1, 2. (a) Kumbi Yesu wanguŵakambiyanji akusambira ŵaki kwati kwaja kamanavi kuti wafwi? (Wonani chithuzi cho che pachanya.) (b) Ntchifukwa wuli tikhumbika kukumbuka vifukwa vo tipharazgiya? (c) Kumbi tikambiskanengenji?

USIKU wakuti wafwengi mawa laki, Yesu wangukambiskana kwa nyengu yitali ndi akutumika. Iyu wanguŵasimikiziya kuti watiŵayanja ukongwa. Wanguŵakambiya so ntharika ya mphereska yo tingukambiskana sabata yamala. Yesu wangugwiriskiya ntchitu ntharika yeniyi kuti wachiski akusambira ŵaki ‘kulutirizga kupasa vipasu vinandi,’ kung’anamuwa kupharazga uthenga wamampha wa ufumu.—Yoha. 15:8.

² Yesu wangukambiya akusambira ŵaki vo akhumbikanga kuchita ndipuso chifukwa cho akhumbikiyanga kuchita viyo. Iyu wanguŵakambiya vifukwa vo akhumbikiyanga kupharazga. Ntchifukwa wuli titenere kukambiskana vifukwa venivi? Asani tikumbuka vifukwa vo titenere kupharazgiya, mbwenu tilekengi cha kuchitiya “ukaboni ku ŵanthu amitundu yosi.” (Mate. 24:13, 14) Tiyeni tikambiskani vifukwa vinayi va mu malemba vo titenere kupharazgiya. Tikambiskanengi so vinthu vinayi vo vititiwovya kuti tilutirizgi kupasa vipasu.

3. (a) Mwakukoliyana ndi Yohane 15:8, kumbi chifukwa chikulu cho tipharazgiya ntchakuti wuli? (b) Kumbi mu ntharika yaku Yesu, mphereska zimiyanji, nanga ntchifukwa wuli ntchakuvwika kukamba viyo?

³ Chifukwa chikulu cho tipharazgiya ntchakuti tikhumba kukankhuska Yehova ndipuso kuti zina laki lipaturiki. (Ŵerengani Yohane 15:1, 8.) Yesu wanguyeruzgiya Awisi a Yehova ndi mlimi wa mphereska. Iyu mweneku wangujiyeruzgiya ndi chimiti cha mphereska ndipu akusambira ŵaki wanguŵayeruzgiya ndi mphanda. (Yoha. 15:5) Mwaviyo, mphereska zimiya vipasu vo akusambira aku Khristu apasa, pamwenga kuti ntchitu yakupharazga yo achita. Yesu wangukambiya akutumika kuti: “Ada akankhuskika asani mulutirizga kupasa vipasu vinandi.” Asani mphereska zapasa vipasu vamampha mweneku watumbikika, pamwenga kuti wakankhuskika. Mwakuyanana ŵaka, asani tichita vosi vo tingafiska pakupharazga uthenga wa Ufumu, Yehova wakankhuskika.—Mate. 25:20-23.

4. (a) Kumbi titovya wuli kuti zina laku Chiuta lipaturiki? (b) Kumbi mutuvwa wuli kuti mwe ndi mwaŵi wakuwovya kuti zina laku Chiuta lipaturiki?

⁴ Kumbi ntchitu yakupharazga yitovya wuli kuti zina laku Chiuta lipaturiki? Palivi cho isi tingachita kuti zina laku Chiuta lije lakupaturika ukongwa. Ilu ndakupaturika kali ukongwa. Kweni wonani vo mchimi Yesaya wangukamba. Iyu wanguti: “Yehova wa mizinda ndiyu umuwonengi kuti ngwakupaturika.” (Yesa. 8:13) Titovya kuti zina laku Chiuta lije lakupaturika asani titiliwona kuti ndapade kweniso asani titovya ŵanthu anyaki kuti aliwonengi kuti ndakutowa. (Mate. 6:9, mazu ngamumphata.) Mwakuyeruzgiyapu, tivikiliya zina laku Chiuta ku maboza ngaku Satana asani tikambiya ŵanthu uneneska wakukwaskana ndi Yehova kweniso vo wakhumba kutichitiya. (Chiya. 3:1-5) Titovya so kuti zina laku Chiuta lipaturiki asani titesesa kuwovya ŵanthu muchigaŵa chidu kuwona kuti Yehova ngwakwenere “kulonde unkhankhu, ulemu ndipuso nthazi.” (Chivu. 4:11) Rune yo wachita upayiniya kwa vyaka 16 wangukamba kuti: “Ndiwona kuti ndi mwaŵi ukulu ukongwa kuja kaboni wa Mlengi wa chilengedu chosi. Ndichu chifukwa chaki ndileka cha kupharazga.”

