NKHANI YAKUSAMBIRA YA NAMBALA 7
SUMU 15 Thamikani Mwana Wakwamba Waku Yehova!
Kumbi Kugowoka Kwaku Yehova Kutitiwovya Wuli?
“Yimwi mugowoke nadi.”—SALIMO 130:4.
FUNDU YIKULU
Kukambiskana vakuwoniyapu va mu Bayibolu pa nkhani iyi, kutiwovyengi kuti timuwongengi ukongwa Yehova chifukwa chakuti watimugowoke ndi mtima wosi munthu weyosi pakuyija.
1. Ntchifukwa wuli visuzga kuziŵa vo munthu wang’anamuwa asani watikambiya kuti watigowoke?
ASANI munthu munyaki watikambiya kuti “ndakugowokiyani” tituvwa umampha ukongwa mumtima, ukongwa asani tingukamba pamwenga tinguchita chinthu chinyaki cho chingumuguŵiska. Kweni kumbi mazu ngakuti “ndakugowokiyani” ngang’anamuwanji ukongwa? Kumbi asani munthu yo mungumuguŵiska wakamba mazu ngenanga ndikuti wang’anamuwa kuti ubwezi winu waweriyapu nadi? Pamwenga wang’anamuwa kuti wakhumba so cha kuti mukambiskanengi vakukwaskana ndi nkhani yo? Pakuti mumtima tiwonanamu cha, tingaziŵa cha kuti wang’anamuwanji pakutikambiya mazu ngenanga.
2. Kumbi Bayibolu likonkhoska kuti Yehova wagowoke wuli? (Wonani so mazu ngamumphata.)
2 Mo Yehova wachitiya nasi pa nkhani yakutigowoke vipambana ukongwa ndi mo isi taŵanthu tingagowoke anyidu. Kukamba uneneska Yehova watitigowoke mu nthowa yapade ukongwa! Wamasalimo wangukamba vakukwaskana ndi Yehova kuti: “Yimwi mugowoke nadi, kuti ŵanthu akuwopeningi.” a (Salimo 130:4) Asani Yehova wagowoka, ‘wagowoka nadi.’ Iyu ndiyu watitilongo kuti kugowoka chayiku kung’anamuwanji. Mu mavesi nganyaki nga Malemba nga Chiheberi, pakukonkhoska mo Yehova wagowoke, wo alembanga Bayibolu angugwiriskiya ntchitu mazu ngo ngangagwiriskikiya ntchitu cha pakukonkhoska mo isi taŵanthu tigowoke anyidu.
3. Kumbi kugowoka kwaku Yehova kupambana wuli ndi mo isi tigowoke anyidu? (Yesaya 55:6, 7)
3 Asani Yehova wagowoke munthu, wasisitiya limu ubudi waki. Ndipu ubwezi waki ndi Yehova uweriyapu so nge mo venge pakwamba. Asani Yehova wagowoke munthu, wagowoka ndi mtima wosi ndipuso kananandi ŵaka.—Ŵerengani Yesaya 55:6, 7.
4. Kumbi Yehova watitiwovya wuli kuti tivwisi vo kugowoka chayiku kung’anamuwa?
4 Asani kugowoka kwaku Yehova kupambana ndi kwaku isi taŵanthu, kumbi taŵanthu ambula kufikapu tingakuvwisa wuli kugowoka chayiku? Yehova wagwiriskiya ntchitu vakuyeruzgiyapu, kuti walongo mo iyu wagowoke. Mu nkhani iyi tikambiskanengi vinyaki mwa vakuyeruzgiyapu venivi. Vakuyeruzgiyapu venivi vitilongongi mo Yehova watuzgiyapu limu ubudi, kweniso pa nyengu yeniyo pe iyu waweziyapu ubwezi wo ungunangika chifukwa cha vinthu viheni vo tinguchita. Kukambiskana vakuyeruzgiyapu venivi, kutiwovyengi kuti timuwongengi ukongwa Yehova, yo Mbada ŵidu alisungu, wo atitigowoke mu nthowa zakupambanapambana.
