1-2. Ntchifukwa wuli Yesu wangusuzgika ukongwa maŵanaŵanu?

PA ZUŴA lakumaliya la umoyu waki, Yesu wangusuzgika ukongwa maŵanaŵanu. Iyu wenga pafupi kutombozgeka ndipuso kubayika ndi ŵanthu ambula kuvwiya marangu. Kweni Yesu wangusuzgika maŵanaŵanu chifukwa chakuti wenga pafupi kubayika cha. Iyu waŵayanjanga ukongwa Awisi ndipu wakhumbanga kuŵakondwesa. Yesu wanguziŵa kuti asani wangagomezgeka pa mayeseru ngenanga, wawovyengi kuti zina laku Yehova litoweseki. Iyu wayanjanga so ŵanthu ndipu wanguziŵa kuti asani wangagomezgeka kwaku Yehova mpaka nyifwa, taŵanthu tingaja ndi chilindizga cha umoyu wambula kumala.

² Chinanga kuti Yesu wangusuzgika ukongwa maŵanaŵanu, kweni wenga ndi chimangu chamumtima. Iyu wangukambiya akutumika kuti “nditikupaskani chimangu changu.” (Yoha. 14:27) Yesu wenga ndi “chimangu chaku Chiuta.” Ichi ntchimangu cho munthu watuŵa nachu asani we paubwezi wakukho ndi Yehova. Chimangu chenichi chingumuwovya Yesu kuti waleki kusuzgika maŵanaŵanu.—Afi. 4:6, 7.

3. Kumbi tikambiskanengenji mu nkhani iyi?

³ Wosi wo alondo Yesu akumanengi ndi mayeseru. Kweni palivi yo wangakumana ndi mayeseru ngakuyanana ndi ngo Yesu wangukunthiyapu. (Mate. 16:24, 25; Yoha. 15:20) Nyengu zinyaki, nasi tingasuzgika ukongwa maŵanaŵanu nge mo Yesu wanguchitiya. Kumbi tingachita wuli kuti kusuzgika ukongwa maŵanaŵanu kuleki kutilonda chimangu chamumtima? Tiyeni tikambiskani vinthu vitatu vo Yesu wanguchita pa nyengu yo wachitanga uteŵeti waki panu pasi ndipuso mo nasi tingachitiya vinthu nge iyu asani takumana ndi mayeseru.

4. Mwakukoliyana ndi 1 Atesalonika 5:17, kumbi mpha vakuchitika nivi po Yesu wangupemphera mwakuwerezawereza pa zuŵa lakumaliya la umoyu waki panu pasi?

⁴ Ŵerengani 1 Atesalonika 5:17. Yesu wangupemphera kananandi ŵaka pa zuŵa lakumaliya la umoyu waki pacharu chapasi. Pa nyengu yo wasambizanga akusambira ŵaki mo angakumbukiya nyifwa yaki, wangupemphere chiŵandi ndi vinyu. (1 Akori. 11:23-25) Ŵechendatuwepu pamalu ngo anguchitiya Pasika, Yesu wangupemphera ndi akusambira ŵaki. (Yoha. 17:1-26) Ndipu wati wafika pa Phiri la Maolivi ndi akusambira ŵaki usiku wenuwu, wangupemphera mwakuwerezawereza. (Mate. 26:36-39, 42, 44) Mazu ngakumaliya ngo Yesu wangukamba wechendafwi, lenga pempheru. (Luka 23:46) Yesu wangukambiya Yehova vosi vo vinguchitika pa zuŵa lenili.

5. Ntchifukwa wuli akutumika angutondeka kuja ndi chiganga?

⁵ Yesu wangukunthiyapu chifukwa wanguthemba Awisi ndipu wanguŵapempha mwakuwerezawereza kuti amuwovyi. Kweni akutumika angufwiyapu cha kupemphera pa usiku wenuwu. Lekani angutondeka kuja ndi chiganga ŵati akumana ndi mayeseru. (Mate. 26:40, 41, 43, 45, 56) Asani takumana ndi mayeseru tingaja akugomezgeka asani ‘tilutirizga kupemphera’ nge mo Yesu wachitiyanga. Kumbi ndi vinthu nivi vo tingakamba asani tipemphera?

