Tikulengeka Kuti Tijengi Kwamuyaya
KUMBI ndiyani waku isi yo waleka kukhumba kuja ndi umoyu utali kweniso wakukondweska? Ŵanaŵaniyani mo vatingi vijaliyengi vakukondweska kuja ndi umoyu wamuyaya, liŵavu lanthazi kweniso kukondwa ndi umoyu! Tatingi tiŵengi ndi nyengu yinandi yakucheze ndi akwanjiwa ŵidu kweniso kwenda m’malu ngakupambanapambana pacharu chosi. Tatingi tisambirengi so malusu nga ntchitu zakupambanapambana, zeru kweniso kuchita vinthu vinandi vo titanja.
Ntchifukwa wuli ŵanthu akhumba kuja ndi umoyu wamuyaya? Malemba ngatitikambiya kuti Chiuta wakuŵika vamuyaya mu mtima mwidu. (Wakutaula 3:11) Ngakamba so kuti “Chiuta ntchanju.” (1 Yohane 4:8) Kumbi pangaŵa pakuvwika kuti Chiuta yo watitiyanja watilengi ndi khumbiru lakuja ndi umoyu kwamuyaya, pavuli paki mbwenu wachitiska kuti titondeki kuja ndi umoyu wenuwu?
Kukamba uneneska, nyifwa yilivi bwezi. Ndichu chifukwa chaki Bayibolu likamba kuti ndi “murwani.” (1 Akorinto 15:26) Anyaki atufwa ŵeche anamana penipo anyaki atufwa mbara kali. Kweni fundu njakuti, kwali munthu wakhumbi pamwenga waleki kukhumba, weyosi wafwengi. Ŵanthu anandi atopa kufwa ndipu adandawula asani aŵanaŵaniya vakuti afwengi. Kumbi murwani mwenuyu wazamuthereskeka? Kumbi venivi vingachitika nadi?
CHILINDIZGA CHO TENACHU
Mungazizwa kuziŵa kuti lenga khumbu laku Chiuta cha kuti ŵanthu afwengi. Bayibolu mu buku la Chiyambo, lilongo ukaboni wakuti Chiuta wakhumbanga kuti ŵanthu ajengi kwamuyaya pacharu chapasi. Yehova Chiuta wakulenga charu chapasi ndipu wakuŵikamu chechosi chakukhumbika kuti ŵanthu ajengi mwakukondwa. Pavuli paki, wangulenga munthu wakwamba Adamu, ndipu wangumuŵika mu paradayisu, mu munda wa Edene. “Chiuta wanguwona vinthu vosi vo wangulenga, ndipu venga vamampha ukongwa.”—Chiyambo 1:26, 31.
Adamu wangulengeka wakufikapu. (Marangu 32:4) Hava nayu, yo wenga muwolu waku Adamu, wangulengeka wambula kalema kekosi. Ndipu Yehova wanguŵakambiya kuti: “Mubalani, muje anandi, muzazi charu chapasi ndipu muchithereski. Muje ndi mazaza pa somba za munyanja, pa vamoyu vo viphululuka mude, ndi vamoyu vo vitenda pacharu chapasi.”—Chiyambo 1:28.
Patingi pajumphengi nyengu yitali kuti Adamu ndi Hava azazi charu chapasi. Hava wakhumbikanga kubala ŵana ndipu ŵana ŵaki nawu akhumbikanga so kubala ŵana anyawu mpaka charu chosi kuzaza nge mo Chiuta wakhumbiyanga. (Yesaya 45:18) Kumbi muwona kuti mphakuvwika kuŵanaŵana kuti Yehova watingi waperekengi mwaŵi wenuwu kwaku Adamu ndi Hava, kukaŵengi kuti ajengi kwa nyengu yimanavi chikulu awona waka ŵana ndi azuku ŵawu kwambula kuziŵa vo vatingi viŵachitikiyengi?
Ŵanaŵaniyani so udindu wakuphwere vinyama wo wangupaskika. Yehova wangukambiya Adamu kuti wadani vinyama mazina ndipu venivi vatingi vimutoliyengi nyengu kuti wamalizi. (Chiyambo 2:19) Kweni kuti waje ndi mazaza pa vinyama, wakhumbikanga kuviziŵa umampha kweniso kuziŵa mo wangaviphwere. Kuti wafiski kuchita venivi, wakhumbikanga nyengu yitali kuphara nyengu yo wenga nayu, yakuvidana mazina.
Mwaviyo, ulongozgi wo Chiuta wanguŵapaska wakuti azazi charu chapasi kweniso kuti aje ndi mazaza pa vinyama, ulongo kuti Adamu ndi Hava angulengeka kuti aje ndi umoyu kwa nyengu yitali. Ndipu Adamu wanguja nadi kwa nyengu yitali ukongwa.
KHUMBU LAKU CHIUTA NDAKUTI ŴANTHU AZIJENGI KWAMUYAYA MU PARADAYISU PACHARU CHAPASI
ANGUJA NDI UMOYU KWANYENGU YITALI UKONGWA
Adamu wanguja vyaka 930
Metusela wanguja vyaka 969
Nowa wanguja vyaka 950
Mazuŵa nganu ŵanthu aja vyaka 70-80
Bayibolu lilongo kuti kali ŵanthu ajanga kwa nyengu yitali kuphara mazuŵa nganu. Ilu likamba kuti: “Mazuŵa ngosi nga umoyu waku Adamu ngenga vyaka 930.” Lizumbuwa so ŵanthu anyaki akukwana 6 wo anguja ndi umoyu kwa vyaka vakujumpha 900! Yiwu ŵenga Seti, Enosi, Kayinani, Yaredi, Metusela ndi Nowa. Ŵanthu wosi ŵenaŵa, angujaku chigumula chechendachitiki. Mwakuyeruzgiyapu, Nowa wanguja vyaka 600 Chigumula chechendazi. (Chiyambo 5:5-27; 7:6; 9:29) Ntchifukwa wuli ŵanthu yaŵa anguja ndi umoyu kwanyengu yitali viyo?
Chifukwa chikulu chenga chakuti ŵanthu wosi ŵenaŵa angujaku pati pajumpha waka kanyengu kamanavi kutuwa po ŵanthu ŵenga akufikapu. Kweni kumbi kuja akufikapu kukwaska wuli unandi wa vyaka vo ŵanthu aja ndi umoyu? Nanga kumbi nyifwa yazamuthereskeka wuli? Kuti tisaniyi kwamuka kwa mafumbu ngenanga, tikhumbika kuziŵa dankha chifukwa cho taŵanthu tikote ndi kufwa.