1-2. (a) Kumbi Yehova wawonanji asani ŵanthu mamiliyoni nganandi awungana pa Chakurya Chamazulu cha Ambuya? (Wonani chithuzi cho che pachikonkhombi.) (b) Kumbi tikambiskanengenji mu nkhani iyi?

KUMBI Yehova wawonanji asani ŵanthu mamiliyoni nganandi awungana pa Chakurya Chamazulu cha Ambuya? Iyu wawona ŵaka mzinda wa ŵanthu cha kweni wawona munthu weyosi pakuyija. Mwakuyeruzgiyapu, Yehova wawona wo atuza chaka chechosi. Anyaki mwa ŵanthu yaŵa achita viyo chinanga kuti atombozgeka. Anyaki atuza kaŵikaŵi cha ku maunganu nga mpingu kweni atondeka cha kuza ku Chikumbusu chifukwa awona kuti ntchakukhumbika ukongwa. Yehova wawona so wo aza kakwamba ku Chikumbusu, panyaki chifukwa chakuti akhumba kuziŵa vo vichitika.

² Tikayika cha kuti Yehova wakondwa asani wawona ŵanthu anandi wo atuza ku Chikumbusu. (Luka 22:19) Kweni Yehova waŵanaŵaniya ŵaka unandi wa ŵanthu wo atuza pa Chikumbusu cha. Iyu wakondwa ndi chifukwa cho ŵanthu aziya ku Chikumbusu. Mu nkhani iyi tikambiskanengi fumbu lakukhumbika ukongwa lakuti: Ntchifukwa wuli tituza ku Chikumbusu ndi maunganu nganyaki ngo tichita sabata yeyosi?

3-4. (a) Ntchifukwa wuli tiwungana? (b) Kumbi asani tituza ku maunganu tilongonji? (c) Mwakukoliyana ndi 1 Akorinto 11:23-26, chifukwa wuli tikhumbika cha kuja ku Chikumbusu?

³ Chifukwa chikulu cho tiziya pa maunganu nga mpingu ntchakuti tisopa Yehova. Chifukwa chinyaki ntchakuti tisambizika ndi Yehova pa maunganu ngenanga. Ŵanthu akujikuzga  akana kusambizika. (3 Yoha. 9) Kweni isi tikhumbisiska kusambizika ndi Yehova ndi gulu lo wagwiriskiya ntchitu.​—Yesa. 30:20; Yoha. 6:45.

⁴ Asani tiwungana tilongo kuti te akujiyuyuwa ndipuso tikhumbisiska kusambizika. Tikumbukiya nyifwa yaku Yesu chifukwa chakuti kuchita viyo nkhwakukhumbika ukongwa. Tichita so viyo chifukwa tivwiya dangu lo Yesu wangukamba lakuti: “Lutirizgani kuchita venivi pakundikumbuka.” (Ŵerengani 1 Akorinto 11:23-26.) Unganu uwu utitiwovya kuja ndi chilindizga chakukho cha vinthu vo Chiuta wakutilayizga. Utitikumbusa so kuti Yehova watitiyanja ukongwa. Kweni Yehova waziŵa kuti tikhumbika kuchiskika kamoza pe cha pa chaka. Mwaviyo, watitipaska maunganu sabata yeyosi ndipu watitichiska kuti tisanirikengepu. Kujiyuyuwa kutitiwovya kuti timuvwiyengi. Sabata yeyosi tipatuwa nyengu kuti tinozgekiyengi maunganu ngenanga ndi kusanirikapu.

5. Kumbi ŵanthu akujiyuyuwa achita wuli asani Yehova watiŵadana?

⁵ Chaka chechosi ŵanthu anandi akujiyuyuwa azomera kusambizika ndi Yehova. (Yesa. 50:4) Yiwu akondwa kuza ku Chikumbusu ndipu pavuli paki atamba kuza ku maunganu nganyaki. (Zeka. 8:20-23) Tosi tikondwa kusambizika ndi kulongozgeka ndi Yehova. Iyu ndi ‘chovyu chidu ndi mtaski widu.’ (Sumu 40:17) Kukamba uneneska, palivi chinthu chakukondwesa pamwenga chakukhumbika kuphara kusambizika ndi Yehova ndi Mwana waki Yesu yo watimuyanja ukongwa.​—Mate. 17:5; 18:20; 28:20.

