1. Kumbi Yehova wangukamba uchimi nuwu wo unguzichiska ŵanthu, Adamu ndi Eva ŵati abuda?

YEHOVA waja wachichiska ŵanthu kutuliya po Adamu ndi Eva angubudiya. Yiwu ŵati abuda ŵaka, Yehova wangukamba uchimi wo unguzichiska ŵana ŵawu. Uchimi uwu, wo usanirika pa Chiyambo 3:15, ulongo kuti kunthazi kwe vinthu vamampha. Asani tavwisa vo uchimi uwu ung’anamuwa, tiziŵa kuti Chiuta wazamutuzgapu Satana Dyaboli yo ndi “njoka yakali ukongwa,” pamoza ndi ntchitu zaki.—Chivu. 12:9; 1 Yoha. 3:8.

2. Kumbi Yehova wangumuchiska wuli Nowa?

² Nowa wenga mteŵeti waku Yehova. Kweni ŵanthu wo wajanga nawu awopanga Chiuta cha. Iyu pe ndi banja laki ndiwu asopanga Yehova. Mu nyengu yaku Nowa, chiwawa ndi ureŵi venga peposi. Ivi vatingi vimugongoweskengi. (Chiya. 6:4, 5, 11; Yuda 6) Kweni Yehova wangumukambiya vinthu vo  vingumupaska nthazi kuti walutirizgi ‘kwenda ndi Chiuta.’ (Chiya. 6:9) Iyu wangukambiya Nowa kuti wanangengi charu. Wangumukambiya so vo wangachita kuti banja laki lizitaskiki. (Chiya. 6:13-18) Yehova wangumuchiska ukongwa Nowa.

3. Kumbi Yehova wangumuchiska wuli Yoswa? (Wonani chithuzi cho che papeji 15.)

³ Yoswa wenga ndi ntchitu yakusuzga yakuserezga Ayisirayeli mucharu cho Chiuta wanguŵalayizga. Iyu wakhumbikanga kuthereska arwani anthazi wo ajanga mucharu cho. Yoswa wenga ndi chifukwa chakuvwika chakuchitiya mantha. Mwaviyo, Yehova wangukambiya Mozesi kuti wachiski Yoswa. Iyu wanguti: “Uŵiki Yoswa kuja mulongozgi ndipu umuchiski ndi kumukhwimiska mtima, chifukwa ndiyu wayambukengi panthazi pa ŵanthu yaŵa ndipu ndiyu wakuŵaserezga kuti ahari charu cho uwonengi.” (Mara. 3:28) Yoswa wechendayambi ntchitu iyi, Yehova wangumuchiska kuti: “Asi ini ndini ndakulamula venivi? Uje ndi chiganga kweniso uje ndi nthazi. Ungachitanga mantha cha pamwenga kopa, chifukwa Yehova Chiuta waku we nawi kwekosi ko ungaluta.” (Yoswa 1:1, 9) Mazu yanga ngatenere kuti ngangumuchiska ukongwa Yoswa.

4, 5. (a) Kumbi Yehova wanguŵachiska wuli ateŵeti ŵaki a mu nyengu yakali? (b) Kumbi Yehova wangumuchiska wuli Mwana waki?

⁴ Yehova wachiskanga so ŵanthu ŵaki nge gulu. Mwakuyeruzgiyapu, iyu wanguziŵa kuti Ayuda azamukhumbika kuchiskika pa nyengu yo ŵenga ku ukapolu ku Babiloni. Mwaviyo, wanguŵakambiya uchimi wakuchiska, wakuti: “Ungachitanga mantha cha, chifukwa nde nawi. Ungafipanga mtima cha pakuti ndini Chiuta waku. Ndikukhwimisengi, hinya, ndikuwovyengi, ndikukolesengi nadi ndi janja langu lamaryi laurunji.” (Yesa. 41:10) Yehova wachiskanga so Akhristu a mu nyengu ya akutumika. Ndimu so wachitiya ndi isi mazuŵa nganu.—Ŵerengani 2 Akorinto 1:3, 4.

