1. Kumbi ndi nthowa zinyaki nizi zo tingagwiriya ntchitu ndi Yehova?

YEHOVA wangulenga ŵanthu akufikapu ndipu iyu wanguziŵa kuti wazamugwira nawu ntchitu pakufiska khumbu laki. Chinanga kuti pasonu panu ŵanthu mbambula kufikapu, kweni ŵanthu akugomezgeka angagwira mbwenu ntchitu ndi Yehova. Mwakuyeruzgiyapu, “tigwiriya ntchitu limoza ndi Chiuta” asani tipharazga uthenga wa Ufumu kweniso kusambiza ŵanthu. (1 Akori. 3:5-9) Ndi mwaŵi ukulu kugwira ntchitu yakukhumbika ukongwa ndi Mlengi wa chilengedu chosi! Chinanga kuti ve viyo, tigwira ntchitu ndi Yehova asani tipharazga ndi kusambiza ŵanthu pe cha. Mu nkhani iyi, tiwonengi so nthowa zinyaki zo tingagwiriya ntchitu ndi Yehova, nge kovya banja lidu ndi Akhristu anyidu, kulonde alendu, kugwira ntchitu za ufumu mwakujipereka ŵaka kweniso kusazgiyaku uteŵeti widu.—Ako. 3:23.

2. Ntchifukwa wuli tikhumbika cha kujiyeruzgiya ndi anyidu pakuteŵete Yehova?

² Po tikambiskana nkhani iyi, tingajiyeruzgiyanga ndi anyidu cha pakuteŵete Yehova. Tingachita umampha kukumbuka kuti taŵanthu tiyanana cha. Anyaki mbarara penipo anyaki mbachinyamata, anyaki atamatama, tikumana ndi masuzgu ngakupambana ndipuso te ndi malusu ngakupambana. Wakutumika Paulo wangukamba  kuti: “Weyosi wasandi vakuchita vaki, ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.”—Aga. 6:4.

3. Ntchifukwa wuli tingakamba kuti munthu yo waphwere banja laki wachita vinthu mwakukoliyana ndi Chiuta?

³ Yehova wakhumba kuti ateŵeti ŵaki aphweriyengi mabanja ngawu. Mwakuyeruzgiyapu, mungakhumbika kugwira ntchitu kuti musaniyi ndalama zakuwovye banja linu. Anthukazi anandi aja panyumba kuti aphweriyengi ŵana ŵawu. Ŵanthu anyaki akhumbika kuphwere apapi ŵawu akukota. Vinthu ivi vakukhumbika. Mazu ngaku Chiuta ngatiti: “Asani munthu waleka kuphwere ŵaki, ukongwa a munyumba yaki, wakana chivwanu ndipu ndi muheni ukongwa kuluska munthu wambula chivwanu.” (1 Timo. 5:8) Asani mwe ndi maudindu ngenanga, vingaja vakusuzga kuti muchiti vinandi pakuteŵete Yehova nge mo mwaŵeni mukhumbiya. Kweni mungadandawulanga cha! Yehova wakondwa asani muphwere banja linu.—1 Akori. 10:31.

