1. Ntchifukwa wuli tikondwa?

TIKONDWA ukongwa kuwona mo ateŵeti aku Yehova alongore ukweru wawu pacharu chosi chapasi! Chaka chamala tinguchitiska masambiru nga Bayibolu ngakujumpha 10,000,000. Ŵanthu mamiliyoni nganandi anguza ku Chikumbusu. Yiwu angusambira mo Chiuta wakulongore chanju pakutipaska sembi.—1 Yoha. 4:9.

2, 3. (a) Kumbi ntchinthu wuli cho chingatitondekeska cha ‘kuŵala nge vakumbulikiya’? (b) Kumbi tikambiskanengenji mu nkhani iyi?

² Pacharu chosi, ŵanthu aku Yehova aŵereŵeta vineneru vinandi. Kweni ivi vitititondekeska cha kukankhuska Yehova. (Chivu. 7:9) Kaya tiŵereŵeta chineneru wuli pamwenga tija pani, tosi tingaŵala nge “vakumbulikiya mucharu.”—Afi. 2:15.

³ Tikankhuska Yehova asani tipharazga, tikoliyana ndi Akhristu anyidu kweniso asani te ndi nkharu yamampha. Mu nkhani iyi tikambiskanengi mo tingalongole ukweru mu vigaŵa vitatu venivi.—Ŵerengani Mateyu 5:14-16.

4, 5. (a) Kusazgiyapu pa ntchitu yakupharazga, kumbi tingalongo wuli ukweru? (b) Kumbi tiyanduwa wuli asani timwemwete mu uteŵeti? (Wonani chithuzi cho che papeji 21.)

⁴ Nthowa yamampha ukongwa yo tilongore ukweru widu nkhupharazga ndi kuwovya ŵanthu kuti aje akusambira. (Mate. 28:19, 20) Nkhani yinyaki ya mu Chigongwi cha Alinda cha June 1, 1925 ya mutu wakuti “Light in the Darkness,” yingukamba kuti mazuŵa nganu ngakumaliya, palivi yo wangaja wakugomezgeka kwa Ambuya asani watondeka kulongo ukweru waki. Kweni wakhumbika kupharazga uthenga wamampha kweniso kuja ndi mijalidu yamampha. Kusazgiyapu pa ntchitu yakupharazga, mijalidu yidu yingawovya kuti Yehova wakankhuskiki. Ŵanthu anandi atitiwona asani tipharazga. Asani timwemwete kweniso kuŵatawuzga, asintha maŵanaŵanu ngaheni ngo ŵenga nangu ngakukwaskana ndi isi ndipu atumbika Chiuta widu.

⁵ Yesu wangukambiya akusambira ŵaki kuti, “Muchisere munyumba, tawuzgani ŵanthu a munyumba yo.” (Mate. 10:12) Muchigaŵa cho Yesu ndi akutumika apharazganga, ŵanthu ayanjanga kuserezga alendu munyumba. Mazuŵa nganu, ivi vichitika cha muvigaŵa vinandi. Kweni asani timwemwete ndi kuŵakambiya chifukwa cho taziya, vitovya ŵeneku a nyumba kuti afwatuki pamwenga aleki kukwiya. Kuchita viyo kutovya so asani tipharazga mwakugwiriskiya ntchitu kachelufu kamatayala. Asani timwemwete pakuchita upharazgi uwu, kanandi ŵanthu atuza kuzito mabuku ngidu. Yiwu angakhumba kuti tiyambi kukambiskana nawu.

