1, 2. (a) Kumbi Yesu watangwanikanga ukongwa ndi ntchitu niyi, ndipu ntchifukwa wuli wachitanga viyo? (b) Pakuti “tigwiriya ntchitu limoza ndi Chiuta,” kumbi titenere kuchitanji kuti tichitengi umampha uteŵeti widu?

YESU KHRISTU wenga kalipentala kweniso wapharazganga. (Mariko 6:3; Aro. 15:8) Iyu waziziŵanga umampha ntchinthu zosi ziŵi izi. Pakuŵa kalipentala, Yesu wangusambira mo wangagwiriskiya ntchitu vidya va ukalipentala kuti wapangi vinthu vamampha kutuliya ku mathabwa. Ndipu pakuŵa msambizi wa uthenga wamampha, iyu wagwiriskiyanga ntchitu Malemba mwalusu kuti ŵanthu avwisi uneneska wa mu Mazu ngaku Chiuta. (Mate. 7:28; Luka 24:32, 45) Wati wafika vyaka 30, Yesu wanguleka ukalipentala chifukwa wanguziŵa kuti kupharazga ndiku kwenga kwakukhumbika ukongwa. Iyu wangukamba kuti chifukwa chimoza cho wanguziya pacharu chapasi, chenga chakuti Chiuta wangumutuma kuti wazipharazgi uthenga wamampha wa Ufumu. (Mate. 20:28; Luka 3:23; 4:43) Yesu watangwanikanga ukongwa ndi kupharazga uthenga wamampha ndipu wakhumbanga kuti ŵanthu anyaki nawu achitengi viyo.—Mate. 9:35-38.

² Anyaki aku isi te akalipentala cha kweni tipharazga uthenga wamampha. Ntchitu iyi njakukhumbika ukongwa mwakuti Chiuta nayu wagwiraku. Bayibolu likamba kuti “tigwiriya ntchitu limoza ndi Chiuta.” (1 Akori. 3:9; 2 Akori. 6:4) Tikoliyana ndi yo wakulembaku buku la Sumu yo wangukamba kuti ‘mazu ngosi [ngaku Yehova] mbuneneska.’ (Sumu 119:159, 160) Ndichu chifukwa chaki tikhumbisiska ‘kusambiza umampha mazu ngauneneska’ mu uteŵeti.  (Ŵerengani 2 Timote 2:15.) Mwaviyo, titesesa kuti tiliziŵi umampha Bayibolu chifukwa ndichu chidya chikulu cho tigwiriskiya ntchitu pakusambiza uneneska wakukwaskana ndi Yehova, Yesu ndi Ufumu. Kuti tichiti umampha uteŵeti widu, gulu laku Yehova latipaska Vidya vo Tigwirisiya Ntchitu Pakusambiza. Vidya ivi tikhumbika kuviziŵa umampha.

3. (a) Pakuti taja ndi nyengu yimanavi, kumbi titenere kuŵika mtima pakuchitanji? (b) Kumbi titenere kupenja ŵanthu naŵa mwakukoliyana ndi Machitidu 13:48?

³ Panyaki mungazizwa chifukwa cho titividaniya kuti Vidya vo Tigwiriskiya Ntchitu Pakusambiza mumalu mwakukamba kuti Vidya vo Tigwiriskiya Ntchitu Pakupharazga. “Kupharazga” kung’anamuwa kumemeza uthenga penipo “kusambiza” kung’anamuwa kumukonkhoske munthu kuti wavwisi vo tikamba kuti wachitepu kanthu. Pakuti taja ndi nyengu yimanavi, tikhumbika kuŵika mtima widu pakwambisa masambiru nga Bayibolu ndi kusambiza ŵanthu uneneska. Ivi ving’anamuwa kuti titenere kupenja ŵanthu wo ŵe ndi ‘maŵanaŵanu ngamampha ngo ngangaŵawovya kuti azisaniyi umoyu wamuyaya.’—Ŵerengani Machitidu 13:44-48.

