1. Ntchifukwa wuli tingakamba kuti chechosi ntchaku Yehova? (Wonani chithuzi cho che pachanya.)

CHECHOSI ntchaku Yehova! Bayibolu likamba kuti: “Kuchanya, kuchanya ukongwa ndipuso charu chapasi ndi vosi vo ve mwenimo, vaku Yehova Chiuta winu.” (Mara. 10:14; Chivu. 4:11) Chifukwa chakuti Yehova ndiyu wakutilenga, tosi te ŵaki. (Sumu 100:3) Kweni kwamba kali, Chiuta wasankha ŵanthu anyaki kuja ŵanthu ŵaki apade.

2. Kumbi mbayani wo Bayibolu likamba kuti mbanthu apade aku Yehova?

² Mwakuyeruzgiyapu, lemba la Sumu 135 likamba kuti Ayisirayeli wo asopanga Yehova mwakugomezgeka, ŵenga “chuma chaki chapade.” (Sumu 135:4) Kweniso buku la Hoseya likamba kuti ŵanthu anyaki wo mbayisirayeli cha, azamuja ŵanthu aku Yehova. (Hose. 2:23) Uchimi waku Hoseya ungufiskika pa nyengu yo Yehova wangusankha ŵanthu wo ŵenga Ayuda cha kuti akalamuliyengi ndi Khristu. (Machi. 10:45; Aro. 9:23-26) “Mtundu wakupaturika” wenuwu, “ntchuma chapade” chaku Yehova. Yiwu akusankhika ndi mzimu wakupaturika. (1 Petu. 2:9, 10) Nanga Akhristu akugomezgeka wo alindizga kuzija ndi umoyu wamuyaya pacharu chapasi, Yehova watiŵawona wuli? Nawu watiŵadana  so kuti “ŵanthu” ŵaki ndipuso “akusankhika” ŵaki.—Yesa. 65:22.

3. (a) Kumbi mbayani wo Yehova watiŵawona kuti mbanthu ŵaki apade mazuŵa nganu? (b) Kumbi tikambiskanengenji mu nkhani iyi?

³ Mazuŵa nganu, “a kamskambu kamana” wo alindizga kuluta kuchanya ndi a “mbereri zinyaki” wo alindizga kuzija pacharu chapasi, apanga “mskambu umoza.” Wosi Yehova watiŵawona kuti mbanthu ŵaki. (Luka 12:32; Yoha. 10:16) Mwaviyo, tikhumbika kumuwonga Yehova chifukwa chakutisankha kuja ŵanthu ŵaki. Mu nkhani iyi, tiwonengi vo tingachita kuti tilongo kuti tiwonga Yehova chifukwa cha mwaŵi wapade wenuwu.

4. Kumbi tingalongo wuli kuti tiwonga Yehova chifukwa chakutisankha kuja ŵanthu ŵaki, nanga Yesu wanguchita wuli venivi?

⁴ Tilongo kuti tiwonga Yehova asani titijipereka ndi mtima wosi kwaku iyu mu pempheru kuti tichitengi khumbu laki. Pa ubatizu, tilongo ŵanthu wosi kuti te aku Yehova ndipu tikhumbisiska kujithereska kwaku iyu. (Ahe. 12:9) Ivi ndivu Yesu wanguchita pa nyengu yo wabatizikiyanga. Venga nge wangukamba kuti: “Ndikondwa kuchita khumbu linu, Chiuta wangu, dangu linu le mumtima mwangu.” (Sumu 40:7, 8) Yesu wangujipereka kuchita khumbu laku Yehova chinanga kuti wanguwiya kali mu mtundu wo wenga wakujipereka kwaku Chiuta.

5, 6. (a) Kumbi Yehova wangukambanji Yesu wati wabatizika? (b) Konkhoskani chakuyeruzgiyapu cho chilongo kuti Yehova wawonga asani tajipereka kwaku iyu, chinanga kuti vinthu vosi vaki kali.

