MAZU yanga ngangukambika ndi Davidi yo watingi wazijengi fumu ya Yisraele. Iyu walumbanga munthukazi yo wangukumana nayu zina laki Abigaili. Kumbi ntchinthu wuli chinguchiska Davidi kuti wamurumbi, nanga isi tisambiranjipu?

Davidi wangukumana ndi munthukazi mwenuyu pa nyengu yo wathaŵanga Fumu Sauli. Abigaili wangutolana ndi Nabala yo wenga wakukhupuka. Nabala wenga ndi mbereri zinandi zo waliskanga mdera la mapiri mucharu cha Yuda. Davidi ndi anthurumi ŵaki “ŵenga nge linga lakuvikiliya” aliska ndi viŵetu vaku Nabala. Pavuli paki Davidi wangutuma ŵanthu kwaku Nabala kuti akamupemphi chakurya ‘chechosi cho wangaŵa nachu.’ (1 Sam. 25:8, 15, 16) Pemphu ili lenga lambula kusuzga. Tikamba viyo chifukwa Davidi ndi ŵanthu ŵaki anguvikiliya viŵetu vaku Nabala.

Nabala yo zina laki ling’anamuwa kuti “wakupusa” pamwenga “muzeleza,” wanguchita vinthu mwakukoliyana ndi zina laki. Iyu wangumuka Davidi mwaukali kweniso mwakunyoza ndipu wangukana kupereka vakurya vo angumupempha. Davidi wakhumbanga kuchilanga Nabala chifukwa cha vinthu viheni vo wangukamba. Nabala ndi ŵanthu ŵaki atingi alangikengi chifukwa cha uzeleza waki.—1 Sam. 25:2-13, 21, 22.

Chifukwa chakuti Abigaili wanguziŵa vo vatingi vichitikengi, wanguchita vinthu mwachiganga. Iyu wangukambisana ndi Davidi mwaulemu ndipu vinguwovya Davidi kuti waleki kunanga ubwezi waki ndi Yehova. Abigaili wangupereka chakurya chinandi kwaku Davidi ndi ŵanthu ŵaki. Pavuli paki, Davidi wanguziŵa kuti Yehova wangugwirisiya ntchitu munthukazi mwenuyu kuti wamukanizi kunangiya Chiuta. Davidi wangukambiya Abigaili kuti: “Yitumbikiki zeru yaku! Utumbikiki chifukwa chakundiweza msanawale ku mulandu wa ndopa.”—1 Sam. 25:18, 19, 23-35.

Tingakhumba cha kuja nge Nabala, mwakuleka kuwonga vinthu vamampha vo anyidu atichitiya. Kusazgiyapu pa fundu yeniyi, asani tiwona kuti pangayambika mphindanu, tingachita umampha kuchita vo tingafiska kuti yileki kuŵapu. Tingayezga yo wakulembaku buku la Sumu yo wakukamba kuti: “Ndisambizeni zeru ndi kuziŵa vinthu.”—Sumu 119:66.

Vo tichita vingawovya ŵanthu kuziŵa kuti te ndi zeru. Kaya angachita kukamba pamwenga cha, angajivwa nge Davidi yo wangukamba kuti: “Yitumbikiki zeru yaku!”