4. Kumbi ŵanthu wo ŵe ndi ‘maŵanaŵanu ngamampha ngo ngangaŵawovya kuti azisaniyi umoyu wamuyaya’ tingaŵasaniya wuli?

⁴ Kumbi tingaŵaziŵa wuli ŵanthu wo ŵe ndi ‘maŵanaŵanu ngamampha ngo ngangaŵawovya kuti azisaniyi umoyu wamuyaya’? Nge mo ve nge mu nyengu ya akutumika, nthowa yimoza yo tingasaniriya ŵanthu aviyo, nkhupharazga. Mwaviyo, titenere kuchita nge mo Yesu wangukambiya. Iyu wangukamba kuti: “Mutawuni pamwenga mumuzi wewosi wo mungasere, penjanimu munthu yo ngwakwenere.” (Mate. 10:11) Kweni mphakusuzga kuti ŵanthu avwisiyi uthenga wamampha asani vaku Chiuta alivi navu ntchitu, mbakujikuzga pamwenga asani achita vinthu mwauneneska cha. Tipenja ŵanthu wo ŵe ndi nja yauneneska, akujiyuyuwa ndipuso wo ŵe ndi mtima wamampha. Kupenja uku tingakuyeruzgiya ndi vo Yesu watenere kuti wachitanga pa nyengu yo wenga kalipentala. Iyu watenere kuti wapenjanga chimiti chamampha kuti wapangiyi mipandu, bedi, visasa, goli pamwenga vinthu vinyaki. Asani wachisaniya, watonga vidya vaki ndi kugwiriskiya ntchitu lusu laki kupanga chinthu cho wapenja. Ndivu nasi titenere kuchita penipo tisambiza ŵanthu amtima wamampha kuti aje akusambira aku Yesu.—Mate. 28:19, 20.

5. Kumbi tikhumbika kuziŵanji pankhani ya Vidya vo Tigwiriskiya Ntchitu Pakusambizga? Kambani chakuyeruzgiyapu. (Wonani chithuzi cho che papeji 11.)

⁵ Nge mo viŵiya ndi vidya vinyaki vosi vo ŵanthu agwiriskiya ntchitu, chidya chechosi chija ndi ntchitu yaki. Mwakuyeruzgiyapu, tiyeni tikambiskani vidya vo Yesu watenere kuti wagwiriskiyanga ntchitu pa ntchitu yaki ya ukalipentala. * Iyu wakhumbikanga vidya vakupimiya ndi kulembe pa thabwa, vakudumuliya, vakutolore, vakuyanisiya mathabwa ndi kungalunga pamoza. Mwakuyanana ŵaka, chidya chechosi cho tigwiriskiya ntchitu pakusambiza che ndi ntchitu yaki. Mwaviyo, yiyeni tikambiskani vidya vo tikupaskika kweniso mo tingavigwiriskiya ntchitu.

6, 7. (a) Kumbi yimwi mutingagwiriskiya wuli ntchitu makadi ngakuziŵisa ŵanthu za jw.org? (b) Kumbi timapepala takudaniya ŵanthu ku maunganu nga mpingu tigwira ntchitu wuli?

⁶ Makadi Ngakuziŵisa Ŵanthu za jw.org. Makadi yanga ngatovya kuti ŵanthu atiziŵi ndi kuŵalongozge pa webusayiti yidu po angaziŵa vinandi vaku isi ndi kupempha sambiru la Bayibolu. Pasonu panu ŵanthu akujumpha 400,000 akupempha kuziya pa webusayiti yidu ya jw.org kuti asambirengi Bayibolu. Ndipu anyaki so anandi apempha zuŵa lelosi. Mungachita umampha kupinga makadi yanga peposi po mutenda kuti mugaŵiyengi ŵanthu.

⁷ Timapepala Takudaniya Ŵanthu. Pa kapepala kakudaniya ŵanthu ku maunganu nga mpingu pakulembeka kuti: “Titikupemphani kuti  musambirengi Bayibolu ndi Akaboni aku Yehova.” Pavuli paki, katimupaska wanangwa munthu wakusankha kusambira Bayibolu “pa maunganu ngidu ngachisanisani” ‘pamwenga kuti munthu wasambirengi nayu.’ Mwaviyo, kapepala yaka katovya ŵanthu kutiziŵa kweniso kapempha “wo aziŵa kuti akhumbika Chiuta” kuti ayambi kusambira nasi Bayibolu. (Mate. 5:3) Ŵanthu wosi mbakulondereka ku maunganu ngidu, kwali azomeri kusambira Bayibolu pamwenga cha. Asani awungana nasi ndipu amamuka kumasu kuti pe vinandi vo akhumbika kusambira mu Bayibolu.

