1. Ntchifukwa wuli tosi tikhumba kupembuzgika?

TOSI tikhumba kupembuzgika. Panyaki tifipa mtima pamwenga tikumana ndi vakuguŵiska. Tanyaki tingaŵa kuti tituvwa vakuŵaŵa chifukwa cha ukoti, matenda ndi nyifwa ya mubali widu. Anyaki aku isi ŵanthu atitichitiya vinthu viheni ndipu tija ndi ŵanthu wo atanja viwawa. “Nyengu zakusuzga ukongwa” zinu, zilongo kuti tija “mu mazuŵa ngakumaliya” ndipu zuŵa lelosi tindere kufupi ndi charu chifya. (2 Timo. 3:1) Kweni vingachitika kuti talindizga kwa nyengu yitali kuti Yehova wafiski vo wakulayizga ndipu masuzgu ngidu ngasazgikiyaku. Kumbi ndiyani yo wangatipembuzga?

2, 3. (a) Kumbi tiziŵanji vakukwaskana ndi Habakuku? (b) Ntchifukwa wuli tikambiskanengi buku la Habakuku?

² Kuti timuki fumbu ili, tiyeni tikambiskani buku la Habakuku. Chinanga kuti Malemba ngakonkhoska vosi cha vakukwaskana ndi Habakuku ndipuso ntchitu yo wachitanga, kweni buku lo wakulemba, lo liziŵika ndi zina laki ndakuchiska ukongwa. Zina laki litenere kuti ling’anamuwa “Kuvumbatiya.” Mazu yanga ngatenere kuti ngang’anamuwa mo Yehova watitipembuzgiya nge ndi pa  watitivumbatiya. Pamwenga ngang’anamuwa mo ateŵeti ŵaki ameremete kwaku iyu nge mo mwana wachitiya kwa awisi. Habakuku wangukambiskana ndi Yehova ndi kumufumba mafumbu. Yehova wangumumuka mafumbu ngaki ndipu wangumukambiya kuti walembi vo angukambiskana. Ivi vilongo kuti Yehova wanguziŵa kuti nasi tazamuyanduwa navu.—Haba. 2:2.

³ Bayibolu likamba vinandi cha vakukwaskana ndi Habakuku. Likamba ŵaka vo iyu wangukambiskana ndi Yehova pa nyengu yo wangusuzgika maŵanaŵanu. Buku ili, ntchigaŵa cha “vinthu vo vikulembeka kali” mu Mazu ngaku Chiuta kuti “tije ndi chilindizga chifukwa cha kukunthiyapu ndipuso kupembuzgika ndi Malemba.” (Aro. 15:4) Kumbi weyosi wangayanduwa wuli ndi buku la Habakuku? Buku ili lingatiwovya kuziŵa kuti kugomezga Yehova kung’anamuwanji. Kweniso uchimi waku Habakuku utitisimikiziya kuti tingaja ndi chimangu cha mumtima chinanga kuti tingakumana ndi masuzgu. Tiyeni tikambiskani vinandi vakukwaskana ndi buku la Habakuku.

4. Ntchifukwa wuli Habakuku wangusuzgika maŵanaŵanu?

⁴ Ŵerengani Habakuku 1:2, 3. Vinthu venga vakusuzga ukongwa mu nyengu yaku Habakuku. Iyu wenga ndi chitima ukongwa chifukwa wajanga ndi ŵanthu aheni wo achitanga vinthu va nkhaza. Habakuku wajifumbanga kuti: ‘Kumbi vinthu viheni vimalengi zukwanji? Ntchifukwa wuli Yehova waleka kuchitapu kanthu mwaliŵi?’ Mu nyengu yaku Habakuku ŵanthu anandi achitanga vinthu vambula urunji ndipu akandilizgananga. Iyu wawonanga kuti palivi yo wangamuwovya. Mwaviyo, wangupempha Yehova kuti wachitepu kanthu. Habakuku watenere kuti wangwamba kuŵanaŵana kuti Yehova vitimukwaska cha. Iyu wawonanga kuti Yehova waswera kuchitapu kanthu. Kumbi ndimu namwi muvwiya nyengu zinyaki?

