1, 2. (a) Kumbi chanju ndi chivwanu vikoliyana wuli? (b) Tikambisanengi mafumbu nanga?

TITANJA Yehova “chifukwa iyu ndiyu wangwamba kutiyanja.” (1 Yoh. 4:19) Iyu watumbika ateŵeti ŵaki akugomezeka vo vilongo kuti watiŵayanja. Asani titanja ukongwa Chiuta, tija ndi chivwanu chakukho chakuti iyu waliku kweniso kuti wapereka mphotu kwaku wo watiŵayanja.—Ŵerengani Ŵahebere 11:6.

² Yehova waleka cha kupereka mphotu kwa ateŵeti ŵaki akugomezeka. Mwaviyo, tikhumbika kuja ndi chivwanu chakukho kuti Chiuta wapereka mphotu kwaku wo atimupenja ndi mtima wosi chifukwa “chivwanu nkhuja ndi chigomezu chakukho pa vinthu vo munthu walindiza.” (Ŵah. 11:1) Kuja ndi chivwanu kusazgapu kulindiza vitumbiku vo Chiuta walayizga. Kumbi kulindiza kuti tazamulonde mphotu, kutitiwovya wuli? Kumbi mu nyengu yakali, Yehova wangupereka wuli mphotu kwa ateŵeti ŵaki, nanga mazuŵa nganu watiŵapasa wuli mphotu? Tiyeni tikambisani.

3. Kumbi ndi layizgu nili lo le pa Malaki 3:10?

³ Yehova Chiuta wakhumbisisa kupereka mphotu kwa ateŵeti ŵaki akugomezeka. Mwaviyo watitipempha kuti tichitepu kanthu kuti tizilonde vitumbiku. Mazu ngaki ngatiti: “Yehova mulongozgi wagulu la angelu wakamba kuti: ‘Ndiyeseni chondi, . . . kuti muwoni asani ndilekengi kukujuliyani makhomu ngakuchanya ndi kukupunguliyani vitumbiku vinandi.’” (Mal. 3:10) Asani tiyesesa kuchita vo iyu wakhumba, tilongo kuti tiwonga ndi mtima wosi vo walayizga.

4. Ntchifukwa wuli tigomeza vo Yesu wangukamba pa Mateyu 6:33?

⁴ Yesu wangulayizga akusambira ŵaki kuti asani aŵikengi panthazi Ufumu, Chiuta waŵawovyengi. (Ŵerengani Mateyu 6:33.) Iyu wangukamba viyo chifukwa waziŵanga kuti Yehova wachita vinthu mwakugomezeka nyengu zosi. Yesu waziŵanga kuti Chiuta watondeka cha kufiska vo walayizga. (Yes. 55:11) Nasi tingasimikiza kuti asani timugomezengi ndi mtima wosi, wafiskengi layizgu laki lakuti: “Ndikulekeningi cha ndipuso ndikujowoningi cha.” (Ŵah. 13:5) Layizgu ili likoliyana ndi mazu ngo Yesu wangukamba ngakuti tipenjengi dankha Ufumu waku Chiuta ndi urunji waki.

5. Ntchifukwa wuli vo Yesu wangumuka Petro, vingatiwovya kuja ndi chivwanu chakukho?

⁵ Nyengu yinyaki wakutumika Petro wangufumba Yesu kuti: “Tasiya vinthu vosi ndikukulondoni; kumbi tazamusaniyanji?” (Mat. 19:27) M’malu mwakumuchenya chifukwa chakufumba fumbu lenili, iyu wangukambiya akusambira ŵaki kuti azamulonde mphotu chifukwa chakujipereka kwawu. Akutumika akugomezeka ndi  ŵanthu anyaki amulamuliya limoza ndi Yesu kuchanya. Chinanga ndi sonu napu pe mphotu. Yesu wanguti: “Weyosi yo wasiya nyumba, abali, azichi, awisi, anyina, ŵana pamwenga minda chifukwa cha zina langu, wazamusaniya vinthu vinandi ukongwa kuluska venivi ndipuso wazamulonde umoyu wamuyaya.” (Mat. 19:29) Akusambira ŵaki alonde vitumbiku vinandi kuluska vinthu vo asiya. Kumbi anyinafwi, awusefwi, abali, azichi kweniso ŵana wo tisaniya mumpingu wachikhristu mbakuzirwa cha kuluska vinthu vosi vo tikusiya chifukwa cha Ufumu?