⁵ Yehova wanguchiska so Mwana waki Yesu. Pa nyengu yo wabatizikanga, iyu wanguvwa mazu kutuliya kuchanya ngakuti: “Uyu ndi Mwana wangu, mweniyo nditanja, yo watindikondwesa.” (Mate. 3:17) Mazu yanga ngatenere kuti ngangumuchiska ukongwa Yesu pa nyengu yo wachitanga uteŵeti waki panu pasi!

6. Ntchifukwa wuli ntharika ya matalenti njakuchiska?

⁶ Yesu nayu wachiskanga ŵanthu nge Awisi. Ntharika ya matalenti yo wangukamba, yititichiska kuti tijengi akugomezgeka. Mbuyawu wa muntharika iyi, wangukambiya kapolu weyosi kuti: “Wachita umampha ukongwa, ndiwi kapolu wamampha kweniso wakugomezgeka! Ungugomezgeka pa vinthu vimanavi, sonu ndikuŵikengi kuti uwoneriyengi vinthu vinandi. Kondwere limoza ndi mbuyaku.” (Mate. 25:21, 23) Mazu yanga, nganguchiska akusambira ŵaki kuti ateŵetiyengi Yehova mwakugomezgeka.

7. Kumbi Yesu wanguŵachiska wuli akutumika kweniso Peturo pakuyija?

⁷ Kanandi akusambira aku Yesu asuskananga kuti mura ukongwa ndiyani pakati pawu. Mumalu mwakuŵakwiyiya, Yesu wachitanga nawu vinthu mwakuzikira nyengu zosi. Iyu wanguŵachiska kuti ajiyuyuwengi kweniso kuti ajengi ateŵeti mumalu mwakuja mabwana. (Luka 22:24-26) Peturo waguŵiskanga  Yesu kananandi ŵaka. (Mate. 16:21-23; 26:31-35, 75) Kweni Yesu wangumukana cha Peturo. Mumalu mwaki, wangumuchiska kweniso wangumutuma kuti wakachiski Akhristu anyaki.—Yoha. 21:16.

8. Kumbi Hezekiya wanguŵachiska wuli arara a nkhondu ndi Ayuda wosi?

⁸ Yesu wenga chakuwoniyapu chamampha pa nkhani ya kuchiska ŵanthu. Kweni chinanga mphanyengu yo Yesu wenga wechendazi pacharu chapasi, ateŵeti aku Yehova aziŵanga kuti akhumbika kuchiska anyawu. Wati wawofyezeka ndi Asiriya, Hezekiya wanguwunganiska arara a nkhondu ndi Ayuda wosi kuti waŵachiski. Ndipu ŵanthu ‘anguchiskika ndi mazu ngaki.’—Ŵerengani 2 Mikoka 32:6-8.

9. Kumbi buku la Jobu lititisambizanji pa nkhani ya kuchiska anyidu?

⁹ Chinanga kuti Yobu wakhumbikanga kuchiskika, kweni wangusambiza anyaki atatu wo anguza kuzimupembuzga mo angachiskiya anyawu. Wanguŵakambiya kuti asani wenga iyu, ‘watingi waŵachiskengi ndi mazu nga mulomu waki, ndipu kupembuzga kwa mulomu waki kwatingi kugowozgengi chitima chawu.’ (Jobu 16:1-5) Pakumaliya, Elihu ndi Yehova angumuchiska Yobu.—Jobu 33:24, 25; 36:1, 11; 42:7, 10.

10, 11. (a) Ntchifukwa wuli mwana waku Jefta wakhumbikanga kuchiskika? (b) Kumbi mbayani mazuŵa nganu wo akhumbika kuchiskika?

¹⁰ Munthu munyaki wa mu nyengu yakali yo wakhumbikanga kuchiskika, wenga mwana waku Jefta. Wechendaluti kuchichita nkhondu ndi a Amoni, Jefta wangulayizga Yehova kuti asani wachiwina, munthu wakwamba yo wazamutuwa munyumba kuzikumana nayu, wazakumupereka kwaku Yehova kuti wakateŵetiyengi pa chihema. Ayisrayeli anguwina nkhondu ndipu munthu wakwamba yo wangutuwa kuzikumana nayu, wenga mwana waki yumoza pe munthukazi. Ivi vingumupweteka ukongwa Jefta. Kweni iyu wanguchita vo wangulayizga ndipu wangutuma mwana waki ku Shilo kuti wakateŵetiyengi pa chihema kwa umoyu waki wosi.—Ŵeru. 11:30-35.