5. Kumbi tisambiranji mubuku la Habakuku? (Wonani chithuzi cho che papeji 13.)

⁵ Kumbi pakufumba mafumbu yanga, Habakuku walongonga kuti wanguleka kugomezga Yehova ndi vo wangulayizga? Awa! Habakuku wangukambiya Yehova vo vamufipiskanga mtima mumalu mwakukambiya ŵanthu. Ivi vilongo kuti wanguleka cha kugomezga Yehova. Iyu wangusuzgika maŵanaŵanu chifukwa waziŵanga cha chifukwa cho Yehova wasweriyanga kuchitapu kanthu ndi kuzomereza kuti wasuzgikengi. Yehova wangukambiya Habakuku kuti walembi vo wafipanga navu mtima kuti isi tisambirepu kanthu. Yehova wakhumba kuti tingawopanga cha kumukambiya vo tifipa navu mtima. Iyu wachita kutipempha kuti timukambiyengi masuzgu ngidu mu pempheru. (Sumu 50:15; 62:8) Lemba la Nthanthi 3:5 lititi ‘tigomezgengi Yehova ndi mtima widu wosi, ndipu tingathembanga zeru zidu cha.’ Habakuku watenere kuti wangaziŵanga mazu yanga ndipu wangagwiriskiyanga ntchitu.

6. Ntchifukwa wuli pempheru ndakukhumbika?

⁶ Habakuku wangugomezga Yehova yo wenga Mubwezi waki kweniso Awiski. Iyu wadandawulanga nangu pakuyija cha masuzgu ngaki pamwenga kumalana nangu yija. Mumalu mwaki, wangukambiya Yehova mo wavwiyanga. Ndivu nasi titenere kuchita. Kweniso Yehova yo watuvwa mapempheru, watitipempha kuti tilongongi kuti titimugomezga mwakumukambiya vo tifipa navu mtima. (Sumu 65:2) Asani tichitengi viyo, tiwonengi mo Yehova wamukiya mapempheru ngidu kweniso mo watitipembuzgiya ndi kutilongozge. (Sumu 73:23, 24) Kwali tingakumana ndi masuzgu wuli, iyu watiwovyengi kuti tiziŵi mo wawone masuzgu ngo takumana nangu. Pempheru ndi nthowa yimoza yo tilongore kuti titimugomezga ukongwa Chiuta.

7. Kumbi Yehova wanguchita wuli Habakuku wati wamukambiya vo vamufipiskanga mtima?

⁷ Ŵerengani Habakuku 1:5-7. Habakuku wati wakambiya Yehova vo vamufipiskanga mtima, watenere kuti waŵanaŵaniyanga mo Yehova wamukiyengi. Pakuŵa Ada achanju kweniso akuvwisa, Yehova wangumuchenya cha Habakuku chifukwa cha madandawulu ngaki. Iyu wanguziŵa kuti Habakuku wadandawulanga chifukwa cha chitima cho wenga nachu. Mwaviyo, wangumukambiya vo wanguzichita kunthazi pati pajumpha nyengu yimanavi. Habakuku watenere kuti wenga munthu wakwamba yo Yehova wangumuvumbuliya kuti Ayuda ambula kugomezgeka ŵenga pafupi kulangika.

