KUMBI ndi zuŵa nili lo mungukondwa ukongwa pa umoyu winu? Kumbi lenga lo mungutole, kuyirwiya, lo mungubaliya mwana winu wakwamba pamwenga lo mungubatizikiya? Zuŵa lo mungubatizikiya litenere kuti ndakuzirwa ukongwa kwaku imwi. Abali ndi azichi nawu atenere kuti angukondwa ukongwa pa zuŵa ili. Pa zuŵa ili, mungulongo ku ŵanthu kuti mutanja Chiuta ndi mtima winu wosi, umoyu winu wosi, maŵanaŵanu nginu ngosi ndi nthazi zinu zosi!​—Marko 12:30.

Tikayika cha kuti kutuliya po mukubatizikiya, mukondwa ukongwa kuteŵete Yehova. Kweni apharazgi anyaki akuleka kukondwa pakuteŵete Yehova nge mo achitiyanga pakwamba. Chifukwa wuli akuleka? Ntchifukwa wuli titenere kulutiriza kuteŵete Yehova mwakukondwa?

Uthenga wa Ufumu utitikondwesa ukongwa. Chifukwa wuli? Chifukwa Yehova wakamba kuti pambula kuswera Ufumu waki utuzengepu masuzu ngo tikumana nangu mu charu chiheni ichi. Kweniso lemba la Zefaniya 1:14 likamba kuti: “Zuŵa likulu laku Yehova lepafupi! Lepafupi ndipu lituza mwaliŵi ukongwa!” Kweni chifukwa chakuti talindiza kwa nyengu yitali, vingachitisa kuti tileki kukondwa. Kweniso tingaleka kulimbikiya pakuteŵete Chiuta.​—Nthanthi 13:12.

Kuwungana ndi ŵanthu aku Chiuta kungatiwovya kuti tilutirizi kuteŵete Yehova mwakukondwa. Panyaki tingwamba kuteŵete Yehova chifukwa cha nkharu yamampha ya ateŵeti ŵaki. (1 Petro 2:12) Kumbi chingachitika ntchinthu wuli asani Mkhristu munyidu wachenyeka chifukwa chakuleka kuvwiya marangu ngaku Chiuta? Asani ivi vachitika, anyaki wo angwamba kuteŵete Yehova chifukwa cha nkharu yamampha ya ateŵeti ŵaki angagongowa ndipu angaleka kumuteŵete mwakukondwa.

Kwanja chuma kungachitisa so ŵanthu anyaki kuti aleki kukondwa pakuteŵete Yehova. Satana wagwirisiya ntchitu charu kuti tigomezengi kuti tikhumbika kuja ndi vinthu vambula kukhumbika ukongwa. Kweni titenere kukumbuka vo Yesu wangukamba. Iyu wanguti: “Palivi munthu yo wangateŵete ambuya ŵaŵi, chifukwa watinkhengi yumoza ndi kwanja munyaki, pamwenga wagomezekengi ku yumoza ndi kunyoza munyaki. Mungaja cha kapolu waku Chiuta ndipuso kapolu wa chuma pa nyengu  yimoza.” (Mat. 6:24) Tingateŵete cha Yehova mwakukondwa asani tipenja kuti tije ndi chosi cho tingakhumba.

Kuteŵete Yehova ndi mphingu cha ku ŵanthu wo atimuyanja. Yesu wangukamba kuti: “Zani kwaku ini mosi imwi akuvuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani gori langu ndipu sambirani kwaku ini chifukwa nde wakuzika kweniso wakujiyuyuwa ndipu mwazamusisipulika. Chifukwa gori langu ndipusu kweniso katundu wangu ndi mupepu.” (Mat. 11:28-30) Kuja Mkhristu nkhwakusisipuwa kweniso nkhwakukondwesa. Te ndi vifukwa vakuvwika vakukondwe pakuteŵete Yehova. Tiyeni tikambisani vifukwa vitatu vo titenere kujaliya ‘akukondwa pakuteŵete Chiuta mtaski widu.’​—Hab. 3:18.

Titeŵete Chiuta walikondwa mweniyo wakutipasa umoyu. (Mac. 17:28; 1 Tim. 1:11) Tiziŵa kuti Chiuta ndiyu wakutipasa umoyu. Mwaviyo, tilutiriza kumuteŵete mwakukondwa chinanga kuti pajumpha vyaka vinandi kutuliya po tikubatizikiya.

Héctor wanguteŵete Yehova nge wakuwonere dera kwa vyaka 40. Chinanga kuti wakukota, iyu weche kumuteŵete. (Sumu 92:12-14) Iyu watondeka kuchita vinandi pakuteŵete Chiuta chifukwa chakuti muwolu waki watama. Kweni waleka cha kukondwa. Iyu wangukamba kuti: “Vakupasa chitima kuti muwolu wangu matenda ngakuliyakuliya ndipu ndisuzika kumuphwere. Chinanga kuti ndikumana ndi masuzgu yanga, kweni nditimuyanja ukongwa Yehova. Nditimuteŵete ndi mtima wosi chifukwa ndiziŵa kuti ndiyu wakundipasa umoyu ndipuso wenga ndi chilatu pakulenga taŵanthu. Ndilimbikiya kupharazga ndipu nditesesa kuŵika vinthu va Ufumu pa malu ngakwamba ndi chilatu chakuti ndijengi wakukondwa.”