YEHOVA WATUZGAPU UBUDI
5. Kumbi ntchinthu wuli cho chichitika asani Yehova watigowoke maubudi ngidu?
5 Kanandi Bayibolu liyeruzgiya ubudi ndi katundu muzitu. Fumu Davidi yingukamba vakukwaskana ndi ubudi waki kuti: “Maubudi ngangu ngathopoka kuluska mutu wangu; ndipu ngajumpha msinkhu wangu nge katundu muzitu.” (Salimo 38:4) Kweni Yehova wagowoke munthu yo walapa. (Salimo 25:18; 32:5) Mazu nga Chiheberi ngo ngafwatulika kuti “kugowoke” ngang’anamuwa “kutuzgapu” pamwenga “kunyamuwa” chinthu ndi kuluta nachu kunyaki. Yehova tingamuyeruzgiya ndi munthu wanthazi ukongwa yo watuzgapu katundu muzitu pamaphewa ngidu, kung’anamuwa ubudi. Ndipu katundu mwenuyu watimunyamuwa ndi kuluta nayu kumalu nganyaki.
“Mungundigowoke” (Salimo 32:5)
6. Kumbi Yehova watitiŵikiya kutali wuli maubudi ngidu?
6 Bayibolu ligwiriskiya ntchitu chakuyeruzgiyapu chinyaki, cho chilongo kuti Yehova wapinga maubudi ngidu ndi kuluta nangu kutali ukongwa. Lemba la Salimo 103:12 likamba kuti: “Nge mo ulili utali wa pakati pa ko kutuliya lumwi ndi ko liselere, ndimu so waŵikiya kutali maubudi ngidu ndi isi.” Mtunda wakutuwa kuvuma kuchifika kuzambwi ndiwu ngutali ukongwa pacharu. Vigaŵa viŵi venivi vikumanapu cha. Ivi ving’anamuwa kuti Yehova watitiŵikiya kutali ukongwa maubudi ngidu. Venivi vititisimikiziya kuti Yehova watitigowoke nadi maubudi ngidu!
“Nge mo ulili utali wa pakati pa ko kutuliya lumwi ndi ko liselere” (Salimo 103:12)
7. Kumbi Bayibolu likonkhoska kuti Yehova wachita wuli ndi maubudi ngidu? (Mika 7:18, 19)
7 Chinanga kuti Bayibolu likamba kuti Yehova watore kutali maubudi ngidu, kumbi walutirizga mbwenu kungakumbuka? Awa! Fumu Hezekiya yingulemba vakukwaskana ndi Yehova kuti: “Mwaponya kumsana kwinu maubudi ngangu ngosi.” Ndipu mazu ngamumphata ngakamba so kuti: “Mwatuzgapu maubudi ngangu ngosi pa masu pinu.” (Yesa. 38:9, 17; mazu ngamumphata) Chakuyeruzgiyapu ichi chilongo kuti Yehova wataya kutali maubudi nga ŵanthu wo alapa ndipu watingawona so cha. Mu mazu nganyaki fundu yeniyi yingakambika so kuti: “Mwachitiska kuti maubudi ngangu ngaje nge kuti nganguchitika so cha.” Bayibolu lididimizga so fundu yeniyi mwakugwiriskiya ntchitu chakuyeruzgiyapu chinyaki cho chisanirika pa Mika 7:18, 19. (Ŵerengani.) Pa lemba lenili Yehova wakambika kuti waponya maubudi ngidu mundimba ya nyanja. Mu nyengu yakali, vachitikanga cha kuti munthu wakato so chinthu cho chaponyeka pasi panyanja.
“Mwaponya kumsana kwinu maubudi ngangu ngosi” (Yesa. 38:17)
“Maubudi ngawu ngosi mwazakungaponya mundimba ya nyanja” (Mika 7:19)
8. Kumbi kufika yapa tingakamba kuti tasambiranji?
8 Vakuyeruzgiyapu ivi vatiwovya kuziŵa kuti Yehova watitigowoke maubudi ngidu, mwakuti titijimba mulandu so cha ndi vo tinguchita. Ndichu chifukwa chaki, Davidi wangukamba kuti: “Mbakukondwa ŵanthu wo ntchitu zawu zakususkana ndi marangu zagowokereka kweniso wo maubudi ngawu ngabenekereka. Ngwakukondwa munthu yo Yehova wazakungakumbukapu cha maubudi ngaki.” (Aro. 4:6-8) Kwenuku ndiku kugowoka chayiku!