6. Ntchifukwa wuli Yehova walayizga ateŵeti ŵaki kuti wazakuŵapasa mphotu?

⁶ Chifukwa chakuti Yehova walayizga kuti waŵapasengi mphotu ateŵeti ŵaki, vitiŵawovya kuja akugomezeka pa nyengu yo ateseka. Chinanga kuti sonu ateŵeti akugomezeka aku Yehova atumbikika, yiwu akhumbisisa kuzilonde vitumbiku vinandi kunthazi. (1 Tim. 4:8) Tija ndi chivwanu chakukho chifukwa tigomeza kuti Yehova “wapereka mphotu kwaku wo atimupenja ndi mtima wosi.”—Ŵah. 11:6.

7. Ntchifukwa wuli chilindiza che nge ndondowa?

⁷ Pa Upharazgi wa Paphiri Yesu wanguti: “Kondwani ndipu mukondwi ukongwa, pakuti mphotu yinu njikulu kuchanya, chifukwa ndimu so angutombozge achimi wo ŵengaku imwi mwechendajeku.” (Mat. 5:12) Chinanga kuti anyaki alindiza kuzilonde mphotu kuchanya, kuzija ndi umoyu wamuyaya muparadayisu pacharu chapasi, nakuso ‘nkhwakukondwesa ukongwa.’ (Sumu 37:11; Luka 18:30) Kwali tilutengi kuchanya pamwenga tijengi pacharu chapasi, chilindiza chidu cho chingaŵa nge “ndondowa ya umoyu, ntchakugomezeka kweniso ntchakukho.” (Ŵah. 6:17-20) Nge mo ndondowa yitovye kuti boti lileki kuluta ndi mphepu, asani te ndi chilindiza chakukho chakuti tazamulonde mphotu, chingatiwovya kuti tilekengi kufipa mtima, tiŵanaŵanengi umampha kweniso tilutirizgi kuja pa ubwezi wakukho ndi Chiuta. Chingatiwovya so kuja ndi nthazi kuti tikunthiyepu masuzgu.

8. Kumbi vo Chiuta walayizga vititiwovya wuli kuti tilekengi kufipa mtima ukongwa?

⁸ Malayizgu nga m’Bayibolu ngatitiwovya kuti tilekengi kufipa mtima chifukwa cha masuzgu ngo tikumana nangu. Vo Chiuta walayizga vititovya nge mo mafuta ngatovye munthu asani wapwetekeka. Ntchinthu chakuchiska kuziŵa kuti tikhumbika ‘kuponye Yehova masuzgu ngidu’ chifukwa ‘watiwovyengi’! (Sumu 55:22) Tigomezengi ndi mtima wosi kuti Chiuta wangatichitiya ‘vinthu vinandi ukongwa kuluska vosi vo tipempha pamwenga kuŵanaŵana.’ (Ŵaef. 3:20) Ŵanaŵaniyani fundu iyi: Yehova watichitiyengi ŵaka vinandi cha kweni “vinandi ukongwa”!