6. Kumbi chivwanu chingatiwovya wuli kuja ndi chimangu chamumtima?

⁶ Tingapemphera kwaku Yehova kuti ‘watisazgiyeku chivwanu.’ (Luka 17:5; Yoha. 14:1) Tikhumbika chivwanu chifukwa Satana wayesengi wosi wo alondo Yesu. (Luka 22:31) Kumbi chivwanu chingatiwovya wuli kuti tilutirizgi kuja ndi chimangu chamumtima asani masuzgu  ngatigundizga? Asani tachita vosi vo tingafiska kuti timalani ndi suzgu lo takumana nalu, chivwanu chitiwovyengi kuti tileki kusuzgika maŵanaŵanu chifukwa tiziŵa kuti Yehova wachitengepu kanthu pa nyengu yakwenere. Ndipu venivi vingatiwovya kuja ndi chimangu chamumtima.—1 Petu. 5:6, 7.

7. Kumbi vo Robert wangukamba vititisambizanji?

⁷ Pempheru lititiwovya kuja ndi chimangu chamumtima chinanga kuti tikumana ndi mayeseru. Wonani vo wangukamba mura wavyaka vakujumpha 80 zina laki Robert. Iyu wanguti: “Ulongozgi wa pa Afilipi 4:6, 7 wandiwovya kumalana ndi mayeseru nganandi pa umoyu wangu. Ndenga ndi suzgu lakusoŵa ndalama. Ndipuso kwakanyengu ndinguleka kuteŵete nge mura.” Kumbi ntchinthu wuli cho chawovya Robert kuti waje ndi chimangu chamumtima? Iyu wangukamba kuti: “Ndipemphera asani ndayamba ŵaka kufipa mtima. Ndigomezga kuti kupemphera mwakuwerezawereza ndipuso mwakutuliya pasi pa mtima ndiku kungandiwovwa kuja ndi chimangu chamumtima.”

8. Nge mo pakambiya pa Yohane 8:29, kumbi ntchinthu wuli chinyaki cho chinguwovya Yesu kuja ndi chimangu chamumtima?

⁸ Ŵerengani Yohane 8:29. Yesu wenga ndi chimangu chamumtima chinanga mphanyengu yo watombozgekanga. Venga viyo chifukwa waziŵanga kuti wakondwesa Awisi. Iyu wanguvwiya pa nyengu yo venga vakusuzga kuchita viyo. Yesu wayanjanga Awisi ndipu kuteŵete Yehova ndichu chenga chinthu chakukhumbika ukongwa pa umoyu waki. Wechendazi pacharu chapasi, wenga “m’misiri” waku Chiuta. (Nthanthi 8:30) Ndipu pa nyengu yo wenga pacharu chapasi, Yesu wapharazgiyanga ŵanthu mwaphamphu  vakukwaskana ndi Awisi. (Mate. 6:9; Yoha. 5:17) Ntchitu yeniyi yingumuwovya kuti wakondwengi ukongwa.—Yoha. 4:34-36.

9. Kumbi kutangwanika ndi ntchitu yakupharazga kutitiwovya wuli kuja ndi chimangu chamumtima?

⁹ Tingachita nge mo Yesu wachitiyanga asani tivwiya Yehova ndipuso asani tija ndi “vakuchita vinandi mu ntchitu ya Ambuya.” (1 Akori. 15:58) ‘Kutangwanika’ ndi ntchitu yakupharazga, kungatiwovya kuti tiwonengi masuzgu ngo tikumana nangu mwakwenere. (Machi. 18:5) Mwakuyeruzgiyapu, ŵanthu wo tikumana nawu mu uteŵeti, kanandi akumana ndi masuzgu ngakulu kuluska ngo isi tikumana nangu. Kweni asani ayamba kwanja Yehova ndi kugwiriskiya ntchitu ulongozgi waki, umoyu wawu usintha ndipu atamba kukondwa. Asani tiwona venivi vichitika, tikayikiya cha kuti Yehova watitiphwere. Ivi vititiwovya kuti tilutirizgi kuja ndi chimangu chamumtima. Mzichi munyaki wanguwona kuti fundu yeniyi njauneneska. Iyu wajiwonanga kuti ngwambula kukhumbika ndipuso wasuzgikanga maŵanaŵanu. Mzichi uyu wanguti: “Asani nditangwanika ndi ntchitu yakupharazga, ndisuzgika maŵanaŵanu cha ndipu ndikondwa. Ndiwona kuti venivi vichitika chifukwa chakuti asani nde mu uteŵeti, nditijivwa kuti nde pafupi ukongwa ndi Yehova.”