YEHOVA WASISITIYA LIMU UBUDI
9. Kumbi Yehova wagwiriskiya ntchitu vakuyeruzgiyapu nivi kuti walongo kuti watitigowoke nadi?
9 Yehova wagwiriskiya so ntchitu vakuyeruzgiyapu vinyaki kuti watiwovyi kuwona mo wasisitiya maubudi nga ŵanthu wo alapa kuziya mu sembi yakuwombole. Bayibolu liyeruzgiya kuti Yehova wasuka ndi kusukuluza maubudi ngenanga. Venivi vitovya kuti munthu yo wabuda waje so wakutowa. (Salimo 51:7; Yesa. 4:4; Yere. 33:8) Yehova wakonkhoska vo vichitika asani Iyu wachita venivi. Wakamba kuti: “Chinanga maubudi nginu ngangaŵa ngayera, ngajengi ngatuŵa ukongwa, chinanga ngangatchesama nge salu yiyera, ngajengi ngatuŵa nge weya utuŵa.” (Yesa. 1:18) Vija vakusuzga ukongwa kuti inki yiyera pamwenga vinthu vo vathimbiriya vituwi pachakuvwala. Yehova wagwiriskiya ntchitu chakuyeruzgiyapu chenichi, kuti watisimikiziyi kuti maubudi ngidu ngangasukika mpaka kumaliya limu ndipu ngangawoneka so cha.
“Chinanga maubudi nginu ngangaŵa ngayera, ngajengi ngatuŵa ukongwa” (Yesa. 1:18)
10. Kumbi ntchakuyeruzgiyapu chinyaki nichi cho Yehova wagwiriskiya ntchitu cho chilongo kuti wagowoka ukongwa?
10 Nge mo tingusambiriya mu nkhani yajumpha, maubudi ngidu ngayeruzgikiya so ndi “ngongoli.” (Mate. 6:12; mazu ngamumphata; Luka 11:4) Nyengu yeyosi yo tabudiya Yehova vija nge kuti ngongoli yidu nayu yisazgikiyaku ukongwa. Tija ndi ngongoli yikulu kwaku iyu! Kweni asani Yehova watigowoke, vija nge kuti watigowoke ngongoli yikulu yo takhumbikanga kuweza. Iyu wakhumba cha kuti watikumbusengi so maubudi ngo wakutigowoke kali. Chakuyeruzgiyapu ichi chilongo kuti tituvwa umampha ukongwa mumtima asani Yehova watigowoke maubudi ngidu!
“Mutigowoke ngongoli” (Mate. 6:12; mazu ngamumphata)
11. Kumbi Bayibolu ling’anamuwanji asani likamba kuti maubudi ngidu ‘ngasisitika’? (Machitidu 3:19)
11 Yehova watitigowoke ŵaka cha ngongoli yidu pamwenga maubudi, kweni wativisisitiya limu. (Ŵerengani Machitidu 3:19.) Asani munthu watigowoke ngongoli yidu, vija nge kuti wakhwacha po wangulemba ngongoli ndi chiekisi chikulu (X). Kweni chinanga kuti wakhwacha ndi chiekisi chenichi, ndalama zo zakhwachika zingawoneka mbwenu. Kusisitiya limu chinthu chinyaki kupambana ndi kukhwacha ŵaka. Kuti tivwisi chakuyeruzgiyapu ichi, titenere kukumbuka kuti inki yo ŵanthu agwiriskiyanga ntchitu kali yasuzganga cha kuyisisita mwakugwiriskiya ntchitu maji. Munthu wasisitiyanga ŵaka chabuwula chakuzumbwa. Mwaviyo asani munthu “wasisita” ngongoli, yawonekanga so cha ndipu ndalama zo wangulemba zawonekanga so cha. Vajanga nge kuti ŵanthu wo angukongolanapu ndalama so cha. Tichiskika ukongwa kuziŵa kuti Yehova watitigowoke ŵaka maubudi cha, kweni watingasisitiya limu!—Salimo 51:9.