9. Ntchifukwa wuli tigomeza kuti Yehova watitumbikengi?

⁹ Kuti tizilonde mphotu, tikhumbika kugomeza Yehova ndi mtima wosi kweniso kuvwiya ulongozgi waki. Mosese wangukambiya Ayisraele kuti: “Yehova wakutumbikeningi mucharu cho Yehova Chiuta winu wakupaseningi nge chihara, asani muvwiyengi mazu ngaku Yehova Chiuta winu ndipuso kusunga marangu ngaki ngosi ngo nditikupasani msanawale. Chifukwa Yehova Chiuta winu wakutumbikeningi nge mo wakukulayizgiyani.” (Mar. 15:4-6) Kumbi namwi mugomeza ndi mtima wosi kuti Yehova wakutumbikeningi asani mulutirizengi kumuteŵete mwakugomezeka? Mwambula kukayika, mwe ndi chifukwa chamampha chakugomeze viyo.

10, 11. Kumbi Yehova wangumutumbika wuli Yosefe?

¹⁰ Bayibolu likulembeka kuti litiwovyi. Mwe nkhani zinandi za mo Chiuta wangupasiya mphotu ateŵeti ŵaki akugomezeka. (Ŵar. 15:4) Yosefe ntchakuwoniyapu chamampha. Chifukwa chakuti abali ŵaki angumuchitiya chiŵembu ndipu pavuli paki muwolu wa abwana ŵaki wangumupusikiya, wanguŵikika mujeri ku Egipiti.  Kumbi venivi vinguchitisa kuti waleki kuja pa ubwezi ndi Chiuta? Awa! ‘Yehova wanguja ndi Yosefe ndipu wangulutiriza kumulongo chanju chambula kumala . . . Yehova wenga ndi Yosefe ndipu wangumuwovya kuti vosi vo wachitanga vimuyendiyengi umampha.’ (Chiy. 39:21-23) Pa masuzgu ngosi ngo Yosefe wangukumana nangu, wanguzizipizga ndipu wangulindiza Chiuta waki.

¹¹ Pati pajumpha vyaka, Farao wangutuza Yosefe mujeri ndipu wangusankha kapolu mwenuyu kuja wakulamuliya wachiŵi ku Egipiti. (Chiy. 41:1, 37-43) Muwolu waki wangubala ŵana anthurumi ŵaŵi. “Yosefe wangudana mwana waki wakwamba kuti Manase, chifukwa wanguti, ‘Chiuta wandichitisa kuti ndiluwi masuzgu ngangu ngosi kweniso nyumba yosi ya ada.’ Ndipu wachiŵi wangumudana kuti Efraimu, chifukwa wanguti, ‘Chiuta wandiyandanisa mucharu chamasuzgu.’” (Chiy. 41:51, 52) Yosefe wangulutiriza kuja wakugomezeka kwaku Chiuta ndipu wangupasika vitumbiku vo vinguchitisa kuti Ayisraele ndi Aegipiti aleki kufwa ndi nja. Iyu wanguziŵa kuti Yehova ndiyu wangumupasa vitumbiku.—Chiy. 45:5-9.

12. Ntchinthu wuli cho chinguwovya Yesu kuja wakugomezeka pa masuzgu ngo wangukumana nangu?

¹² Mwakuyanana ŵaka, Yesu Khristu nayu wanguvwiya Chiuta chinanga kuti wangukumana ndi masuzgu nganandi ngakwesa chivwanu chaki ndipu wangupasika mphotu. Ntchinthu wuli chingumuwovya kuti wakunthiyepu? Mazu ngaku Chiuta ngakonkhoska kuti: “Chifukwa cha likondwa lo linguŵikika panthazi paki, iyu wangukunthiyapu chimiti chakutombozgekiyapu, wanguvitoliyaku kanthu cha vinthu vakuchitisa soni vo vingumuchitikiya.” (Ŵah. 12:2) Yesu wangusaniya nadi likondwa chifukwa wangufiska kutowesa zina laku Chiuta. Kusazgiyapu pa fundu yeniyi, vinguchitisa kuti Awisi amuyanji ndipuso amupasi maudindu nganandi ngapachanya. Bayibolu likamba kuti ‘wakuja kujanja lamaryi la mpandu wachifumu waku Chiuta.’ Likamba so kuti: ‘Chiuta wakumukweza kuja pa udindu wapachanya ndipu wakumuchitiya lisungu ndi kumupasa zina lakuluska mazina ngosi.’—Ŵaf. 2:9.