8. Ntchifukwa wuli vo Yehova wangumuka ndivu Habakuku wakhazganga cha?

⁸ Yehova wangusimikiziya Habakuku kuti wenga wakunozgeka kuchitapu kanthu. Wangukamba kuti wagwiriskiyengi ntchitu Akadiya pamwenga kuti ŵanthu a ku Babiloni kulanga ŵanthu ankhaza a mucharu cha Yuda. Pakukamba kuti ivi vichitikengi “mu mazuŵa nginu,” Yehova wangulongo kuti cheruzgu ichi chinguchitika Habakuku weche wamoyu pamwenga mu mazuŵa nga Ayisirayeli wo ŵengaku mu nyengu yaki. Vo Yehova wangumuka ndivu Habakuku wakhazganga cha. Ŵanthu a ku Babiloni ndiwu ŵenga ankhaza ukongwa kuphara Ayuda wo aziŵangaku fundu zaku Yehova. Sonu ntchifukwa wuli Yehova wangukamba kuti wagwiriskiyengi ntchitu ŵanthu ambula kumuziŵa kuti alangi ŵanthu ŵaki? Asi ivi vatingi visazgiyengeku ŵaka masuzgu kwa Ayuda? * Kumbi mukaŵengi yimwi mwatingi muchitengi wuli ndi vo Yehova wangumuka Habakuku?

9. Kumbi Habakuku wangufumba mafumbu nganyaki nanga?

⁹ Ŵerengani Habakuku 1:12-14, 17. Chinanga kuti Habakuku wanguziŵa kuti Yehova wagwiriskiyengi ntchitu a Babiloni kulanga Ayuda, iyu wenga weche wakutimbanyizgika. Kweni Habakuku wanguleka cha kuwona Yehova nge “Jarawi” laki. (Mara. 32:4; Yesa. 26:4) Habakuku wagomezganga mbwenu kuti Chiuta ngwachanju kweniso ngwalisungu. Iyu wanguwopa cha kumufumba mafumbu nganyaki nge yanga: Ntchifukwa wuli Yehova wanguzomereza kuti vinthu vinangiki ukongwa ku Yuda? Ntchifukwa wuli wanguleka kuchitapu kanthu mwaliŵi? Ntchifukwa wuli Wanthazi zosi wanguzomereza kuti ŵanthu ŵaki asuzgiki ukongwa? Ntchifukwa wuli wangujapu ŵaka cheti po vinthu vambula urunji vachitikanga? Mafumbu yanga ngenga ngakuvwika chifukwa Yehova ndi “Mutuŵa.” Masu ngaki ngangalereska chinthu chiheni cha.

10. Ntchifukwa wuli nyengu zinyaki tingajivwa nge Habakuku?

¹⁰ Nyengu zinyaki nasi tingajivwa nge mo Habakuku wavwiyanga. Nasi tivwisiya asani Yehova walongoro nasi. Titimugomezga ndipu tiŵerenga ndi kusambira Mazu ngaki. Ivi vititiwovya kuti tije ndi chilindizga. Tituvwa so vo wakutilayizga kuziya mu vo gulu laki lititisambiza. Kweni tingajifumba mbwenu kuti, ‘Kumbi masuzgu ngamalengi zukwanji?’ Kumbi vo Habakuku wanguchita pavuli paki vititisambizanji?

11. Kumbi Habakuku wangusimikiza kuchitanji wati wavwa vo Yehova wangukamba?

¹¹ Ŵerengani Habakuku 2:1. Habakuku wenga ndi chimangu cha mumtima wati wakambiskana ndi Yehova. Mwaviyo, wangusimikiza mtima kulindizga Yehova kuti wachitepu kanthu. Habakuku wangulongo so kuti wenga wakusimikiza mtima po wangukamba kuti:  “Ndilindizgengi mwachisisi zuŵa la suzgu.” (Haba. 3:16) Ateŵeti anyaki akugomezgeka nawu alindizganga Yehova nge mo wanguchitiya Habakuku. Vo yiwu anguchita vititichiska kuti nasi tilindizgengi Yehova kuti wachitepu kanthu.—Mika 7:7; Yako. 5:7, 8.

