Kumbi mukuŵerenga mwakuphwere nkhani za mu magazini nga Chigongwi cha Mlinda nga chaka chinu? Asani ndi viyo, wonani asani mungafiska kumuka mafumbu yanga:

Kumbi Yehova wachita nawu wuli vinthu anthukazi?

Iyu wachita nawu vinthu mwambula kwanjiya. Chiuta watiŵavwisiya, waŵanaŵaniya mo anthukazi avwiya kweniso vinthu vo vitiŵafipiska mtima. Ndipu wakuŵapaska ntchitu yakuti agwirengi mu gulu laki.—w24.01, peji 15-16.

Kumbi tingaligwiriskiya wuli ntchitu lemba la Aefeso 5:​7, lo likamba kuti: “Mungachitangaku nawu cha”?

Wakutumika Paulo watitcheŵeskanga kuti tingachezanga cha ndi ŵanthu wo angatitondekesa kugwiriskiya ntchitu fundu zaku Chiuta. Venivi visazgapu ŵanthu wo ticheza nawu pamasu ndi pamasu kweniso kuziya pamalu ngakucheziyapu nga pa Intaneti.—w24.03, peji 22-23.

Kumbi tikhumbika kujivikiliya ku nkhani zaboza nizi?

Tikhumbika kuphwere ndi nkhani zambula ukaboni zo tituvwa kwa abali ndi azichi, maimelu ngo nge ndi nkhani zakukopa zakutuliya ku ŵanthu wo titiŵaziŵa cha kweniso ŵanthu a mpatuku wo apusikiziya kuti akhumba kuvwisiya uthenga widu.—w24.04, peji 12.

Kumbi ndi vinthu wuli vo tiziŵa kweniso vo tileka kuziŵa vakukwaskana ndi mo Yehova wazamuyeruzgiya Fumu Solomoni, ŵanthu wo angubayika mumatawuni nga Sodomu ndi Gomora kweniso wo angufwa pa nyengu ya Chigumula?

Tiziŵa cha kuti Yehova wakuŵabayiya limu. Kweni tiziŵa kuti iyu waziŵa vosi vakukwaskana ndi ŵanthu wo ndipuso kuti iyu ngwalisungu ukongwa.—w24.05, peji 3-4.

Kumbi kuziŵa kuti Chiuta ndi “Jalawi” kutitisimikiziyanji? (Doto. 32:4)

Tingathaŵiya kwaku Yehova. Iyu ngwakuthembeka ndipu nyengu zosi wafiska malayizgu ngaki. Iyu wasintha cha, wachita vinthu mwakukoliyana ndi mijalidu yaki kweniso khumbu laki.—w24.06, peji 26-28.

Kumbi ndi vinthu wuli vo vingakuwovyani kuti muziŵiriyi mpingu wasonu?

Muthembengi Yehova yo wakuwovyeningi nge mo wakuwovyiyapu ateŵeti ŵaki a mu nyengu yakali. Lekani kuyeruzgiya mpingu winu wakali ndi mpingu wasonu. Muchitiyengi vinthu limoza ndi abali ndi azichi a mpingu winu wasonu kweniso yesesani kusaniya mabwezi ngasonu.—w24.07, peji 26-28.

Kumbi tisambiranji pa ntharika zitatu zo ze mu Mateyu chaputala 25?

Ntharika ya mbereri ndi mbuzi yididimizga fundu yakuti tikhumbika kuja akugomezgeka. Ntharika ya amwali azeru ndi akupusa yididimizga kuti tikhumbika kuja akunozgeka kweniso kuja masu. Ndipu ntharika ya matalenti yikonkhoska kukhumbika kwakuja aphamphu.—w24.09, peji 20-24.

Kumbi khondi la nyumba yakusopiyamu yo Solomoni wanguzenga lenga litali wuli?

Pa lemba la 2 Mbiri 3:​4, mumipukutu yinyaki akulemba kuti “manja 120,” kung’anamuwa kuti khondi ili lenga litali mamita 53 kutuwa pasi kufika pachanya! Kweni mipukutu yinyaki yakuthembeka akulemba kuti “manja 20,” kung’anamuwa kuti kutuwa pasi kufika pachanya lenga litali mamita pafupifupi 9. Ndipu venivi vikoliyana ndi ukhomi wa chimati cha nyumba yakusopiyamu.—w24.10, peji 31.

Kumbi mazu ngakuti mteŵeti wakovya watenere kuja ‘munthulumi wa munthukazi yumoza’ ngang’anamuwanji? (1 Timo. 3:12)

Ngang’anamuwa kuti mteŵeti wakovya watenere kuto munthukazi yumoza pe ndipu wakhumbika cha kuchitanga ureŵi. Kusazgapu yapa, watenere cha kukopana ndi anthukazi anyaki.—w24.11, peji 19.

Ntchifukwa wuli tikamba kuti lemba la Yohane 6:53 likamba vakukwaskana ndi mwambu wa Chakurya cha Mazulu cha Ambuya cha?

Lemba la Yohane 6:53 likamba vakukwaskana ndi kurya liŵavu laku Yesu kweniso kumwa ndopa zaki. Yesu wangukamba mazu ngenanga mu 32 C.E. ku Galileya, ndipu wakambiyanga Ayuda wo akhumbikanga kuja ndi chivwanu mwaku iyu. Kweni mwambu wa Chakurya cha Mazulu cha Ambuya wanguwuyambisa we ku Yerusalemu mu chaka chakulondopu. Ndipu mazu ngenanga Yesu wakambiyanga ŵanthu wo wamulamuliya nawu limoza kuchanya.—w24.12, peji 10-11.