13, 14. Kumbi Yehova watuvwa wuli ndi vo titimuchitiya?

¹³ Tigomeza kuti Yehova wawonga vosi vo titesesa kuchita pakumuteŵete. Iyu waziŵa vinthu vo vititifipisa mtima pamwenga vo vititichitisa kuti tijikayikiyengi. Yehova watitichitiya lisungu asani tisuzgika chifukwa cha kusoŵa ndalama, kutama pamwenga kusuzgika maŵanaŵanu vo vichitisa kuti titondekengi kuchita vinandi pa uteŵeti widu wakupaturika. Tigomeza ndi mtima wosi kuti Yehova waluwa cha vo ateŵeti ŵaki achita kuti alutirizi kuja akugomezeka kwaku iyu.—Ŵerengani Ŵahebere 6:10, 11.

¹⁴ Kumbukani so kuti tingapemphera kwaku Chiuta yo ‘watuvwa pempheru,’ ndipu tigomeza kuti wavwisiyengi asani titimukambiya masuzgu ngidu. (Sumu 65:2) “Ada alisungu ndipuso Chiuta wakupembuzga” watiwovyengi kuti tileki kusuzgika maŵanaŵanu kweniso timuteŵetiyengi. Iyu wangachita venivi mwakugwirisiya ntchitu Akhristu anyidu. (2 Ŵakor. 1:3) Asani tichitiya lisungu anyidu, tikondwesa mtima waku Yehova. Bayibolu likamba kuti: “Yo wachitiya lisungu munthu wakusika, wabwerekesa Yehova ndipu wazakumuweze pa vo wachita.” (Nthanthi 19:17; Mat. 6:3, 4) Mwaviyo, asani titiŵawovya ndi mtima wosi ŵanthu wo akumana ndi masuzgu, Yehova wawona kuti tabwerekesa iyu. Iyu walayizga kuti waŵapasengi mphotu ŵanthu wo alongo lisungu anyawu.

15. Kumbi mulindiza kuzilonde mphotu wuli? (Wonani chithuzi cho che papeji 24.)

¹⁵ Akhristu akusankhika achiskika chifukwa  alondiyengi “chisoti chachifumu chaurunji, cho Ambuya, wo mbakweruzga a urunji, aŵapasengi . . . nge mphotu mu zuŵa lo.” (2 Tim. 4:7, 8) Chinanga kuti ve viyo, asani Chiuta watilayizga vinthu vakupambana ndi vo walayizga Akhristu anyidu, tingadandawulanga cha. A “mbereri zinyaki” mamiliyoni nganandi, akhumbisisa ndi mtima wosi kuzilonde mphotu ya umoyu wambula kumala pacharu chapasi cha paradayisu. Yiwu “azamukondwa ndipu azamuja ndi chimangu chikulu.”—Yoh. 10:16; Sumu 37:11.

16. Kumbi tipembuzgika wuli ndi fundu yo ye pa 1 Yohane 3:19, 20?

¹⁶ Nyengu zinyaki tingajivwa kuti tichita vinandi cha pamwenga tingawona kuti Yehova wakondwa cha ndi vo titesesa kuchita. Tingakayikiya kuti ndisi akwenere kulonde mphotu yeyosi. Tingaluwanga cha kuti “Chiuta ndi mukulu kuluska mtima widu ndipu waziŵa vosi.” (Ŵerengani 1 Yohane 3:19, 20.) Chinanga tingawona kuti sembi yo tipereka njimana, iyu watumbika uteŵeti wewosi wo tingachita mwakutuliya pasi pa mtima chifukwa chakuti te ndi chivwanu kweniso titimuyanja.—Marko 12:41-44.

