Kumbi mukuŵerenga magazini nga Chigongwi cha Alinda ngo ngatuwa pambula kuswera yapa? Asani ndi viyo, yesani kumuka mafumbu yanga:

Kumbi pe ukaboni wa mu Malemba wo ulongo kuti Chiuta watitilenge lisungu?

Pa nyengu yo Ayisirayeli ŵenga ku ukapolu ku Ijipiti, Chiuta waziŵanga masuzgu ngo akumananga nangu ndipu wavwanga nge mo yiwu avwiyanga. (Chitu. 3:7; Yesa. 63:9) Taŵanthu tikulengeka mu chikozgu chaku Chiuta ndipu nasi tingalongo lisungu nge iyu. Chiuta watitilenge lisungu chinanga tingajiwona kuti te akwenere cha chanju chaki.—wp18.3, peji 8-9.

Kumbi vo Yesu wasambizanga vinguŵawovya wuli ŵanthu kuti aleki kuchita sankhu?

Ayuda anandi mu nyengu yaku Yesu ŵenga asankhu. Kweni Khristu wangukamba kuti kujiyuyuwa nkhwakukhumbika ndipu wangusambiza kuti kujikuzga chifukwa cha mtundu, nkhuheni. Iyu wangukambiya akusambira ŵaki kuti awonanengi nge abali.—w18.06, peji 9-10.

Yehova wangumuzomereza cha Mozesi kusere mucharu cho wangulayizga. Kumbi isi tisambiranjipu?

Mozesi wenga pa ubwezi wamampha ndi Yehova. (Mara. 34:10) Ayisirayeli ŵe pafupi kufika kucharu cho Chiuta wanguŵalayizga, angudandawula so chifukwa cha kusoŵa kwa maji. Chiuta wangutuma Mozesi kuti walongoro ndi jalawi. Kweni mumalu mwakulongoro nalu iyu wangulipuma. Yehova watenere kuti wangukwiya chifukwa Mozesi wangutondeka kulondo ulongozgi wo wangumupaska pamwenga chifukwa chakukamba nge kuti iyu ndiyu wangutuza maji mumalu mwakupereka unkhankhu kwaku Chiuta. (Maŵe. 20:6-12) Ivi vititisambiza kuti tikhumbika kuvwiya Yehova ndi kumupaska unkhankhu.—w18.07, peji 13-14.

Ntchifukwa wuli kungaŵa kunanga kuyeruzga mwakutole kawonekeru ka kubwalu?

Pe vinthu vitatu vo kanandi vichitiska ŵanthu kuti ayeruzgengi mwakutole vo awona ndi masu. Vinthu ivi ndi mtundu, chuma ndi msinkhu. Kweni tikhumbika kuyesesa kuwona anyidu nge mo Yehova watiŵawone! (Machi. 10:34, 35)—w18.08, peji 8-12.

Kumbi Akhristu akukota angawovya mu nthowa zinyaki nizi?

Mura wakukota yo uteŵeti waki ukusintha, Chiuta wakondwa nayu ndipu wangachita vinandi pakovya abali ndi azichi. Iyu wangapharazgiya munthulumi pamwenga munthukazi yo wakutorana ndi Kaboni, kuwovya akulopwa, kuchitiska masambiru nga Bayibolu ndi kusazgiyaku uteŵeti waki.—w18.09, peji 8-11.

Kumbi Akhristu ŵe ndi vidya nivi vo agwiriskiya Ntchitu pakusambiza?

Makadi ngakuziŵisa ŵanthu za jw.org ndi timapepala takudaniya ŵanthu. Te ndi so timapepala 8 to tikulembeka mwambula kusuzga kugwiriskiya ntchitu ndipuso Chigongwi cha Alinda ndi Jani Masu! Kweniso te ndi timabuku ndi mabuku ngo tisambiriya Bayibolu ndi ŵanthu ndi mavidiyo nganayi kusazgapu yakuti Ntchifukwa Wuli Tikhumbika Kusambira Bayibolu?—w18.10, peji 16.

Kumbi ‘tingagula wuli uneneska’ nge po pakambiya pa Nthanthi 23:23?

Tikhumbika ndalama cha kuti tiguli uneneska. Kweni tikhumbika kupatuwa nyengu ndi kuchitapu kanthu kuti tiwusaniyi.—w18.11, peji 4.

Kumbi mo Hoseya wanguchitiya vinthu ndi muwolu waki Gomeri vititisambizanji?

Gomeri wachitanga chigololu mwakuwerezawereza, kweni Hoseya wamugowokiyanga. Asani yumoza mu banja wachita chigololu, yo waleka kunanga wangasankha kumugowoke. Asani munthu wayamba so kugonana ndi mulumu waki pamwenga muwolu waki yo wachita chigololu, ndikuti palivi chifukwa cha mu malemba chakumupatiya.—w18.12, peji 13.