PACHARU chosi chapasi, ŵara akondwa ndi uteŵeti wo achita mu gulu laku Chiuta. Tiwonga ukongwa kuti te ndi abali yaŵa. Kweni pambula kuswera yapa, gulu likusintha vinthu vinyaki. Ŵara akukota angupempheka kuti asiriyi ŵara wo ŵechendakoti mauteŵeti nganyaki ngo achitanga.

Mazuŵa nganu, asani akuwonere dera pamwenga wo asambiza mu masukulu nganyaki nga gulu laku Yehova afika vyaka 70 akhumbika kuleka uteŵeti uwu. Kweniso, ŵara wo afika vyaka 80 akhumbika kusiriya ŵara wo ŵechendakoti mauteŵeti nganyaki ngo achitanga, nge kukumanisa ntchitu za Komiti ya Nthambi ndi kukumanisa ntchitu za wupu wa ŵara mu mpingu. Kumbi ŵara akukota atuvwa wuli chifukwa cha kusintha uku? Yiwu alongo kuti mbakugomezgeka kwaku Yehova ndi gulu laki.

Ken yo wanguteŵete nge wakukumanisa ntchitu za Komiti ya Nthambi kwa vyaka 49 wangukamba kuti: “Fundu iyi ndingukoliyana nayu ndi mtima wosi. Ndipu ndi mlenji wo ndinguvwiya nkhani iyi, ndingupemphera kwaku Yehova kumukambiya kuti abali ambula kukota ndiwu akhumbika kuteŵete nge akukumanisa.” Ŵara anandi akukota angukamba mazu  ngakuyanana ŵaka ndi ngo Ken wangukamba. Kweni pakwamba anyaki angudandawula chifukwa atanja kuteŵete abali.

Esperandio yo wenga wakukumanisa ntchitu za wupu wa ŵara wangukamba kuti, “Ndingudandawula ndati ndavwa.” Kweni wangukamba so kuti, “Chifukwa chakuti ndatamanga, ndinguwona kuti vindipaskengi mupata wakusaniya chovyu.” Esperandio weche kuteŵete mwakugomezgeka ndipu mpingu uwonga ukongwa vo wachita.

Nanga akuwonere madera anguvwa wuli ŵati ŵavwa za kusintha uku? Allan yo wenga wakuwonere dera kwa vyaka 38 wanguti: “Ndati ndavwa ndinguzizwa ukongwa.” Kweni iyu wanguziŵa kuti kusambiza abali wo ŵechendakoti nkhwakukhumbika ukongwa ndipu weche kuteŵete mwakugomezgeka.

Russell yo wenga wakuwonere dera ndi kusambiza mu masukulu nganyaki nga gulu laku Yehova kwa vyaka 40, wangukamba kuti pakwamba iyu ndi muwolu waki anguguŵa. Iyu wangukamba kuti: “Takondwanga ukongwa ndi uteŵeti widu ndipu tawonanga kuti teche ndi nthazi.” Russell ndi muwolu waki agwiriskiya ntchitu lusu lawu mu mpingu wo awungana ndipu abali ndi azichi wo ateŵete nawu, akondwa ukongwa.

Chinanga kuti vo takonkhoska mu ndimi zo tatuwaku yimwi vechendakuchitikiyenipu, kweni nkhani yapa 2 Samuele yingakuwovyani kuŵavwisa wo vikuŵachitikiyapu.

Ŵanaŵaniyani vo vinguchitika pa nyengu yo Absalomu wanguyukiya awisi a Davidi. Davidi wanguthaŵa ku Yerusalemu kuluta ku Mahanaimu, kuvuma kwa msinji wa Yorodani. Ku Mahanaimu Davidi ndi wo wenga nawu ŵengavi vakurya ndi vinthu vinyaki vakukhumbika. Kumbi muziŵa vo vinguchitika?

Ŵanthu atatu amuchigaŵa ichi anguza ndi vakugonapu, vakurya vakupambanapambana ndi vinthu vinyaki vakukhumbika. Barzilai wenga yumoza mwa ŵanthu ŵenaŵa. (2 Samu. 17:27-29) Vo Absalomu wakhumbanga vati vatondeka, Davidi wanguwere ku Yerusalemu ndipu Barzilai wangumuperekeza mpaka ku msinji wa Yorodani. Davidi wangupempha Barzilai kuti waluti nayu ku Yerusalemu. Iyu wangukamba kuti wakumupaska vakurya chinanga kuti Barzilai wenga “wakukhupuka ukongwa” ndipu wakhumbanga vakurya vaki cha. (2 Samu. 19:31-33) Kweni Davidi wakhumbanga kuti Barzilai waluti ku Yerusalemu kuti wakamulunguchizgengi. Wenga mwaŵi ukulu ukongwa kugwira ntchitu pa nyumba ya chifumu!

Chifukwa chakuti wenga wakujiyuyuwa ndipu waziŵanga vo wangafiska, Barzilai wangukana kuluta ndi Davidi chifukwa pa nyengu iyi ndipu we ndi vyaka 80. Iyu wangukamba kuti: “Kumbi ndingapambanisa pakati pa chamampha ndi chiheni?” (2 Samu. 19:35) Kumbi  Barzilai wang’anamuwanganji? Iyu watenere kuti wenga ndi zeru chifukwa chakuti wenga mura. Barzilai watingi wakaperekengi ulongozgi wamampha nge mo “anthulumi arara” anguchitiya kwaku Rehobowamu. (1 Ŵakaro. 12:6, 7; Sumu 92:12-14; Nthanthi 16:31) Mwaviyo, Barzilai watenere kuti wang’anamuwanga kuti wamutondeka kuchita vinthu vinyaki chifukwa cha kukota. Iyu wangukamba kuti wangaziŵa cha kanowelu ka vakurya ndi vakumwa. (Waku. 12:4, 5) Barzilai wangupempha Davidi kuti waluti ndi Chimhama, yo watenere kuti wenga mwana waki.​—2 Samu. 19:36-40.