⁵ Kumbi Yehova wangukambanji Yesu wati wabatizika? Bayibolu likamba kuti: “Wati wabatizika, nyengu yeniyo, wanguzuwuka mumaji ndipu awonani! kuchanya kungujulika ndipu Yohane wanguwona mzimu waku Chiuta uchisika nge nkhunda ndi kuza paku Yesu. Ndipuso kuchanya kunguvwika mazu ngakuti: ‘Uyu ndi Mwana wangu, mweniyo nditanja, yo watindikondwesa.’” (Mate. 3:16, 17) Chinanga kuti Yesu wenga waku Yehova kali, kweni Chiuta wangukondwa kuwona kuti mwana waki wenga wakukhumbisiska kuchita khumbu laki. Mwakuyanana ŵaka, Yehova wakondwa asani titijipereka kwaku iyu mu pempheru kuti tichitengi khumbu laki ndipu watititumbika asani tichita viyo.—Sumu 149:4.

⁶ Tiyeruzgiyi kuti ada apanda vingoma vinandi. Mbwenu zuŵa linyaki kamwana kawu kamana katema chingoma ndi kuŵapaska nge mphasu. Vingoma ivi va awisi kali. Ntchifukwa wuli iyu wangaŵapaska chinthu cho chenga chawu kali? Awisi angamufumba cha fumbu ili. Yiwu angawona kuti chingoma cho mwana wawu waŵapaska ntchamampha ukongwa kuluska vingoma vinyaki vosi vo ve mumunda. Mwakuyanana waka, Yehova wakondwa ukongwa asani titijipereka kwaku iyu pe.—Chitu. 34:14.

7. Kumbi Malaki watitiwovya wuli kuziŵa vo Yehova wachita ndi ŵanthu wo akhumbisiska kumuteŵete?

⁷ Ŵerengani Malaki 3:16. Asani mwechendajipereki kwaku Chiuta ndipuso kubatizika, muŵanaŵaniyengi umampha wakuchita viyo. Mbuneneska kuti mwe aku Yehova kutuliya ŵaka pa zuŵa lo anyinamwi angutole nthumbu yinu, nge mo viliri ndi ŵanthu wosi. Kweni Yehova wangakondwa ukongwa asani mungajipereka kwaku iyu kuti muchitengi khumbu laki chifukwa cha kuziŵa kuti ngwakwenere kulamuliya. (Nthanthi 23:15) Yehova waziŵa wo akhumbisiska kumuteŵete ndipu watiŵalemba mazina mu ‘buku laki lachikumbusu.’

8, 9. Kumbi Yehova wakhumbanji ku ŵanthu wo mazina ngawu ngakulembeka mu “buku lachikumbusu”?

 ⁸ Asani tikhumba kuti Yehova waleki kutuzgamu zina lidu mu “buku [laki] la chikumbusu,” pe vinthu vinyaki vo tikhumbika kuchita. Malaki wangukamba kuti titenere ‘kuwopa Yehova, ndi kuŵanaŵaniya pa zina laki.’ Asani tingayamba kusopa munthu munyaki pamwenga chinthu chinyaki, mbwenu Yehova watuzgengemu zina lidu mu buku laki la umoyu.—Chitu. 32:33; Sumu 69:28.

⁹ Mwaviyo, kujipereka kwaku Yehova kung’anamuwa vinandi pade pa kumulayizga kuti tichitengi khumbu laki ndipuso kubatizika. Vinthu ivi vito nyengu yimanavi ŵaka ndipu vija ŵaka mbiri. Kweni kuti tilongo kuti te kuchigaŵa chaku Yehova, tikhumbika kumuvwiya nyengu zosi. Zuŵa lelosi tikhumbika kulongo mu vakuchita vidu kuti tivwiya Yehova.—1 Petu. 4:1, 2.

10. Kumbi patenere kuŵa mphambanu wuli pakati pa munthu yo wateŵete Yehova ndi yo waleka kumuteŵete?

¹⁰ Mu nkhani yasabata yamala, tingusambira zaku Kayini, Solomoni ndi Ayisirayeli. Wosi akambanga kuti asopa Yehova kweni ŵenga akugomezgeka cha kwaku iyu. Vakuyeruzgiyapu ivi, vititisambiza kuti kukamba ŵaka kuti tisopa Yehova nkhwakukwana cha. Kweni tikhumbika kutinkha chiheni ndi kwanja chamampha. (Aro. 12:9) Yehova wangukamba kuti pazamukuŵa ‘mphambanu pakati pa munthu murunji ndi muheni, yo wateŵete Chiuta ndi yo waleka kumuteŵete.’—Mala. 3:18.

