1, 2. (a) Kumbi Akhristu auneneska apambana wuli ndi ŵanthu wo ŵe kuchigaŵa chaku Satana pa vo alindiza? (b) Kumbi ndi mafumbu ngakukhumbika nanga ngo tikambisanengi?

AKHRISTU auneneska alindiza vinthu vamampha ukongwa. Kaya ndisi Akhristu akusankhika pamwenga “a mbereri zinyaki,” tosi tilindiza kuti Chiuta wafiski vo wakhumbanga pakwamba kweniso watowesi zina laki. (Yoh. 10:16; Mat. 6:9, 10) Venivi ndivu munthu weyosi wangayanja kuti vifiskiki. Tilindiza so kuzilonde mphotu ya umoyu wamuyaya wo Chiuta wakulayizga. Anyaki aluta ‘kuchanya’ penipo anyaki azamuja ‘pacharu chapasi.’ (2 Pet. 3:13) Pasonu panu, tilindiza kuti ŵanthu aku Chiuta alutirizengi kusambira vinandi vakukwaskana ndi iyu.

² Ŵanthu wo ŵe kuchigaŵa chaku Satana nawuso ŵe ndi chilindiza kweni akayika asani chilindiza chawu chazamufiskika. Mwakuyeruzgiyapu, ŵanthu mamiliyoni wo atchova juga agomeza kuti awinengi kweni asimikiza cha. Mwaviyo, tingakamba kuti, munthu wakhumbika kuja ndi “chigomezu chakukho” kuti waje ndi chivwanu cheneku. (Ŵah. 11:1) Panyaki mungajifumba kuti, kumbi ndingachita wuli kuti ndije ndi chigomezu kuti vo ndilindiza vazamufiskika nadi? Kumbi  ndingasaniya vitumbiku wuli chifukwa chakuja ndi chivwanu chakukho pa vinthu vo ndilindiza?

3. Ntchifukwa wuli Akhristu auneneska aja ndi chivwanu?

³ Ŵanthu ambula kufikapu achita kuwa nachu cha chivwanu ndipuso chituza ŵaka chija cha. Asani munthu we ndi mtima wamampha, mzimu waku Chiuta utimuwovya kuja ndi chivwanu. (Ŵag. 5:22) Bayibolu likamba cha kuti Yehova we ndi chivwanu pamwenga wakhumbika chivwanu. Chifukwa chakuti Yehova ngwanthazizosi ndipuso ngwazeru kuluska weyosi, palivi cho chingamutondekesa kufiska khumbu laki. Ada ŵidu akuchanya akayika cha kuti vinthu vamampha vo akulayizga vifiskikengi ndipu kwaku yiwu vija nge vikufiskika kali. Ndichu chifukwa chaki akamba kuti: “Vafiskika!” (Ŵerengani Chivumbuzi 21:3-6.) Mwaviyo, Akhristu aja ndi chivwanu chifukwa chakuti Yehova ndi “Chiuta wakugomezeka” yo nyengu zosi wafiska vo walayizga.—Mar. 7:9.

4. Kumbi anthurumi ndi anthukazi akugomezeka wo ŵengaku Yesu wechendazi ŵe ndi chilindiza wuli?

⁴ Mubuku la Ŵahebere chaputala 11 mwe mazina nga anthurumi ndi anthukazi akukwana 16 wo ŵenga ndi chivwanu. Yo wangulemba buku lenili wakukamba za ŵanthu ŵenaŵa ndipuso anyaki anandi wo ‘anguŵachitiya ukaboni chifukwa cha chivwanu chawu.’ (Ŵah. 11:39) Wosi ŵenga ndi “chigomezu chakukho” kuti Chiuta wazamuyusa “mbewu” yakulayizgika yo yazamuphwanya Satana ndipu yazamufiska vo Yehova wakhumbanga pakwamba. (Chiy. 3:15) Yesu Khristu ndiyu wakujula nthowa yakuluta kuchanya kweni ŵanthu akugomezeka ŵenaŵa, akufwa mbewu yakulayizgika yechendazi. (Ŵag. 3:16) Chinanga kuti ve viyo, tiwonga Yehova chifukwa chakuti wazamufiska malayizgu ngaki ndipu yiwu azamuyuskika kuti azije ndi umoyu wamuyaya muparadayisu pacharu chapasi.—Sumu 37:11; Yes. 26:19; Hos. 13:14.