10. Kumbi vo Brenda wangukamba vakusambizaninji?

¹⁰ Tiyeni tiwoni so vo vinguchitikiya mzichi munyaki zina laki Brenda. Iyu ndi mwana waki atama matenda ngakulu. Brenda we ndi nthazi zimana ndipu watenda pa njinga ya ŵanthu akupunduka. Nyengu zinyaki wapharazga kunyumba ndi nyumba, kweni kanandi wagwiriskiya ntchitu makalata pa kupharazga. Iyu wanguti: “Ndati ndaziŵa kuti ndingachira cha nthenda yo nditama, ndinguzomereza ŵaka ndipu ndiŵika maŵanaŵanu ngangu ngosi pa uteŵeti. Kukamba uneneska, asani ndipharazga, ndiluwaku masuzgu ngangu. Mumalu mwaki, ndiŵika maŵanaŵanu ngangu pakuwovya ŵanthu wo nditiŵapharazgiya muchigaŵa chidu. Ndipu nyengu zosi asani ndipharazga ndiŵanaŵaniya vinthu vamampha vo ndilindizga kunthazi.”

11-13. (a) Kumbi ndi vinthu wuli vo akutumika ndi ŵanthu anyaki anguchita kulongo kuti ŵenga nadi mabwezi ngaku Yesu? (b) Kumbi Yesu wavwanga wuli ndi vo abwezi ŵaki achitanga?

¹¹ Nyengu yosi yo Yesu wachitanga uteŵeti waki, akutumika akugomezgeka angulongo kuti ŵenga abwezi ŵaki nadi. Yiwu angulongo kuti vo Bayibolu likamba vauneneska. Likamba kuti: “Pe bwezi lo limamatiya kuluska mubali waku.” (Nthanthi 18:24) Mabwezi ngenanga ngenga ngakukhumbika ukongwa kwaku Yesu. Pa nyengu yo wachitanga uteŵeti waki panu pasi, avurwa ŵaki ŵengavi chivwanu mwaku iyu. (Yoha. 7:3-5) Mwakuti nyengu yinyaki abali ŵaki angukamba kuti wazunguliya mutu. (Mariko 3:21) Mwakupambana ndi venivi, kwati kwaja kamanavi kuti Yesu wabayiki wangukambiya akutumika ŵaki akugomezgeka kuti: “Yimwi ndimwi mwajaliya nani limoza mu mayeseru ngangu.”—Luka 22:28.

¹² Nyengu zinyaki akutumika amuguŵiskanga Yesu kweni iyu waŵanaŵaniyanga ukongwa vo anangisanga cha. Mumalu mwaki, wawonanga kuti ŵe ndi chivwanu mwaku iyu. (Mate. 26:40; Mariko 10:13, 14; Yoha. 6:66-69) Po wenga ndi anthulumi akugomezgeka ŵenaŵa pa usiku wakumaliya, Yesu wanguŵakambiya kuti: “Ndakudanani kuti anyangu, chifukwa ndakukambiyani vinthu vosi vo ndikuvwa kutuliya kwa Ada.” (Yoha. 15:15) Mwambula kukayika, anyaki aku Yesu amuchiskanga ukongwa. Ndipu Yesu wakondwanga ukongwa chifukwa chakuti yiwu amuwovyanga pakuchita uteŵeti waki.—Luka 10:17, 21.

¹³ Kusazgiyapu pa akutumika, Yesu wenga so ndi mabwezi nganyaki ngo ngamuwovyanga pa ntchitu yakupharazga kweniso munthowa zinyaki. Anyaki amudaniyanga kunyumba kwawu kuti akaryi nayu chakurya. (Luka 10:38-42; Yoha. 12:1, 2) Ndipu anyaki ayendanga nayu  kweniso amugaŵiyangaku vinthu vo ŵenga navu. (Luka 8:3) Yesu wenga ndi mabwezi ngamampha chifukwa chakuti nayu wenga bwezi lamampha. Iyu waŵachitiyanga vinthu vamampha ndipu wakhumbanga cha kuti amuchitiyi vinthu vo angatondeka kufiska. Chinanga kuti Yesu wenga wakufikapu, kweni wawonganga ukongwa asani abwezi ŵaki ambula kufikapu atimuwovya. Ndipu tikayika cha kuti amuwovyanga kuja ndi chimangu chamumtima.

14-15. Kumbi tingasaniya wuli mabwezi ngamampha, nanga ngangatiwovya wuli?