4. Kumbi apapi angachita wuli kuti aŵikengi vinthu va ufumu pamalu ngakwamba, ndipu venivi vingawovya wuli?

⁴ Apapi achikhristu agwira ntchitu ndi Yehova asani aja ndi mtima wakuchita uteŵeti. Apapi anandi wo achita viyo, atovya ŵana ŵawu kuti kunthazi aziyambi uteŵeti wa nyengu zosi ndipu atachiteŵete kutali ndi kumuzi kwawu. Anyaki achita umishonale; anyaki achita upayiniya ko kukhumbika apharazgi anandi; ndipu anyaki ateŵete pa Beteli. Kuteŵete kutali ndi kwawu, kungachitiska kuti aleki kuwonana pafupipafupi ndi ŵanthu a mu banja lawu. Chinanga kuti ve viyo, apapi wo atanja Yehova achiska ŵana ŵawu kuti angalekanga cha kuchita uteŵeti. Ntchifukwa wuli yiwu achita viyo? Yiwu akondwa ukongwa kweniso akhorwa asani ŵana ŵawu awona kuti vinthu va Ufumu ndivu vakukhumbika ukongwa pa umoyu wawu. (3 Yoha. 4) Anandi mwa apapi ŵenaŵa, atuvwa nge Hana yo wangukamba kuti ‘wabwerekesa’ mwana waki Samuele kwaku Yehova. Yiwu awona kuti ndi mwaŵi kugwira ntchitu ndi Yehova pa kovya ŵana ŵawu kuti amuteŵetiyengi. Yiwu awona kuti kuchita venivi nkhwakukhumbika ukongwa.—1 Samu. 1:28.

5. Kumbi mungaŵawovya wuli abali ndi azichi mu mpingu winu? (Wonani chithuzi cho che papeji 23.)

⁵ Asani mulivi udindu ukulu wakuphwere banja, kumbi mungawovya Akhristu anyinu wo atama, akukota, akavu kweniso wo aphwere ŵanthu anyaki? Mungachita umampha kufufuza wo akhumbika chovyu mu mpingu winu. Asani mu mpingu winu mwe muzichi yo waphwere apapi ŵaki akukota, mungachita umampha kucheza ndi apapi ŵaki pa nyengu yo iyu wachita vinthu vinyaki. Pamwenga mungawovya ŵanthu anyaki wo akhumbika chovyu nge kuluta nawu ku maunganu, kuchiŵaguliya vinthu kumsika, kuŵagwiriya ntchitu zinyaki, pamwenga kuchiwona wo atama kuchipatala. Asani muchitengi venivi, mugwirengi ntchitu ndi Yehova pakumuka mapempheru nga ŵanthu wo akhumbika chovyu.—Ŵerengani 1 Akorinto 10:24.

6. Kumbi kulonde alendu kung’anamuwanji?

⁶ Ateŵeti aku Chiuta aziŵika kuti mbakulonde alendu. Mu Malemba nga Chigiriki nga Chikhristu, mazu ngakuti “kulonde alendu” ngang’anamuwa “kuchitiya lisungu ŵanthu ambula kuŵaziŵa.” (Ahe. 13:2; mazu ngamumphata.) Mu Mazu ngaku Chiuta, mwe vakuwoniyapu vo vilongo kukhumbika kwa kulonde alendu. (Chiya. 18:1-5) Tikhumbika kusaniya mipata yakuwovye anyidu nyengu zosi, kwali ‘mbabali ŵidu mu chivwanu’ pamwenga cha.—Aga. 6:10.

7. Ntchifukwa wuli mukhumbika kulonde abali ndi azichi wo achita uteŵeti wanyengu zosi?

 ⁷ Kumbi mungagwira ntchitu ndi Chiuta mwa kulonde akuwonere dera? (Ŵerengani 3 Yohane 5, 8.) Kulonde ateŵeti a nyengu zosi kutovya kuti ‘muchiskanengi.’ (Aro. 1:11, 12) Tiyeni tikambiskani nkhani yaku Olaf. Iyu wangukamba kuti nyengu yinyaki weche mwana, mu mpingu mo wawungananga, ŵanthu wosi angukhumba cha kulondele wakuwonere dera yo wenga wambula kuto. Olaf wangupempha apapi ŵaki wo ŵenga Akaboni cha kuti kunyumba kwawu kuzifikiyi wakuwonere dera. Yiwu anguzomera, kweni angumukambiya kuti iyu wazamugona pampandu. Olaf wangudandawulapu cha kugona pampandu. Iyu wangukamba kuti: “Sabata iyi yenga yakukondwesa ukongwa! Zuŵa lelosi ini ndi wakuwonere dera, tayukanga mlenjilenji ndipu takambiskananga nkhani zakukondwesa pa nyengu ya chakurya cha mlenji. Fundu zakuchiska zo takambiskananga zingundiwovya kuti ndije ndi khumbu lakuchita uteŵeti wanyengu zosi.” Olaf wateŵetiyapu nge mumishonale muvyaru vakupambanapambana kwa vyaka vakujumpha 40.