5. (a) Mwakukoliyana ndi Yohane 15:9, 10, ntchifukwa wuli tipharazga? (b) Kumbi Yesu wangulongo wuli kuti kukunthiyapu nkhwakukhumbika?

⁵ Ŵerengani Yohane 15:9, 10. Chifukwa chinyaki cho tipharazgiya uthenga wa Ufumu ntchakuti titanja Yehova ndi Yesu ndi mtima widu wosi. (Mariko 12:30; Yoha. 14:15) Yesu wangukambiya akusambira ŵaki kuti ‘alutirizgi kuchita vinthu vo vingawovya kuti waŵayanjengi.’ Ntchifukwa wuli Yesu wangukamba viyo? Iyu wanguziŵa kuti kukunthiyapu nkhwakukhumbika kuti munthu walutirizgi kuja wakusambira waki. Kuti walongo kuti kukunthiyapu nkhwakukhumbika, Yesu wangukamba mazu ngakuti ‘lutirizgani’ mwakuwerezawereza pa Yohane 15:4-10.

6. Kumbi tingalongo wuli kuti tikhumba kuti Khristu walutirizgi kutiyanja?

⁶ Kumbi tingalongo wuli kuti tikhumba kuti Khristu walutirizgi kutiyanja? Mwakuvwiya marangu ngaki. Yesu wakhumba kuti tichitengi vo nayu wachitanga. Iyu wangukamba kuti: “Nge mo ini nani ndasungiya marangu nga Ada ndi kulutirizga kuchita vinthu vo vitovya kuti andiyanjengi.” Yesu ndiyu wangwamba kusunga marangu nga Awisi ndipu nasi tikhumbika kuchita viyo.—Yoha. 13:15.

7. Kumbi pe kukoliyana wuli pakati pa kuvwiya ndi chanju?

⁷ Kumbi pe kukoliyana wuli pakati pa kuvwiya ndi chanju? Yesu wangukambiya akutumika  kuti: “Munthu weyosi yo we ndi marangu ngangu ndipu watingasunga, watindiyanja.” (Yoha. 14:21) Marangu ngaku Yesu ngatuliya kwa Awisi. Mwaviyo, asani tisunga dangu laku Yesu la kupharazga, tilongo so kuti titanja Awisi. (Mate. 17:5; Yoha. 8:28) Ndipu asani titanja Yehova ndi Yesu, nawu alutirizgengi kutiyanja.

8, 9. (a) Kambani chifukwa chinyaki cho tipharazgiya. (b) Kumbi mazu nga pa Ezekiele 3:18, 19 ndi 18:23 ngatitichiska wuli kuti tilutirizgi kupharazga?

⁸ Pe so chifukwa chinyaki cho tilutirizgiya kupharazga. Tipharazga kuti titcheŵeski ŵanthu. Bayibolu likamba kuti Nowa wenga “mupharazgi.” (Ŵerengani 2 Peturo 2:5.) Nowa watenere so kuti watcheŵeskanga ŵanthu kuti kuzengi Chigumula. Ntchifukwa wuli tikamba viyo? Tikamba viyo chifukwa cha vo Yesu wangukamba. Iyu wanguti: “Pakuti nge mo venge mu mazuŵa ngo, Chigumula chechendazi, ŵanthu aryanga ndi kumwa, anthulumi atonga, anthukazi ayirwanga mpaka pa zuŵa lo Nowa wanguselere muchingaraŵa, yiwu anguziŵaku kanthu cha mpaka po Chigumula chinguziya ndi kuŵapeye limu wosi, ndimu so kwazamuŵiya kuŵapu kwa Mwana wa munthu.” (Mate. 24:38, 39) Chinanga kuti ŵanthu atoliyangaku kanthu cha, kweni Nowa wanguleka cha kuŵatcheŵeska.