17. Kumbi ndi vitumbiku wuli vo tilonde sonu?

¹⁷ Chinanga kuti te mu mazuŵa ngakumaliya nga charu chiheni ichi, Yehova watiŵatumbika mbwenu ŵanthu ŵaki. Iyu wayesesa kuti akondwengi ndi chakurya chinandi cho alonde kuluska kali. (Yes. 54:13) Nge mo Yesu wangulayizgiya, Yehova watitipasa mphotu sonu chifukwa te mubanja lachanju lo ndi gulu lapacharu chosi la abali ndi azichi. (Marko 10:29, 30) Kusazgiyapu pa fundu yeniyi, ŵanthu wo apenja Chiuta ndi mtima wosi aja ndi chimangu mumtima, agutiskika ndipuso aja ndi likondwa. Vinthu venivi viluska vinthu vinyaki vosi.—Ŵaf. 4:4-7.

18, 19. Kumbi ateŵeti aku Yehova atuvwa wuli chifukwa cha vitumbiku vo alonde?

¹⁸ Ateŵeti aku Yehova pacharu chosi chapasi, azomereza kuti Chiuta watiŵapasa vitumbiku. Mwakuyeruzgiyapu, Bianca wa ku Germany wangukamba kuti: “Ndiziŵa cha kuti ndingamuwonga wuli Yehova chifukwa cha kundiwovya kuti ndileki kudandawula kweniso pakuŵa nani zuŵa ndi zuŵa. Mucharu ichi muchitika vinthu vinandi viheni. Kweni asani ndigwira ntchitu limoza ndi Yehova ndiwona kuti ndini wakuvikilirika. Nyengu yeyosi yo ndipereka sembi kwaku iyu, watindiweze vitumbiku vinandi ukongwa.”

¹⁹ Ŵanaŵaniyani Paula wa ku Canada yo we ndi vyaka 70, yo watama matenda ngakulu ngakunanga musana. Iyu wakamba kuti: “Chinanga kuti nditenda ukongwa cha, nditondeka cha kupharazga. Nditesesa kupharazga mu nthowa zakupambanapambana nge kugwirisiya ntchitu foni pamwenga kupharazga asani ndasaniya mpata. Kuti ndichiskikengi, nde ndi buku lo ndilembamu malemba kweniso fundu zakutuliya mumabuku ngidu, lo nditiliŵerenga nyengu zosi. Buku lenili nditilidana kuti, ‘Buku Langu Lakundichiska.’ Vinthu vakuguŵisa va kanyengu asani tiŵanaŵaniya vo Yehova wakutilayizga. Nyengu zosi Yehova ngwakunozgeka kutiwovya chinanga tingakumana ndi masuzgu wuli.” Panyaki masuzgu nginu ngapambana ndi ngaku Bianca ndi Paula. Muŵanaŵaniyengi mo Yehova wakukutumbikiyani kweniso mo wakutumbikiya anyinu. Mungachita umampha kuŵanaŵaniya so mo Yehova watikutumbikiyani sonu ndipuso mo wazakukutumbikiyani kunthazi.

20. Kumbi tazamulondiyanji asani tilutirizengi kuteŵete Yehova ndi mtima wosi?

²⁰ Mungaluwanga cha kuti ‘mwazamutumbikika ukongwa’ chifukwa cha marombu nginu ngakutuliya pasi pa mtima. Mutenere kuja ndi chigomezu kuti ‘asani mwachita khumbu laku Chiuta, mwazamulonde vo wakukulayizgani.’ (Ŵah. 10:35, 36) Mwaviyo, tiyeni tilutirizi kuja ndi chivwanu chakukho ndipuso kuteŵete Yehova ndi mtima wosi. Tingafiska kuchita venivi chifukwa tiziŵa kuti Yehova wazakutipasa mphotu pa nyengu yaki.—Ŵerengani Ŵakolose 3:23, 24.