5, 6. Kumbi ndi vinthu nivi vo Abrahamu ndi banja laki alindizanga, nanga ntchinthu wuli cho chinguŵawovya kuti alutirizi kuja ndi chivwanu chakukho? (Wonani chithuzi cho che papeji 21.)

⁵ Lemba la Ŵahebere 11:13 likamba za ateŵeti anyaki wo ŵengaku Yesu wechendazi. Likamba kuti: “Wosi ŵenaŵa akufwa ndi chivwanu ndipu chinanga kuti akungawona cha malayizgu ngachifiskika, angungawone patali ndi kungalonde.” Yumoza mwa ŵanthu ŵenaŵa wenga Abrahamu. Kumbi iyu waŵanaŵaniyanga umoyu wamampha wo watingi wazijengi nawu asani “mbewu” yakulayizgika yaziyamba kulamuliya? Yesu wangumuka mwakuvwika umampha fumbu lenili po wangukambiya ŵanthu wo amususkanga kuti: “Awusemwi Abrahamu angukondwa ukongwa chifukwa alindizanga kuziwona zuŵa langu, yiwu anguliwona ndipu angukondwa.” (Yoh. 8:56) Ndimu so venge ndi Sara, Yisaki, Yakobe ndi ŵanthu anyaki anandi wo alindizanga Ufumu wo watingi uzijengepu kunthazi, wo Chiuta ndiyu ‘wakunoza ndi kuzenga.’—Ŵah. 11:8-11.

⁶ Ntchinthu wuli cho chinguwovya Abrahamu ndi banja laki kuti aje ndi chivwanu chakukho? Yiwu atenere kuti asambiranga zaku Chiuta kutuliya ku ŵanthu arara akugomezeka, kuziya mu mauthenga ngakutuliya kwaku Chiuta ngo alondiyanga pamwenga mipukutu yakugomezeka yakali yo aŵerenganga. Fundu yakukhumbika ukongwa njakuti, anguluwa cha vo angusambira ndipu akondwanga ndi malayizgu ngaku Chiuta kweniso vo wakhumbanga. Yiwu alungurukanga vinthu venivi. Chifukwa chakuti ŵenga ndi chigomezu chakukho, anthurumi ndi anthukazi ŵenaŵa ŵenga akunozgeka kukumana ndi suzgu lelosi kuti aje akugomezeka kwaku Chiuta.

7. Kumbi ndi vinthu nivi vo Yehova watipasa vo vititiwovya kuja ndi chivwanu chakukho, nanga tikhumbika kuchitanji ndi vinthu venivi?

⁷ Yehova wakutipasa Bayibolu kuti litiwovyi kulutiriza kuja ndi chivwanu chakukho. Tikhumbika kuŵerenga mazu ngaku Chiuta nyengu  zosi kuti ‘tikondwengi’ ndipuso kuti vinthu ‘vitiyendiyengi umampha’ ndipu asani tingafiska, tiŵerengengi zuŵa lelosi. (Sumu 1:1-3; ŵerengani Machitidu 17:11.) Nge mo anguchitiya ateŵeti aku Yehova a munyengu yakali, titenere kuŵanaŵaniya vinthu vo iyu walayizga ndipuso tivwiyengi marangu ngaki. Yehova watitumbika so chifukwa watitisambiza kuziya mu vinthu vinandi vo “muŵanda wakugomezeka ndi wakuwamu” watitipasa. (Mat. 24:45) Mwaviyo, asani titivigwirisiya ntchitu, tijengi nge ateŵeti akali akugomezeka wo ŵenga ndi “chigomezu chakukho” mu vinthu vo Ufumu watingi uzisengi.

