DIANA we ndi vyaka vakujumpha 80. Mulumu waki watamanga nthenda yo yinanga wongu ndipu kwa vyaka vinandi wechendafwi, wajanga kumalu ngakusungiyaku ŵanthu akukota. Diana wakhumbikanga so kukunthiyapu nyifwa ya ŵana ŵaki ŵaŵi anthulumi ndipuso we ndi kansa ya mu maŵe. Kweni nyengu zosi wawoneka wakukondwa pa Nyumba ya Ufumu ndi mu uteŵeti.

John wenga wakuwonere dera kwa vyaka vakujumpha 43. Iyu wawuyanjanga ukongwa uteŵeti uwu. Kweni wanguleka uteŵeti uwu kuti wakaphweriyengi mubali waki yo watamanga ndipu sonu wateŵete mu mpingu wa kumuzi kwaki. Asani abali ndi azichi wo atimuziŵa akumana nayu pa unganu wadera pamwenga wachigaŵa, wawoneka kuti wakusintha cha. Iyu weche kuwoneka wakukondwa.

Ntchifukwa wuli Diana ndi John akondwa? Kumbi vingachitika wuli kuti munthu yo watama kweniso kusuzgika maŵanaŵanu wakondwengi? Ndipu vingachitika wuli kuti munthu yo wakuleka uteŵeti wanyengu zosi wakondwengi? Bayibolu lititikambiya chifukwa chaki, lititi: “Murunji wakondwengi mwaku Yehova.” (Sumu 64:10) Tingavwisa fundu iyi asani tingaziŵa vo vichitiska kuti munthu wakondwengi ndipuso vo vingachitiska kuti walekengi kukondwa.

Pe vinthu vinyaki vo vichitiska kuti tikondwengi. Mwakuyeruzgiyapu, ŵanaŵaniyani za ŵanthu wo akhumba kutorana. Pamwenga apapi wo alindizga kuja ndi mwana kweniso munthu yo wapaskika uteŵeti. Vinthu venivi vichitiska kuti munthu wakondwengi ndipu mphaki kuchita viyo chifukwa vituliya kwaku Yehova. Iyu ndiyu wakwambisa nthengwa, wakuchitiska kuti ŵanthu abalanengi kweniso wapereka mauteŵeti mu mpingu.—Chiya. 2:18, 22; Sumu 127:3; 1 Timo. 3:1.

Kweni vinthu ivi vingatipaska likondwa kwa nyengu yimanavi. Mwakuyeruzgiyapu, munthu yo tikutorana nayu wangachita chigololu pamwenga kufwa. (Ezeki. 24:18; Hose. 3:1) Ŵana anyaki avwiya cha apapi ŵawu ndi Chiuta ndipu nyengu zinyaki angasezgeka. Ŵana aku Samuyeli ateŵetiyanga Yehova mu nthowa yakwenere cha ndipu vo Davidi wanguchita vinguchitiska  kuti mubanja laki muŵi masuzgu. (1 Samu. 8:1-3; 2 Samu. 12:11) Ivi vingachitiska kuti tiŵi ndi chitima ndi kusuzgika maŵanaŵanu. Kukamba uneneska, vinthu ivi vingatipaska likondwa cha.

Mwakuyanana ŵaka, uteŵeti wo tingapaskika mu gulu laku Yehova ungamala chifukwa cha matenda, kuphwere munthu wa mubanja lidu pamwenga asani gulu lasintha vinthu vinyaki. Anandi wo akuŵasiyisa uteŵeti akamba kuti akondwanga ukongwa pa nyengu yo achitanga uteŵeti.

Ivi vilongo kuti vinthu vinyaki vingatipaska likondwa kwa nyengu yimanavi ŵaka. Kweni kumbi pe chinthu chinyaki cho chingatipaska likondwa lambula kumala, chinanga vinthu vingasintha pa umoyu? Chitenere kuti chilipu, chifukwa Samuyeli, Davidi ndi ŵanthu anyaki akondwanga chinanga kuti akumananga ndi masuzgu.

Yesu waziŵanga vo likondwa leneku ling’anamuwa. Wechendazi pacharu chapasi, Bayibolu lititikambiya kuti iyu ‘wakondwanga pa masu paku [Yehova] nyengu zosi.’ (Nthanthi 8:30) Kweni pa nyengu yo wenga pacharu chapasi, nyengu zinyaki wakumananga ndi masuzgu ngakulu ukongwa. Chinanga kuti venga viyo, Yesu wakondwanga kuchita khumbu la Awisi. (Yoha. 4:34) Kumbi iyu wanguchita wuli ndi urwirwi wo wanguvwa kwati kwaja kamanavi kuti wafwi? Bayibolu likamba kuti: “Chifukwa cha likondwa lo linguŵikika panthazi paki, iyu wangukunthiyapu chimiti chakutombozgekiyapu.” (Ahe. 12:2) Tiyeni tikambiskani vinthu viŵi vo Yesu wangukamba kuti vingatiwovya kuja ndi likondwa leneku.

Pa nyengu yinyaki akusambira 70 anguwere kwaku Yesu ŵati amaliza kupharazga. Yiwu angukondwa ukongwa chifukwa anguchita vinthu vakuziziswa ndipu atuzganga ndi viŵanda viyo. Kweni Yesu wanguŵakambiya kuti: “Mungakondwanga chifukwa chakuti mizimu yakuvwiyani cha, kweni kondwani chifukwa chakuti mazina nginu ngalembeka kuchanya.” (Luka 10:1-9, 17, 20) Kukamba uneneska, chinthu chakukhumbika ukongwa nkhuŵa wakuzomerezeka pa masu paku Yehova kuluska uteŵeti wewosi wapade wo tingapaskika. Iyu wazakuŵaluwa cha ateŵeti ŵaki akugomezgeka ndipu venivi vititikondwesa ukongwa.

