Kukamba uneneska, palivi munthu mazuŵa nganu yo wangaziŵa mo Paulo wawonekiyanga. Vithuzi vaku Paulo vo tijambula mu mabuku ngidu vakuyeruzgiya ŵaka.

Kweni pe vinthu vinyaki vo vingatiwovya kuziŵa mo Paulo wawonekiyanga. Mwakuyeruzgiyapu, magazini ya Zion’s Watch Tower ya March 1, 1902 yingukamba kuti, “Pakukamba za mo Paulo wawonekiyanga, buku la Acts of Paul and Thecla, lo lingulembeka mu 150 A.D., likonkhoska umampha mo Paulo wawonekiyanga kuphara mabuku nganyaki ngosi. . . . Buku ili likamba kuti Paulo wenga ‘mufupi, waphara, wamatewu, wanthazi, nkhopi zaki zakumananga ndipuso wenga ndi mphunu yitali.’”

Buku la Oxford Dictionary of the Christian Church (la 1997) lingukamba kuti: “Vingachitika kuti vinthu vinyaki va mbiri yakali vo ve mu buku la ‘Acts’ vauneneska.” Buku la Acts of Paul and Thecla aliwonanga kuti ndakukhumbika ukongwa munyengu ya Akhristu akwambiriya. Ve viyo chifukwa mipukutu 80 ya buku ili yeche kusanirika mu Chigiriki ndi vineneru vinyaki. Mwaviyo, vithuzi vaku Paulo vo tijambula mu mabuku ngidu, vikoliyana ndi vo vikulembeka mu mabuku ngakali.

Kweni mutenere kukumbuka kuti pe vinthu vinyaki vakukhumbika ukongwa kuluska mo Paulo wawonekiyanga. Chinanga mphanyengu yo Paulo wachitanga uteŵeti waki, ŵanthu anyaki akambanga kuti: “Asani we pakati pidu wawoneka wambula nthazi ndipu vo walongoro vilivi fundu.” (2 Akori. 10:10) Kweni tingaluwanga cha kuti Paulo wanguja Mkhristu, Yesu wati wamuwoneke mwakuziziswa. Tikhumbika so kuŵanaŵaniya vo Paulo wanguchita nge ‘chiyaŵi chakusankhika chaku Khristu kuti chipingi zina laku Yesu ku ŵanthu amitundu yinyaki.’ (Machi. 9:3-5, 15; 22:6-8) Kweniso titenere kuŵanaŵaniya vo tingapinduwa mu mabuku ngo Yehova wangukambiya Paulo kuti walembi.

Paulo wangujikuzga cha chifukwa cha vinthu vo wanguchita wechendaje Mkhristu ndipuso wangukonkhoskapu cha mo wawonekiyanga. (Machi. 26:4, 5; Afi. 3:4-6) Iyu wangukamba kuti: “Ini nde mumana ukongwa pa akutumika wosi, ndipu nde wakwenere cha kudanika kuti wakutumika.” (1 Akori. 15:9) Pavuli paki wangulemba kuti: “Wezi ukulu wenuwu unguperekeka kwaku ini ndamunthu mumana kuluska mumana ukongwa pa akupaturika wosi, kuti ndipharazgi uthenga wamampha ku ŵanthu amitundu yinyaki wakukwaskana ndi chuma chambula kuŵerengeka chaku Khristu.” (Aefe. 3:8) Uthenga uwu ndiwu wakuzirwa ukongwa kuluska mo Paulo wawonekiyanga.