11. Ntchifukwa wuli ŵanthu wosi atenere kuwona kuti te aku Yehova?

¹¹ Tiwonga ukongwa kuti Yehova wakutisankha kuti tije ŵanthu ŵaki. Ŵanthu wosi atenere ‘kuwona kuti tiluta panthazi.’ (1 Timo. 4:15; Mate. 5:16) Tingajifumba kuti: ‘Kumbi ŵanthu awona kuti nde wakugomezgeka kwaku Yehova? Kumbi ndinyadiya kukambiya anyangu kuti nde Kaboni waku Yehova?’ Yehova wangadandawula ukongwa asani ŵanthu wo wakuŵasankha angachita soni kuziŵiska anyawu kuti mbanthu ŵaki.—Sumu 119:46; ŵerengani Mariko 8:38.

12, 13. Kumbi anyaki achitanji vo vichitiska kuti aleki kuziŵika kuti mbakaboni aku Yehova?

 ¹² Chakupaska chitima ntchakuti chinanga mbakaboni anyaki atole “mzimu wa charu.” Ivi vichitiska kuti aleki kupambana ndi ŵanthu wo aleka kusopa Yehova. (1 Akori. 2:12) Chifukwa cha “mzimu wa charu,” ŵanthu aŵika mtima wawu pa “makhumbiru nga liŵavu.” (Aefe. 2:3) Mwakuyeruzgiyapu, chinanga kuti gulu lipereka ulongozgi wakupambanapambana pankhani iyi, kweni anyaki aleka cha kuvwala ndi kujitowesa mwambula kwenere. Yiwu avwala malaya ngakuko liŵavu pamwenga ngakuwonesa viŵalu vakubisika. Achita ivi ndi ku maunganu viyo. Anyaki atole masitayeru nga charu pa kumeta sisi ndi pa kupesa. (1 Timo. 2:9, 10) Ivi vichitiska kuti kuje kwakusuzga kupambanisa pakati paku yo ngwaku Yehova ndi yo we “pa ubwezi ndi charu.”—Yako. 4:4.

¹³ Pe so vinthu vinyaki vo Akaboni anyaki achita vo vilongo kuti apambana cha ndi charu. Mwakuyeruzgiyapu, asani ŵe ku maphwandu avina kweniso kuchita vinthu vambula kwenere Akhristu. Anyaki aŵika vithuzi vawu pa intaneti ndi kulembapu mazu ngo ngalongo kuti ŵe ndi maŵanaŵanu nga charu. Vo achita, vakuti angachenyekiyapu cha pamwenga kusezgeka mumpingu, kweni vingachitiska kuti abali ndi azichi mumpingu wo atesesa kuja ndi nkharu yamampha, atoliyeku jalidu lawu.—Ŵerengani 1 Peturo 2:11, 12.

14. Kumbi tingachita wuli kuti tivikiliyi ubwezi widu ndi Yehova?

¹⁴ Vinthu va mucharu vichitiska kuti ŵanthu ajengi ndi ‘makhumbiru nga liŵavu, makhumbiru nga masu kweniso kujiwonesa ndi vinthu vo munthu we navu pa umoyu.’ (1 Yoha. 2:16) Kweni chifukwa chakuti te aku Yehova, tichiskika kuti “tikanengi kuja ndi mijalidu yambula kopa Chiuta kweniso makhumbiru nga charu, ndipuso kuti tijengi ndi maŵanaŵanu ngamampha, tichitengi urunji ndipuso tijengi akujipereka kwaku Chiuta pakati pa mugonezi wunu.” (Tito 2:12) Ŵanthu atenere kuwona kuti tikujipereka kwaku Yehova pe kuziya mu vo tilongoro,  kurya, kumwa, vo tivwala pamwenga ntchitu yo tigwira.—Ŵerengani 1 Akorinto 10:31, 32.

