CHAKA chamala abali anandi anguŵikika kuja ŵara kweniso ateŵeti akovya pacharu chosi. Asani mwe yumoza mwa abali yaŵa, mutenere kuti mukondwa ukongwa ndi uteŵeti winu.

Kweni mutenere so kuti muchita mantha. Jason yo ndi mura wachinyamata wangukamba kuti, “Ndaŵanaŵananga kuti ndenga ndi vakuchita vinandi ukongwa ndipu ndingafiska cha.” Mozesi ndi Yeremiya nawu awonanga kuti angafiska cha Yehova wati waŵapaska uteŵeti. (Chitu. 4:10; Yere. 1:6) Asani namwi mwe ndi maŵanaŵanu ngenanga, kumbi mungachita wuli kuti muleki kuchita viyo ndi kuluta panthazi? Tiyeni tiwoni vo Timote wanguchita.—Machi. 16:1-3.

Pa nyengu yo Paulo wangumudana kuti ayendiyengi limoza, Timote watenere kuti wenga ndi vyaka pafupifupi 20 pamwenga ndipu wajumpha ŵaka vyaka ivi. Pakwamba, Timote watenere kuti wajideleranga chifukwa chakuti wenga munamana ndipu panyaki wagongowanga kwamba uteŵeti wo wangupaskika. (1 Timo. 4:11, 12; 2 Timo. 1:1, 2, 7) Kweni pati pajumpha vyaka 10, Paulo wangukambiya mpingu wa ku Filipi kuti: “Ndigomezga mwa Ambuya Yesu kuti ndikutumiziyeningi Timote pambula kuswera yapa . . . Chifukwa ndilivi so munyaki wa maŵanaŵanu ngakuyanana ndi ngaki.”—Afi. 2:19, 20.

Ntchifukwa wuli Timote wenga mura wamampha? Tiyeni tiwoni vinthu 6 vo tingasambira kwaku Timote.

1. Waphweriyanga ŵanthu. Paulo wangukambiya abali a ku Filipi kuti: ‘Timote wazamuphwere nadi vaku yimwi.’ (Afi. 2:20) Timote waphweliyanga nadi ŵanthu. Iyu wakhumbanga kuti aje pa ubwezi ndi Yehova ndipu waŵateŵetiyanga ndi mtima wosi.

Tikhumbika cha kuja nge dilayiva wa basi yo waŵanaŵaniya ŵaka za kufika pasiteji pa nyengu yaki, mumalu mwa kuŵanaŵaniya za kuto ŵanthu. William, yo wateŵete nge mura kwa vyaka vakujumpha 20, wangukambiya ŵara wo asankhika ŵaka kuti: “Muyanjengi abali. Mukhumbika kuŵanaŵaniya abali ndi azichi, mumalu mwakuŵanaŵaniya ukongwa mo vinthu vitenere kwende mumpingu.”

2. Ntchitu yakupharazga yenga yakukhumbika ukongwa kwaku iyu kuphara vinthu vosi. Kuti walongo kuti Timote wenga wakupambana ndi abali anyaki, Paulo wangukamba kuti: “Pakuti anyaki wosi akhumba vaku yiwu ŵija, vaku Yesu Khristu cha.” (Afi. 2:21) Paulo wenga ku Roma pa nyengu yo walembanga kalata iyi. Iyu wanguwona kuti abali ku Roma atangwanikanga ukongwa ndi vakukhumba vawu. Yiwu ateŵetiyanga mwamphwayi. Kweni ndimu Timote wachitiyanga cha. Mwaŵi wakupharazga uthenga wamapha wati wasanirika, Timote wenga ndi maŵanaŵanu nge ngaku Yesaya, yo wangukamba kuti: “Ndini panu! Nditumeni!”—Yesa. 6:8.

Kumbi mungachita wuli kuti vinthu vakuliŵavu vileki kukumaliyani nyengu yakuchitiya vinthu vauzimu? Chakwamba, muŵikengi vinthu vakukhumbika ukongwa pakwamba. Paulo wangukamba kuti, “Musimikizi kuti vinthu vakukhumbika ukongwa ndi nivi.” (Afi. 1:10) Vinthu vo Chiuta wawona kuti vakukhumbika ukongwa ndivu so vitenere kuŵa vakukhumbika ukongwa kwaku imwi. Chachiŵi, sinthani vinthu vinyaki vo muchita.  Mukhumbika kuleka vinthu vo vingakumaliyani nyengu ndi nthazi. Paulo wangukambiya Timote kuti: “Thaŵa makhumbiru nga unyamata, kweni penja urunji, chivwanu, chanju, chimangu.”—2 Timo. 2:22.

