Weyosi Watenere Kusankha Yija cho Ntchamampha Ndi Chiheni
Fundu zo tisankha kuti tiyendiyengi ndizu zingatichitiska kuti tikondwengi pamwenga cha. Yehova Chiuta waziŵa venivi. Ndichu chifukwa chaki wakhumba kuti tiyendiyengi fundu zaki.
Yehova wakhumba kuti tijengi ndi umoyu wamampha kweniso wachimangu.
“Ini Yehova, ndini Chiuta waku, Yo watikusambiza kuti vinthu vikuyende umampha, Yo watikulongozga munthowa yo utenere kwendamu. Vingaŵa umampha asani ungavwiya marangu ngangu! Mbwenu chimangu chaku chazamuja nge msinji ndipu urunji waku wazamuja nge mayiŵa nga munyanja.”—Yesaya 48:17, 18.
Nge Mlengi widu, Chiuta waziŵa vo tikhumbika kuchita kuti tijengi umoyu umampha. Iyu wakhumba kuti tiyendiyengi fundu zaki chifukwa venivi vingatiwovya kuti vinthu vitiyendiyengi umampha. Asani tiyendiyengi marangu ngaku Chiuta, tikayikiyengi cha kuti vo tasankha vamampha pamwenga cha. Ndipu nyengu zosi tisankhengi vinthu umampha, vo vitiwovyengi kuti tijengi mwachimangu kweniso mwalikondwa.
Yehova wakhumba cha kuti tichitengi vinthu vo tingatondeka kufiska.
“Dangu ili lo nditikulamula msanawale ndinononu cha kwaku yiwi, kweniso le kumalu ngakuti ungatondeka cha kufikaku.”—Dotoronome 30:11.
Asani titende fundu zaku Chiuta tikhumbika kusintha mo tiŵanaŵaniya kweniso mo tichitiya vinthu. Kweni Yehova watitipempha kuchita vo tingatondeka kufiska cha. Ndipu pakuŵa Mlengi widu, iyu waziŵa vo isi tingafiska. Mwaviyo asani tamuziŵa umampha Yehova, tazamuwona kuti “marangu ngaki ngazitu cha.”—1 Yohane 5:3.
Yehova walayizga kuti wawovyengi weyosi yo watende fundu zaki.
“Ini, Yehova Chiuta waku, ndakolesa janja laku lamaryi, ndini Yo watikukambiya kuti, ‘Ungawopanga cha. Ndikuwovyengi.’”—Yesaya 41:13.
Tingafiska kuja nge mo Yehova wakhumbiya chifukwa iyu watiwovyengi. Iyu wangatiwovya mwakugwiriskiya ntchitu Mazu ngaki Bayibolu, ngo ngatitichiska kweniso ngatitipaska chilindizga.
Ŵanthu mamiliyoni nganandi pacharu chosi asaniya kuti kwende fundu za mu Bayibolu kwaŵawovya ukongwa pa umoyu wawu. Mwaviyo namwi mungasambira vinandi vakukwaskana ndi fundu zamampha zo Bayibolu lipereka. Mungayamba kusambira kabuku kakuti Kondwani Ndi Umoyu Kwamuyaya! ko kasanirika kwawezi pa webusayiti yidu ya jw.org. Mukabuku yaka mwe mitu iyi:
-
Kumbi Bayibolu Lingakuwovyani Wuli?
-
Bayibolu Likamba Kuti Vinthu Vijengi Umampha Kunthazi
-
Kumbi Mungaligomezga Bayibolu?
Asani mufufuza Mazu ngaku Chiuta, Bayibolu, mwazamuwona kuti fundu zaki zikuleka cha kugwira ntchitu. Kweni mazu ngaki “Ngakugomezgeka nyengu zosi, kutuwa sonu mpaka muyaya.” (Salimo 111:8) Mwazamuwona kuti kulondo fundu za mu Bayibolu ndiyu nthowa yamampha yo tingasankha pa umoyu widu. Chinanga kuti ve viyo, Chiuta wazakutichichizgapu cha kuti tichitengi venivi. (Dotoronome 30:19, 20; Yoswa 24:15) Kweni ntchakusankha cho weyosi waku isi wakhumbika kusankha yija.
