi tituvwa wuli asani tiwona ŵanthu abatizika?

¹¹ Ndimu so viliri ndi wo asambira Bayibolu mazuŵa nganu, kwali angaŵa anamana pamwenga arara. Asani avwana ndi kuvwisa uneneska wa mu Bayibolu, akhumbisiska kujipatuliya kwaku Yehova ndi kubatizika. Nkhani ya ubatizu, yikambika pa unganu wewosi wadera ndi wachigaŵa. Akaboni aku Yehova akondwa asani munthu yo asambira nayu Bayibolu wazomera uneneska ndipu waluta panthazi mpaka kubatizika. Apapi Achikhristu akondwa ukongwa asani awona ŵana ŵawu ŵe pagulu la abali ndi azichi wo aluta kuchibatizika. Mu chaka cha uteŵeti cha 2017, ŵanthu akujumpha 284,000 ‘amaŵanaŵanu ngamampha,’ angulongo kuti ajipatuliya kwaku Yehova mwakubatizika. (Machi. 13:48) Kukamba uneneska, abali ndi azichi asonu ŵenaŵa anguziŵa kuti ubatizu ngwakukhumbika kwa Mkhristu weyosi. Kumbi anguchitanji kuti abatiziki?

12. Kumbi munthu yo wasambira Bayibolu wakhumbika kuchitanji wechendabatiziki?

¹² Munthu yo wakhumba kubatizika, wakhumbika kuja ndi chivwanu mwaku Chiuta, kuziŵa khumbu laki, kweniso vo Chiuta wakuchita kuti wataski ŵanthu. (1 Timo. 2:3-6) Chifukwa cha chivwanu chenichi, iyu wakana mijalidu yo yileka kukondwesa Chiuta ndi kwamba kuchita vinthu mwakukoliyana ndi fundu za urunji zaku Yehova. (Machi. 3:19) Yehova wangazomereza cha kujipatuliya kwa munthu yo wachita vinthu viheni vo vingamutondekeska kuti wazisere mu Ufumu waki. (1 Akori. 6:9, 10) Kweni pe vinandi vo vikhumbika pade pakulondo fundu za mijalidu yamampha yaku Yehova. Wo akhumba kujipatuliya kwaku Yehova, awungana ndipuso agwiraku ntchitu yakutaska ŵanthu ndi kupanga akusambira. Yesu wangukamba kuti ntchitu yeniyi yazamugwirika ndi Akhristu auneneska. (Machi. 1:8) Yo wasambira Bayibolu wakhumbika dankha kuchita vinthu venivi. Pavuli paki, wangajipatuliya kwaku Yehova mu pempheru we kwakuyija ndipu wangalongo ku ŵanthu kuti wakujipatuliya mwakubatizika.

13. Asani tisambiza ŵanthu, ntchifukwa wuli tikhumbika kukumbuka kuti ubatizu ngwakukhumbika kuti aje Akhristu?

¹³ Po titovya ŵana ŵidu ndi wo tisambira nawu Bayibolu kuchita vinthu vakukhumbika venivi, titenere kukumbuka kuti wo akhumba kuja akusambira auneneska aku Yesu, akhumbika kubatizika. Asani tikumbuka fundu iyi, tiŵawovyengi umampha wo tisambira nawu. Tilekengi cha kukambiskana nawu pa nyengu yakwenere kukhumbika kwa kujipatuliya kwaku Yehova ndi kubatizika. Tikhumba kuti ŵana ŵidu ndi ŵanthu anyaki wo tisambira nawu Bayibolu, aluti panthazi ndi kubatizika!

14. Ntchifukwa wuli tikhumbika cha kuchichizga munthu kuti wabatiziki?

¹⁴ Munthu weyosi wakhumbika cha kuchichizga mwana waki pamwenga yo wasambira nayu Bayibolu kuti wabatiziki. Yehova watitichichizga cha kuti timuteŵetiyengi. (1 Yoha. 4:8) Mumalu mwaki, asani titiŵasambiza tikhumbika kuŵakonkhoske kukhumbika kwa kuja pa ubwezi ndi Chiuta. Yo tisambira nayu Bayibolu  wakhumbika kubatizika asani wavwisa uneneska wo wasambira kweniso asani wakhumba kuchita vosi vo Mkhristu wauneneska wakhumbika kuchita.—2 Akori. 5:14, 15.

