1-2. (a) Ntchifukwa wuli tingakhaza kuti Yesu wangatipaska nthowa yipusu yakukumbukiya nyifwa yaki? (b) Kumbi tikambiskanengi mijalidu wuli yaku Yesu?

KUMBI mungakonkhoska vo vichitika pa Chakurya Chamazulu cha Ambuya? Tikayika cha kuti tanandi tikumbuka vo vichitika pa nyengu iyi. Ntchifukwa wuli tikumbuka? Ntchifukwa chakuti pa mwambu uwu tigwiriskiya ntchitu vinthu vimanavi ŵaka vambula kusuzga kunozga. Chinanga kuti ve viyo, mwambu uwu ngwakukhumbika ukongwa. Mwaviyo, tingajifumba kuti, ‘Ntchifukwa wuli tigwiriskiya ntchitu vinthu vimanavi ŵaka?’

² Pa nyengu yo wachitanga uteŵeti waki panu pasi, Yesu waziŵikanga kuti wasambizanga uneneska mu nthowa yipusu, yakuvwika umampha ndipuso yambula kusuzga kuvwa. (Mate. 7:28, 29) Mwakuyanana ŵaka, tingakhaza kuti iyu wangatipaska so nthowa yambula kusuzga yakukumbukiya * nyifwa yaki. Tiyeni tikambiskani va Chakurya Chamazulu cha Ambuya ndi vinthu vinyaki vo Yesu wangukamba ndi kuchita. Ivi vitiwovyengi kuti tivwisi mo Yesu wangulongore kuti ngwakujiyuyuwa, ngwachiganga ndipuso kuti ngwachanju. Tisambirengi so mo tingachitiya nge iyu.

3. Nge po pakambiya pa Mateyu 26:26-28, kumbi Yesu wangugwiriskiya ntchitu vinthu vimanavi nivi pakuyambisa mwambu wakukumbukiya nyifwa yaki, nanga vinthu ivi vimiyanji?

³ Yesu wenga ndi akutumika 11 pa nyengu yo wayambisanga  mwambu wakukumbukiya nyifwa yaki. Iyu wangugwiriskiya ntchitu vinthu vo vingujaku pa Pasika pakuyambisa mwambu uwu. (Ŵerengani Mateyu 26:26-28.) Yesu wanguto chiŵandi chambula chakutupisa ndi vinyu yo wengapu kali. Wangukambiya akutumika kuti vinyu ndi chiŵandi vimiya ndopa ndi liŵavu laki lambula ubudi. Akutumika atenere kuti anguzizwa cha Yesu wati wagwiriskiya ntchitu vinthu vimanavi pa chakuchitika chakuzirwa chenichi. Ntchifukwa wuli anguzizwa cha?

4. Kumbi vo Yesu wangukambiya Marita vititiwovya kuvwisanji?

⁴ Ŵanaŵaniyani vo vinguchitika mu chaka chachitatu cha uteŵeti waku Yesu. Iyu wanguluta kwaku Lazaro, Marita ndi Mariya wo ŵenga abwezi ŵaki. Wati wafika, wangwamba kuŵasambiza. Kweni Marita wangutangwanika ndi kumubikiya chakurya. Yesu wati wawona ivi, wangumukambiya kuti nyengu zinyaki vakurya vinandi vakukhumbika cha. (Luka 10:40-42) Kwati kwaja kamanavi kuti wapereki umoyu waki, Yesu wanguchita vo wangukambiya Marita. Iyu wangugwiriskiya ntchitu vakurya vimanavi pakwambisa mwambu wa Chikumbusu. Kumbi ivi vititisambizanji vaku Yesu?

5. Kumbi vakurya vimanavi vo Yesu wangugwiriskiya ntchitu vilongo kuti wenga ndi jalidu wuli, ndipu fundu yeniyi yikoliyana wuli ndi Afilipi 2:5-8?

⁵ Yesu wenga wakujiyuyuwa mu vakukamba ndi vakuchita vaki vosi. Mwaviyo, tizizwa cha kuti wangulongo jalidu ili kwati kwaja kamanavi kuti wabayiki. (Mate. 11:29) Yesu wanguziŵa kuti kwaja kamanavi kuti wapereki sembi. Wanguziŵa so kuti Yehova wamuyuskengi kuti wakaje fumu kuchanya. Chinanga kuti wanguziŵa venivi, kweni wangujikuzga cha ndi kuchita phwandu likulu lakukumbukiya nyifwa yaki. Mumalu mwaki, wangukambiya akusambira ŵaki kuti agwiriskiyengi ntchitu vakurya vimanavi venivi pakumukumbukiya kamoza pa chaka. (Yoha. 13:15; 1 Akori. 11:23-25) Vakurya vimanavi vo wangugwiriskiya ntchitu vilongo kuti Yesu wenga wakujikuzga cha. Tikondwa ukongwa kuti Fumu yidu yakuchanya njakujiyuyuwa.​—Ŵerengani Afilipi 2:5-8.