6. Kumbi banja linyaki lingusazgiyaku wuli uteŵeti wawu?

⁶ Banja linyaki la ku England litondeka kupharazga kunyumba ndi nyumba chifukwa chakutamatama. Mwaviyo, ayala mabuku pa thebulu kubwalu kwa nyumba yawu yo yepafupi ndi sukulu. Asani apapi atuza kuzito ŵana ŵawu atopu mabuku kusazgapu mabuku nga Mayankho a Zimene Achinyamata amafunsa—Buku Loyamba ndi Buku Lachiwiri. Mpayiniya munyaki wa mu mpingu wawu wangwamba kupharazga nawu. Apapi anyaki angwamba kusambira Bayibolu chifukwa chakuti mpayiniya uyu wenga wamasangu kweniso banja lo wapharazganga nalu lakhumbisiskanga kovya ŵanthu.

7. Kumbi mungachita wuli kuti muwovyi alendu muchigaŵa chinu?

⁷ Mazuŵa nganu, ŵanthu anandi athaŵa kwawu ndi kuchija kuvyaru vinyaki. Kumbi mungachita wuli kuti muwovyi ŵanthu yaŵa kuziŵa Yehova ndi khumbu laki? Mungayamba kusambira mo atawuzgiyana. Pulogilamu yakusambiriya chineneru ya JW Language yingakuwovyani kuti musambiri moni wawu. Mungasambira so mazu nganyaki nga muchineneru chawu. Ivi vingawovya kuti ayambi kuvwisiya uthenga wo mutiŵapharazgiya. Pavuli paki, mungaŵawonesa jw.org ndi kuŵalongo mavidiyo kweniso mabuku nga muchineneru chawu.—Mara. 10:19.

8, 9. (a) Kumbi Unganu wa Umoyu Widu Wachikhristu utitiwovya wuli? (b) Kumbi apapi angawovya wuli ŵana ŵawu?

⁸ Yehova watitipaska Unganu wa Umoyu Widu Wachikhristu kuti tiŵafikengi pa mtima ŵanthu asani titiŵapharazgiya. Ulongozgi wo tilonde pa unganu uwu, utitiwovya kuti tilekengi kuchita mantha kuweriyaku ku ŵanthu wo titiŵapharazgiya ndi kuchitiska masambiru nga Bayibolu.

 ⁹ Asani alendu aza ku maunganu ngidu, kanandi akondwa ndi vo ŵana amuka. Mwapapi mungawovya ŵana ŵinu kuti amukengi mu mazu ngawu. Ŵanthu anyaki asambira uneneska chifukwa cha vo ŵana amuka.—1 Akori. 14:25.

10. Kumbi tingachita wuli kuti tikoliyanengi mu banja?

¹⁰ Yehova wakankhuskika so asani titesesa kusambiza banja lidu kuti lichitengi vinthu mwakukoliyana ndipuso mwachimangu. Nthowa yimoza yo apapi angachitiya venivi, nkhuchita Kusopa kwa Pabanja nyengu zosi. Mabanja nganandi ngawonere TV ya JW Broadcasting ya mwezi ndi mwezi. Pavuli paki, akambiskana vo awonere. Asani mpapi wachitiska kusopa kwa pabanja, watenere kukumbuka kuti ulongozgi wo ungaperekeka ku ŵana anamana ungapambana ndi wo ungaperekeka kwa achinyamata. Mwaviyo, iyu wakhumbika kuwonesesa kuti weyosi mubanja wayanduwa ndi kusopa kwa pabanja.—Sumu 148:12, 13.

11-13. Kumbi tosi tingachita wuli kuti tikoliyanengi mu mpingu?

¹¹ Kumbi achinyamata angawovya wuli kuti mpingu uje wakukoliyana ndi kuchiska anyawu kuti alongongi ukweru? Nthowa yimoza nkhucheza ndi abali ndi azichi akukota. Mungaŵafumba kuti akukambiyeni vo akumanapu navu pakuteŵete Yehova. Yiwu angakusambizani vinthu vakukhumbika ukongwa. Ivi vingachiska mosi, yimwi ndi yiwu. Kaya ndisi ŵana pamwenga ara, tosi tikhumbika so kulonde alendu wo atuza ku Nyumba ya Ufumu. Kuchita viyo kungawovya kuti tikoliyanengi ndipu kungachiska alendu kuti nawu alongongi ukweru wawu. Tikhumbika kuŵatawuzga mwakukondwa ndipu asani mphakwenere tingaŵalongo pakuja. Tingaŵawovya so kuti aziŵani ndi abali ndi azichi mu mpingu kuti ajivwi kuti alondeleka.