⁹ Mazuŵa nganu, tipharazga uthenga wa Ufumu kuti ŵanthu aziŵi vo Chiuta wakhumba kuzitichitiya kunthazi. Nge Yehova, nasi tikhumba kuti ŵanthu avwiyi uthenga wo titiŵapharazgiya kuti “aje amoyu” kwamuyaya. (Ezeki. 18:23) Kweniso, asani tipharazga kunyumba ndi nyumba ndi kumalu ko kusanirika ŵanthu anandi, titcheweska ŵanthu kuti Ufumu waku Chiuta uzengi ndipu wazamunanga ŵanthu aheni.—Ezeki. 3:18, 19; Danye. 2:44; Chivu. 14:6, 7.

10. (a) Mwakukoliyana ndi Mateyu 22:39, ntchifukwa wuli tipharazga? (b) Konkhoskani mo Paulo ndi Sila anguwovye mulonda wa jeri ku Filipi.

¹⁰ Chifukwa chinyaki cho tifwiya daka cha pa ntchitu yakupharazga, ntchakuti titanja ŵanthu. (Mate. 22:39) Pakuti titanja anyidu, tileka cha kupharazga chifukwa tiziŵa kuti ŵanthu angasintha maŵanaŵanu asani vinthu vasintha pa umoyu wawu. Mwakuyeruzgiyapu, ŵanaŵaniyani vo vinguchitikiya Paulo ndi Sila. Mutawuni ya Filipi, ŵanthu akususka anguŵaponya mujeri. Mwamabuchibuchi, pakati pa usiku kunguchitika chidilirisi cho chingusukunyiska jeri ndipu visasa vingujulika. Mulonda wa jeri wakhumbanga kujibaya chifukwa waŵanaŵananga kuti akayidi athaŵa. Kweni Paulo wangudaniriza kuti: “Leka kujipweteka!” Mulonda wa jeri wangufumba kuti: “Nditenere kuchitanji kuti nditaskiki?” Angumukambiya kuti: “Gomezga mwa Ambuya Yesu ndipu yiwi ndi a munyumba yaku mutaskikengi.”—Machi. 16:25-34.

11, 12. (a) Kumbi nkhani ya mulonda wa jeri yititisambizanji? (b) Ntchifukwa wuli tikhumba kulutirizga kupharazga?

¹¹ Kumbi nkhani ya mulonda wa jeri yititisambizanji? Wonani kuti mulonda wa jeri wangusintha maŵanaŵanu ndi kupempha  chovyu kwati kwachitika chidilirisi. Mwakuyanana ŵaka, ŵanthu anyaki mazuŵa nganu wo akana uthenga wa mu Bayibolu, angasintha maŵanaŵanu ndi kupempha chovyu asani akumana ndi masuzgu. Mwakuyeruzgiyapu, anyaki ntchitu yingaŵamaliya mwamabuchibuchi. Anyaki angaguŵa chifukwa cha kumala kwa nthengwa. Kweniso anyaki angaŵa ndi chitima asani aŵasaniya ndi matenda ngakulu pamwenga mubali wawu watayika. Asani vinthu va nge ivi vachitika, anyaki afumba mafumbu ngakukwaskana ndi umoyu ngo kali aŵanaŵaniyangaku cha. Panyaki yiwu angafumba kuti, ‘Kumbi nditenere kuchitanji kuti nditaskiki?’ Asani takumana nawu, yiwu angavwisiya uthenga widu kakwamba pa umoyu wawu.