6. Kumbi tingachita wuli kuti tije akujiyuyuwa nge Yesu asani takumana ndi masuzgu?

⁶ Kumbi tingachita wuli kuti tije akujiyuyuwa nge Yesu? Mwa kuŵanaŵaniya dankha vakukhumba va anyidu mumalu mwa vakukhumba vidu. (Afi. 2:3, 4) Kumbukani vo Yesu wanguchita ndi usiku wo wangukoleke. Iyu wanguziŵa  kuti wafwengi nyifwa yakuŵaŵa ukongwa. Kweni mumalu mwakuŵanaŵaniya venivi, wafipiyanga mtima akutumika akugomezgeka. Wanguziŵa kuti azamuchita chitima asani iyu wafwa. Mwaviyo, ndi usiku wenuwu wanguŵasambiza ndi kuŵachiska. (Yoha. 14:25-31) Yesu wanguŵanaŵaniya ukongwa anyaki mumalu mwakujiŵanaŵaniya. Iyu wakutisiliya sambiru lamampha ukongwa!

7. Kumbi Yesu wangulongo wuli kuti wenga ndi chiganga chikulu wati wayambisa ŵaka Chikumbusu?

⁷ Yesu wati wayambisa ŵaka Chikumbusu, wangulongo chiganga chikulu. Kumbi wanguchita wuli venivi? Wanguzomera kuchita khumbu la Awisi chinanga kuti wanguziŵa kuti wafwengi nyifwa yakuchitiska soni. (Mate. 26:65, 66; Luka 22:41, 42.) Yesu wangulutirizga kuja wakugomezgeka kuti zina laku Yehova litumbikiki, kuti walongo kuti we kuchigaŵa cha ulamuliru waku Chiuta, ndi kujula nthowa kuti ŵanthu wo alapa azilonde umoyu wamuyaya. Iyu wanguwovya so akusambira ŵaki kuti anozgeke masuzgu ngo angukumana nangu pati pajumpha nyengu yimanavi.

8. (a) Kumbi Yesu wanguŵakambiyanji akutumika? (b) Kumbi akusambira aku Yesu angulondo wuli chiganga chaki pati pajumpha vyaka kutuliya po iyu wangufwiya?

⁸ Chinthu chinyaki cho chilongo kuti Yesu wenga ndi chiganga ntchakuti wafipiyanga mtima masuzgu ngaki cha kweni wafipiyanga mtima akutumika. Chikumbusu cho Yesu wanguyambisa Yudasi wati watuwapu, chikumbusa Akhristu akusankhika vitumbiku vo asaniya chifukwa cha ndopa zaku Yesu ndipuso chifukwa chakuja chigaŵa cha phanganu lifya. (1 Akori. 10:16, 17) Kuti alutirizgi kuja akugomezgeka ndi kuchija kuchanya, Yesu wangukambiya akusambira ŵaki vo iyu ndi  Awisi akhumbanga kuti achitengi. (Yoha. 15:12-15) Yesu wanguŵakambiya so masuzgu ngo ngenga kunthazi kwawu. Pavuli paki, wanguŵakambiya kuti ‘akhwimi mtima’ nge mo iyu wanguchitiya. (Yoha. 16:1-4a, 33) Pati pajumpha vyaka vinandi, akusambira aku Yesu anguleka cha kulondo mtima waki wakujipereka ndi kuchita vinthu mwachiganga. Yiwu awovyananga mumasuzgu ngakupambanapambana chinanga kuti akumananga ndi masuzgu chifukwa cha kuchita viyo.​—Ahe. 10:33, 34.

