Haykanush wa ku Armenia ndi mupharazgi wambula kubatizika. Iyu wangutondo pasipoti pafupi ndi nyumba yaki. Mukati mwa pasipoti mwenga kadi la ku banki ndi ndalama zinandi. Iyu wangukambiya murumu waki yo wenga so mupharazgi wambula kubatizika.

Chinanga kuti banja ili lengavi ndalama kweniso lenga ndi ngongoli, kweni linguŵanaŵana kuti liwezi ndalama ku mweneku. Munthu yo wangutaya ndalama izi ndi banja laki anguzizwa ukongwa. Haykanush ndi murumu waki angukonkhosa kuti angugomezeka chifukwa cha vo asambiranga m’Bayibolu. Yiwu anguwona kuti akhumbikanga kugomezeka, ndipu angugwirisiya ntchitu mpata wenuwu kuŵakambiya va Akaboni aku Yehova ndi kuŵapasa magazini.

Banja ili lakhumbanga kumupasa ndalama Haykanush chifukwa cha vo wanguchita, kweni iyu wangukana. Mawa laki, muwolu wa munthu yo wangutaya ndalama wanguluta kunyumba yaku Haykanush. Chifukwa chakuwonga, wanguchichiza Haykanush kuti walonde mpheti ya dayamondi.

Nge mo banja ili linguchitiya, ŵanthu anandi angazizwa ndi vo Haykanush ndi murumu waki anguchita. Kweni kumbi Yehova wanguzizwa? Kumbi wanguwona wuli vo yiwu anguchita? Kumbi anguyanduwa chifukwa cha kugomezeka kwawu?

Mafumbu yanga ngakusuza cha kumuka. Tikamba viyo chifukwa ateŵeti aku Chiuta agomeza kuti kuja ndi mijalidu yaki nkhwakuzirwa ukongwa kwaku iyu kuphara dayamondi, golidi pamwenga vinthu vinyaki vakuliŵavu. Yehova wawona vinthu mwakupambana ndi mo ŵanthu awone. Vo iyu wawona kuti vakuzirwa, ŵanthu angaviwona viyo cha. (Yes. 55:8, 9) Kweni ateŵeti aku Yehova awona kuti kuja ndi mijalidu yaki ntchinthu chakuzirwa ukongwa.

Tikamba viyo chifukwa cha vo Bayibolu likamba pa nkhani ya kuwamu ndi zeru. Lemba la Nthanthi 3:13-15 likamba kuti: “Wakukondwa ndi munthu yo wasaniya zeru ndipuso yo wawamu, chifukwa kusaniya vinthu ivi nkhwamampha kuphara kusaniya siliva, ndipu kuja navu nge phindu kuphara kuja ndi golidi. Vakuzirwa ukongwa kuphara mya ya korali, pa vinthu vosi vo ungakhumbira, palivi cho chingayanana navu.” Lemba ili lilongore limu kuti Yehova wawona kuti mijalidu iyi njakuzirwa kuphara vinthu vosi vakuliŵavu.

Nanga kugomezeka?

Yehova ngwakugomezeka. Iyu “wangakamba boza cha.” (Tito 1:2) Wangukambiya wakutumika Paulo kuti walembe Akhristu achihebere kuti: “Lutirizgani kutirombe, pakuti tigomezga kuti te ndi njuŵi yauneneska, pakuti tikhumba kuchita vinthu vosi mwakugomezeka.”—Ŵah. 13:18.

Yesu Khristu ntchakuwoniyapu chamampha pa nkhani yakugomezeka. Mwakuyeruziyapu, pa nyengu yinyaki Kayafa Wasembi Mula wangudaniriza kuti: “Lapizga pa masu paku Chiuta wamoyu asani ndiwi nadi Khristu, Mwana waku Chiuta!” Yesu wanguzomera kuti ndi Mesiya chinanga kuti wanguziŵa kuti Mphara Yikulu ya Milandu yimumbengi mlandu wakuti wanyoza Chiuta ndipuso kuti amubayengi.​—Mat. 26:63-67.

Nanga isi? Kumbi tijengi akugomezeka asani tiwona kuti tingasaniya vinthu vakuliŵavu pa tingakamba boza?

Kuja wakugomezeka nkhwakusuza mazuŵa nganu ngakumaliya, chifukwa ŵanthu anandi ‘mbakujiyanja kweniso atanja ndalama.’ (2 Tim. 3:2) Kugomezeka nkhwakusuza asani  munthu walivi ndalama pamwenga wawona kuti ntchitu yimalengi. Ŵanthu anandi awona kuti palivi suzu kuba, kubiya mayesu pamwenga kuleka kugomezeka pa vinthu vinyaki. Ivi vakuwanda ukongwa mwakuti anandi awona kuti nthowa yija yo munthu wangasaniriya chuma nkhuleka kugomezeka. Akhristu anyaki nawu atondeka kugomezeka ndipu chifukwa chakukhumba kusaniya ‘chuma mwachinyengu’ ŵe ndi mbiri yamampha cha mumpingu.​—1 Tim. 3:8; Tito 1:7.