15, 16. (a) Kumbi pe vyaka vo munthu wakhumbika kubatizikiya? Konkhoskani. (b) Ntchifukwa wuli yo tisambira nayu Bayibolu wakhumbika kubatizika chinanga kuti wangubatizikapu kali muchisopa chinyaki?

¹⁵ Bayibolu likamba cha vyaka vo munthu watenere kubatizikiya. Wakusambira Bayibolu weyosi wapambana ndi munyaki. Munyaki waluta panthazi mwaliŵi, munyaki cha. Anandi abatizika ŵeche anamana ndipu alutirizga kuja akugomezgeka kwaku Yehova. Kweni anyaki atamba kusambira Bayibolu ndi kubatizika mbara kali. Anyaki aja kuti ŵe ndi vyaka vakujumpha 100.

¹⁶ Munthu munyaki yo wangwamba kusambira Bayibolu ndi mura kali, wangufumba mzichi yo wamusambizanga asani wakhumbikanga kubatizika so. Iyu wangufumba viyo chifukwa ndipu wabatizikapu kali muvisopa vinyaki. Munthu uyu pamoza ndi yo wasambiranga nayu Bayibolu, anguŵerenga malemba nganyaki ngo ngangumuka fumbu laki. Iyu wanguziŵa kuti Bayibolu likamba kuti wakhumbikanga kubatizika so ndipu wangubatizika pati pajumpha nyengu yimanavi. Chinanga kuti wenga ndi vyaka vakujumpha 70, wanguwona kuti ubatizu ngwakukhumbika. Kuti ubatizu wa munthu uje wakuzomerezeka, wakhumbika kuliziŵa umampha khumbu laku Yehova. Mwaviyo, wo asambira sonu uneneska, akhumbika kubatizika chinanga kuti angubatizika kali muchisopa chinyaki.—Ŵerengani Machitidu 19:3-5.

17. Kumbi ndi vinthu wuli vo munthu wakhumbika kuŵanaŵaniyapu pa zuŵa lo wabatizikiya?

¹⁷ Pa zuŵa lo munthu wabatizikiya wakondwa ukongwa. Kweni watenere so kuŵanaŵaniyapu vo munthu wakhumbika kuchita asani wajipatuliya ndi kubatizika. Wakhumbika kuŵikiyapu mtima kuti walutirizgi kusunga vo wangulayizga pa nyengu yo wajipatuliyanga kwaku Yehova. Ndichu chifukwa chaki Yesu wanguyeruzgiya kuja Mkhristu ndi goli. Akusambira aku Yesu ‘atenere cha kuja ndi umoyu wakujikondwesa ŵeneku, kweni wakukondwesa yo wakuŵafwiya ndi kuyuskika.’—2 Akori. 5:15; Mate. 16:24.

18. Kumbi tazamukambiskana mafumbu nanga mu nkhani ya sabata yamawa?

¹⁸ Anyina aku Mariya aŵanaŵaniyanga venivi panyengu yo ajifumbanga mafumbu ngo ngalembeka kukwambiriya kwa nkhani iyi. Asani ndimwi mpapi mungajifumba kuti: ‘Kumbi mwana wangu ngwakunozgeka kubatizika? Kumbi waziŵa vinandi vakukwaskana ndi Yehova kuti wajipatuliyi kwaku iyu? Kumbi mwana wangu wakhumbika kusambira ukongwa kweniso kusaniya ntchitu wechendabatiziki? Nanga asani wazibuda pavuli pakuti wabatizika?’ Mu nkhani ya sabata yamawa tazamukambiskana mafumbu ngenanga, ndipu tazamuziŵa vo apapi Achikhristu angachita kuti awonengi ubatizu mwakwenere.