15. Ntchifukwa wuli titenere kuchita vinthu mwalisungu kweniso mwachanju ndi abali ŵidu?

¹⁵ Mo tichitiya vinthu ndi abali ndi azichi ŵidu vingalongo kuti tiwonga Yehova kuti wakutisankha kuja nayu pa ubwezi. Abali ndi azichi nawu mbanthu aku Yehova. Asani tikumbuka fundu iyi, nyengu zosi tichitengi vinthu mwalisungu kweniso mwachanju ndi abali ŵidu. (1 Ate. 5:15.) Yesu wangukambiya akusambira ŵaki kuti: “Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.”—Yoha. 13:35.

16. Kumbi ntchakuyeruzgiyapu nichi mu Dangu laku Mozesi cho chilongo mo Yehova wawone ŵanthu ŵaki?

¹⁶ Kuti tivwisi mo tikhumbikiya kuchitiya vinthu ndi abali ŵidu, tiyeni tiwoni chakuyeruzgiyapu ichi. Viyaŵi vo Ayisirayeli agwiriskiyanga ntchitu munyumba yakusopiyamu, venga vakupatulika ndipu akhumbikanga kuvigwiriskiya ntchitu pa kusopa kwa uneneska pe. Dangu laku Mozesi lakambanga mo angaphwere vinthu ivi ndipu wo aleka kuvwiya dangu ili aŵabayanga. (Maŵe. 1:50, 51) Asani Yehova waphweriyanga vinthu vambula umoyu venivi, kwe wuli ateŵeti ŵaki akugomezgeka wo wakuŵasankha! Nyengu yinyaki, Yehova wangukambiya ŵanthu ŵaki kuti: “Yo wakwaska imwi, ndikwesa wakwaska mboni ya jisu langu.”—Zeka. 2:8.

17. Kumbi Yehova wawona pamwenga ‘kuvwisiya’ asani tichitanji?

¹⁷ Malaki wangukamba kuti Yehova ‘wavwisiya’ asani ŵanthu Ŵaki akambiskana. (Mala. 3:16) Yehova “waziŵa [nadi] ŵanthu wo mbaki.” (2 Timo. 2:19) Iyu waziŵa vosi vo tichita kweniso kulongoro. (Ahe. 4:13) Asani tileka kuŵachitiya lisungu abali ndi azichi, Yehova wawona pamwenga ‘wavwisiya.’ Iyu wawona so asani tilonde alendu, te ndi mtima wakupaska, tigowoke anyidu kweniso asani titiŵalenge lisungu.—Ahe. 13:16; 1 Petu. 4:8, 9.

18. Kumbi tingalongo wuli kuti tiwonga Yehova chifukwa chakutisankha kuja ŵanthu ŵaki?

¹⁸ Tiwonga Yehova ndi mtima wosi chifukwa chakutisankha kuja ŵanthu ŵaki. Tiziŵa kuti tinguchita chinthu chazeru ukongwa pa nyengu yo tingujipereka kwaku iyu. Chinanga kuti tija “pakati pa mugonezi ukhuluku kweniso wakunyongoroka,” tikhumba kuti ŵanthu awonengi kuti tilivi ‘kalema kweniso ambula mulandu, . . . ndi kuŵala nge vakumbulikiya mucharu.’ (Afi. 2:15) Tikhumba cha kuchita vinthu viheni. (Yako. 4:7) Titanja ndi kutumbika abali ŵidu chifukwa tiziŵa kuti nawu mbanthu aku Yehova.—Aro. 12:10.

19. Kumbi Yehova watiŵatumbika wuli ŵanthu ŵaki?

¹⁹ Bayibolu likamba kuti: ‘Yehova waŵajowongi cha ŵanthu ŵaki.’ (Sumu 94:14) Layizgu ili lingasintha cha kwali tingakumana ndi suzgu wuli. Yehova watijowongi cha pamwenga kutiluwa chinanga tingafwa. (Aro. 8:38, 39) “Asani te amoyu, tijaliya Yehova, ndipu asani tafwa, tafwiya Yehova. Kwali te amoyu pamwenga tafwa, te aku Yehova.” (Aro. 14:8) Tilindizga zuŵa lo Yehova wazamuyuska ateŵeti ŵaki akugomezgeka wo akufwa. (Mate. 22:32) Chinanga ndi sonu napu tisaniya vitumbiku vinandi. Bayibolu lititi “ngwakukondwa mtundu wo Chiuta wawu ndi Yehova, ŵanthu wo waŵasankha kuŵa chihara chaki.”—Sumu 33:12.