8. Ntchifukwa wuli nkhwakukhumbika kuti ŵanthu ŵazi ku maunganu ngidu chinanga kangaŵa kamoza pe? Kambani chakuyeruzgiyapu.

⁸ Kudaniya ŵanthu ku maunganu ngidu nkhwakukhumbika ukongwa chinanga angalutaku kamoza pe. Chifukwa wuli? Asani ŵaza ku maunganu ngidu azamuwona kuti Akaboni aku Yehova asambiza uneneska ndipuso atovya ŵanthu kuziŵa Chiuta penipo visopa vaboza vichita viyo cha. (Yesa. 65:13) Ivi ndivu Ray ndi muwolu waki Linda a ku United States angusaniya. Yiwu anguŵanaŵana kuti ayambi kuluta ku tchalitchi. Ray ndi muwolu waki agomezganga Chiuta ndipu ŵenga ndi nja yauzimu. Mwaviyo, angwamba kuluta ku matchalitchi ngakupambanapambana mutawuni yawu. Mutawuni iyi mwenga matchalitchi nganandi. Yiwu angukambiskana kuti tchalitchi lo aserengi likhumbika kuchita vinthu viŵi. Chakwamba, akhumbanga kuti tchalitchi lo aserengi akasambirengeku fundu yinyaki zuŵa lelosi. Chachiŵi, ŵanthu ŵaki avwalengi mwaulemu nge ateŵeti aku Chiuta. Pati pajumpha vyaka, yiwu anguluta ku tchalitchi lelosi lo lenga mutawuni yawu kweni anguguŵa ukongwa ndi vo angusaniya. Palivi cho angusambira mu matchalichi yanga ndipu ŵanthu ŵaki avwalanga umampha cha. Ŵati atuwa mu tchalitchi lakumaliya lo angulutaku, Linda wanguluta ku ntchitu kwaki ndipu Ray wanguwere kunyumba. Wachiluta kunyumba, Ray wangujumpha pa Nyumba ya Ufumu ndipu wangukamba cha mumtima kuti, ‘Wuli ndisere kuti nkhawoni vo vichitika?’ Kwenuku ndiku wangusaniya vo wapenjanga. Weyosi mu Nyumba ya Ufumu wenga wamasangu kweniso wanguvwala mwaulemu. Ray wanguja kunthazi ndipu wangukondwa ndi vo wangusambira. Venga nge vo wakutumika Paulo wangukamba va munthu yo waza kakwamba ku maunganu nga mpingu ndi kukamba kuti: “Chiuta we pakati pinu nadi.” (1 Akori. 14:23-25) Kutuliya pa zuŵa ili, Ray wangwamba kuluta pa Sabata peposi ku maunganu ndipu pavuli paki wangwamba so kuluta ku maunganu nga mukati mwa sabata. Linda nayu wangwamba kuwungana ndipu angwamba kusambira Bayibolu ndi kubatizika po ŵenga ndi vyaka va m’ma 70.

9, 10. (a) Ntchifukwa wuli timapepala tisuzga cha kugaŵiya? (b) Konkhoskani mo tingagwiriskiya ntchitu kapepala kakuti Kumbi Ufumu Waku Chiuta Ntchinthu Wuli?

⁹ Timapepala. Te ndi timapepala 8 to tititiwovya kwamba kukambiskana ndi ŵanthu mu uteŵeti. Timapepala pafupifupi 5 biliyoni tasindikizika kutuliya mu 2013. Umampha wa timapepala iti ngwakuti asani munthu waziŵa mo wangagaŵiya kapepala kamoza, wangagaŵiya tinyaki tosi chifukwa tikulembeka mwakuyanana. Kumbi mungagwiriskiya wuli ntchitu timapepala kuti muyambi kukambiskana ndi munthu?