12. Kumbi tisambiranji kwaku Habakuku?

¹² Kumbi kusimikiza mtima ko Habakuku wanguchita kutitisambizanji? Chakwamba, tingalekanga cha kupemphera kwaku Yehova chinanga tingakumana ndi masuzgu wuli. Chachiŵi, titenere kuvwisiya asani Yehova walongoro nasi kuziya mu Mazu ngaki ndi gulu laki. Chachitatu, titenere kulindizga Yehova ndi kumugomezga kuti watuzgengepu masuzgu ngidu pa nyengu yaki. Asani tilutirizgengi kulongoro ndi Yehova ndi kuvwisiya asani iyu walongoro nasi nge mo Habakuku wanguchitiya, nasi tiŵengi ndi chimangu cha mumtima cho chitiwovyengi kuti tikunthiyengepu. Vo tilindizga vitiwovyengi kuti tizizipizgengi kweniso kuti tikondwengi chinanga tingakumana ndi masuzgu.Vitiwovyengi so kugomezga kuti Ada widu akuchanya achitengepu kanthu.—Aro. 12:12.

13. Kumbi lemba la Habakuku 2:3 lititipembuzga wuli?

¹³ Ŵerengani Habakuku 2:3. Tikayika cha kuti Yehova wangukondwa Habakuku wati wakamba kuti wamulindizgengi. Wanthazizosi wangaziŵanga umampha masuzgu ngaku Habakuku. Mwaviyo, Chiuta wangumupembuzga ndipu wangumusimikiziya kuti wachitengepu kanthu pa vinthu vo wafipanga navu mtima. Venga nge kuti Yehova wakambiya Habakuku kuti: “Zikira, ndigomezgi. Ndimukengi pempheru laku chinanga ungawona nge kuti ndiswera!” Yehova wangumukumbusa kuti wakuŵika kali nyengu yo wazamufiskiya vo wakulayizga. Iyu wangukambiya Habakuku kuti walindizgi. Nyengu yati yakwana, mchimi uyu wanguguŵa cha chifukwa vo Yehova wangukamba vinguchitika nadi.

14. Kumbi titenere kusimikiza mtima kuchitanji asani takumana ndi masuzgu?

¹⁴ Nasi tikhumbika kulindizga Yehova kuti wachitepu kanthu ndi kuvwisiya mwakuphwere asani walongoro nasi. Ivi vitiwovyengi kuti timugomezgengi ndi kuja ndi chimangu cha mumtima kwali vinthu vingasuzga wuli. Yesu wangutichiska kuti tikhumbika kugomezga Yehova mumalu mwakuŵanaŵaniya va “nyengu ndi mazuŵa” ngo Chiuta wechendatikambiyi. (Machi. 1:7) Mwaviyo, tingavukanga cha kweni titenere kujiyuyuwa, kuzizipizga ndi kugomezga Yehova. Tikhumbika kugwiriskiya ntchitu nyengu yidu mwazeru mwakuchita vosi vo tingafiska pakuteŵete Yehova.—Mariko 13:35-37; Aga. 6:9.

15, 16. (a) Kumbi Yehova watitilayizga vinthu wuli mubuku la Habakuku? (b) Kumbi vo Yehova watitilayizga mubuku ili vititisambizanji?

¹⁵ Ŵanthu arunji wo atimugomezga, Yehova watiŵalayizga kuti: “Murunji wazamuja ndi umoyu chifukwa cha chivwanu chaki” ndipu “charu chapasi chizamuzaza ndi ŵanthu wo aziŵa unkhankhu waku Yehova.” (Haba. 2:4, 14) Wo alindizga Chiuta ndi kumugomezga, wazakuŵapaska umoyu wamuyaya.

¹⁶ Layizgu lo le pa Habakuku 2:4 ndakukhumbika ukongwa mwakuti mazu ngo nge pa vesi ili, Paulo wangungakamba kakukwana katatu. (Aro. 1:17; Aga. 3:11; Ahe. 10:38) Kwali munthu murunji wangakumana ndi masuzgu wuli, iyu wazamuwona kufiskika kwa malayizgu ngaku Yehova chifukwa cha chivwanu chaki. Yehova wakhumba kuti tiŵanaŵaniyengi vinthu vo tilindizga kunthazi.