¹⁴ Mabwezi ngamampha ngangatiwovya kuti tije akugomezgeka kwaku Yehova. Ndipu nthowa yamampha yakujaliya ndi mabwezi ngamampha nkhuja bwezi lamampha. (Mate. 7:12) Mwakuyeruzgiyapu, Bayibolu likamba kuti tikhumbika kugwiriskiya ntchitu nthazi zidu kuti tiwovyi ŵanthu, ukongwa wo ‘mbakavu.’ (Aefe. 4:28) Kumbi mu mpingu winu mwe munthu munyaki yo mungamuwovya? Kumbi mungachimuguliya vinthu vinyaki munthu yo wasuzgika kwenda chifukwa cha kutama pamwenga ukoti? Kumbi mungalipaskaku chakurya banja lo lisuzgika? Asani muziŵa kugwiriskiya ntchitu webusayiti ya jw.org^® ndi JW Library^®, kumbi mungasambiza abali mu mpingu winu mo angagwiriskiya ntchitu vinthu ivi? Asani tiŵika maŵanaŵanu ngidu pakovya anyidu, tikondwengi ukongwa.—Machi. 20:35.

¹⁵ Asani takumana ndi mayeseru, mabwezi ngamampha ngangatiwovya kuja ndi chimangu chamumtima. Elihu wanguvwisiya po Yobu wakonkhoskanga masuzgu ngaki. Mwakuyanana ŵaka, mabwezi ngidu ngangatiwovya asani ngavwisiya pa nyengu yo tikonkhoska mo tivwiya mumtima. (Jobu 32:4) Tingakhazanga kuti anyidu atisankhiyengi vakuchita cha, kweni tingalongo  kuti te ndi zeru asani tivwisiya ulongozgi wa mu Bayibolu wo atitipaska. (Nthanthi 15:22) Fumu Davidi yingujiyuyuwa ndipu yinguzomera kuti anyaki ayiwovyi. Mwakuyanana waka, nasi tikhumbika kujiyuyuwa ndi kuzomera chovyu cho anyidu angatipaska. (2 Samu. 17:27-29) Kukamba uneneska, mabwezi ngamampha ndi mphasu yakutuliya kwaku Yehova.—Yako. 1:17.

16. Mwakukoliyana ndi Afilipi 4:6, 7, kumbi ndi nthowa yimoza pe niyi yo tingajaliya ndi chimangu chamumtima? Konkhoskani.

¹⁶ Ŵerengani Afilipi 4:6, 7. Yehova watitikambiya kuti tingalonde chimangu cho iyu wapereka “kuporote mwaku Khristu Yesu.” Ntchifukwa wuli tingalonde chimangu chenichi kuziya mwaku Yesu? Chifukwa tingaja ndi chimangu chamumtima pijapija asani tiziŵa udindu wo Yesu wenawu pakufiska khumbu laku Yehova ndipuso asani tigomezga kuti wafiskengi udindu wenuwu. Mwakuyeruzgiyapu, kuporote mu sembi yo Yesu wangupereka, maubudi ngidu ngosi ngagowokereka. (1 Yoha. 2:12) Tituvwa umampha ukongwa mumtima asani tiŵanaŵaniya fundu yeniyi! Pakuti Yesu ndi Fumu ya Ufumu waku Chiuta, wazamutuzgapu masuzgu ngosi ngo Satana ndi charu chaki achitiska. (Yesa. 65:17; 1 Yoha. 3:8; Chivu. 21:3, 4) Venivi vititiwovya kuti tilindizgengi vinthu vamampha vo ve kunthazi! Chinanga kuti Yesu wakutipaska ntchitu yakusuzga, iyu we nasi ndipu watiwovyengi mazuŵa ngosi mpaka pakumaliya pa mugonezi. (Mate. 28:19, 20) Kuziŵa venivi kutitiwovya kuja ndi chiganga. Kuvwa umampha mumtima, kulindizga vamampha vo ve kunthazi kweniso chiganga, vakukhumbika ukongwa kuti tije ndi chimangu chamumtima.

17. (a) Kumbi Mkhristu wangachita wuli kuti waje ndi chimangu chamumtima? (b) Nge mo pakambiya pa Yohane 16:33, kumbi tingakwaniska kuchitanji?

¹⁷ Kumbi mungachita wuli kuti muje ndi chimangu chamumtima asani mwakumana ndi masuzgu ngakulu? Mungaja ndi chimangu ichi asani namwi muchita vo Yesu wachitanga. Chakwamba, mufwiyengepu kupemphera. Chachiŵi, muvwiyengi Yehova kweniso mupharazgengi mwaphamphu chinanga kuti nyengu zinyaki kungaŵa kwakusuzga kuchita viyo. Ndipu chachitatu, muzomerengi asani anyinu akhumba kukuwovyani pa nyengu yo mwakumana ndi mayeseru. Asani muchitengi viyo, chimangu chaku Chiuta chivikiliyengi mtima winu ndi maŵanaŵanu nginu. Ndipu nge mo Yesu wanguchitiya, namwi mungakwaniska kuthereska mayeseru ngosi ngo mungakumana nangu.​—Ŵerengani Yohane 16:33.