8. Kumbi kuromba kungatiwovya wuli kuti tije ndi chivwanu chakukho?

⁸ Kuromba kunguwovya so ateŵeti akali kulutiriza kuja ndi chivwanu chakukho. Yiwu ajanga ndi chivwanu chakukho asani marombu ngawu ngamukika. (Neh. 1:4, 11; Sumu 34:4, 15, 17; Dan. 9:19-21) Nasi tingamukambiya Yehova vinthu vo tifipa navu mtima chifukwa tiziŵa kuti wavwengi rombu lidu ndipuso watiwovyengi kuja alikondwa pa nyengu yo tikunthiyapu. Tija ndi chivwanu chakukho asani marombu ngidu ngamukika. (Ŵerengani 1 Yohane 5:14, 15.) Chifukwa chakuti chivwanu ndi jalidu lo mzimu utuŵa utitiwovya kuja nalu, tikhumbika ‘kulutiriza kupempha’ nge mo Yesu wakutichiskiya.—Luka 11:9, 13.

9. Kusazgiyapu pa kupempha vo tikhumba, kumbi mbayani anyaki wo titenere kuŵarombe?

⁹ Marombu ngidu ngangaŵanga ŵaka ngakupempha chovyu cha. Tiwongengi ndipuso tithamikengi Yehova zuŵa lelosi chifukwa cha ‘ntchitu zaki zakuziziswa’ kweniso ‘zambula maŵerengeka.’ (Sumu 40:5) Marombu ngidu ngatenere kulongo kuti ‘tikumbuka ŵanthu wo ŵe mujeri nge kuti tamangikiya nawu limoza.’ Titenere so kurombe ‘wo atitilongozga’ kweniso abali ndi azichi pacharu chosi. Tichiskika asani tiwona mo Yehova wamukiya marombu ngidu!—Ŵah. 13:3, 7.

10. Kumbi mbateŵeti aku Chiuta naŵa wo angulutiriza kuja akugomezeka, nanga ndiyani yo wanguŵapasa nthazi kuti achiti viyo?

¹⁰ Mu Ŵahebere chaputala 11, wakutumika Paulo wakukamba za mayeseru ngo ateŵeti anandi aku Chiuta angukunthiyapu, ŵanthu ŵenaŵa mazina ngawu ngakuzumbulika cha. Mwakuyeruzgiyapu, wakukamba za anthukazi wo ŵana ŵawu angufwa kweni pavuli paki anguyuskika. Paulo wakukamba so za ŵanthu anyaki “wo angukana kufwatulika chifukwa akhumbanga kuti azilonde chiyuka chamampha.” (Ŵah. 11:35) Chinanga kuti tiziŵa cha kuti Paulo wakambanga yani kweni penga Naboti ndi Zekariya wo anguponyeka mya mpaka kufwa chifukwa chakuvwiya Chiuta ndi kuchita khumbu laki. (1 Ŵakar. 21:3, 15; 2 Mik. 24:20, 21) Kwatingi kuŵengi kwambula kusuzga kuti Danyele ndi anyaki aleki kuja akugomezgeka ndi chilatu chakuti ‘afwatuliki.’ Tingakamba kuti, yiwu angugomeza nthazi zaku Chiuta kuti ‘zijalengi milomu ya nkharamu’ ndi ‘kuzimwa nthazi ya motu.’—Ŵah. 11:33, 34; Dan. 3:16-18, 20, 28; 6:13, 16, 21-23.

11. Kumbi ndi mayeseru nanga ngo achimi anyaki angukunthiyapu chifukwa chakuti ŵenga ndi chivwanu?

¹¹ Achimi anyaki nge Mikaya ndi Yeremiya nawu anguyeseka. Yiwu ‘anyozekanga ndipuso aŵikikanga mujeri’ chifukwa chakuti ŵenga ndi chivwanu. Anyaki nge Eliya ‘ayinganga muvipalamba ndi mumapiri ndi muzimphanji, ndi muvibuwu va charu.’ Wosi angukunthiyapu chifukwa chakuti ŵenga ndi ‘chigomezu chakukho pa vinthu vo alindizanga.’—Ŵah. 11:1, 36-38; 1 Ŵakar. 18:13; 22:24-27; Yer. 20:1, 2; 28:10, 11; 32:2.