¹¹ Ivi venga vakusuzga kwaku Jefta. Kweni venga vakusuzga ukongwa ku mwana waki yo wanguzomera kuchita vo awisi angulayizga. (Ŵeru. 11:36, 37) Ivi vang’anamuwanga kuti waŵirwengi cha pamwenga kubala ŵana kuti zina la awisi lilutiriyi. Mwaviyo, wakhumbikanga kuchiskika ukongwa. Bayibolu likamba kuti: “Kenga kalusu mu Israyeli kakuti: Chaka ndi chaka amwali mu Israyeli alutanga kuchimulumba mwana waku Jefta Mugiliyadi, mazuŵa nganayi pa chaka.” (Ŵeru. 11:39, 40) Akhristu wo aleka kuto pamwenga kuŵirwa kuti achiti vinandi pakuteŵete Yehova, nawu akhumbika kuwongeka kweniso kuchiskika.—1 Akori. 7:32-35.

12, 13. Kumbi Peturo wanguŵachiska wuli Akhristu anyaki?

¹² Yesu we pafupi kufwa, wangukambiya Peturo kuti: “Simoni, Simoni, awona! Satana wakhumba kuti wakupepeteni nge tirigu. Kweni ndakupemphere mwakuŵeyere kuti chivwanu chaku chileki kumala ndipu asani yiwi waziwerere, uzichiski abali ŵaku.”—Luka 22:31, 32.

 ¹³ Peturo walongozganga mpingu wachikhristu mu nyengu ya akutumika. (Aga. 2:9) Vo wanguchita pa Pentekositi kweniso pavuli paki, vinguchiska abali. Wati wateŵete kwa vyaka vinandi, wangulembe Akhristu anyaki kuti: “Ndakulembiyani mazu ngamanavi kuti ndikuchiskeni ndi kukupaskani ukaboni wanthazi kuti uwu ndi wezi ukulu nadi waku Chiuta. Jani akukho mwaku yiwu.” (1 Petu. 5:12) Makalata ngo Peturo wakulemba nganguchiska Akhristu a mu nyengu yaki. Vo iyu wangukamba pa lemba ili, nasi vititichiska po tilindizga vo Yehova wakutilayizga.—2 Petu. 3:13.

14, 15. Kumbi makalata ngo wakutumika Yohane wangulemba, ngatiŵachiska wuli Akhristu?

¹⁴ Wakutumika Yohane nayu walongozganga mpingu wachikhristu mu nyengu ya akutumika. Iyu wangulemba uthenga wakukondwesa mubuku la Yohane wakukwaskana ndi uteŵeti waku Yesu. Uthenga wa mu buku ili, wachiska Akhristu kwa vyaka vinandi ndipu weche kutichiska mpaka sonu. Mwakuyeruzgiyapu, buku lenili pe ndilu likamba kuti Yesu wanguti chanju ndichu chitovya ŵanthu kuziŵa Akhristu auneneska.—Ŵerengani Yohane 13:34, 35.

¹⁵ Mu makalata ngatatu ngo Yohane wangulemba, mwe so fundu zinyaki zakukhumbika ukongwa. Asani tikondwa cha chifukwa cha ubudi wo tikuchita, tichiskika kuziŵa kuti ‘ndopa zaku Yesu zitititowesa ku maubudi ngosi.’ (1 Yoha. 1:7) Ndipu asani mtima widu utitisuska, tiwonga asani tiŵerenga kuti “Chiuta ndi mukulu kuluska mitima yidu.” (1 Yoha. 3:20) Yohane pe ndiyu wakulemba kuti “Chiuta ntchanju.” (1 Yoha. 4:8, 16) Mu kalata yaki yachiŵi ndi yachitatu, Yohane wanguwonga Akhristu wo ‘alutirizganga kwenda mu uneneska.’—2 Yoha. 4; 3 Yoha. 3, 4.

16, 17. Kumbi wakutumika Paulo wanguŵachiska wuli Akhristu akwambiriya?

