Saniyani Vinthu Vamampha Ukongwa Kuluska Golidi
Kumbi mukusaniya golidi wamampha? Mbanthu amanavi ukongwa wo akumusaniya. Chinanga kuti ve viyo, ŵanthu mamiliyoni nganandi asaniya vinthu vamampha ukongwa kuluska golidi. Yiwu asaniya zeru zakutuliya kwaku Chiuta zo “zingagulika cha ndi golidi wakuyengeka umampha.”—Jobu 28:12, 15.
TINGAKAMBA kuti wo asambira Bayibolu ŵe nge ŵanthu wo afufuza golidi. Yiwu akhumbika kuchita phamphu ndipuso kulutiriza kufufuza m’Malemba kuti asaniyi zeru zaku Chiuta. Nge ŵanthu wo asambira Bayibolu, kumbi tisambiranji asani tiŵanaŵaniya nthowa zitatu zo ŵanthu asaniliya golidi?
MWASANIYA GOLIDI!
Tiyeruziyi kuti mutenda mumphepeti mwa musinji ndipu muwona kamwa kakuŵala. Musindama ndipu mutikato. Pavuli paki, mukondwa kuti mwasaniya golidi. Kamwa kenaka nkhamana kuluska kamutu ka tchisa ndipu nkhakuŵala kuluska mwa wa dayamondi. Kukamba uneneska, muyambengi kupenjapenja kuti panyaki musaniyengi timya tinyaki.
Ivi viyanana ŵaka ndi zuŵa lo mutililuwa cha lo Kaboni waku Yehova wanguza kunyumba kwinu, kuzikambisana namwi uthenga wamampha wa m’Bayibolu. Mutenere kuti mukumbuka nyengu yo mungusaniliya golidi wamampha ukongwa yo nkhuziŵa Chiuta. Mungusaniya golidi mwenuyu pa nyengu yo munguwona zina laku Chiuta, lakuti Yehova m’Bayibolu. (Sumu 83:18) Pamwenga pa nyengu yo munguziŵa kuti mungaja bwezi laku Yehova. (Yak. 2:23) Nyengu yeniyi munguziŵa kuti mwasaniya chinthu chamampha ukongwa kuluska golidi. Mutenere kuti mungukhumbisisa kusaniya golidi munandi m’Mazu ngaku Chiuta.
MWASANIYA GOLIDI MUNANDI!
Nyengu zinyaki, timya timanatimana ta golidi tiwunjikana mutivipopomu kweniso mumisinji. Kwa myezi yimanavi, ŵanthu wo atesesa kufufuza golidi asaniya munandi m’malu ngenanga ndipu atimugulisa ndalama zinandi.
Mwati mwayamba kusambira Bayibolu ndi Akaboni aku Yehova, mungujivwa nge munthu yo wakhumba kusaniya golidi munandi. Chifukwa chakuti mwaŵanaŵaniyanga vo mwaŵerenganga m’Bayibolu, panyaki vingukuchitisani kuti muziŵi vinandi vakukwasana ndi Chiuta. Pa nyengu yo mwaŵanaŵaniyanga fundu za m’Bayibolu, mungusambira mo mungajaliya pa ubwezi ndi Yehova ndipuso vo mungachita kuti mulutirizi kuja nayu pa ubwezi ndi kuzilonde umoyu wamuyaya.—Yak. 4:8; Yuda 20, 21.
Nge munthu yo watesesa kufufuza golidi, kumbi mutesesa kusambira uneneska wa m’Bayibolu wo ngwakukhumbika ukongwa?
Nge munthu yo wafufuza golidi, panyaki namwi munguyesesa kufufuza fundu zakovya za m’Bayibolu. Mwati mwasambira fundu za m’Bayibolu zo munthu Mat. 28:19, 20.
wasambira pakwamba, panyaki mungulutiriza kusambira. Venivi vingukuchitisani kuti mujipatuliyi ndi kubatizika.—LUTIRIZANI KUFUFUZA!
Nyengu zinyaki, munthu yo wafufuza golidi wasaniya golidi mumanavi mukati mwa mya yikuluyikulu. Mya yikuluyikulu yeniyi atiyiphwanya kuti yije yimanayimana. Pavuli paki, aphwanya so mya yimanayimana kuti asaniyi golidi. Pakwamba mungaziŵa cha kuti mu mya yeniyi musanirikengi golidi. Ve viyo chifukwa chakuti mya yakukwana makilogilamu 907 mungasanirika ŵaka golidi wakukwana magilamu 10. Chinanga kuti paja ntchitu yikulu viyo, munthu yo wafufuza golidi wawona kuti mphakwenere kugwira ntchitu yeniyi.
Mwakuyanana ŵaka, asani munthu waziŵa “visambizu vakwamba vakukwasana ndi Khristu,” wakhumbika kulutiriza kusambira kuti waziŵi vinandi. (Ŵah. 6:1, 2) Asani musambira Bayibolu, mukhumbika kuyesesa kusaniya fundu zasonu ndipuso zo zingakuwovyani pa umoyu winu. Kumbi mukhumbika kuchitanji kuti muyanduwengi asani musambira Bayibolu pakumwija, chinanga kuti panyaki mwaja muchilisambira kwa vyaka vinandi?
Jani ndi mtima wakukhumba kusambira. Muvwisisengi fundu zo musambira. Lutirizani kuchita phamphu ndipu musaniyengi ulongozi kweniso zeru zaku Chiuta, zakuluska golidi zo zisanirika m’Bayibolu. (Ŵar. 11:33) Kuti mungaziŵi umampha Malemba, mutenere kugwirisiya ntchitu mabuku ngakufufuziya nga chineneru chinu. Saniyani nyengu yakufufuziya ulongozi wo mukhumba ndipuso kwamuka kwa mafumbu ngo mwenangu ngakukwasana ndi Bayibolu. Mufumbengi anyinu malemba ndi nkhani zakovya kweniso zakuchisa zo asaniya. Namwiso mukambiyengi anyinu fundu zakuchiska zo mwasaniya muchisambira Mazu ngaku Chiuta.
Kumbukani kuti mukhumba ŵaka kuziŵa fundu zinandi cha za uneneska. Wakutumika Paulo wangukamba kuti “kuziŵa vinthu kuchitisa munthu kujikuza.” (1 Ŵakor. 8:1) Mwaviyo, yesesani kulutiriza kuja akujiyuyuwa kweniso kuja ndi chivwanu chakukho. Kuchita kusopa kwa pabanja nyengu zosi ndipuso kusambira Bayibolu pakumwija, vikuwovyeningi kuti muchitengi vinthu mwakukoliyana ndi fundu zaku Yehova za mijalidu yamampha zo zikuchitiseningi kuti muwovyi anyinu. Kuphala vosi, mukondwengi chifukwa mwasaniya vinthu vamampha ukongwa kuluska golidi.—Nthanthi 3:13, 14.