Ntchifukwa Wuli Tikhumbika Ufumu Waku Chiuta?
Ŵanthu akwamba ŵati alengeka, Mlengi widu yo zina laki ndi Yehova ndiyu pe walamuliyanga. Iyu walamuliyanga ŵanthu ŵenaŵa mwachanju. Yehova wangupanga malu ngakutowa ngo ngadanikanga kuti munda wa Edeni kuti ŵanthu ajengemu ndipu wanguŵapaska chakurya chinandi. Iyu wanguŵapaska so ntchitu yamampha yakuti agwirengi. (Chiyambo 1:28, 29; 2:8, 15) Ŵanthu atingi akondwengi kuja mwachimangu asani angulutirizga kuzomereza kuti Chiuta ndiyu waŵalamuliyengi.
Ŵanthu akwamba angukana kuvwiya ulamuliru waku Chiuta
Bayibolu likamba kuti Satana Dyaboli yo ndi mungelu wakugaruka, wangususka kuti Chiuta ngwakwenere cha kulamuliya. Iyu wang’anamuwanga kuti ŵanthu angakondwa mbwenu kwambula ulongozgi ndipuso ulamuliru waku Chiuta. Chakupaska chitima ntchakuti apapi ŵidu akwamba, Adamu ndi Heva anguvwiya boza laku Satana ndipu angugarukiya Chiuta.—Chiyambo 3:1-6; Chivumbuzi 12:9.
Chifukwa chakuti Adamu ndi Heva angukana kuvwiya Chiuta nge Wakulamuliya wawu, yiwu angutaya mwaŵi wakuja ndi umoyu wamuyaya kweniso wambula kutama mu paradayisu. (Chiyambo 3:17-19) Vo angusankha vingukwaska ŵana ŵawu wo angubala. Bayibolu likamba kuti Adamu wangubuda ndichu chifukwa chaki ‘ubudi ukusere mucharu kuziya mwa munthu yumoza, ndi nyifwa chifukwa cha ubudi.’ (Aroma 5:12) Bayibolu lilongo so kuti ubudi ukuchitiska suzgu yinyaki yikulu: “Munthu wapweteka munthu munyaki pakumulamuliya.” (Wakutawula 8:9) Mumazu nganyaki tingakamba kuti masuzgu ngangamalapu cha asani ŵanthu angalutirizga kujilamuliya ŵija.
MO ULAMULIRU WA ŴANTHU UKWAMBIYA
Nimurodi wangugarukiya Yehova
Munthu wakwamba kulamuliya yo wazumbulika mu Bayibolu ndi Nimurodi. Iyu wangugarukiya ulamuliru waku Yehova. Kutuliya pa nyengu yaku Nimurodi yeniyi, ŵanthu agwiriskiya ntchitu mazaza ngawu mwambula kwenere. Kwa vyaka 3,000 vo vajumpha, Fumu Solomoni yingukamba kuti: “Ndinguwona masozi nga ŵanthu akukandirizgika kweni pengavi wakuŵapembuzga. Ndipu wo akandirizganga anyawu ŵenga ndi nthazi.”—Wakutaula 4:1.
Vo vachitikanga munyengu yakali ndivu so vichitika mazuŵa nganu. Mu 2009, Wupu wa United Nations ungulemba kuti maulamuliru ngaheni ndipuso ngankhaza “ndingu ngachitiska kuti vinthu vilutirizgengi kunangika mu maboma ngakupambanapambana pacharu.”
NYENGU YAKUTI CHIUTA WACHITEPU KANTHU!
Ŵanthu pacharu akhumbika boma lamampha ndipuso akulamuliya amampha. Venivi ndivu Mlengi widu watilayizga.
Chinanga ndi maboma nga ŵanthu ngo ngawoneka nge ngamampha ngatondeka kumalisa masuzgu
Chiuta wakujalikiska Ufumu pamwenga kuti boma lo lituzgengepu maulamuliru ngosi nga ŵanthu ndipu ufumu wenuwu pe ndiwu “wazamulamuliya mpaka muyaya.” (Danyele 2:44) Ŵanthu mamiliyoni nganandi akwamba kali kupemphere Ufumu wenuwu. (Mateyu 6:9, 10) Kweni ndi Chiuta cha yo walamuliyengi mu Fumu wenuwu. Mumalu mwaki, wakusankha yo wangujapu nge munthu kuti ndiyu walamuliyi ŵanthu. Kumbi Chiuta wasankha yani?
Mungayanja Kuŵerenga so Nkhani Izi
MAFUMBU NGO BAYIBOLU LIMUKA
Kumbi Ufumu Waku Chiuta we Mumtima Winu?
Kumbi Bayibolu ling’anamuwanji asani likamba kuti “Ufumu waku Chiuta we pakati pinu”?
