MU NYENGU yakali, mteŵeti wapanyumba wawoneriyanga nyumba pamwenga katundu wa bwana waki.

Yosefi mwana waku Yakobe wati waja kapolu ku Ijipiti, wenga mteŵeti wapanyumba ya mbuyaki. Mwakuti mbuyaki “wanguŵika vinthu vaki vosi mu manja mwaku Yosefi.” (Chiya. 39:2-6) Pavuli paki, Yosefi wati waja fumu ku Ijipiti, nayu wangusankha mteŵeti wapanyumba kuti wawoneriyengi nyumba yaki.​—Chiya. 44:4.

Mu nyengu yaku Yesu, kanandi ŵeneku a minda ajanga mu matawuni, kutali ndi minda yawu. Mwaviyo, yiwu asankhanga ateŵeti apanyumba kuti awoneriyengi aganyu wo agwiranga ntchitu muminda yeniyi.

Kumbi asankhanga munthu wamtundu wuli kuti waje mteŵeti wapanyumba? Mu nyengu ya akutumika munthu munyaki wa ku Roma zina laki Columella wangukamba kuti kapolu yo wasakhikanga kuti waje mteŵeti wapanyumba, wakhumbikanga “kuja munthu yo watiyiziŵa umampha ntchitu yo mbuyaki wakhumbanga kuti wagwiri.” Wakhumbikanga “kuwonesesa kuti antchitu agwira umampha ntchitu yo apaskika mwambula kuŵachitiya nkhaza.” Iyu wangukamba so kuti: “Kuluska vosi vo vakhumbikanga, mteŵeti wapanyumba wakhumbikanga cha kuŵanaŵana kuti waziŵa kali vinthu vosi. Kweni nyengu zosi wakhumbikanga kuja wakukhumbisiska kusambira vinthu vasonu.”

Mazu ngaku Chiuta ngayeruzgiya ntchitu zo mteŵeti wapanyumba wachitanga ndi ntchitu zinyaki zo zigwirika mu mpingu Wachikhristu. Mwakuyeruzgiyapu, wakutumika Peturo wanguchiska Akhristu kuti agwiriskiyengi ntchitu mphasu zo Chiuta wakuŵapaska “pakuteŵetiyana nge ateŵeti akuwonere nyumba amampha a wezi ukulu waku Chiuta.”​—1 Petu. 4:10.

Muntharika yo Yesu wangukamba pa Luka 16:1-8, wangugwiriskiya ntchitu chakuyeruzgiyapu cha mteŵeti wapanyumba. Kweniso mu uchimi wakukwaskana ndi kuŵapu kwaki nge Fumu, Yesu wangusimikiziya akusambira ŵaki kuti azamusankhika kuja “kapolu wakugomezgeka ndi wazeru” pamwenga kuti “mteŵeti wapanyumba.” Udindu ukulu wa mteŵeti mwenuyu nkhupereka chakurya chauzimu kwa akusambira aku Khristu mu mazuŵa ngakumaliya. (Mate. 24:45-47; Luka 12:42) Tiwonga ukongwa kuŵa mugulu la ŵanthu wo alonde mabuku ngo mteŵeti wapanyumba mwenuyu watitipaska pacharu chosi chapasi.