Kumbi mukuŵerenga magazini nga Chigongwi cha Alinda ngo ngatuwa pambula kuswera yapa? Asani ndi viyo, yesani kumuka mafumbu yanga:

Kumbi ndi vinthu vinayi nivi vo vingatiwovya kuti timbengi umampha sumu?

Tikhumbika kuma mwakunyoroka ndi kusoske buku la sumu muchanya. Titenere kututa mwakwenere. Tikhumbika so kujula ukongwa mulomu widu ndipu ivi vitovya kuti timbengi mwakukweza.—w17.11, peji 5.

Ntchinthu wuli cho chititikondwesa ndi misewu kweniso misumba yo Ayisirayeli athaŵiyangaku?

Penga misumba 6 yo Ayisirayeli athaŵiyangaku ndipu yenga ndi misewu yamampha. Mwaviyo, munthu yo wabaya munyaki mwangozi wafikanga luŵi ndipuso mwambula kusuzgika.—w17.11, peji 14.

Ntchifukwa wuli sembi yaku Yesu ndi mphasu yamampha ukongwa kuphara zosi?

Yifiska vo tikhumba kweniso vo tisoŵeka. Taŵanthu tikhumba kuja kwamuyaya kweniso tikhumbika kufwatulika ku ubudi ndi nyifwa. Chifukwa chakuti watanja ŵana aku Adamu, Chiuta wakutipaska Yesu chinanga kuti ndisi akubuda.—wp17.6, papeji 6-7.

Ntchifukwa wuli tikamba kuti lemba la Sumu 118:22, likamba za chiyuka chaku Yesu?

Yesu angumukana kuti wenga Mesiya ndipu angumubaya. Kuti iyu waje “mwa wapakona,” wakhumbikanga kuyuskika.—w17.12, papeji 9-10.

Kumbi munthu wakhumbikanga kuŵa mwana wakwamba kuti Mesiya waziwiyi mubanja laki?

Nyengu zinyaki munthu wakhumbikanga kuja mwana wakwamba kuti wazije mupapi waku Yesu, kweni nyengu zinyaki cha. Mwakuyeruzgiyapu, Davidi wenga mwana wakwamba cha waku Jese kweni Mesiya wanguziwiya mubanja laki.—w17.12, papeji 14-15.

Kumbi ndi fundu zinyaki nizi zo Bayibolu likamba pa nkhani zachipatala?

Mu Marangu ngo Chiuta wangupaska Mozesi, ŵanthu wo atamanga matenda ngakuyambuzgiyana akhumbikanga kuja kwakuŵija. Ŵanthu akhumbikanga kusamba asani ako munthu wakufwa. Dangu ili lakambanga so kuti ŵanthu akhumbikanga kukumbiya pasi asani ajiwovya ndipu akhumbikanga kuchita viyo kutali ndi ko ŵanthu ajanga. Mwana munthulumi wakhumbikanga kudumulika asani wakwanisa mazuŵa 8 kutuliya pa zuŵa lo wawiyaku. Ivi vawovyanga kuti ndopa zileki kutuwa zinandi.—wp18.1, peji 7.

Ntchifukwa wuli kujiyanja mwakwenere nkhwakukhumbika kwa Akhristu?

Tikhumbika kwanja anyidu nge mo titijiyanjiya taŵeni. (Mariko 12:31) Anthulumi atenere “kwanja awolu ŵawu nge maliŵavu nga ŵeneku.” (Aefe. 5:28) Kweni tikhumbika cha kuŵanaŵaniya vaku tija pe.—w18.01, peji 23.

Kumbi ndi vinthu wuli vinyaki vo tingachita kuti tiluti panthazi mwauzimu?

Titenere kuŵerenga Mazu ngaku Chiuta, kuŵanaŵaniya vo taŵerenga ndi kuyesesa kugwiriskiya ntchitu vo tasambira. Tikhumbika so kulongozgeka ndi mzimu wakupaturika ndipuso kulonde ulongozgi wo anyidu atitipaska.—w18.02, peji 26.

Ntchifukwa wuli kusanda vinthu vakuchanya kweniso kuloske kungatiwovya cha kuziŵa vo vichitikengi kunthazi?

Pe vifukwa vinandi kweni chifukwa chikulu ntchakuti Chiuta watinkhana navu.—wp18.2, papeji 4-5.

Kumbi tikhumbika kuchita wuli asani anyidu atidana kuti tikaryi nawu chakurya?

Asani tinguzomera kuti tilutengi ko atidana, tikhumbika kuchita vo talayizga. (Sumu 15:4) Tingasinthanga cha pa vifukwa vambula kwenere. Yo watidana wangaŵa kuti wanozgeke kali.—w18.03, peji 18.

Kumbi ŵara ndi ateŵeti akovya angasambiranji kwaku Timote?

Timote waphweriyanga ŵanthu ndipu wayanjanga ukongwa kupharazga kuphara chechosi. Iyu wachitanga uteŵeti wakupaturika mwaphamphu ndipu wagwiriskiyanga ntchitu vo wasambiranga. Wangulutirizga kujisambiza ndipu wathembanga mzimu waku Yehova. Ŵara ndi Akhristu anyaki angalondo chakuwoniyapu chaku Timote.—w18.04, papeji 13-14.