Wakutumika Paulo wangulembe Timote kuti: “Nditikulamula mwanthazi pa masu paku Chiuta, paku Khristu Yesu kweniso pa angelu akusankhika, kuti usungengi ulongozgi wenuwu kwambula sankhu pamwenga kwanjiya.”—1 Timo. 5:21.

Kuti tiziŵi kuti angelu wo akambika pa lemba ili mbayani, chakwamba tiyeni tiziŵi dankha angelu wo ŵe mugulu lenili cha. Vakuwoneke limu kuti angelu yaŵa mba 144,000 cha. Pa nyengu yo Paulo walembiyanga Timote kalata iyi, ndipu chiyuka cha Akhristu akusankhika chechendayambi. Akutumika kweniso Akhristu akusankhika anyaki ndipu ŵeche ndaje vakulengeka vauzimu. Mwaviyo, “angelu akusankhika” wo akambika pa lemba ili mba 144,000 cha.—1 Akori. 15:​50-54; 1 Ate. 4:​13-17; 1 Yoha. 3:2.

Kweniso angelu wo angugarukiya Chiuta pa nyengu ya Chigumula, ŵe mugulu la “angelu akusankhika” cha. Angelu ŵenaŵa angukoliyana ndi Satana kweniso anguja viŵanda vo Yesu wanguvisuska. (Gene. 6:2; Luka 8:​30, 31; 2 Petu. 2:4) Munthazi angelu ŵenaŵa azamuponyeka muchizenji kwa vyaka 1,000 ndipu pavuli paki azamubayika limoza Dyaboli.—Yuda 6; Chivu. 20:​1-3, 10.

“Angelu akusankhika” wo Paulo wangukamba atenere kuti ŵenga kuchanya ndipu awovyanga ‘Chiuta ndi Khristu Yesu,’ wo nawu azumbulika pa vesi lenili.

Pe angelu akugomezgeka masawuzandi nganandi. (Ahe. 12:​22, 23) Viwoneka kuti Yehova watiŵapaska ntchitu yakuyanana cha angelu wosi. (Chivu. 14:​17, 18) Kumbukani kuti Yehova wangutuma mungelu yumoza kuti wabayi asilikali a ku Asiriya 185,000. (2 Mafu. 19:35) Angelu anandi atenere kuti agwira ntchitu yakutuzgamu “vakuguŵiska vosi kweniso ŵanthu wo aleka kuvwiya marangu mu Ufumu [waku Yesu].” (Mate. 13:​39-41) Anyaki atenere kuti akupaskika ntchitu ‘yakuwunganiska akusankhika ŵaki’ kuti aluti kuchanya. (Mate. 24:31) Ndipu anyaki akulamulika kuti ‘ativikiliyengi mu nthowa zidu zosi.’—Salimo 91:11; Mate. 18:10; yeruzgiyani ndi Mateyu 4:11; Luka 22:43.

“Angelu akusankhika” wo azumbulika pa 1 Timote 5:​21, atenere kuti mbangelu wo akupaskika ntchitu yapade, yakovya pakuphwere vinthu vakukwaskana ndi mipingu ya ŵanthu aku Chiuta. Mu nkhani yeniyi, Paulo wapereka ulongozgi wakukwaskana ndi mo ŵara atenere kugwiriya ntchitu zawu mu mpingu kweniso kuti Akhristu wosi atenere kutumbika ŵara. Ŵara akhumbika kugwira ntchitu yawu “kwambula sankhu pamwenga kwanjiya.” Kweniso akhumbika cha kuyeruzga pamwenga kusankha vakuchita kwambula kuŵanaŵaniyapu. Chifukwa chikulu cho yiwu alondole ulongozgi waku Paulo ntchakuti ateŵete abali ŵawu “pa masu paku Chiuta, paku Khristu Yesu kweniso pa angelu.” Mwaviyo, viwoneke limu kuti angelu anyaki akupaskika ntchitu yakuphwere mpingu, nge kuwuvikiliya, kuwonere ntchitu yakupharazga kweniso kupereka uthenga kwaku Yehova wakukwaskana ndi vo asaniya.—Mate. 18:10; Chivu. 14:6.