6. Kumbi kujiyuyuwa kungumuwovya wuli munthu munyaki?

⁶ Chaka chechosi tiyesesa kudaniyaku ŵanthu ku Chikumbusu. Ŵanthu anandi wo titiŵadana ayanduwa ndi mwambu uwu. Tiyeni tiwoni chakuyeruzgiyapu chimoza. Vyaka vinandi kuvuli uku, munthu munyaki wangulonde kapepala kakumudaniya ku Chikumbusu. Kweni wangukambiya mubali yo wangumupaska kapepala kuti wazamulutaku cha chifukwa wazamukuŵa wakutangwanika. Pa zuŵa la Chikumbusu, mubali yo wangumupaska kapepala wanguzizwa kuwona kuti munthu yuwa wasere mu Nyumba ya Ufumu. Munthu uyu wangukondwa ukongwa chifukwa cha mo abali ndi azichi angumulondere mwakuti wangwamba kuza ku maunganu nga mpingu. Iyu wangujapu katatu pe ku maunganu chaka chosi champhumphu. Kumbi ntchinthu wuli cho chingumuwovya kuti wawunganengi? Iyu wenga wakujiyuyuwa. Mubali yo wangumugaŵiya kapepala wangukamba kuti, “Ndi munthu wakujiyuyuwa ukongwa.” Tikayika cha kuti Yehova ndiyu wangumuguza ndipu sonu ndi mubali.​—2 Samu. 22:28; Yoha. 6:44.

7. Kumbi vo tisambira pa maunganu ndi vo tiŵerenga mu Bayibolu vititiwovya wuli kuti tije akujiyuyuwa?

⁷ Vo tisambira pa maunganu ndi vo tiŵerenga mu Bayibolu vititiwovya kuti tije akujiyuyuwa. Asani kwaja masabata ngamanavi kuti tichiti Chikumbusu, tisambira vo Yesu wanguchita kweniso kujiyuyuwa ko wangulongo pakupereka umoyu waki. Ndipu asani Chikumbusu che pafupi, tiŵerenga nkhani za mu Bayibolu zo zikamba va nyifwa ndi kuyuskika kwaku Yesu. Vo tisambira pa maunganu ngenanga ndipuso nkhani za mu Bayibolu zenizi, vititiwovya kuti tiwongengi ukongwa sembi yaku Yesu. Tichiskika kuyezga Yesu pa nkhani ya kujiyuyuwa ndi kuchita khumbu laku Yehova chinanga tingakumana ndi masuzgu.​—Luka 22:41, 42.

8. Kumbi Yesu wangulongo wuli kuti wenga wachiganga?

⁸ Tiyezga so Yesu pa nkhani ya kulongo chiganga. Ŵanaŵaniyani chiganga cho wangulongo kwati kwaja mazuŵa ngamanavi kuti wafwi. Iyu wanguziŵa kuti arwani ŵaki amunyozengi, amukwechuwengi ndi kumubaya. (Mate. 20:17-19) Kweni wanguchita mantha cha kufwa. Nyengu yati yakwana kuti amuko wangukambiya akusambira ŵaki akugomezgeka wo wenga nawu ku Gesemani kuti: “Sokani, tiyeni tikengi. Awonani! Wakundipereka wafika.” (Mate. 26:36, 46) Gulu lo lingupinga vidya lati laza kuti lizimuko, iyu wanguluta ko ŵenga ndipu wanguŵakambiya kuti iyu ndi Yesu yo apenjanga. Wangukambiya so asilikali kuti akusambira ŵaki aŵaleki akengi. (Yoha. 18:3-8) Yapa Yesu wangulongo chiganga chikulu. Mazuŵa nganu, Akhristu akusankhika ndi ambereri zinyaki ayesesa kulondo Yesu pa nkhani ya kulongo chiganga. Kumbi yiwu alongo wuli chiganga?