“Kuti maubudi nginu ngasisitiki” (Machi. 3:19)
12. Kumbi chakuyeruzgiyapu cha mtambu ufipa chititisambizanji?
12 Yehova wagwiriskiya ntchitu chakuyeruzgiyapu chinyaki pakukonkhoska mo wasisitiya maubudi ngidu. Iyu wakamba kuti: “Ndazamusisita maubudi ngaku nge kuti ngabenekereka ndi mtambu ndipuso ndazamusisita mphulupulu zaku nge kuti zabenekereka ndi mtambu ufipa.” (Yesa. 44:22) Asani Yehova watigowoke maubudi vija nge kuti wagwiriskiya ntchitu mtambu ufipa kujala vo tanangisa kuti vileki kuwoneka so.
“Ndazamusisita maubudi ngaku nge kuti ngabenekereka ndi mtambu” (Yesa. 44:22)
13. Kumbi ndi vinthu wuli vo titenere cha kuchita asani Yehova watigowoke maubudi ngidu?
13 Kumbi vakuyeruzgiyapu venivi vititisambizanji? Asani Yehova watigowoke maubudi ngidu, tikhumbika so cha kuŵanaŵana kuti tiŵengi mbwenu ndi timadonthu ta ubudi wo tinguchita. Yehova wasisita ngongoli ya maubudi ngidu kuziya mu ndopa zaku Yesu Khristu. Asani vaŵa viyo, po pangulembeka ngongoli yo pangaziŵika ndi kuziŵika so cha. Venivi ndivu Yehova wachita asani wagowoke munthu yo walapa.
YEHOVA WAWEZIYAPU SO UBWEZI WIDU NDI IYU
Kugowoka kwa Awusefwi akuchanya kutitiwovya kuti tije nawu pa ubwezi wamampha (Wonani ndimi 14)
14. Ntchifukwa wuli tikhumbika kugomezga kuti Yehova watitigowoke nadi? (Wonani so vithuzi.)
14 Asani Yehova watigowoke nadi vititiwovya kuti tije so pa ubwezi wamampha ndi iyu kweniso titijimba mulandu so cha. Tikhumbika cha kuchita mantha kuti panyaki Yehova watitisungiya vifukwa ndipu wapenjapenja nthowa yakuti watilangiyi. Iyu wangachita cha venivi. Ntchifukwa wuli tikhumbika kumugomezga Yehova asani wakamba kuti watigowoke? Yehova wangukambiya mchimi Yeremiya kuti: “Ndazakuŵagowoke mphulupulu zawu ndipu ndazamukumbuka so cha ubudi wawu.” (Yere. 31:34) Pakukamba fundu ya pa lemba ili wakutumika Paulo wangugwiriskiya ntchitu mazu ngakuyanana. Iyu wangukamba kuti: “Ndazamukumbuka so cha maubudi ngawu.” (Ahe. 8:12) Kumbi venivi ving’anamuwanji ukongwa?
“Ndazamukumbuka so cha ubudi wawu” (Yere. 31:34)
15. Kumbi Yehova wakumbuka so cha maubudi ngidu mu nthowa wuli?
15 Mu Bayibolu ndi nyengu zosi cha po mazu ngakuti “kukumbuka” ngang’anamuwa munthu yo wakumbuka chinthu chinyaki pamwenga kuchiŵanaŵaniya. Mumalu mwaki ngang’anamuwa munthu yo wachitapu kanthu. Chigaŵenga cho chingupayikika limoza ndi Yesu chingumupempha kuti: “Yesu, uzindikumbuki asani wazisere mu Ufumu waku.” (Luka 23:42, 43) Yapa chigaŵenga ichi chapemphanga Yesu kuti wachichitiyi chinthu chinyaki. Vo Yesu wangumuka vingulongo kuti wazamuchitapu nadi kanthu ndipu wazakuchiyuska. Mwaviyo asani Yehova wakamba kuti wakumbuka so cha maubudi ngidu, wang’anamuwa kuti wachitengepu kanthu cha pa maubudi ngo wakutigowoke kali. Iyu wazakutilanga cha munthazi chifukwa cha maubudi ngo wakutigowoke kali.