17. Kumbi mubuku la Habakuku Yehova watitisimikiziyanji asani titimugomezga?

¹⁷ Mubuku la Habakuku mwe sambiru lamampha ukongwa kwaku isi tija mu mazuŵa ngakumaliya. Yehova walayizga umoyu wamuyaya  ku munthu murunji weyosi yo watimugomezga. Mwaviyo, titenere kusazgiyaku chivwanu chidu mwaku Chiuta chinanga tingakumana ndi masuzgu ngakulu wuli. Kuporote mwaku Habakuku, Yehova watitisimikiziya kuti watiwovyengi ndi kutitaska. Iyu watitipempha kuti timugomezgengi ndipuso kuti tilindizgengi nyengu yo Ufumu waki wazamuyambiya kulamuliya. Pa nyengu iyi, pacharu chosi chapasi pazamuja ŵanthu akukondwa ndipuso akuzika wo azamusopa Yehova.—Mate. 5:5; Ahe. 10:36-39.

18. Kumbi vo Yehova wangukambiya Habakuku vingumukwaska wuli?

¹⁸ Ŵerengani Habakuku 3:16-19. Vo Yehova wangukambiya Habakuku vingumukwaska ukongwa. Habakuku wanguŵanaŵaniyapu vinthu vakuziziswa vo Yehova wanguchitiya ŵanthu ŵaki kuvuli. Venivi vingumuwovya kuti wayambi so kumugomezga ukongwa Yehova. Habakuku wanguziŵa kuti kwaja kamanavi kuti Yehova wachitepu kanthu. Ivi vingumupembuzga ukongwa mchimi uyu chinanga kuti waziŵanga kuti masuzgu ngo wenga nangu ngamalengi nyengu yeniyo cha. Habakuku wanguleka kukayikiya. Mumalu mwaki, wenga ndi chivwanu chikulu kuti Yehova wamutaskengi. Ndipu mazu ngo Habakuku wangukamba mu vesi 18 ngamoza mwa mazu ngo ngalongo kuti wamugomezganga ukongwa Yehova. Ŵanthu anyaki akamba kuti mazu ngo nge mu vesi ili, ngang’anamuwa kuti “ndindwikengi ndi likondwa mwa ambuya ndipu ndivinengi chifukwa chakukondwa mwaku Chiuta.” Fundu yo ye mu mavesi yanga njakuchiska ukongwa. Yehova wakutilayizga vinthu vamampha kunthazi kweniso watitisimikiziya kuti pasonu panu wachitapu kanthu kuti wafiski khumbu laki.

19. Kumbi tingachita wuli kuti Chiuta watipembuzgi nge mo wanguchitiya ndi Habakuku?

¹⁹ Sambiru likulu lo tisambira mubuku la Habakuku ndakuti tigomezgengi Yehova. (Haba. 2:4) Tingayamba kumugomezga Yehova asani tingaŵa nayu pa ubwezi wakukho. Mwaviyo, titenere (1) kupemphera nyengu zosi kwaku Yehova, kumukambiya vosi vo tifipa navu mtima; (2) kuvwisiya asani Yehova walongoro nasi kuziya mu Mazu ngaki ndi kuvwiya vo watitikambiya kuziya mugulu laki; ndipuso (3) kugomezga ndi kulindizga vo Yehova wakulayizga. Ivi ndivu Habakuku wanguchita. Chinanga kuti Habakuku wangwamba kulemba buku laki ndi madandawulu, kweni wangumaliza ndi mazu ngalikondwa. Asani tingalondo Habakuku, nasi Yehova watipembuzgengi. Palivi munthu munyaki yo wangatipembuzga kuphara Yehova mucharu chiheni ichi.