ŴANTHU anandi mucharu ichi atijiwona kuti mbapachanya, mbakwenere kupaskika udindu wapade pamwenga so ŵanthu akhumbika kuŵachitiya vinthu mwapade mwakupambana ndi anyawu wosi. Kwali apaskiki udindu wapade, yiwu awona kuti akhumbika mbwenu udindu unyaki kuluska wo ŵe nawu kali. Ŵanthu wo aŵanaŵana viyo, mbakujiyanja kweniso mbambula kuwonga. Ndipu Bayibolu likukambiya limu kuti mu mazuŵa ngakumaliya ŵanthu azamuja ndi mijalidu yeniyi.—2 Timo. 3:2.

Mbuneneska kuti jalidu la kujiyanja likwamba kali ukongwa. Adamu ndi Heva akhumbanga kuti asankhengi ŵija chamampha ndi chiheni, ndipu venivi vikuzisa masuzgu ngakulu. Pati pajumpha vyaka, Fumu Uziya ya ku Yuda, yaŵanaŵananga kuti njakuzomerezeka kupereka sembi ya vakununkhira pa nyumba yakusopiyamu, kweni yingunangisa ukongwa. (2 Mbiri 26:​18, 19) Mwakuyanana ŵaka, Afarisi ndi Asaduki agomezganga kuti mbanthu apade ukongwa pamasu paku Chiuta, ŵaka pakuti ŵenga mphapu yaku Abrahamu.—Mate. 3:9.

Mazuŵa nganu tija ndi ŵanthu akujiyanja kweniso akujikuzga ndipu mijalidu yawu yeniyi yingatikwaska. (Aga. 5:26) Tingayamba kuŵanaŵana kuti te akwenere kulonde udindu unyaki pamwenga ŵanthu atenere kutichitiya vinthu mwapade mwakupambana ndi anyidu. Kumbi tingachita wuli kuti tileki kuja ndi maŵanaŵanu ngenanga? Chakwamba, tikhumbika kuziŵa mo Yehova watiyiwone nkhani yeniyi. Ndipu pe fundu ziŵi za mu Bayibolu zo zingatiwovya.

Yehova ndiyu wasankha vinthu vo isi te akwenere kuvilonde. Tiyeni tiwoni vakuyeruzgiyapu.

• Mubanja, munthulumi ngwakwenere kulonde ulemu kutuwa ku muwolu waki ndipu munthukazi ngwakwenere  kuyanjika ukongwa ndi mulumu waki. (Aefe. 5:33) Ŵanthu akutorana mbakwenere kulongorana chanju chosi mubanja. (1 Akori. 7:3) Apapi akhaza kuti ŵana ŵawu aŵavwiyengi ndipu ŵana nawu akhaza kuti apapi ŵawu aŵayanjengi kweniso kuŵawovya.—2 Akori. 12:14; Aefe. 6:2.

• Yehova wakamba kuti ŵara mu mpingu, atenere kulonde ulemu chifukwa cha ntchitu yo agwira mwaphamphu. (1 Ate. 5:12) Kweni yiwu atenere cha kuchita kuŵalamuliya abali ndi azichi.—1 Petu. 5:​2, 3.

• Chiuta wakupaska maboma nga ŵanthu wanangwa wakulonde msonkhu kweniso ulemu kutuliya ku ŵanthu wo ngatiŵalamuliya.—Aro. 13:​1, 6, 7.

Mwachanju Yehova watitipaska vinthu vinandi kuluska vo tikhumbika. Chifukwa chakuti te akubuda, te akwenere kufwa. (Aro. 6:23) Kweni Yehova watitipaska vitumbiku vinandi chifukwa cha chanju chaki chambula kumala. (Salimo 103:​10, 11) Vitumbiku vosi vo tilonde pamwenga mwaŵi wewosi wa uteŵeti wo iyu watitipaska, watitipaska chifukwa cha wezi waki ukulu.—Aro. 12:​6-8; Aefe. 2:8.

Phweriyani kuti muleki kutole mijalidu yo ŵanthu a mucharu ichi ŵe nayu. Kwambula kuziŵa, tingayamba kuŵanaŵana kuti te akwenere kulonde vinthu vinandi kuluska anyidu. Yesu wangukonkhoska chakuyeruzgiyapu cho chilongo kuti chingaŵa chipusu kuti nasi tiyambi kuŵanaŵana mu nthowa yeniyi. Iyu wangukamba va antchitu anyaki wo anguzomera kugwira ntchitu zuŵa losi lamphumphu kuti aŵalipirengi dinari yimoza. Pavuli paki, bwana wawu wangupenjiyapu a ntchitu anyaki anandi. Ndi mazulu, antchitu wosi angupaskika malipiru ngakuyanana chinanga ndi wo angugwira ntchitu kwa ora limoza. Kweni wo angwamba kugwira ntchitu ndi mlenji aŵanaŵananga kuti alondiyengi ndalama zinandi chifukwa chakuti angugwira ntchitu zuŵa losi lamphumphu. (Mate. 20:​1-16) Yesu wangugwiriskiya ntchitu chakuyeruzgiya chenichi kuti walongo kuti akusambira ŵaki akhumbikanga kukhorwa ndi vinthu vo Chiuta waŵapaskanga.

Muwongengi ndipu mungalamulanga anyinu cha kuti akupaskeningi vinthu. (1 Ate. 5:18) Mujengi nge wakutumika Paulo, yo wachitanga kupempha cha kuti abali a a ku Korinto amupaski vinthu vakukhumbika paumoyu chinanga kuti pengavi suzgu kuchita viyo. (1 Akori. 9:​11-14) Tikhumbika kuwonga ukongwa vinthu vo ŵanthu atitipaska ndipu tingaŵalamulanga cha.

 Mujengi akujiyuyuwa. Asani munthu watijiŵanaŵaniya ukongwa, watamba kujiwona kuti watenere kulonde vinthu vinandi kuluska anyaki. Asani te akujiyuyuwa, vititiwovya kuti tileki kuja ndi maŵanaŵanu ngaheni ngenanga.

Mchimi Daniyeli ntchakuwoniyapu chamampha pankhani ya kujiyuyuwa. Iyu wangutuliya mubanja lakuzirwa, wenga wakutowa, wazeru kweniso wenga ndi malusu nganandi. Venivi vatingi vimuchitiskengi kujiwona kuti ngwakwenere kulonde udindu unyaki pamwenga ŵanthu atenere kumuchitiya vinthu mwapade mwakupambana ndi anyaki. (Dani. 1:​3, 4, 19, 20) Kweni Daniyeli wangulutirizga mbwenu kuja wakujiyuyuwa ndipu jalidu lenili linguchitiska kuti waje wakuzirwa pamasu paku Yehova.—Dani. 2:30; 10:​11, 12.

Tiyeni tikani mzimu wakujiyanja kweniso wakujikuzga wo wawanda ukongwa mucharu ichi mazuŵa nganu. Mumalu mwaki, tiyeni tilutirizgi kukondwa ndi vitumbiku vo Yehova watitipaska chifukwa cha wezi waki ukulu.