3. Wachitanga uteŵeti wakupaturika mwaphamphu. Paulo wangukumbuska Akhristu a ku Filipi kuti: ‘Muziŵa ukaboni wo Timote mweneku wakulongo, kuti nge mwana ndi wisi, iyu wateŵete nani limoza nge kapolu kuti uthenga wamampha uluti panthazi.’ (Afi. 2:22) Timote wenga mulesi cha. Iyu wateŵetiyanga mwaphamphu ndi Paulo. Ivi vinguchitiska kuti ayanjanengi ukongwa.

Mazuŵa nganu mugulu laku Chiuta mwe ntchitu zinandi. Ntchitu iyi njakukondwesa ndipu yingakuwovyani kuti muyanjanengi ndi abali ndi azichi. Mwaviyo, nyengu zosi muŵengi ndi “vakuchita vinandi mu ntchitu ya Ambuya.”—1 Akori. 15:58.

4. Wagwiriskiyanga ntchitu vo wasambiranga. Paulo wangulembe kalata Timote kuti: “Yiwi wayesesa kulondo chisambizu changu, umoyu wangu, chilatu changu, chivwanu changu, kuzizipizga kwangu, chanju changu, kukunthiyapu kwangu.” (2 Timo. 3:10) Chifukwa chakuti Timote wagwiriskiyanga ntchitu vo wasambiranga, wangupaskika udindu ukulu.—1 Akori. 4:17.

Kumbi pe mura yo watikuwovyani mwauzimu? Asani palivi, mungasankha mura yumoza mumpingu winu. Tom yo wateŵete nge mura kwa vyaka vinandi, wangukamba kuti: “Mura munyaki wandiyanjanga ndipu wandisambizanga umampha. Kanandi ndamufumbanga ulongozgi ndipu ndawugwiriskiyanga ntchitu. Ivi vingundiwovya kuti ndileki kujidelera.”

5.Wajisambizanga. Paulo wangukambiya Timote kuti: “Ujisambizengi wamweni ndipu uje ndi chilatu chakuti ulongo kuti we wakujipereka kwaku Chiuta.” (1 Timo. 4:7) Munthu yo watchaya bola pamwenga masaza nganyaki wangaŵa ndi kochi yo watimusambiza, kweni mweneku nayu wakhumbika kujisambiza. Paulo wanguchiska Timote kuti: “Lutirizga kujipereka pa nkhani ya kuŵerenga pa gulu la ŵanthu, kuchiska ndipuso kusambiza. . . . Ulungurukengi vinthu venivi; tangwanika ndi venivi, kuti ŵanthu wosi awoni kuti uluta panthazi.”—1 Timo. 4:13-15.

Namwiso mukhumbika kusazgiyaku malusu nginu. Mukhumbika kuŵerenga mwaphamphu kuti muyendiyengi ulongozgi wasonu wo gulu litende. Ivi vikuwovyeningi kuti muleki kutiniliya mwauzimu. Kweniso mungajigomezganga ukongwa cha, panyaki chifukwa chakuŵanaŵana kuti muziŵa kali vinandi mwakuti mungachita chechosi kwambula kufufuza. Nge mo Timote wachitiyanga, ‘nyengu zosi muphweriyengi ndi vo muchita ndipuso vo musambiza.’—1 Timo. 4:16.

6. Wathembanga mzimu waku Yehova. Paulo wangukumbusa Timote kuti: “Vikiliya chuma cho wasungizika mwakugwiriskiya ntchitu mzimu wakupaturika, wo we mwaku isi.” (2 Timo. 1:14) Timote wakhumbikanga kuthemba mzimu waku Chiuta kuti wavikiliyi uteŵeti waki.

Donald, yo wateŵete nge mura kwa vyaka vinandi wangukamba kuti: “Ŵara ndi ateŵeti akovya atenere kuwona kuti ubwezi wawu ndi Chiuta ngwakuzirwa ukongwa. Wo achita viyo, alutiliyengi ‘kusazgiyaku nthazi.’ Asani apempha Chiuta kuti waŵapaski mzimu waki ndi kuŵa ndi mijalidu yo mzimu utitiwovya kuja nayu, yiwu atuŵa akovya ukongwa kwa abali ndi azichi.”—Sumu 84:7; 1 Petu. 4:11.

Ntchakukondwesa ukongwa kuwona kuti ŵara ndi ateŵeti akovya anandi wo aŵikika ŵaka sonu nge imwi, aluta panthazi pakuteŵete Yehova. Jason yo tamukamba kukwamba kwa nkhani iyi wangukamba kuti: “Pa nyengu yosi yo ndaja mura, ndasambira vinandi ndipu ndikuleka kujidelera. Sonu ndikondwa ukongwa ndi uteŵeti wangu ndipu ndiwona kuti ndi mwaŵi kuchita uteŵeti wenuwu.”

Kumbi mulutirizgengi kuluta panthazi pakuteŵete Yehova? Muyesesengi kusambira kwaku Timote. Asani muchitengi viyo, namwi muŵengi akovya ku ŵanthu aku Chiuta.