¹⁰ Tiyeruzgiyi kuti mukhumba kugaŵiya kapepala kakuti Kumbi Ufumu Waku Chiuta Ntchinthu Wuli? Kumbi mungachita wuli? Mulongoni fumbu lo le pakwamba ndi kumufumba kuti: “Kumbi muŵanaŵana kuti Ufumu waku Chiuta ntchinthu wuli? Kumbi muŵanaŵana kuti . . . ?” Pavuli paki mungamupempha kuti wasankhepu kwamuka pa timadonthu titatu to te mumphata mwa peji lakwamba la kapepala yaka. Mumalu mwakumukambiya kuti vo wamuka vaboza pamwenga vauneneska, mungajula mukati pakamutu kakuti “Vo Bayibolu Likamba” ndi kuŵerenga Danyele 2:44 kweniso Yesaya 9:6. Asani mwawona kuti mphakwenere, mungalutirizga kukambiskana nayu. Pakumaliya, mungamufumba fumbu lo le kukumaliya kwa kapepala yaka pakamutu kakuti “Ŵanaŵaniyani Mafumbu Yanga”: “Kumbi umoyu wazamukuŵa wuli mu Ufumu waku Chiuta?” Ivi  vingakuwovyani kuti muziweliyeku. Asani mwaziweliyaku, mungamulongo sambiru 7 mu kabuku ka Uthenga Wamampha Wakutuliya Kwaku Chiuta. Kabuku yaka nkhamoza mwa vidya vo tigwiriskiya ntchitu pakwambisa masambiru nga Bayibolu.

11. Kumbi magazini ngidu atingalembiyanji, nanga tikhumbika kuziŵanji va magazini yanga?

¹¹ Magazini. Magazini nga Chigongwi cha Alinda ndi Jani Masu! ndingu ngalembeka nganandi kuphara magazini ngosi pacharu chosi chapasi. Chifukwa chakuti ŵanthu wo aŵerenga magazini yanga atuwa mu vyaru vakupambanapambana, nkhani za pa chikonkhombi zilembeka kuti zikopi ŵanthu kwekosi. Tikhumbika kugwiriskiya ntchitu magazini yanga kuti tiwovyi ŵanthu kuŵanaŵaniya vinthu vakukhumbika ukongwa mazuŵa nganu. Kweni kuti tigaŵiyi ŵanthu akwenere, tikhumbika kuziŵa kuti magazini yo alembe ayani.

12. (a) Kumbi magazini nga Jani Masu! ngalembeke ayani ndipu atingalembiyanji? (b) Kambani vinthu vamampha vo vinguchitika pa nyengu yo mwagaŵiyanga magazini yanga.

¹² Magazini nga Jani Masu! ngalembeke ŵanthu wo aziŵa vimanavi vakukwaskana ndi Bayibolu pamwenga wo atiliziŵa cha. Yiwu angaŵa kuti palivi cho aziŵa chakukwaskana ndi visambizu va Chikhristu. Anyaki angaŵa kuti visopa ativigomezga cha pamwenga aziŵa cha kuti Bayibolu lingaŵawovya. Chifukwa chikulu cho magazini nga Jani Masu! ngalembeke, nkhuwovya ŵanthu kuziŵa kuti kwe Chiuta. (Aro. 1:20; Ahe. 11:6) Ngatovya so munthu yo waŵerenga kugomezga kuti Bayibolu ndi “mazu ngaku Chiuta” nadi. (1 Ate. 2:13) Magazini nga Jani Masu! nga mu 2018, nge ndi mitu yakuti: “Vo Vingatiwovya Kuti Tikondwengi,” “Fundu 12 Zo Zitovya Mabanja Kuti Ngajengi Mwalikondwa” ndi wakuti “Vo Vingakuwovyani Asani mwe Ndi Chitima.”

13. (a) Kumbi magazini ngakugaŵiya nga Chigongwi cha Alinda ngalembeke ayani? (b) Kambani vinthu vamampha vo vinguchitika pa nyengu yo mwagaŵiyanga magazini yanga.