¹² Mwaviyo, asani tilutirizgengi kupharazga, tiwovyengi ŵanthu pa nyengu yo mbakunozgeka kuvwisiya. (Yesa. 61:1) Charity, yo wachita uteŵeti wanyengu zosi kwa vyaka 38, wangukamba kuti: “Ŵanthu mazuŵa nganu aziŵa cha chakuchita. Yiwu akhumbika kuvwa uthenga wamampha.” Eva, yo wachita upayiniya kwa vyaka 34, wangukamba kuti: “Mazuŵa nganu, ŵanthu anandi asuzgika maŵanaŵanu kuluska kali. Ndikhumbisiska kuti ndiŵawovyi. Ndichu chifukwa chaki ndipharazga.” Kwanja anyidu ntchifukwa chakwenere nadi chakulutirizgiya kupharazga!

13, 14. Kumbi ntchinthu wuli cho chikambika pa Yohane 15:11? (b)  Kumbi likondwa laku Yesu lingaja wuli lidu? (c) Kumbi likondwa lingatiwovya wuli mu uteŵeti?

¹³ Usiku wakuti wafwengi mawa laki, Yesu wangukambiya so akutumika vinthu vinandi vo vingaŵawovya kuti alutirizgi kupasa vipasu. Kumbi wanguŵakambiyanji, ndipu isi tingayanduwa navu wuli?

¹⁴ Likondwa. Kumbi kupharazga ndi mphingu? Awa, ndi mphingu cha. Wati wakamba za ntharika ya mphereska, Yesu wangukamba kuti asani tipharazga tija ndi likondwa. (Ŵerengani Yohane 15:11.) Iyu wangukamba kuti likondwa laki lijengi nasi. Mu nthowa wuli? Nge po takambiyapu kali, Yesu wangukamba kuti iyu ndi mphereska ndipu akusambira ŵaki ndi mphanda. Mphanda zime ku chimiti cha mphereska. Asani mphanda ze kuchimiti cha mphereska zilonde maji ndi chakurya kutuwa ku kuchimiti chenichi. Mwakuyanana ŵaka, Yesu wakondwa chifukwa chakuchita khumbu la Awisi ndipu nasi tikondwengi asani tilutirizgengi kukoliyana nayu mwakulondo maphazi ngaki. (Yoha. 4:34; 17:13; 1 Petu. 2:21) Ana, yo wachita upayiniya kwa vyaka vakujumpha 40, wangukamba kuti: “Ndileka cha kuteŵete Yehova chifukwa cha likondwa lo ndituŵa nalu asani ndipharazga.” Likondwa lititipaska nadi nthazi kuti tilutirizgi kupharazga chinanga kuti muchigaŵa chidu ŵanthu akana kuvwisiya.—Mate. 5:10-12.

15. (a) Kumbi ntchinthu wuli cho chikambika pa Yohane 14:27? (b) Kumbi chimangu chititiwovya wuli kupasa vipasu?

¹⁵ Chimangu. (Ŵerengani Yohane 14:27.) Pa usiku wenuwu wakuti mawa laki wafwengi, Yesu wangukambiya so akutumika kuti: “Nditikupaskani chimangu changu.” Kumbi chimangu cho Yesu watitipaska chititiwovya wuli kupasa vipasu? Asani tilutirizga kupharazga, tija ndi chimangu cha mumtima cho tituŵa nachu chifukwa chakuziŵa kuti Yehova ndi Yesu atitiyanja. (Sumu 149:4; Aro. 5:3, 4; Ako. 3:15) Alfred, yo wachita upayiniya wanyengu zosi kwa vyaka 45, wangukamba kuti: “Ndivuka asani ndipharazga kweni ndija ndi chimangu chamumtima ndipu ndiwona kuti umoyu wangu we ndi chilatu.” Tiwonga ukongwa kuti te ndi chimangu chamumtima chambula kumala!

16. (a) Kumbi ntchinthu wuli cho chikambika pa Yohane 15:15? (b) Kumbi akutumika akhumbikanga kuchitanji kuti alutirizgi kuja abwezi aku Yesu?