¹² Asani muchitiska unganu wakunozgeke kupharazga, mungawovya akukota kuti nawu apharazgengi. Kumbi ŵe ndi chigaŵa chamampha chakupharazgaku? Nyengu zinyaki mungaŵagaŵa ndi wachinyamata kuti waŵawovyengi mu uteŵeti. Mungawovya so wo atondeka kuchita vinandi mu uteŵeti  chifukwa cha matenda kweniso masuzgu nganyaki ngo akumana nangu. Asani ŵara ndi ateŵeti akovya aŵanaŵaniya abali ndi azichi wosi mu mpingu, angachiskika kuti apharazgengi mwaphamphu.—Ŵale. 19:32.

¹³ Yo wakulembaku buku la Sumu wangukamba kuti: “Vamampha ndipuso vakukondwesa ukongwa asani abali aja pamoza mwachimangu!” (Ŵerengani Sumu 133:1, 2.) Ayisirayeli ayanduwanga ukongwa asani ŵe ndi anyawu wo asopanga limoza Yehova. Yo wakulembaku buku la Sumu wanguyeruzgiya kukoliyana uku ndi mafuta ngo angagwiriskiyanga so ntchitu asani aŵika munthu pa udindu. Mwakuyanana ŵaka, nasi tikhumbika kuchitiya vinthu vamampha abali ŵidu. Ivi vingawovya kuti tikoliyanengi. Titikuwongani asani mukwamba kali kuchita venivi. Mukhumbika ‘kusanuzga mtima’ winu, pamwenga kuti kuŵaziŵa umampha abali mu mpingu.—2 Akori. 6:11-13.

14. Kumbi mungalongo wuli ukweru muchigaŵa cho muja?

¹⁴ Mungalongo so ukweru winu muchigaŵa cho muja. Ŵanthu wo muja nawu pafupi angasambira uneneska asani mukambiskana nawu mwaulemu kweniso asani mwe ndi nkharu yamampha. Mujifumbengi kuti: ‘Kumbi ŵanthu wo ndija nawu pafupi atindiwona wuli? Kumbi panyumba pangu mphakutowa ndipu patovya kuti muchigaŵa cho ndija muwonekengi umampha? Kumbi nditiŵawovya wo ndija nawu pafupi?’ Mufumbengi Akaboni anyinu kuti muziŵi mo nkharu yawu yawovye abali ŵawu, anyawu wo aja nawu pafupi, wo agwira nawu ntchitu pamwenga wo asambira nawu sukulu. Tikayika cha kuti akukambiyeningi vinthu vamampha vo vaŵachitikiyapu.—Aefe. 5:9.

15. Ntchifukwa wuli tikhumbika kulutilizga kuja masu?

¹⁵ Asani tikhumba kuti ukweru widu uŵarengi ukongwa, tikhumbika kuziŵa nyengu yo tijamu. Yesu wangukambiya akusambira ŵaki kananandi ŵaka kuti: “Lutirizgani kuja masu.” (Mate. 24:42; 25:13; 26:41) Asani tiwona kuti “chisuzgu chikulu” chepatali, tiŵawovyengi cha ŵanthu kuti aziŵi Yehova. (Mate. 24:21) Mumalu mwakuŵala ukongwa muchigaŵa chidu, ukweru widu ungayamba kusiwiliya ndipu pavuli paki ungazimwiya limu.

16, 17. Kumbi mungachita wuli kuti mulutirizgi kuja masu?

