YOSWA wakhumbikanga kulongozga mtundu wa Isirayeli kuti ukasere mucharu cho Chiuta wanguŵalayizga. Ivi venga vakusuzga ukongwa. Kweni Yehova wangumuchiska ndi kumusimikiziya kuti: ‘Uje ndi chiganga kweniso uje ndi nthazi ukongwa, ndipuso usungengi mwakuphwere Dangu langu. Uliŵerengengi ndi kulunguruka msana ndi usiku, kuti usungi mwakuphwere vosi vo valembekamu; pakuti asani uchitengi viyo, vinthu vikuyendiyengi umampha ndipuso uchitengi vinthu mwazeru.’—Yoswa 1:7, 8.

Pakuti tija mu “nyengu zakusuzga,” nasi tikumana ndi masuzgu. (2 Timo. 3:1) Nge Yoswa, vinthu vingatiyende umampha asani tilondo ulongozgi wo Yehova wangumupaska. Tikhumbika kuŵerenga Bayibolu nyengu zosi ndi kugwiriskiya ntchitu fundu zo taŵerenga asani takumana ndi masuzgu.

Tanyaki aku isi tiziŵa cha mo tingasambiriya Bayibolu pamwenga titanja cha kusambira. Kweni Kuŵerenga Bayibolu nkhwakukhumbika ukongwa. Mungaweriyamu bokosi lakuti “ Yesani Masachizgu Yanga,” kuti musaniyi fundu zo zingakuwovyani kuti muyanduwengi ndi kukondwa asani musambira Bayibolu.

Yo wakulembaku buku la Sumu wangukamba kuti, “Ndilongozgeni mu nthowa ya marangu nginu, chifukwa ndikondwa nangu.” (Sumu 119:35) Namwi mukondwengi ukongwa asani musambirengi Mazu ngaku Chiuta. Musaniyengi fundu zinandi zamampha asani musambirengi Bayibolu.

Chinanga kuti yimwi mukhumbika kulongozga ŵanthu anandi cha nge mo Yoswa wanguchitiya, kweni namwi mukumana ndi masuzgu. Nge Yoswa, mukhumbika kusambira ndi kuvwiya Mazu ngaku Chiuta. Asani muchitengi viyo, vinthu vikuyendiyeningi umampha ndipu muchitengi vinthu mwazeru.