9. (a) Ntchifukwa wuli tikhumbika chiganga kuti tiwunganengi nyengu zosi? (b) Kumbi abali wo akumangika chifukwa cha chivwanu chawu achiskika wuli asani atuvwa kuti te ndi chiganga?

⁹ Asani takumana ndi masuzgu tikhumbika chiganga kuti tiwunganengi nyengu zosi. Mwakuyeruzgiyapu, abali ndi azichi anyaki aluta ku maunganu chinanga kuti nyengu zinyaki akumana ndi vakuguŵiska, atama pamwenga ŵe ndi chitima. Anyaki aluta ku maunganu chinanga kuti asuskika ndi abali ŵawu pamwenga maboma. Abali wo akumangika chifukwa cha chivwanu chawu achiskika asani atuvwa kuti te ndi chiganga. (Ahe. 13:3) Asani atuvwa kuti tilutirizga kuteŵete Yehova chinanga tikumana ndi mayeseru, nawu alutirizga kuja ndi chivwanu, chiganga ndipuso akugomezgeka. Venivi ndivu vinguchitikiya Paulo. Pa nyengu yo wenga mujeri ku Roma, iyu wakondwanga asani watuvwa kuti abali ateŵete Chiuta mwakugomezgeka. (Afi. 1:3-5, 12-14) Paulo watenere kuti wangulembe kalata Aheberi kwati kwaja kamanavi kuti amutuzgi mujeri pamwenga ŵati amutuzga ŵaka. Mu kalata iyi wanguchiska Akhristu akugomezgeka yaŵa kuti ‘alutirizgi kwanja abali’ kweniso kuti angalekanga cha kuwungana pamoza.​—Ahe. 10:24, 25; 13:1.

10-11. (a) Kumbi mbayani wo titenere kuŵadaniya ku Chikumbusu? (b) Kumbi lemba la Aefeso 1:7 likamba kuti ntchifukwa wuli titenere kuchita viyo?

¹⁰ Tilongo kuti te ndi chiganga asani tidaniya ku Chikumbusu abali ŵidu, wo tigwira nawu ntchitu ndi wo tija nawu pafupi. Ntchifukwa wuli titiŵadana? Tikhumbisiska kuŵadaniya ku Chikumbusu chifukwa chakuti tiwonga vo Yehova ndi Yesu akutichitiya. Tikhumba kuti nawu aziŵi mo angayanduliya ndi ‘wezi ukulu’ waku Yehova wo wakuwulongo kuziya mu sembi yaku Yesu.​—Ŵerengani Aefeso 1:7; Chivu. 22:17.

¹¹ Asani tiwungana tilongo kuti te ndi chiganga. Tilongo so kuti te ndi jalidu linyaki lo Chiuta ndi Mwana waki ŵe nalu.

12. (a) Kumbi maunganu ngatitiwovya wuli kuti tiyanjengi ukongwa Yehova ndi Yesu? (b) Kumbi lemba la 2 Akorinto 5:14, 15, lititichiska kuti tichitengenji nge mo Yesu wachitiya?

¹² Tiwungana chifukwa chakuti titanja Yehova ndi Yesu. Vo tisambira pa maunganu vititiwovya kuti timuyanjengi ukongwa Yehova ndi Mwana waki. Asani te pa maunganu tikumbusika vo yiwu akutichitiya. (Aro. 5:8) Ukongwa Chikumbusu ndichu chititikumbusa kuti Yehova ndi Yesu atanja taŵanthu, chinanga ndi wo aleka kuziŵa kukhumbika kwa sembi. Chifukwa cha kuwonga sembi iyi, tiyesesa kulondo Yesu mu vakuchita vidu zuŵa lelosi. (Ŵerengani 2 Akorinto 5:14, 15.) Kusazgiyapu yapa, mtima widu utitituma kuthamika Yehova chifukwa cha kutipaska sembi yeniyi. Nthowa yimoza yo tingamuthamikiya nkhumuka fundu zakutuliya pasi pa mtima pa maunganu.

