Pambula kuswera yapa, asani boma lasonu laku Chiuta lakuchanya layamba kulamuliya ŵanthu wosi, charu chapasi chazamukuŵa malu ngakukondwesa ngo ŵanthu angajamu mwakukoliyana, ndi kugwira ntchitu zamampha kweniso zakukhorwesa. Chiuta wakusankha Yesu Khristu kuti wazilamuliyengi charu. Mwakupambana ndi akulamuliya anandi a mazuŵa nganu, Yesu wazakuŵachitiyanga vinthu vamampha ŵanthu. Iyu wazamulamuliya mwachanju, mwalisungu kweniso mwambula kwanjiya.—Yesaya 11:4.

Ŵanthu wo azamuja mucharu chifya, azamugaŵikananga cha chifukwa chakupambana charu pamwenga mtundu. Ŵanthu wosi azamuja akukoliyana. (Chivumbuzi 7:9, 10) Ŵanthu wosi azamuyanjanga Chiuta kweniso azamuyanjananga. Ndipuso azamugwiranga ntchitu limoza mwachimangu kuti aphweriyengi charu nge mo Chiuta wakhumbiyanga pakwamba.—Salimo 115:16.

Asani Ufumu waku Chiuta waziyamba kulamuliya, Mlengi wazamutuzgapu masoka ngachilengedu. (Salimo 24:1, 2) Yesu we pacharu chapasi, wangulongo vo iyu wangafiska kuchita mwakugwiriskiya ntchitu nthazi zaku Chiuta wati wachetamisa chimphepu. (Mariko 4:39, 41) Pa nyengu yo Khristu wazamulamuliyanga, ŵanthu azamuwopanga masoka ngachilengedu cha. Ndipu asani Ufumu waku Chiuta waziyamba kulamuliya, tazamujanga mwachimangu ndi vinyama ndipu palivi yo wazamunanga charu.—Hoseya 2:18.

Weyosi wazamukuŵa ndi umoyu wamampha. Palivi yo wazamutama, kukota pamwenga kufwa. (Yesaya 35:5, 6) Ŵanthu azamukondwa ndi malu ngamampha kweniso ngakutowa, nge ngo banja lakwamba lakondwanga nangu mumunda wa Edeni. Nge mo ve nge mu Edeni, mucharu chifya mwazamukuŵa vakurya vinandi ndipu ŵanthu wosi azamuja ndi vakurya vinandi. (Genezesi 2:9) Nge mo ve nge ndi mtundu wa Ayisirayeli, weyosi mu Paradayisu ‘wazamukurya chiŵandi chaki mpaka kuguta.’—Levitiko 26:4, 5.

Mu Ufumu waku Chiuta wo wazamulamuliya pacharu chosi, ŵanthu wosi azamujanga mwachimangu ndipu azamuchitiyananga vinthu mwalisungu kweniso mwambula kwanjiya. Kwazamuŵavi nkhondu, ulamuliru wa nkhaza kweniso weyosi wazamuja ndi vinthu vakukhumbika pa umoyu. Bayibolu lilayizga kuti: “Weyosi wazamuja pasi pa chimiti chaki cha mphereska kweniso pasi pa chimiti chaki cha mkuyu, ndipu palivi munthu yo wazakuŵawofya.”—Mika 4:3, 4.

Banja lelosi lazamuja ndi nyumba kwambula kopa chechosi ndipu ntchitu yeyosi yo tazamugwira tazamuyanduwanga nayu. Nge mo Bayibolu likambiya, ŵanthu wo azamuja mucharu chifya chaku Chiuta “azamugwira ntchitu paŵaka cha.”—Yesaya 65:21-23.

Bayibolu lilayizga kuti: “Charu chapasi chazamuzaza ndi kuziŵa Yehova.” (Yesaya 11:9) Ŵanthu wo azamuja mu Ufumu waku Chiuta, azamusambira kwamuyaya zeru zaku Yehova Mlengi wawu kweniso vinthu vakutowa vo wakulenga. Yiwu azamugwiriskiya ntchitu zeru zawu pakupanga vidya va nkhondu cha pamwenga kupweteka anyawu. (Yesaya 2:4) Mumalu mwaki, azamusambira mo angajaliya mwachimangu ndi anyawu kweniso mo angaphwere charu.—Salimo 37:11.

Chiuta wakupanga charu mwakuphwere kuti tikondwengi ukongwa ndi umoyu zuŵa lelosi. Iyu wakhumba kuti ŵanthu aje pacharu chapasi kwamuyaya. (Salimo 37:29; Yesaya 45:18) Kuti wazifiski venivi, Chiuta “wazamumeza nyifwa kwamuyaya.” (Yesaya 25:8) Bayibolu lilayizga kuti: “Nyifwa yazamuŵaku so cha, kwazamuŵavi kuliya, kukuta pamwenga urwirwi.” (Chivumbuzi 21:4) Ŵanthu wosi wo Chiuta wazakuŵataska pa nyengu yo wazamunangiya charu chiheni ichi kweniso anandi wo wazakuŵayuskiya mucharu chifya, wazakuŵapaska mwaŵi wakuja ndi umoyu wamuyaya.—Yohane 5:28, 29; Machitidu 24:15.

 Ŵanthu mamiliyoni nganandi ayambapu kali kunozgeke kuzija mucharu chifya cho che pafupi ukongwa. Chinanga kuti mbambula kufikapu, yiwu atesesa kuti aŵi ŵanthu wo Chiuta wakhumba kuti azije mucharu chaki chifya. Kumbi achita wuli venivi? Asambira vakukwaskana ndi Yehova Chiuta kweniso Yesu Khristu yo iyu wangumutuma.—Yohane 17:3.

Ziŵani vo mungachita kuti muzitaskiki pa nyengu yo charu ichi chazamumaliya ndi kuzija mucharu chamampha cho che pafupi ukongwa. Sambirani Bayibolu kwawezi ndi Kaboni waku Yehova.