Kumbi Nyifwa Yazamuthereskeka Wuli?
CHINANGA kuti kuleka kuvwiya kwa apapi ŵidu akwamba, Adamu ndi Hava kukuzisa ubudi ndi nyifwa ku mtundu wa ŵanthu, kweni khumbu laku Chiuta likusintha cha. Kuziya mu Mazu ngaki Bayibolu, Chiuta wakamba mwakuwerezawereza kuti khumbu laki lechendasinthi.
-
“Arunji azamuhara charu chapasi ndipu azamuja mwenimo kwamuyaya.”—Sumu 37:29.
-
“Wazamumeza nyifwa kwamuyaya, ndipu Yehova Fumu Yikulu wazamuleska masozi ku visku vosi.”—Yesaya 25:8.
-
“Nyifwa, yo ndi murwani wakumaliya, yazamutuzgikapu.”—1 Akorinto 15:26.
-
“Nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha.”—Chivumbuzi 21:4.
Kumbi Chiuta ‘wazamumeza wuli nyifwa’? Bayibolu likonkhoska mwakuvwika umampha kuti: “Arunji . . . azamuja kwamuyaya.” Likamba so kuti, “palivi munthu murunji pacharu chapasi yo wachita vamampha pe kwambula kubuda.” (Wakutaula 7:20) Kumbi ivi ving’anamuwa kuti Chiuta wakhumbengi so cha kuti ŵanthu asungengi marangu ngaki ndi chilatu chakuti watuzgepu nyifwa, mwakupambana ndi vo wakukamba m’Bayibolu? Awa! Iyu wangachita cha venivi chifukwa Bayibolu likamba kuti “Chiuta . . . wangapusika cha.” (Tito 1:2) Kumbi Chiuta wazamuchitanji kuti wazifiski khumbu lo wenga nalu pakulenga ŵanthu?
CHIUTA “WAZAMUMEZA NYIFWA KWAMUYAYA.”—YESAYA 25:8
KUTHERESKA NYIFWA MWAKUPEREKA SEMBI YAKUWOMBOLE
Yehova Chiuta wangunozga kuti paperekeki sembi yakuwombole ŵanthu wosi ku nyifwa. Sembi yeniyi ndi mtengu wo uperekeka wakuyanana ndi chinthu cho chanangika pamwenga kuweziyapu urunji. Chifukwa chakuti tosi tikubuda ndipuso te akwenere kufwa, Bayibolu likonkhoska mwakuvwika umampha kuti: “Palivi munthu yo wangawombo m’bali waki, pamwenga kupaska Chiuta sembi yakumuwombole, (mtengu wakuwombole umoyu wawu ngwakuzirwa ukongwa mwakuti munthu wangakwanisa cha kuwupereka mpaka muyaya).”—Sumu 49:7, 8.
Asani munthu wambula kufikapu wafwa, iyu watijilipiriya yija maubudi ngaki. Ndipu iyu wangajiwombo cha pamwenga kupereka malipiru nga maubudi nga ŵanthu anyaki. (Aroma 6:7) Takhumbikanga munthu wakufikapu kuti wapereki umoyu waki, kuti wajiwombo ku maubudi ngaki cha, kweni kuti wawombo taŵanthu ku maubudi ngidu.—Aheberi 10:1-4.
Venivi ndivu Chiuta wanguchita. Iyu wangutuma Mwana waki, Yesu kutuwa kuchanya kuti wazi pacharu chapasi nge munthu wakufikapu. (1 Peturo 2:22) Yesu wangukamba kuti iyu wanguza pacharu chapasi ‘kuzipereka umoyu waki sembi yakuwombole ŵanthu anandi.’ (Mariko 10:45) Iyu wangufwa kuti wathereski nyifwa kweniso kuti tizije ndi umoyu wamuyaya.—Yohane 3:16.
KUMBI NYIFWA YAZAMUTHERESKEKA ZUKWANJI?
Mazuŵa nganu, tisimikiza kuti mauchimi nga m’Bayibolu ngafiskika nadi chifukwa te mu “nyengu zakusuzga ukongwa.” Venivi vilongo kuti te mu “mazuŵa ngakumaliya” nga mgonezi. (2 Timote 3:1) Mazuŵa ngakumaliya ngazamumala pa “zuŵa la cheruzgu ndipuso pa zuŵa la kunangika kwa ŵanthu ambula kopa Chiuta.” (2 Peturo 3:3, 7) Kweni ŵanthu wo atanja Chiuta azamutaskika ndipu azamutumbikika mwa kupaskika “umoyu wamuyaya.”—Mateyu 25:46.
Yesu wanguza ‘kuzipereka umoyu waki sembi yakuwombole ŵanthu anandi.’—Mariko 10:45
Ŵanthu mamiliyoni nganandi azamuja ndi mwaŵi wakulonde umoyu wamuyaya asani aziyuskika. Pa Luka 7:11-15) Wakutumika Paulo nayu so wangukamba kuti: “Nde ndi chilindizga kwaku Chiuta . . . kuti kwazamuja chiyuka cha ŵanthu arunji ndi ambula urunji.” Chilindizga chenichi chilongo kuti Chiuta watanja mitundu ya ŵanthu.—Machitidu 24:15.
nyengu yo Yesu wanguluta ku tawuni ya Nayini, wangulongo kuti ŵanthu akufwa angaja so ndi umoyu. Iyu ‘wanguchita chitima’ wati wawona mwana yo wangufwa yo wanguwaku yija kwa anyina ndipu wangumuyuska. (Ŵanthu mabiliyoni nganandi alindizga kuzija ndi umoyu kwamuyaya. Bayibolu likamba kuti “Arunji azamulonde charu chapasi ndipu azamuja mwenimo kwamuyaya.” (Sumu 37:29) Pa nyengu iyi, weyosi wazamukondwa kweniso kupembuzgika kuvwa mazu ngo Paulo wangulemba vyaka 2,000 vo vajumpha, ngakuti: “Yiwi nyifwa, kuthereska kwaku kwe pani? Yiwi nyifwa, liwozga laku le pani?” (1 Akorinto 15:55) Pa nyengu iyi, nyifwa yo ndi murwani wakusuzga ukongwa yazamuthereskeka!