13. Kumbi tingalongo wuli kuti titimuyanja ukongwa Yehova ndi Mwana waki? Konkhoskani.

¹³ Tingalongo kuti titanja Yehova ndi Mwana waki asani tikhumbisiska kusiya vo titanja chifukwa chaku yiwu. Kanandi tisiya vinthu vo takhumbanga kuchita kuti tiluti ku maunganu. Mipingu yinandi yichita maunganu mukati mwa sabata ndi mazulu pa nyengu yo tanandi tituŵa kuti tavuka. Ndipu unganu unyaki uchitika pa Chisulu pamwenga pa Sabata po ŵanthu anyaki apumuwa. Kumbi Yehova wawona asani tiyesesa kuza ku maunganu chinanga kuti tavuka? Hinya wawona! Ndipu iyu wawonga ukongwa chanju cho titimulongo asani titesesa kuwungana chinanga tingavuka.​—Mariko 12:41-44.

14. Kumbi Yesu wakutipaska sambiru wuli pa nkhani ya kulongo chanju?

¹⁴ Yesu wakutipaska sambiru pa nkhani ya kulongo chanju. Iyu wangukhumbisiska kufwiya akusambira ŵaki kweniso waŵanaŵaniyanga ukongwa vakukhumba vawu mumalu mwa vakukhumba vaki. Mwakuyeruzgiyapu, wanguluta kuchikumana ndi akusambira ŵaki chinanga kuti wanguvuka kweniso wangusuzgika ukongwa maŵanaŵanu. (Luka 22:39-46) Iyu waŵanaŵaniyanga vo wangachitiya anyaki mumalu mwa vo anyaki angamuchitiya. (Mate. 20:28) Asani titanja Yehova ndi abali  ŵidu tichitengi vosi vo tingafiska kuti tisanirikengepu pa Chikumbusu ndi pa maunganu nganyaki ngosi nga mpingu.

15. Kumbi tikhumba kovya ayani ukongwa?

¹⁵ Te mu gulu limoza pe la Akhristu auneneska ndipu tikondwa kudana anyidu kuti nawu asere mu gulu lenili. Kweni tikhumba ukongwa kovya “abali ŵidu mu chivwanu” wo akuleka kupharazga ndi kuza ku maunganu. (Aga. 6:10) Tilongo kuti titiŵayanja asani titiŵachiska kuti azengi ku maunganu, ukongwa ku Chikumbusu. Nge Yehova ndi Yesu, nasi tikondwa asani akulopwa awere kwaku Yehova, wo Mbada ŵidu achanju.​—Mate. 18:14.

16. (a) Kumbi tingachiskana wuli, ndipu maunganu ngangatiwovya wuli? (b) Ntchifukwa wuli iyi ndi nyengu yamampha kukumbukiya mazu ngo Yesu wangukamba pa Yohane 3:16?

¹⁶ Titenere kuchita vosi vo tingafiska kuti tidani ŵanthu anandi kuti azi ku Chikumbusu pa Chinkhondi ndi mazulu pa 19 April, 2019. (Wonani bokosi lakuti “ Kumbi Mwazakuŵadana?”) Kweniso nyengu zosi tikhumbika kuchiskana kuti tizengi ku maunganu ngosi nga mpingu ngo Yehova watitipaska. Penipo umaliru wa charu uŵandika, maunganu ngakukhumbika kuti ngatiwovyi kuja akujiyuyuwa, achiganga ndipuso achanju. (1 Ate. 5:8-11) Tiyeni tilongongi ndi mtima widu wosi kuti titanja Yehova ndi Mwana waki chifukwa chakutilongo chanju chikulu!​—Ŵerengani Yohane 3:16.