12. Kumbi ndiyani yo wakulongo chakuwoniyapu chamampha ukongwa chakukunthiyapu mayeseru, nanga ntchinthu wuli chingumuwovya kuchita viyo?

¹² Paulo wati wamala kukonkhosa za anthurumi ndi anthukazi wo ŵenga ndi chivwanu wangukamba zaku Yesu Khristu Ambuyafwi  yo ntchakuwoniyapu chamampha ukongwa ku ŵanthu wosi. Lemba la Ŵahebere 12:2 likamba kuti: ‘Chifukwa cha likondwa lo linguŵikika pa nthazi paki, wangukunthiyapu pachimiti chakutombozekiyapu, wanguchita soni cha ndipu wanguja kumaryi kwa mpandu wachifumu waku Chiuta.’ Kukamba uneneska, tikhumbika ‘kuŵanaŵaniya ukongwa’ vo Yesu wanguchita pa nyengu yo wangukumana ndi mayeseru ngakulu. (Ŵerengani Ŵahebere 12:3.) Nge Yesu, Akhristu anyaki a mu nyengu ya akutumika angubayika chifukwa chakuti akananga kuthera. Yumoza mwa Akhristu ŵenaŵa wenga Antipase. (Chiv. 2:13) Yiwu akuyusikiya kuchanya ndipu chiyuka chawu chiluska chiyuka cho alindiza ateŵeti aku Yehova wo ŵengaku Yesu wechendazi. (Ŵah. 11:35) Pavuli pa kujalikiskika kwa Ufumu kuchanya mu 1914, Akhristu akusankhika akugomezgeka ŵenaŵa, anguyusikiya kuchanya kuti azilamuliyengi ŵanthu pacharu chapasi limoza ndi Yesu.—Chiv. 20:4.

13, 14. Kumbi ndi mayeseru wuli ngo mubali Rudolf Graichen wangukumana nangu, ndipu ntchinthu wuli cho chingumuwovya kukunthiyapu?

¹³ Ateŵeti mamiliyoni nganandi mazuŵa nganu alondo Yesu, yiwu alutiriza kuja ndi chivwanu ndipu azomereza cha kuti mayeseru ngadewezi chivwanu chawu. Ŵanaŵaniyani mubali Rudolf Graichen yo wanguwa mu 1925, ku Germany. Iyu wakumbukanga vithuzi va nkhani za  m’Bayibolu vo vinguŵikika pa chimati mu nyumba mwawu. Iyu wangulemba kuti, “Pachithuzi chimoza penga kambwi ndi mbereri, mwana ndi nyalubwi, mwana wa ng’ombi ndi nkharamu, vosi vajanga mwachimangu ndipu valongozgekanga ndi kamunyamata. . . . Vithuzi venivi ndaviluwanga cha.” (Yes. 11:6-9) Pakwamba mubali Rudolf wangutombozgeka ndi apolisi a Nazi ndipu pavuli paki ndi apolisi achisisi a boma lakuvuma kwa Germany. Chinanga kuti wangutombozgeka ukongwa kwa vyaka vinandi, mubali Rudolf wangulutiriza kuja ndi chivwanu chakukho kuti wazamuja muparadayisu.