9. Kumbi tingalondo wuli chiganga chaku Yesu?

⁹ Mwakuyanana ŵaka, nasi mazuŵa nganu tilondo chiganga chaku Yesu. Mwakuyeruzgiyapu, tikhumbika kuŵa ndi chiganga kuti tiwovyi abali ŵidu wo atombozgeka chifukwa cha chivwanu chawu. Nyengu zinyaki abali ŵidu angamangika kwambula kunanga. Asani ivi vachitika, titenere kuchita vosi vo tingafiska kuti tiŵawovyi, kusazgapu kuŵavikiliya. (Afi. 1:14; Ahe. 13:19) Tingalongo so kuti te ndi chiganga asani tilutirizga kupharazga “mwachiganga.” (Machi. 14:3) Nge mo Yesu wachitiyanga, nasi tipharazga uthenga wa Ufumu chinanga ŵanthu angatisuska pamwenga kutitombozga. Kweni nyengu zinyaki tingachita mantha. Kumbi tingachita wuli asani te ndi mantha?

10. Kumbi titenere kuchitanji asani kwaja kamanavi kuti tichiti Chikumbusu? Ntchifukwa wuli titenere kuchita viyo?

¹⁰ Tingaŵa ndi chiganga asani tiŵanaŵaniya vo tilindizga chifukwa cha sembi yaku Khristu. (Yoha. 3:16; Aefe. 1:7) Asani kwaja kamanavi kuti tichiti Chikumbusu, titenere kuŵerenga ndi kuŵanaŵaniyapu vinthu vo vinguchitika pa nyifwa yaku Yesu. Ivi vingatiwovya kuti tiwongengi ukongwa sembi yaki. Ndipu asani taza pa Chikumbusu, tivwisisa vo chiŵandi ndi vinyu vimiya.  Asani tavwisa vo Yesu ndi Yehova akutichitiya kweniso phindu lo isi ndi abali ŵidu tisaniya, chivwanu chidu chikuwa. Ivi vititiwovya kuti tileki kuchita mantha ndipuso kuti tikuthiyengepu masuzgu mpaka pa umaliru.​—Ahe. 12:3.

11-12. Kumbi kufika yapa tasambiranji?

¹¹ Kufika yapa, tasambira kuti Chakurya Chamazulu cha Ambuya chititikumbusa kuti sembi yaku Yesu njakuzirwa. Chititikumbusa so mijalidu yaki, nge kujiyuyuwa ndi chiganga. Tiwonga ukongwa kuti Yesu, Wasembi Mura yo waŵeyere mumalu mwidu, weche ndi mijalidu yeniyi. (Ahe. 7:24, 25) Kuti tilongo kuti tiwonga kutuliya pasi pa mtima, titenere kukumbukiya nyifwa yaku Yesu nge mo iyu mweneku wangulamuliya. (Luka 22:19, 20) Tichita venivi pa zuŵa lo liyanana ndi la Nisani 14. Zuŵa ili ndakukhumbika ukongwa pachaka.

¹² Chakurya Chamazulu cha Ambuya chingatisambiza so jalidu linyaki lo linguchitiska kuti Yesu watifwiyi. Iyu waziŵikanga ndi jalidu lenili po wenga pacharu chapasi. Kumbi ndi jalidu wuli?

13. Kumbi pa Yohane 15:9 ndi pa 1 Yohane 4:8-10, pakonkhoska wuli chanju cho Yehova ndi Yesu akutilongo, ndipu mbayani wo ayanduwa ndi chanju chenichi?

¹³ Yesu wangulongo kuti watitiyanja nge Yehova mu vakuchita vaki vosi. (Ŵerengani Yohane 15:9; 1 Yohane 4:8-10.) Chinthu chikulu cho chilongo kuti Yesu watitiyanja ntchakuti wakutifwiya. Kwali te Akhristu akusankhika pamwenga ambereri zinyaki, tosi tiyanduwa ndi chanju cho Yehova ndi Mwana waki akutilongo kuziya mu sembi yeniyi. (Yoha. 10:16; 1 Yoha. 2:2) Ŵanaŵaniyani so vinthu vo Yesu wangugwiriskiya ntchitu pakwambisa mwambu wa Chikumbusu. Vinthu ivi vilongo kuti Yesu wayanjanga ndi kuŵanaŵaniya akusambira ŵaki. Ntchifukwa wuli tikamba viyo?

14. Kumbi Yesu wangulongo wuli kuti wayanjanga akusambira ŵaki?

¹⁴ Yesu wangulongo kuti wayanjanga akusambira ŵaki chifukwa wangwambisa mwambu wambula kusuzga kuchita. Yiwu akhumbikanga kukumbukiya nyifwa yaki chaka chechosi. Akusambira ŵaki akumananga ndi vinthu vakupambanapambana kuti achiti viyo, kusazgapu kumangika. (Chivu. 2:10) Kumbi anguvwiya vo Yesu wanguŵalamula? Hinya, anguvwiya!