Kusintha chifukwa cha vyaka ko takamba kukwamba kwa nkhani iyi, kuyanana ndi vo Barzilai wanguchita. Mazuŵa nganu gulu likusintha vinthu chifukwa chakuŵanaŵaniya munthu yumoza cha nge mo ve nge ndi Barzilai. Mumalu mwaki, linguŵanaŵaniya vo vingawovya ŵara akugomezgeka pacharu chosi chapasi.

Akhristu arara akujiyuyuwa ŵenaŵa anguziŵa kuti atenere kuleke ŵara achinyamata maudindu kuti vinthu vizilutiriyi kwenda umampha kunthazi mugulu laku Yehova. Kanandi abali akukota ndiwu asambiza abali achinyamata, nge mo Barzilai watenere kuti wangusambiziya mwana waki ndipuso mo Paulo wangusambiziya Timote. (1 Akori. 4:17; Afi. 2:20-22) Abali achinyamata alongo kuti ndi “mphasu.” Yiwu afiska ‘kuzenga liŵavu laku Khristu.’​—Aefe. 4:8-12; yeruzgiyani ndi Maŵerengedu 11:16, 17, 29.

Abali anandi wo akuleke anyawu maudindu ngawu, asaniriyapu mwaŵi wakuchita mauteŵeti nganyaki pamwenga kusazgiyaku uteŵeti wo achita.

Marco yo wenga wakuwonere dera kwa vyaka 19 wangukamba kuti: “Chifukwa chakuti sonu nde wakuwonere dera cha, ndituŵa ndi mpata wakuwovya alumu ŵa azichi wo mbakaboni cha.”

Geraldo yo wanguteŵete nge wakuwonere dera kwa vyaka 28 wangukamba kuti: “Vinthu vinyaki vo tichita kutuliya po tikuleke uteŵeti wo tachitanga, nkhuwovya ŵanthu akulopwa ndi kuchitiska masambiru nganandi nga Bayibolu.” Geraldo wanguti iyu ndi muwolu waki sonu achitiska masambiru nga Bayibolu 15 ndipu abali ndi azichi anandi wo ŵenga akulopwa akwamba kuwungana.

Allan yo tamuzumbuwapu kali wangukamba kuti: “Sonu tipharazga kwa maora nganandi. Tiluta kumalu ngo kusanirika ŵanthu anandi, malu nga bizinesi, kweniso tipharazgiya anyidu wo tija nawu pafupi. Ndipu ŵanthu ŵaŵi wo tisambira nawu atuza ku Nyumba ya Ufumu.”

Asani mukupaskika uteŵeti unyaki kweni mweche ndi nthazi, mungawovya so pa ntchitu zinyaki. Mungagwiriskiya ntchitu vo muziŵa kusambiza achinyamata mu mpingu. Russell yo tamuzumbuwapu kali wangukamba kuti: “Yehova wasambiza ndi kugwiriskiya ntchitu achinyamata alusu. Abali ndi azichi apinduwa ndi vo achinyamata yaŵa asambiza ndipuso maulendu nga uliska ngo achita chifukwa ŵeche ndi nthazi.” Wonani bokosi lakuti “ Muwovyengi Achinyamata Kuti Achitengi vo Angafiska Pakuteŵete Yehova.”

Asani mukuleka uteŵeti wo mwachitanga ndipu mukwamba unyaki, mungadandawulanga cha. Mwawovyapu kali ŵanthu anandi ndipu mungalutirizga kuchita viyo. Ŵanthu anandi atikuyanjani ndipu alekengi cha kukuyanjani.

Chakukhumbika ukongwa ntchakuti Yehova wakuluweningi cha. Iyu “wangaluwa [cha] ntchitu yinu ndi chanju cho munguchilongo pa zina laki, pakuti munguteŵete akupaturika ndipu mweche kuŵateŵete.” (Ahe. 6:10) Fundu ya pa vesi ili yititisimikiziya kuti vo  Yehova wakutilayizga vazamuluska uteŵeti wo tamuchitiyanga. Yehova wawona kuti mwe akuzirwa ndipu wangakuluwani cha chifukwa cha uteŵeti wo mwachitanga kali ndipuso wo mweche kuchita.

Wuli asani yimwi mwechendasinthepu uteŵeti? Nkhani iyi yingakukwaskani mbwenu. Kumbi yingakukwaskani wuli?

Asani mwe mu mpingu umoza ndi abali wo uteŵeti wawu ukusintha, mungayanduwa ndi lusu lawu. Muŵapemphengi ulongozgi. Muŵafumbengi kuti akambepu maŵanaŵanu ngawu. Ndipu muwonengi mo agwiriskiya ntchitu lusu lo angusambira pa uteŵeti wo achitanga kali.

Kwali ndimwi mubali wakukota yo uteŵeti winu ukusintha pamwenga ndimwi Mkhristu yo mungapinduwa ndi uteŵeti wa mubali wakukota, mungaluwanga cha kuti Yehova wakondwa ndi kugomezgeka kwaku wo amuteŵete kwanyengu yitali.