8. Ntchifukwa wuli tikhumbika kuchitiya lisungu ŵanthu chinanga kuti angaleka kuwonga? Kambani chakuyeruzgiyapu.

⁸ Ŵanthu ambula kuŵaziŵa tingaŵalongo chanju mu nthowa zakupambanapambana. Tingachita viyo chinanga kuti pakwamba angawonga cha vo taŵachitiya. Wonani chakuyeruzgiyapu ichi: Zuŵa linyaki mupharazgi munyaki ku Spain wachisambira Bayibolu ndi Yesica wa ku Ecuador wanguwona kuti Yesica waliya ndipu wapembuzgikanga cha. Mupharazgi uyu wangumufumba vo waliyanga. Yesica wangukamba kuti we kwawu ku Ecuador, wenga mukavu ukongwa ndipu zuŵa linyaki wengavi chakurya chechosi kuti wapaski mwana waki, kupatuwaku maji. Pa nyengu yo Yesica wakhumbanga kupemphera kuti wasaniyi chovyu, wangupembuzga dankha mwana waki ndi kumugoneka. Pati pajumpha nyengu yimanavi, Akaboni ŵaŵi anguza kunyumba kwaki kweni iyu wanguŵalondele umampha cha ndipu wangukeruwa magazini yo angumupaska. Iyu wangufumba kuti: “Kumbi chenichi ntchakurya chakuti ndipaski mwana wangu?” Akaboni yaŵa angwesesa kumupembuza, kweni vingubuwa kanthu cha. Pavuli paki, yiwu angumupingiya basiketi ya vakurya ndipu angumuŵikiya pakhomu la nyumba yaki. Yesica wangukwaskika ukongwa ndi vo azichi yaŵa angumuchitiya ndipu wanguwona kuti wangunanga kuleka kutoliyaku kanthu pa nyengu yo Chiuta wamukanga pempheru laki. Kweni Yesica wenga wakukhumbisiska kuti wayambi kuteŵete Yehova. Vo Akaboni yaŵa anguchita vingumuwovya ukongwa.—Waku. 11:1, 6.

9, 10. (a) Kambani ntchitu zinyaki zo Ayisirayeli akhumbikanga kuwovya. (b) Kumbi abali mazuŵa nganu angawovya wuli mu mpingu?

⁹ Mu nyengu yakali, Ayisirayeli ajiperekanga kuti awovyi pa ntchitu zakupambanapambana. (Chitu. 36:2; 1 Miko. 29:5; Nehe. 11:2) Mazuŵa nganu napu, te ndi mwaŵi wakugwiriskiya ntchitu nyengu, vinthu vo tenavu kweniso malusu ngidu kuti tiwovyi abali ndi azichi. Asani tichitengi viyo, tikondwengi ukongwa kweniso tisaniyengi vitumbiku vinandi.

¹⁰ Mazu ngaku Chiuta ngachiska anthulumi mu mpingu kugwira ntchitu ndi Yehova mwakuteŵete nge ateŵeti akovya ndipuso ŵara. (1 Timo. 3:1, 8, 9; 1 Petu. 5:2, 3) Abali wo ŵe pa maudindu ngenanga, atovya anyawu mwauzimu ndipuso mu nthowa zinyaki. (Machi. 6:1-4) Kumbi ŵara akukupemphanipu kuti mulondiyengi alendu pa maunganu, muphweriyengi mabuku, muwoneriyengi vigaŵa vo abali apharazgaku, kunozga vinthu vo vanangika pamwenga kuchita vinthu vinyaki? Abali wo achita mauteŵeti ngenanga akukambiyeningi kuti munthu wakondwa ukongwa asani watovya ŵanthu.