16. Kumbi Bayibolu likonkhoska wuli wanangwa wo tisaniya asani Yehova watigowoke nadi?
16 Bayibolu ligwiriskiya so ntchitu chakuyeruzgiyapu chinyaki kuti litiwovyi kuvwisa wanangwa wo tituŵa nawu asani Yehova watigowoke nadi. Chifukwa chakuti te akubuda ndipu tija ndi maŵanaŵanu ngaheni nyengu zosi, Bayibolu likamba kuti te “akapolu a ubudi.” Kweni asani Yehova watigowoke tija nge akapolu wo ‘akufwatulika ku ubudi.’ (Aro. 6:17, 18; Chivu. 1:5) Kukamba uneneska tikondwa ukongwa asani Yehova watigowoke ndipu tija nge kuti tafwatulika ku ukapolu.
“Mukufwatulika ku ubudi” (Aro. 6:18)
17. Kumbi tichizgika wuli asani Yehova watigowoke? (Yesaya 53:5)
17 Ŵerengani Yesaya 53:5. Chakuyeruzgiyapu chakumaliya cho tikambiskanengi, ntchakuti te nge ŵanthu wo atama ndi matenda ngakofya ukongwa. Chifukwa cha sembi yakuwombole yo Yehova wakupereka kuziya mu Mwana waki, tija nge ŵanthu wo achizgika. (1 Petu. 2:24) Asani tabuda, tinanga ubwezi widu ndi Yehova. Kweni chifukwa cha sembi yakuwombole Yehova wangatigowoke ndipu tingaja so nayu pa ubwezi wakukho. Nge mo munthu yo wachizgika ku matenda ngakofya wakondwe ukongwa, nasi tikondwa ukongwa asani ubwezi widu ndi Yehova waweriyapu ndipu iyu wayamba so kutiyanja.
“Chifukwa cha vilonda vaki tinguchizgika” (Yesa. 53:5)
KUMBI TIYANDUWA WULI CHIFUKWA CHAKUTI YEHOVA WATITIGOWOKE?
18. Kumbi tasambiranji pa vakuyeruzgiyapu va mu Bayibolu vo vilongo kuti Yehova watitigowoke? (Wonani so bokosi lakuti, “Kumbi Yehova Watitigowoke Wuli?”)
18 Kumbi tasambiranji pa vakuyeruzgiyapu va mu Bayibolu vo vilongo kuti Yehova watitigowoke? Asani iyu wagowoka, wagowoka nadi ndi mtima wosi ndipuso kwamuyaya. Venivi vititiwovya kuti tije so pa ubwezi wamampha ndi Awusefwi akuchanya. Ndipuso vititiwovya kuziŵa kuti kugowoka chayiku ndi mphasu yapade. Isi te akwenere cha kuti Yehova watigowoke kweni watitigowoke chifukwa cha chanju chaki ndipuso lisungu likulu.—Aro. 3:24.
19. (a) Kumbi tikhumbika kuwonganji? (Aroma 4:8) (b) Kumbi tikambiskanengenji mu nkhani yakulondopu?
19 Ŵerengani Aroma 4:8. Kukamba uneneska, tosi titimuwonga ukongwa Yehova kuti ndi Chiuta yo ‘wagowoke nadi’! (Salimo 130:4) Kweni kuti Yehova watigowoke, tikhumbika kuchita chinthu chinyaki chakukhumbika ukongwa. Yesu wangukamba kuti: “Asani muleka kugowoke ŵanthu maubudi ngawu, Awusemwi nawu akugowokiyeningi cha maubudi nginu.” (Mate. 6:14, 15) Yapa viwoneke limu kuti tikhumbika kuyezga Yehova pa nkhani ya kugowoka ndi mtima wosi. Kweni tingachita wuli venivi? Nkhani yakulondopu yikonkhoskengi mo tingachitiya venivi.
SUMU 46 Titikuwongani Yehova
a Mumipukutu yakwamba ya Malemba nga Chiheberi akugwiriskiya ntchitu mazu ngakuti “kugowoka” ngo ngang’anamuwa kuti kwenuku ndiku kugowoka chayiku chinanga kuti pangaŵa so kugowoka kwa mitundu yinyaki. Mabayibolu nganandi ngalongo cha kupambana kwa mazu ngenanga kweni Bayibolu la Charu Chifya la Malemba Ngakupaturika lipambanisa mwapade mazu ngenanga pa Salimo 130:4.
