Rose wangukamba kuti: “Ndikuwa ndi suzgu linyaki lo lichitisa kuti ndivwengi urwirwi nyengu zosi. Kwa nyengu yimanavi ŵaka umoyu wangu ukusintha ukongwa.” Chinthu cho wadandawulanga nachu ukongwa chenga chakuti nyengu zinyaki watondekanga kusambira Bayibolu pamwenga so kuchita vinthu vinyaki vo vingamuwovya kuja pa ubwezi ndi Chiuta. Kweni iyu wanguwovyeka ukongwa ndi mazu ngo Yesu wangukamba ngo ngasanirika pa lemba la Mateyu 19:26. Lemba ili likamba kuti: “Palivi cho Chiuta watondeka kuchita.” Rose wangusaniya kuti penga nthowa zinandi zo zingamuwovya pakusambira. Nyengu zinyaki watondekanga kuŵerenga Bayibolu chifukwa cha urwirwi wo wavwanga. Mwaviyo, wagwirisiyanga ntchitu Bayibolu kweniso mabuku ngakuvwisiya kuti wasambiri Bayibolu. * Rose wangukamba kuti: “Asani pengavi vinthu venivi, ndiziŵa cha kuti ndatingi ndichitengi wuli kuti ndilutirizi kuja pa ubwezi wakukho ndi Chiuta.”

Asani Rose wawona kuti watondeka kuchita vinthu vinyaki vo kali wachitanga, wapembuzgika ndi mazu ngo ngasanirika pa lemba la 2 Akorinto 8:12. Lemba ili likamba kuti: “Asani mphasu yaperekeka mwakukhumbisiska, njakuzomerezeka kwaku Chiuta, ndipu yitenere kuperekeka mwakukoliyana ndi vo munthu walivi cha, kweni mwakukoliyana ndi vo we navu.” Mazu ngenanga ngatimuwovya Rose kukumbuka kuti Chiuta wakondwa ndi vo iyu wachita chifukwa wachita vinthu vosi vo wangafiska mwakukoliyana ndi mo vinthu viliri pa umoyu waki.

Delphine yo tamuzumbuwa kali wangukamba kuti: “Vingundiŵaŵa ukongwa mwana wangu munthukazi yo wenga ndi vyaka 18 wati watayika. Mwakuti ndawonanga kuti vingaja umampha kuti nani ndifwi ŵaka. Vinthu vingusinthiya limu pa umoyu wangu.” Kweni wati waŵerenga mazu ngo munthu munyaki yo wakulembaku buku la sumu wangukambiya Chiuta, wangupembuzgika ukongwa. Mazu yanga ngasanirika pa Sumu 94:19, po pakamba kuti: “Pa nyengu yo masuzgu ngangu ngenga nganandi, imwi mungundipembuzga ndi kundikondwesa.” Delphine wangukamba kuti: “Ndingupempha Yehova kuti wandiwovyi kuziŵa vo ndingachita kuti chitima changu chimaleku.”

Delphine wangwamba kuwovya ŵanthu mwa kugwiraku ntchitu yakujipereka. Iyu wajiyeruzgiyanga ndi cheking’i. Chinanga kuti cheking’i chingafyoka, kweni munthu wangachigwirisiya ntchitu mbwenu kuti wachede vinthu. Mwakuyanana ŵaka, chinanga kuti iyu wenga ndi chitima ukongwa wanguwona kuti wangawovya mbwenu ŵanthu anyaki. Iyu wangukamba kuti: “Asani ndigwirisiya ntchitu fundu za m’Bayibolu kweniso ulongozgi wa m’Malemba pakupembuzga ŵanthu wo ndasambiranga nawu Bayibolu, nani ndapembuzgikanga. Yeniyi ndiyu nthowa yo Yehova wagwirisiyanga ntchitu pakundipembuzga.” Delphine wangulemba mazina nga ŵanthu wo azumbulika m’Bayibolu wo angusuzgika ukongwa ndi chitima. Iyu wangukamba kuti: “Ndingusaniya kuti kupemphera kwaku Yehova ndiku kunguwovya ŵanthu wosi wo ndingulemba mazina ngawu.” Iyu wangusaniya so kuti “kuŵerenga Bayibolu ndiku kungawovya munthu weyosi kuti wakunthiyepu masuzgu ngo wakumana nangu.”

Delphine wangusaniya so fundu yinyaki yakukhumbika chifukwa cha kusambira Bayibolu. Iyu wangusambira kuŵika maŵanaŵanu ngaki pa vinthu vo walindizanga m’malu mwakuŵanaŵaniya vinthu vakali. Vo lemba la Machitidu 24:15 likamba vingumupembuzga ukongwa. Lemba ili likamba kuti: “Kwazamuja chiyuka cha ŵanthu arunji ndi ambula urunji.” Kumbi Delphine wasimikiza wuli kuti Yehova wazakumuyuska nadi mwana waki? Iyu wangukamba kuti: “Ndiyeruzgiya kuti ndiwona mwana wangu mucharu chifya. Ndikayika cha kuti pa nyengu yo Yehova wakusankha, mwana wangu wazamuyuskika nadi. Nditijiyeruzgiya kuti nde limoza ndi mwana wangu m’munda wa maluŵa. Venivi vitindikumbusa po ndamuyanjiyanga mwana wangu wati wawaku ŵaka.”