 ¹⁶ Kuja pa ubwezi ndi Yesu. Yesu wati wakambiya akutumika kuti wakhumba kuti ‘likondwa lawu lije likulu ukongwa,’ wanguŵakonkhoske kukhumbika kwa chanju. (Yoha. 15:11-13) Pavuli paki, iyu wanguti: “Ndakudanani kuti anyangu.” Kuja mubwezi waku Yesu ntchinthu chakuzirwa ukongwa! Kumbi akutumika akhumbikanga kuchitanji kuti alutirizgi kuja abwezi aku Yesu? Yiwu akhumbikanga ‘kulutirizga kupasa vipasu.’ (Ŵerengani Yohane 15:14-16.) Vyaka viŵi Yesu wechendakambi mazu yanga, wangukambiya akutumika kuti: “Muchiluta mukapharazgengi kuti: ‘Ufumu wakuchanya waŵandika.’” (Mate. 10:7) Mwaviyo, pa usiku wenuwu, Yesu wanguŵachiska kuti alutirizgi kugwira ntchitu yo angwamba. (Mate. 24:13; Mariko 3:14) Iyu wanguziŵa kuti ntchipusu cha kusunga dangu laki. Kweni yiwu atingi afiskengi ndi kulutirizga kuja abwezi ŵaki. Kumbi atingi afiskengi wuli? Mwakuwovyeka ndi chinthu chinyaki.

17, 18. (a) Kumbi ntchinthu wuli cho chikambika pa Yohane 15:16? (b) Kumbi cho chikambika pa lemba ili chinguŵawovya wuli akusambira aku Yesu? (c) Kumbi ndi vinthu wuli vo vititichiska mazuŵa nganu?

¹⁷ Kumukika mapempheru. Yesu wanguti: ‘Chechosi cho mungapempha kwa Ada mu zina langu, yiwu akupaskeningi.’ (Yoha. 15:16) Vo Yesu wangulayizga akutumika pa lemba ili vitenere kuti vinguŵachiska ukongwa! * Mulongozgi wawu wenga pafupi kufwa, chinanga kuti yiwu avwisisanga cha fundu iyi. Kweni ivi vang’anamuwanga kuti ajengi ŵija cha kwambula kuŵawovya. Yehova wenga wakunozgeka kumuka mapempheru ngawu ndi kuŵawovya pakupharazga uthenga wa Ufumu. Pati pajumpha nyengu yimanavi, yiwu anguwona mo Yehova wangumukiya mapempheru ngawu.—Machi. 4:29, 31.

¹⁸ Ndimu so viliri mazuŵa nganu. Asani tilutirizga kupasa vipasu, tija pa ubwezi ndi Yesu. Kweniso, tikayika cha kuti Yehova ngwakunozgeka kumuka mapempheru ngidu pa masuzgu ngo tikumana nangu asani tipharazga uthenga wamampha wa Ufumu. (Afi. 4:13) Tiwonga ukongwa kuti Yehova wamuka mapempheru ngidu kweniso kuti te pa ubwezi ndi Yesu! Vinthu ivi vititichiska kuti tilutirizgi kupasa vipasu.—Yako. 1:17.

19. (a) Ntchifukwa wuli tilutirizga kupharazga? (b) Kumbi ndi vinthu wuli vo vititiwovya kuti timalizi ntchitu yo Chiuta wakutipaska?

¹⁹ Nge mo nkhani iyi yakambiya, tilutirizga kupharazga kuti tikankhuski Yehova ndi kuwovya kuti zina laki lipaturiki. Kweniso, tipharazga kuti tilongo kuti titanja Yehova ndi Yesu, kuti titcheŵeski ŵanthu ndipuso kuti tilongo kuti titanja anyidu. Kusazgiyapu yapa, vinthu nge likondwa, chimangu, kuja pa ubwezi ndi Yesu ndipuso kumukika mapempheru, vititichiska kuti timalizi ntchitu yo Chiuta wakutipaska. Yehova watenere kuti wakondwa ukongwa asani wawona kuti titijipereka ndi mtima wosi kuti ‘tilutirizgi kupasa vipasu vinandi’!