11. Kumbi mzichi munyaki wayanduwa wuli chifukwa cha kugwira ntchitu za Ufumu?

 ¹¹ Ŵanthu wo atijipereka pa ntchitu za Ufumu kanandi asaniya mabwezi nganyaki. Mwakuyeruzgiyapu, tiyeni tikambiskani za mzichi munyaki zina laki Margie yo wagwira ntchitu yakuzenga Nyumba za Ufumu kwa vyaka 18. Iyu waja wachisambiza azichi achinyamata mo angagwiriya ntchitu iyi. Margie wangukamba kuti kuchita viyo ndi nthowa yamampha ukongwa yakuchiskiyana mwauzimu. (Aro. 1:12) Asani Margie wakumana ndi masuzgu, wachiskika ndi mabwezi ngo wasaniya pa nyengu yo wagwira ntchitu yakuzenga. Kumbi mukugwirapu ntchitu yakuzenga? Kwali mwe ndi lusu pamwenga cha, kumbi mungajipereka kugwiraku ntchitu yeniyi?

12. Kumbi mungawovya wuli asani kwachitika masoka ngachilengedu?

¹² Asani kwachitika masoka ngachilengedu, abali ndi azichi agwira ntchitu ndi Chiuta mwakovya abali mu nthowa zakupambanapambana. Mwakuyeruzgiyapu, yiwu apereka ndalama kuti ziwovyi wo akumana ndi masuzgu ngenanga. (Yoha. 13:34, 35; Machi. 11:27-30) Nthowa yinyaki yo tingawovye, nkhutoweska ndi kunozga vinthu vo vanangika. Gabriela waku Poland yo nyumba yaki yingunangika ndi maji, wangukondwa ukongwa abali a mu mipingu yapafupi ŵati ŵaza kuzimuwovya. Iyu wangukamba kuti: “Ndikhumba cha kukamba za vinthu vangu vo vikunangika chifukwa venga ŵaka vinthu vakuliŵavu. Mumalu mwaki, ndiŵanaŵaniya mo ndinguwovyeke. Vo abali angundichitiya vandiwovya kuziŵa kuti kuja mu mpingu wachikhristu, ndi mwaŵi ukulu ukongwa kweniso nkhwakukondwesa.” Anandi wo awovyeka asani akumana ndi masoka ngachilengedu, atuvwa nge mo muzichi uyu wangukambiya. Abali wo agwira ntchitu ndi Yehova pakovya wo akumana ndi masoka ngachilengedu, akhorwa ndipuso akondwa ukongwa.—Ŵerengani Machitidu 20:35; 2 Akorinto 9:6, 7.

13. Kumbi kujipereka kuti tiwovyi abali kungawovya wuli kuti ubwezi widu ndi Yehova uje wakukho? Kambani chakuyeruzgiyapu.

¹³ Stephanie ndipuso apharazgi anyaki angukondwa kugwira ntchitu ndi Chiuta, po anguwovya Akaboni wo anguthaŵiya ku United States chifukwa cha nkhondu yo yinguchitika mu charu chawu. Yiwu anguŵawovya kusaniya nyumba  ndi katundu wa munyumba. Stephanie wangukamba kuti: “Tinguchiskika kuwona mo angukondwe ndipuso mo awongiyanga chifukwa chakuwona kuti abali atanjana pacharu chosi.” Iyu wangukamba so kuti, “Abali ndi azichi yaŵa, awona kuti tikuŵawovya kweni uneneska ngwakuti, yiwu ndiwu akutiwovya ukongwa. Chifukwa chakuti abali yaŵa akoliyana, ŵe ndi chivwanu, chanju ndipuso athemba Yehova, vatiwovya kuti nasi timuyanjengi ukongwa Yehova kweniso tiwongengi vosi vo tilonde kuziya mu gulu laki.”

14, 15. (a) Kumbi Yesaya wangulongo kuti wenga ndi mtima wuli? (b) Kumbi apharazgi a Ufumu mazuŵa nganu, achita wuli nge Yesaya?

