Mazu nga Chiheberi ngo nge kukwamba kwa vesi 12, ngangafwatulika mu nthowa zinandi. Chinanga kuti ve viyo, fundu zo ze mumphata zingatiwovya kuziŵa uneneska:

1. Kuŵanaŵaniya vo chaputala chosi cha Sumu 144 chikamba. Mazu ngakuti “penipo,” ngo nge kukwamba kwa vesi 12, ngang’anamuwa kuti mavesi 12 mpaka 14 ngakamba za vitumbiku va ŵanthu arunji wo apempha Chiuta kuti ‘waŵataski ndi kuŵawombo’ ku ŵanthu aheni (vesi 11). Fundu yeniyi ndiyu yikambika so mu vesi 15. Mu vesi ili, mazu ngakuti ‘mbakukondwa’ ngasanirika paŵi. Posi paŵi, mazu yanga ngakamba za ŵanthu amoza, “wo Chiuta wawu ndi Yehova.”

2. Ivi vikoliyana ndi vo mavesi nganyaki mu Bayibolu ngakamba, ngo ngalayizga kuti Chiuta wazamutumbika ŵanthu ŵaki akugomezgeka. Sumu 144 yikonkhoska vo Davidi walindizganga. Iyu wagomezganga kuti asani Chiuta wazitaska Ayisirayeli kwa arwani ŵawu, azamukondwa ndipu vinthu vazakuŵayende umampha. (Ŵale. 26:9, 10; Mara. 7:13; Sumu 128:1-6) Mwakuyeruzgiyapu, pa Marangu 28:4 pakamba kuti: “Amutumbikika ŵana ŵinu, vipasu va charu chinu, ŵana a viŵetu vinu, ŵana a ng’ombi ndi mbereri zinu.” Ivi vinguchitika nadi. Pa nyengu yo Solomoni mwana waku Davidi walamuliyanga, mucharu cha Isirayeli mwenga chimangu ndipu vinthu vayendanga umampha. Chakukondwesa ukongwa ntchakuti vo vachitikanga mu ulamuliru waku Solomoni, vilongo ŵaka vo vazamuchitika mu ulamuliru waku Mesiya.—1 Ŵakaro. 4:20, 21; Sumu 72:1-20.Vo takonkhoska mu nkhani iyi vakukwaskana ndi Sumu 144, vikoliyana ndi vo ateŵeti aku Yehova aja achilindizga kwa nyengu yitali. Yiwu alindizga kuti asani Chiuta wazituzgapu ŵanthu aheni, arunji azamukondwa ndi chimangu chikulu ndipu vinthu vazakuŵayende umampha kwamuyaya.—Sumu 37:10, 11.