¹⁴ Mubali Rudolf wangukumana so ndi mayeseru nganyaki. Anyina angufwa ndi matenda nga chifuŵa cha nthomba kujeri la Ravensbrück ndipu awisi chivwanu chawu chingudewezeka mwakuti angusayina chikalata kuti mbakaboni aku Yehova so cha. Wati watuwa kujeri, wangwamba kuteŵete nge wakuwonere dera ndipu pavuli paki wangudanika kuti wakasere Sukulu ya Giliyadi. Mubali Rudolf angumukambiya kuti wakateŵetiyengi nge mumishonale ku Chile, ko wangwamba so kuteŵete nge wakuwonere dera. Iyu wangukumana mbwenu ndi mayeseru. Pati pajumpha chaka kutuliya po wangutole Patsy yo wenga so mumishonale, mwana wawu munthukazi wa myezi yimanavi wangufwa. Pavuli paki, muwolu waki Patsy yo wenga ndi vyaka 43 nayuso wangufwa. Mubali Rudolf wangukunthiyapu mayeseru ngosi yanga. Chinanga kuti wenga wakukota ndipuso watamanga, wachitanga mbwenu upayiniya wa nyengu zosi kweniso wenga mura mumpingu. Pa nyengu yeniyi ndipu nkhani ya umoyu waki yo ye papeji 20 mpaka 25 mu Chigongwi cha Alinda cha August 1, 1997, yalembekanga.

15. Kumbi mbakaboni aku Yehova naŵa wo akunthiyapu kutombozgeka mazuŵa nganu?

¹⁵ Akaboni aku Yehova akondwa chifukwa cha vinthu vo agomeza chinanga kuti atombozgeka ukongwa ndipu ŵanthu alutiriza kuŵatombozga. Mwakuyeruzgiyapu, abali ndi azichi ŵidu mahandiredi ŵe mujeri ku Eritrea, Singapore ndi ku South Korea. Anandi mwa ŵanthu ŵenaŵa akumangika chifukwa chakuvwiya mazu ngo Yesu wangukamba ngakuti, ungatonga lipanga cha. (Mat. 26:52) Anyaki mwa abali ŵenaŵa ndi Isaac, Negede ndi Paulos ndipu aja mujeri vyaka vakujumpha 20 ku Eritrea. Yiwu alivi mwaŵi wakuphwere apapi ŵawu akukota ndipuso kuto kweni ŵeche kugomezeka chinanga kuti atiŵachitiya nkhaza ukongwa. Yiwu awoneka akukondwa pa webusayiti yidu ya jw.org vo vilongo kuti ŵe ndi chivwanu chakukho. Chinanga mbalonda a jeri lo alimu atiŵatumbika.

16. Kumbi chivwanu chakukho chingakuvikiriyani wuli?

¹⁶ Pe so masuzgu nganyaki ngo Akaboni aku Yehova anandi akunthiyapu. Chivwanu chawu chiteseka mu nthowa zinandi. Anandi ateseka ndi ukavu, nkhondu ndipuso ngozi zachilengedu. Anyaki ŵenge Mosese kweniso ateŵeti anyaki akali wo angukana kuja akukhupuka ndipuso akutchuka. Yiwu anguyesesa kukana kuja ndi vinthu vinandi va mucharu ichi kweniso kujikuza. Ntchinthu wuli chinguŵawovya kuti afiski kuchita venivi? Yiwu ayanjanga Yehova ndipu ŵenga ndi chivwanu chakukho kuti wazamutuzapu vinthu vosi vambula urunji kweniso kuti ateŵeti ŵaki akugomezeka, wazakuŵapasa umoyu wamuyaya mucharu chifya cha urunji.—Ŵerengani Sumu 37:5, 7, 9, 29.

17. Kumbi imwi muyesesengi kuchitanji, nanga tazamusambiranji munkhani ya sabata yamawa?

¹⁷ Mu nkhani iyi tawona mo kulunguruka pa vo Chiuta wakulayizga ndipuso kuromba kaŵikaŵi kungatiwovye kuja ndi chivwanu chakukho. Venivi vingachitisa kuti tikunthiyepu mayeseru ngo ngangayesa chivwanu chidu kweniso kuti tilutirizi kuja ndi “chigomezu chakukho” pa vinthu vo tilindiza. Bayibolu lilongo kuti pe vinthu vinandi vo munthu wakhumbika kuchita kuti waje ndi chivwanu nge mo tiwoniyengi mu nkhani yo tazamusambira sabata yamawa.