Yehova wakutipasa sembi ya mwana waki Yesu Khristu yo yititiwovya kuti tikondwengi. “Chiuta wanguchiyanja ukongwa charu mwakuti wangupereka Mwana waki wapade, kuti weyosi yo wavwana mwaku iyu wangafwanga cha kweni waje ndi umoyu wamuyaya.” (Yoh. 3:16) Chifukwa cha sembi yaku Yesu, Chiuta wangatigowoke mphulupulu zidu kweniso tingazisaniya umoyu wamuyaya. Kumbi ichi ntchifukwa chakuvwika cha chakuwonge? Asani tiwonga sembi yaku Yesu titeŵetiyengi Yehova mwakukondwa.

M’bali munyaki wa ku Mexico zina laki Jesús, wangukamba kuti wayanjanga ukongwa kugwira ntchitu. Iyu wagwiranga ntchitu usiku ndi musana kwa mazuŵa 5 kwambula kupumuwa. Wachitanga viyo chinanga kuti lenga lamulu la kampani yaki cha. Iyu wanguti: “Ndachitanga viyo kuti ndipangi ndalama  zinandi. Pavuli paki ndingusambira vaku Yehova kweniso mo wangupereke Mwana waki wakwanjiwa.” Jesús wati waziŵa Yehova wangukhumbisisa kumuteŵete. Mwaviyo, wangubatizika ndipu wanguleka ntchitu yo wangugwira kwa vyaka 28. Wangwamba kuchita uteŵeti wa nyengu zosi. Iyu wateŵete Yehova mwakukondwa kwa vyaka vinandi.

Tikondwa chifukwa cha nkharu yamampha yo tenayu. Kumbi mukumbuka mo umoyu winu wenge mwechendaziŵi Yehova? Wakutumika Paulo wangukumbusa Akhristu a ku Roma kuti “pakwamba ŵenga akapolu a ulakwi,” kweni pavuli paki anguja “akapolu a urunji.” Yiwu alindizanga umoyu wamuyaya chifukwa cha nkharu yamampha yo ŵenga nayu. (Ŵar. 6:17-22) Nasi tivwiya marangu ngaku Yehova. Mwaviyo, titasika ku masuzu ngo ŵanthu wo achita vinthu vambula kwenere akumana nangu. Ivi vititiwovya kuti tikondwengi.

Mwakuyeruziyapu, Jaime wagomezanga cha kuti Chiuta waliku. Iyu wagomezanga kuti vinthu vikuchita kusintha kutuwa ku vinthu vinyaki. Kweniso wachitanga masaza nga ndewu. Jaime wangwamba kuwungana ndi Akaboni aku Yehova. Ndipu wangukondwa ukongwa ndi chanju cho angumulongo abali ndi azichi. Kuti waleki vo wachitanga, Jaime wangupempha Yehova kuti wayambi kumugomeza. Iyu wangukamba kuti: “Kamana ndi kamana ndingwamba kuziŵa kuti kwe Da wachanju kweniso Chiuta walisungu. Kuvwiya marangu ngaku Chiuta kwandivikiliya. Nkhalekengi kusintha, panyaki sonu mphanyi ndikufwa, nge mo akufwiya anyangu wo ndachitanga nawu ndewu. Ndati ndayamba kuteŵete Yehova, ndipu ndingwamba kukondwa ukongwa.”

Kumbi tikhumbika kuchitanji po tilindiza kumala kwa vinthu viheni va m’charu ichi? Kumbukani kuti tichita khumbu laku Chiuta ndipu tilindiza umoyu wamuyaya. Mwaviyo, “tingalekanga cha kuchita cho ntchamampha, chifukwa pa nyengu yaki tazamuvuna asani tilekengi kuvuka.” (Ŵag. 6:8, 9) Tiyeni tikunthiyepu ndi kuyesesa kuja ndi nkharu yamampha kuti tizitasiki pa “chisuzu chikulu.” Kweniso tiyeni tilutirizi kuteŵete Yehova mwakukondwa chinanga mpha nyengu yo tikumana ndi masuzu.​—Chiv. 7:9, 13, 14; Yak. 1:2-4.

Tisimikiza kuti tazamulonde mphotu asani tikunthiyapu, chifukwa Chiuta wawona ntchitu yo tichita. Wawona so mo titimuyanjiya. Asani tilutirizengi kuteŵete Yehova mwakukondwa, tijengi nge Davidi yo wangukamba kuti: “Ndiŵika Yehova panthazi pangu nyengu zosi. Ndipu chifukwa chakuti we ku janja langu lamaryi, ndisukunyikengi cha. Mwaviyo, mtima wangu ukondwa, ndipu ndisekere. Kweniso ndija wakuvikilirika.”​—Sumu 16:8, 9.