¹³ Magazini ngakugaŵiya nga Chigongwi cha Alinda ngakonkhoska vo Bayibolu lisambiza ku ŵanthu wo atumbika Chiuta ndi Mazu ngaki. Chinanga kuti yiwu angaŵa kuti aziŵa fundu zinyaki za mu Bayibolu, kweni vo lisambiza ativiziŵisiska cha. (Aro. 10:2; 1 Timo. 2:3, 4) Magazini ngakugaŵiya nga Chigongwi cha Alinda nga mu 2018, nge ndi mitu yakuti: “Kumbi Bayibolu Litovya Ŵanthu Mazuŵa Nganu?,” “Kumbi ndi Vinthu Wuli vo Vichitikengi Kunthazi?” ndi wakuti “Kumbi Chiuta Watikuŵanaŵaniyani?”

14. (a) Kumbi mavidiyo nganayi ngo tigwiriskiya ntchitu pakusambiza ngatovya wuli? (b) Kambani vinthu vamampha vo vinguchitika pa nyengu yo mwawonesanga mavidiyo yanga.

¹⁴ Mavidiyo. Mu nyengu yaku Yesu kalipentala wagwiriskiyanga ntchitu vidya vambula kwende magesi pe. Kweni mazuŵa nganu kalipentala wagwiriskiya so ntchitu vidya va magesi nge sowu, vakutolore, vakusilirisiya, nyundu ndi vinyaki. Kusazgiyapu pa mabuku, te ndi so mavidiyo ngo tilongo ŵanthu. Nganyaki mwa mavidiyo ndi yanga: Nchifukwa Wuli Tikhumbika Kusambira Bayibolo?, Kumbi Sambiru la Bayibolo Lichitika Wuli?, Kumbi ndi Vinthu Wuli vo Vichitika pa Nyumba ya Ufumu? ndi ya Chichewa yakuti Kodi a Mboni za Yehova ndi Anthu Otani? Mavidiyo ngafupi ngatovya ukongwa pa ulendu wakwamba. Ngatali ngatovya pa maulendu ngakuweliyaku ndipuso asani tipharazgiya ŵanthu wo ŵe ndi nyengu yinandi. Mavidiyo yanga ngangawovya ŵanthu kuti ayambi kusambira Bayibolu ndi kwamba kuza ku maunganu ngidu.

15. Konkhoskani vakuyeruzgiyapu vo vilongo umampha wakuwonere mavidiyo muchineneru chaku.

¹⁵ Mwakuyeruzgiyapu, muzichi munyaki wati wakumana ndi ama anyaki a ku Micronesia wo alongoro chineneru cha Chiyapese, wanguŵalongo vidiyo yakuti Nchifukwa Wuli Tikhumbika Kusambira Bayibolo? mu chineneru chawu. Yiwu ŵati ayamba kuwonere vidiyo iyi, angukamba kuti: “Asi chineneru changu ichi? Mwaŵanthu!  Chiyapese chaki nachu, chayichu chapa chilwa cho ini ndija. Walongoro chineneru changu!” Vidiyo yati yamala, angukamba kuti amuŵerenga ndi kuwonere vinthu vosi va mu chineneru chawu pa jw.org. (Yeruzgiyani ndi Machitidu 2:8, 11.) Tiyeni tiwoni chakuyeruzgiyapu chinyaki. Muzichi munyaki ku United States wangutumiziya mwana wa muzichi waki yo wajanga kucharu chinyaki vidiyo ya mu chineneru chaki. Mwana uyu wati wawonere wangulembe meseji muzichi uyu kuti: “Chigaŵa cha vidiyo cho chikamba kuti pe munthu munyaki yo wawusa charu, chingundikwaska ukongwa. Ndikupempha sambiru la Bayibolu.” Mwana uyu waja mu charu cho ntchitu yidu yakupharazga njakukanizgika.

16. Konkhoskani chifukwa cho kabuku kekosi kakulembeke: (a) Vwiyani Chiuta Kuti Muje ndi Umoyu Wamuyaya. (b) Uthenga Wamampha Wakutuliya Kwaku Chiuta! (c) Kumbi Mbayani Wo Achita Khumbu Laku Yehova Mazuŵa Nganu?