 ¹⁶ Wakutumika Paulo ndiyu watenere kuti wachiskanga ukongwa abali mu nyengu ya akutumika. Yesu wati wafwa, viwoneka kuti akutumika anandi angujaliya ku Yerusalemu, ko kwenga wupu wakulongozga. (Machi. 8:14; 15:2) Akhristu ku Yudeya apharazgiyanga ŵanthu wo agomezganga kali kuti kwe Chiuta yumoza. Yiwu aŵapharazgiyanga vaku Khristu. Kweni Paulo wangutumika ndi mzimu wakupaturika kuti wakapharazgiyi ŵanthu amitundu yinyaki, nge Agiriki ndi Aroma. Ŵanthu yaŵa, asopanga achiuta anandi.—Aga. 2:7-9; 1 Timo. 2:7.

¹⁷ Paulo wanguluta kuchipharazga ku Greece, Italy ndi ku charu cho sonu chidanika kuti Turkey. Iyu wangupharazgiya ŵanthu wo ŵenga Ayuda cha ndipu wangwambiska mipingu muvyaru ivi. Akhristu asonu ŵenaŵa ‘angutombozgeka mu manja mwa ŵanthu amtundu wawu’ ndipu akhumbikanga kuchiskika. (1 Ate. 2:14) Cha m’ma 50 C.E., Paulo wangulembe mpingu wo ungupangika ŵaka sonu ku Tesalonika kuti: “Nyengu zosi tiwonga Chiuta asani titikuzumbuwani mosi mu mapempheru ngidu, pakuti tiluwa cha ntchitu zinu zakugomezgeka, ntchitu zinu za chanju ndipuso kukunthiyapu kwinu.” (1 Ate. 1:2, 3) Iyu wanguŵakambiya so kuti: “Lutirizgani kuchiskana ndi kuzengana.”—1 Ate. 5:11.

18. Kumbi wupu wakulongozga wa mu nyengu yakali ungumuchiska wuli Filipu?

¹⁸ Wupu wakulongozga wa mu nyengu yakali wachiskanga wo alongozganga kweniso Akhristu wosi. Filipu wati wapharazgiya Asamariya vaku Khristu, abali a mu wupu wakulongozga angumuwovya. Yiwu angutuma Peturo ndi Yohane kuti akapemphere Akhristu asonu ŵenaŵa kuti alonde mzimu wakupaturika. (Machi. 8:5, 14-17) Filipu ndi Asamariya wo anguja Akhristu atenere kuti anguchiskika ukongwa wupu wakulongozga wati watuma Peturo ndi Yohane.

19. Kumbi mipingu yinguchita wuli ndi kalata yo wupu wakulongozga ungulemba?

¹⁹ Pavuli paki, wupu wakulongozga ungukumana kuti uwoni asani Akhristu wo ŵenga Ayuda cha akhumbikanga kudumulika, nge mo Ayuda achitiyanga mwakukoliyana ndi marangu ngaku Mozesi. (Machi. 15:1, 2) Mwakulongozgeka ndi mzimu wakupaturika ndi Malemba, abali anguwona kuti kudumulika kwenga kwakwenere cha ndipu angulemba makalata kuti aziŵiski mipingu. Yiwu angutuma abali kuti akapereki makalata yanga ku mipingu. Kumbi ntchinthu wuli cho chinguchitika? “Ŵati ayiŵerenga, angukondwa ukongwa chifukwa cha kuvwa mazu ngakuchiska.”—Machi. 15:27-32.

20. (a) Kumbi Wupu Wakulongozga mazuŵa nganu utiŵachiska wuli abali ndi azichi? (b) Kumbi ndi fumbu nili lo lazamumukika mu nkhani ya sabata ya mawa?

²⁰ Mazuŵa nganu, Wupu Wakulongozga wa Akaboni aku Yehova uchiska wo ateŵete pa Beteli, wo achita mauteŵeti nganyaki ngapade kweniso abali ndi azichi wosi. Nasi tikondwa ukongwa nge mo angukondwe Akhristu a mu nyengu ya akutumika. Kweniso, kuti achiski wo akuleka uneneska, mu 2015 Wupu Wakulongozga ungutuzga kabuku ka mutu wakuti Weriyani Kwaku Yehova. Kweni kumbi wo ŵe ndi udindu pe ndiwu atenere kuchiska anyawu? Fumbu ili lazamumukika mu nkhani ya sabata ya mawa.