¹⁶ Chifukwa chakuti tija munyengu zakusuzga, tosi tikhumbika kulutirizga kuja masu. Kweni tiziŵa kuti umaliru wazamufika panyengu yo Yehova wakuŵika. (Mate. 24:42-44) Pasonu panu, titenere kuzikira kweniso kuja masu. Tiŵerengengi Mazu ngaku Chiuta zuŵa lelosi ndi kufwiyapu kupemphera. (1 Petu. 4:7) Tisambirengi kwa abali ndi azichi wo akwamba kali kuteŵete Yehova. Mwakuyeruzgiyapu, tingaŵerenga nkhani ya mutu wakuti, “Ndagwira Chovala cha Myuda kwa Zaka Zoposa 70,” yo ye mu Chigongwi cha Alinda cha Chichewa cha April 15, 2012 papeji 18-21.

¹⁷ Mutangwanikengi ndi kuteŵete Yehova. Muchitiyengi anyinu vinthu vamampha ndipu muchezengi ndi abali ndi azichi. Ivi vikuwovyeningi kuti mukondwengi ndipu muwonengi kuti nyengu yitenda liŵi. (Aefe. 5:16) Ateŵeti aku Yehova anguchita vinandi vyaka 100 vo vajumpha kweni sonu ndipu tichita vinandi ukongwa. Ntchitu yaku Yehova yakuwa ukongwa kuluska mo taŵanaŵaniyanga. Sonu ukweru widu uŵala ukongwa.

18, 19. Kumbi ŵara mu mpingu angatiwovya wuli kuti titeŵetiyengi Chiuta mwaphamphu? Konkhoskani.

 ¹⁸ Chinanga kuti te akubuda, Yehova watitigwiriskiya mbwenu ntchitu. Kuti watiwovyi, iyu watitipaska “anthulumi nge mphasu,” kung’anamuwa ŵara mu mpingu. (Ŵerengani Aefeso 4:8, 11, 12.) Mwaviyo, asani mura wakuyendiyani, muzivwisiyengi asani wakambiskana namwi kuti muziyanduwi ndi vo wazakukukambiyani.

¹⁹ Mwakuyeruzgiyapu, banja linyaki ku England lenga ndi suzgu mu nthengwa yawu. Yiwu angupempha ŵara ŵaŵi kuti aŵawovyi. Munthukazi wawonanga kuti mulumu waki walongozganga cha banja laki pakuteŵete Yehova. Munthulumi wawonanga kuti waziŵa cha kusambiza ndipu watondekanga kuchitiska kusopa kwa pabanja. Ŵara anguwovya banja ili kuti ayezgengi vo Yesu wachitanga. Yiwu anguchiska munthulumi kuti wayezgengi Yesu yo waphweliyanga akusambira ŵaki. Anguchiska so munthukazi kuti wakhumbika kuja wakuzikira nge Yesu. Ŵara angukambiya so banja ili vo angachita kuti achitengi kusopa kwa pabanja limoza ndi ŵana ŵawu ŵaŵi. (Aefe. 5:21-29) Pavuli paki, ŵara anguwonga munthulumi chifukwa chakuyesesa kwaki. Yiwu angumuchiska kuti wangaweliyanga vuli cha kweniso kuti wathembengi mzimu waku Yehova. Banja ili linguwovyeka chifukwa cha chanju ndi lisungu lo ŵara yaŵa angulongo.

20. Kumbi ntchinthu wuli chingachitika asani tilongo ukweru?

²⁰ Yo wangulembaku buku la Sumu wangukamba kuti: “Ngwakukondwa weyosi yo watopa Yehova, yo watenda munthowa Zaki.” (Sumu 128:1) Tikondwa ukongwa asani titovya ŵanthu kuti ayambi kuteŵete Yehova, tichita vosi vo tingafiska kuti mpingu uje wakukoliyana ndipuso asani tilutirizga kuja masu. Ŵanthu awonengi ntchitu zidu zamampha ndipu ayambengi kukankhuska Awisefwi.—Mate. 5:16.