¹⁶ Timabuku. Kumbi tingasambiza wuli munthu yo wabalabasa ŵaka pakuŵerenga pamwenga yo muchineneru chaki mulivi mabuku ngidu? Tingagwiriskiya ntchitu kabuku kakuti Vwiyani Chiuta Kuti Muje ndi Umoyu Wamuyaya. * Kabuku kamampha kakwambisiya sambiru nkha Uthenga Wamampha Wakutuliya Kwaku Chiuta! Mungamulongo munthu mitu 14 yo ye kukumaliya kwa kabuku yaka kuti wasankhi wo wangayanja. Mungayamba kusambira nayu mutu wo wasankha. Kumbi mukuyesapu kuchita viyo pa ulendu wakuweriyaku? Kabuku kanyaki nkhakuti Kumbi Mbayani Wo Achita Khumbu Laku Yehova Mazuŵa Nganu? Kabuku yaka kakulembeka kuti kawovyi wo tisambira nawu kuziŵa gulu lidu. Kuti muziŵi mo mungakagwiriskiya ntchitu pa sambiru lelosi, wonani mu Kabuku ka Unganu wa Umoyu Widu Wachikhristu Ndipuso Uteŵeti ka March 2017.

17. (a) Kumbi buku lelosi lo tisambiziya ŵanthu litovya wuli? (b) Kumbi ŵanthu wo abatizika akhumbika kuchitanji, nanga ntchifukwa wuli?

¹⁷ Mabuku. Asani mwayamba kusambira Bayibolu ndi munthu mu kabuku, mungasintha nyengu yeyosi kuti muyambi kusambira nayu mu buku la Kumbi Tingasambiranji m’Bayibolu? Buku ili lingawovya munthu kuti waziŵi vinandi vo Bayibolu lisambiza. Asani munthu wamaliza buku ili ndipu waluta panthazi, mungayamba kusambira nayu buku la Mujisungi mu Chanju Chaku Chiuta. * Buku ili limusambizengi mo wangagwiriskiya ntchitu fundu za mu Bayibolu pa umoyu waki. Mungaluwanga cha kuti chinanga munthu wangabatizika wakhumbika mbwenu kulutirizga kusambira mpaka po wamaliziya mabuku ngosi ngaŵi. Ivi vimuwovyengi kuti wajalikiskiki mu uneneska.—Ŵerengani Akolose 2:6, 7.

18. (a) Kumbi lemba la 1 Timote 4:16 lititichiska kuti tichitengenji, nanga ndi vinthu wuli vo vichitika asani tichita viyo? (b) Kumbi khumbu lidu ndakuti wuli asani tigwiriskiya ntchitu Vidya Vakusambiziya?

¹⁸ Pakuŵa Akaboni aku Yehova, tikupaskika “mazu ngauneneska nga uthenga wamampha” ngo ngangawovya ŵanthu kuzisaniya umoyu wamuyaya. (Ako. 1:5; ŵerengani 1 Timote 4:16.) Kuti tifiski ntchitu iyi, tikupaskika Vidya Vakusambiziya. (Wonani bokosi lakuti, “ Vidya vo Tigwiriskiya Ntchitu Pakusambiza.”) Mwaviyo, titenere kugwiriskiya ntchitu vidya ivi mwalusu. Mupharazgi weyosi wangasankha chidya cho wangagwiriskiya ntchitu kuti wayambi kukambiskana ndi munthu ndipuso nyengu yo wangagwiriskiya ntchitu chidya chechosi. Kweni khumbu lidu ndakuti tigaŵiyi ŵaka mabuku cha; pamwenga kupereka mabuku ku ŵanthu wo akhumba cha kuvwa uthenga widu. Mumalu mwaki, khumbu lidu ndakuwovya ŵanthu akujiyuyuwa, amtima wamampha, kweniso wo ŵe ndi nja yauzimu, pamwenga kuti wo ŵe ndi “maŵanaŵanu ngamampha ngakuŵawovya kuti azisaniyi umoyu wamuyaya,” kuti aje akusambira.—Machi. 13:48; Mate. 28:19, 20.