Pa nyengu yinyaki po Yesu wasambizanga, munthukazi munyaki wangukwaskika ukongwa  ndi vo Yesu wakambanga. Munthukazi uyu wanguti anyina aku Yesu ŵenga akutumbikika pamwenga kuti akukondwa. Yesu wangumumuka kuti: “Kweni mbakutumbikika [pamwenga kuti mbakukondwa] wo atuvwa mazu ngaku Chiuta ndi kungasunga.” (Luka 11:27, 28) Mbuneneska nadi kuti tikondwa asani te ndi ŵana. Kweni cho chititikondwesa ukongwa nkhuvwiya Chiuta ndi kuja nayu pa ubwezi wamampha.

Kukamba uneneska, tikondwa ukongwa asani taziŵa kuti te akuzomerezeka pamasu paku Yehova. Chinanga tingakumana ndi mayeseru tikondwa mbwenu. Ndipu asani tilutirizga kuja akugomezgeka tikondwa ukongwa. (Aro. 5:3-5) Kweniso Yehova wapereka mzimu wakupaturika kwaku wo atimugomezga ndipu likondwa ndi jalidu limoza lo mzimu utuzga. (Aga. 5:22) Lekani pa Sumu 64:10 pakamba kuti: “Murunji Wakondwengi Mwaku Yehova.”

Ndichu chifukwa chaki Diana ndi John, wo taŵazumbuwa kukwamba akondwa chinanga kuti akumana ndi masuzgu. Diana wanguti: “Ndithaŵiya kwaku Yehova, nge mo mwana wathaŵiya kwa mupapi waki.” Iyu wangukamba so kuti: “Ndiwona kuti watindipaska nthazi kuti ndipharazgengi mwakukondwa mwezi wewosi.” John weche kupharazga mwaphamphu chinanga kuti wakuleka uteŵeti wakuwonere dera. Iyu wangukonkhoska vo vitimuwovya kuti wakondwengi. John wangukamba kuti mu 1998 angumusankha kuti wakasambizengi Sukulu Yakusambiza Uteŵeti ndipu kutuliya pa nyengu iyi, wasambira ukongwa Bayibolu pakuyija kuluska mo wachitiyanga kali. Pakukamba zaku iyu ndi muwolu waki, wanguti: “Venga vambula kusuzga kusintha chifukwa nyengu zosi takhumbisiskanga kuchita uteŵeti wewosi wo Yehova watipaskanga. Tadandawulanga cha asani uteŵeti wasintha.”

Abali ndi azichi anandi nawu awona kuti mazu nga pa Sumu 64:10 ngauneneska. Mwakuyeruzgiyapu, banja linyaki linguteŵete pa beteli kwa vyaka vakujumpha 30 ku United States. Pavuli paki, anguŵakambiya kuti akachitengi upayiniya wapade. Yiwu angukamba kuti: “Mwa kawi munthu uchita chitima asani waleka chinthu cho wayanjanga.” Kweni “ungajaliya ŵaka kuchita chitima cha nyengu zosi.” Yiwu angwamba kusere mu uteŵeti ndi mpingu ŵati afika ŵaka. Angukamba so kuti: “Tachitanga kuzumbuwa vinthu vinyaki vo takhumbanga mu pempheru. Ndipu tachiskikanga ndi kukondwa asani Chiuta wamuka vo tamupemphanga. Pati pajumpha kanyengu kamanavi, abali ndi azichi anyaki mu mpingu widu angwamba kuchita upayiniya ndipu tingusaniya masambiru ngaŵi ngo ngalutanga panthazi.”

Nyengu zinyaki chija chipusu cha kukondwa ndipu tikumanengi ndi vinthu vo vingachitiska kuti tileki kukondwa. Kweni Yehova wangutuma mteŵeti waki kulemba mazu ngo nge pa Sumu 64:10. Chinanga kuti nyengu zinyaki tigongowa ndipu vinthu vingasintha pa umoyu, tigomezga kuti ‘arunji akondwengi mwaku Yehova.’ Ndipuso tilindizga nyengu yo Yehova wazamufiska layizgu laki lakuti walengengi “charu chifya ndi kuchanya kufya.” Ŵanthu wosi ‘azamusekere ndi kukondwa kwamuyaya’ chifukwa cha vosi vo Chiuta wazamuchita.—Yesa. 65:17, 18.

Ivi ving’anamuwa kuti ŵanthu azamutamanga cha kweniso zuŵa lelosi azamuyukanga ndi nthazi. Kwali tingukumana ndi masuzgu wuli kuvuli, palivi ngo tazakungakumbuka. Bayibolu lititisimikiziya kuti “vinthu vakali vazamukumbukika so cha pamwenga kusere mumtima.” Chiyuka chazamuchitiska kuti ŵanthu azikumani so ndi abali ŵawu. Anandi azamukuvwa nge mo anguchitiya apapi a msungwana wa vyaka 12 yo Yesu wangumuyuska. Bayibolu likamba kuti “angukondwa ukongwa.” (Mariko 5:42)Pakumaliya, munthu weyosi pacharu chapasi wazamuja “murunji” ndipu ‘wazamukondwa mwaku Yehova’ kwamuyaya.