¹⁴ Kumbi mungayanja kugwira ntchitu ndi Yehova mwakusazgiyaku uteŵeti winu? Kumbi mungachiteŵete ko kukhumbika apharazgi anandi? Kweni ateŵeti aku Chiuta akhumbika kuluta kumalu nganyaki pe cha kuti akateŵete. Mwakukoliyana ndi mo vinthu viliri pa umoyu wawu, abali ndi azichi anyaki atijipereka kuchiteŵete kutali ndi kwawu. Yiwu achita nge mo Yesaya wangumukiya. Yehova wati wafumba kuti, “Nditumengi yani, ndipu ndiyani yo walutengi mumalu mwaku isi?” Yesaya wangumuka kuti: “Ndini panu! Nditumeni!” (Yesa. 6:8) Kumbi namwi mwe akunozgeka kuchita nge mo Yesaya wanguchitiya kuti muwovyi gulu laku Yehova? Kumbi mungawovya mu nthowa nizi?

¹⁵ Pakukamba va ntchitu yakupharazga ndi kusambiza, Yesu wanguti: “Ntchitu yakuvuna njikulu kweni antchitu mbamana. Mwaviyo, pemphani Mweneku wa ntchitu yakuvuna kuti watumizi antchitu anandi ku ntchitu yaki.” (Mate. 9:37, 38) Kumbi mungachiteŵete nge mpayiniya ko kukhumbika apharazgi anandi? Pamwenga kumbi mungawovya munthu munyaki kuchita viyo? Abali ndi azichi anandi awona kuti nthowa yamampha yakulongole kuti atanja Chiuta ndi ŵanthu, nkhuchita upayiniya ko kukhumbika akuvuna anandi. Kumbi pe nthowa zinyaki zo mungasazgiyaku uteŵeti winu? Asani mungasazgiyaku uteŵeti winu mukondwengi ukongwa.

16, 17. Kumbi ndi nthowa zinyaki nizi zo mungasazgiyaku uteŵeti winu?

¹⁶ Kumbi mungajipereka kuchiteŵete ku Beteli pamwenga kugwiraku ntchitu za kuzenga kwakanyengu kamanavi? Kumbi mungayanja kuchigwiraku kwa zuŵa limoza pamwenga kwa mazuŵa nganandi pa sabata? Gulu laku Yehova likhumba ŵanthu akujipereka wo angateŵete kwekosi ndipuso wo angagwira ntchitu yeyosi yo angapaskika, chinanga kuti angaŵa ndi lusu pa ntchitu yinyaki. Yehova wawonga ukongwa ŵanthu wo atijipereka kuchiteŵete ko kukhumbika apharazgi anandi.—Sumu 110:3.

¹⁷ Kumbi mungayanja kusazgiyaku lusu linu kuti muteŵetiyengi Yehova ndi mtima wosi? Asani ndi viyo, mungapempha kuti mukasere Sukulu ya Apharazgi a Ufumu. Sukulu iyi yisambiza abali ndi azichi wo achita kali upayiniya kuti gulu laku Yehova liŵagwiriskiyi ntchitu pa mauteŵeti ngakupambanapambana. Wo asere sukulu iyi, akhumbika kuzomera uteŵeti wewosi wo angapaskika asani amaliza sukulu. Kumbi mwe akunozgeka kusere sukulu yeniyi kuti muchiti vinandi pakuteŵete Yehova?—1 Akori. 9:23.

18. Kumbi tiyanduwa wuli asani tigwira ntchitu ndi Yehova zuŵa lelosi?

¹⁸ Chifukwa chakuti te ŵanthu aku Yehova, tipaska anyidu vo tenavu, titiŵachitiya vamampha, titiŵalenge lisungu ndipuso titiŵayanja. Zuŵa lelosi titesesa kuwovya anyidu. Ivi vititiwovya kuti tikondwengi ndipuso kuti tijengi mwachimangu. (Aga. 5:22, 23) Kwali vinthu ve wuli pa umoyu widu, tikondwengi asani tiyezga Yehova pa nkhani ya kupaska kweniso asani tigwira ntchitu ndi iyu!—Nthanthi 3:9, 10.