15-16. Kumbi anyaki anguchita wuli Chikumbusu chinanga kuti ŵenga mujeri?

¹⁵ Mazuŵa nganu napu, Akhristu auneneska ayesesa kukumbukiya nyifwa yaku Yesu. Yiwu achita vosi vo angafiska kuti alondo vo Yesu wanguchita po wayambisanga mwambu uwu. Nyengu zinyaki achita venivi chinanga angaŵa mu masuzgu. Mwakuyeruzgiyapu, pa nyengu yo Mubali Harold King wenga yija mujeri ku China, wangusaniya nthowa yakuchitiya Chikumbusu. Iyu wanguchita vinthu mwakuchenje kuti ŵanthu aleki kuziŵa. Mubali Harold wangugwiriskiya ntchitu vinthu vo wenga navu kunozga vinyu ndi chiŵandi. Wanguŵerengese so mazuŵa kuti wasaniyi deti la Chikumbusu. Zuŵa la Chikumbusu lati lakwana, iyu wangumba sumu, kupemphera ndi kukamba nkhani ya Chikumbusu.

¹⁶ Tiyeni tiwoni so chakuyeruzgiyapu chinyaki. Azichi anyaki anguŵikika mujeri pa nyengu ya Nkhondu Yachiŵi ya Pacharu Chosi. Yiwu anguŵika umoyu wawu pangozi kuti akumbukiyi nyifwa yaku Yesu. Kweni chifukwa chakuti vinthu vo vikhumbika pakuchita Chikumbusu vakusuzga cha, yiwu anguchita mwambu uwu mwakuchenje kuti ŵanthu aleki  kuziŵa. Yiwu angukamba kuti: “Tinguma kuzunguliya thebulu lo tingutandikapu salu yituŵa. Pa thebulu ili tinguŵikapu vinyu ndi chiŵandi. Tingubusa kandulu chifukwa asani tingubusa magesi, ŵanthu atingi atiziŵengi.” Azichi yaŵa angulongo kuti ŵenga ndi chivwanu chikulu! Yesu wangulongo nadi kuti watitiyanja ukongwa pakutiwovya kuti tichitengi Chikumbusu chinanga tingaŵa mu masuzgu.

17. Kumbi tingajifumba mafumbu wuli?

¹⁷ Pakuti taja kamanavi kuti tichiti Chikumbusu, tingachita umampha kujifumba kuti: ‘Kumbi ndingamuyezga wuli Yesu pa nkhani ya kulongo chanju? Kumbi ndiŵanaŵaniya ukongwa vakukhumba vangu kuluska va Akhristu anyangu? Kumbi ndikhumba kuti abali ndi azichi achitengi vinthu mwambula kunangisa pamwenga ndiziŵa kuti angabudisa?’ Nyengu zosi ‘tiŵanaŵaniyengi’ anyidu nge mo Yesu wachitiyanga.​—1 Petu. 3:8.

18-19. (a) Kumbi ŵanthu aku Yehova azamukumbukanganji? (b) Kumbi titenere kuchitanji?

¹⁸ Kunthazi mwambu wakukumbukiya nyifwa yaku Khristu wazamumala. Asani Yesu ‘waza’ pa chisuzgu chikulu, wazamuwunganiskiya Akhristu “akusankhika” kuchanya. Ndipu asani ivi vazichitika, Chikumbusu chazamuchitika so cha.​—1 Akori. 11:26; Mate. 24:31.

¹⁹ Asani tazileka kuchita Chikumbusu, tisimikiza kuti ŵanthu aku Yehova azamukumbukanga kuti chakuchitika ichi chalongonga kuti Yesu wenga wakujiyuyuwa, wachiganga ndipuso wachanju. Tikayika cha kuti ŵanthu wo atuza ku Chikumbusu azamukambiyangaku anyawu mucharu chifwa ndipu wosi wo azamuŵaku pa nyengu iyi azamuyanduwa. Kweni kuti tiyanduwengi ndi Chikumbusu mazuŵa nganu, titenere kuja akujiyuyuwa, achiganga ndi achanju nge Yesu. Asani tichitengi viyo, tikayikengi cha kuti Yehova wazakutipaska mphotu.​—2 Petu. 1:10, 11.