Kweni Akhristu anandi ateza Yesu. Aziŵa kuti mijalidu yaku Chiuta njakuzirwa ukongwa kuphara chuma pamwenga chinthu chinyaki chechosi. Ndichu chifukwa chaki Akhristu achinyamata abiya cha mayesu kuti akweri umampha. (Nthanthi 20:23) Mbunenesa kuti ndi nyengu zosi cha po tingasaniya phindu chifukwa chakugomezeka nge mo venge ndi Haykanush. Kweni kuja wakugomezeka nkhwamampha pa masu paku Chiuta ndipu kutitiwovya kuti tije ndi njuŵi yakutowa, yo njakuzirwa ukongwa.

Gagik ntchakuwoniyapu chamampha pa nkhani iyi. Iyu wangukamba kuti: “Ndechendaje Mkhristu, ndagwiranga ntchitu pa kampani yikulu. Mweneku wa kampani iyi waperekanga cha msonkhu. Iyu wakambanga boza kuti kampani yaki yisaniya pulofiti yimanavi. Nge bwana wa kampani iyi, ndakhumbikanga kukoliyana ndi wakusonkhesa msonkhu. Ndamupasanga vinyeda kuti waleki kusumuwa vo kampani iyi yachitanga. Ivi vinguchitisa kuti ŵanthu andiziŵengi kuti nde munthu wambula kugomezeka. Ndati ndasambira unenesa, ndinguleka ntchitu chinanga kuti kampani yandilipiranga ndalama zinandi. M’malu mwaki, ndingwamba bizinesi. Ndati ndayamba bizinesi iyi, ndingulembesa ku boma ndipuso ndaperekanga misonkhu yosi.”​—2 Ŵakor. 8:21.

Gagik wangukamba kuti: “Ndingwamba kusaniya ndalama zimanavi. Mwaviyo, ndasuzikanga kuphwere banja langu. Kweni sonu ndikondwa ukongwa. Nde ndi njuŵi yamampha pa masu paku Yehova. Nde chakuwoniyapu chamampha ku ŵana ŵangu ŵaŵi. Sonu nde ndi mwaŵi wakuchita mauteŵeti ngakupambanapambana mumpingu. Ŵanthu wo asonkhesa msonkhu ndi anyaki wo ndichita nawu bizinesi atindiziŵa kuti nde munthu wakugomezeka.”

Yehova watanja ŵanthu wo atowesa chisambizu chaki mwakuja ndi mijalidu yaki yamampha, kusazapu kugomezeka. (Tito 2:10) Wangukambiya Fumu Davidi kulemba kuti: “Ndenga mwana, ndipu sonu ndakota, kweni ndechendawonepu kuti munthu murunji wasiyika pamwenga ŵana ŵaki apempha chakurya.”​—Sumu 37:25.

Ruti ntchakuwoniyapu chamampha pa nkhani iyi. Iyu wangulutiriza kuja ndi apongozi ŵaki a Naomi, m’malu mwakuŵaleka ŵija ŵati akota. Ruti wangusamiya ku Yisraele kuti wakasopengi Chiuta waunenesa. (Ruti 1:16, 17) Po wenga ku Yisraele, wenga wakugomezeka ndipu walimbikiyanga ntchitu. Watondonga mbewu zo zingujaliya mumunda mwakukoliyana ndi Dangu laku Mosese. Nge mo Davidi wangukambiya, Yehova wangumuleka cha Ruti ndi Naomi pa nyengu yo akhumbikanga chovyu. (Ruti 2:2-18) Yehova wangumupasa vinthu vakuliŵavu pe cha Ruti. Kweni wangumusankha so kuti waje mpapi waku Davidi ndi Mesiya.​—Ruti 4:13-17; Mat. 1:5, 16.

Ateŵeti anyaki aku Yehova asuzika kusaniya vinthu vakukhumbika pa umoyu. M’malu mwakuchita chinyengu kuti asaniyi vinthu ivi mwambula kusuzikiya, yiwu akhumbika kulimbikiya  kugwira ntchitu. Asani achita viyo, ndikwesa awona kuti kugomezeka ndi mijalidu yinyaki yaku Chiuta njakuzirwa ukongwa kuphara vinthu vakuliŵavu.​—Nthanthi 12:24; Ŵaef. 4:28.

Nge mo Ruti wanguchitiya, Akhristu pacharu chapasi agomeza Yehova kuti ndiyu waŵawovyengi. Iyu wakulayizga kuti: “Ndikulekeningi cha pamwenga kukusiyani.” (Ŵah. 13:5) Kwamba kali, Yehova walongo kuti watovya ŵanthu akusuzika wo agomezeka nyengu zosi. Iyu wafiska layizgu laki lakuti watipasengi vakukhumbika pa umoyu.—Mat. 6:33.

Mbunenesa kuti ŵanthu awona kuti mwa wa dayamondi ndi mya yinyaki njakuzirwa ukongwa. Kweni titenere kuziŵa kuti Awuskefwi akuchanya awona kuti kugomezeka ndi mijalidu yawu yinyaki njakuzirwa ukongwa kuphara chinthu chinyaki chechosi.