1. Ntchifukwa wuli tikhumbika kusanirika pa mwambu wakukumbukiya nyifwa yaku Khristu chaka chechosi?

 TIGOMEZGA kuti namwi muzomereza kuti sembi yaku Yesu ndi mphasu yapade ukongwa yo Yehova wakutipaska! (2 Akori. 9:15) Chifukwa chakuti Yesu wakupereka umoyu waki, mungaja pa ubwezi wakukho ndi Yehova Chiuta. Mungazija so ndi mwaŵi wakuzilonde umoyu wamuyaya. Mwaviyo, mphakuvwika kuti titenere kumuwonga ukongwa Yehova yo wakutipaska sembi yeniyi chifukwa chakuti watitiyanja! (Aro. 5:8) Kuti watiwovyi kulutirizga kuwonga sembi yeniyi kweniso kuti tileki kuyipepuwa, Yesu wangwambisa mwambu wakuti tikumbukiyengi nyifwa yaki chaka chechosi.—Luka 22:​19, 20.

2. Kumbi tikambiskanengenji mu nkhani iyi?

² Chaka chinu, Chikumbusu chazamuchitika pa Chisulu, pa April 12, 2025. Tikayika cha kuti tosi tikhumba kuti tikasanirikepu. Pa nyengu ya Chikumbusu tazamuyanduwa ukongwa asani tingazisaniya mpata wakuŵanaŵaniya vo Yehova ndi Mwana waki akutichitiya. Mu nkhani iyi, tikambiskanengi vo sembi yaku Yesu yititisambiza vakukwaskana ndi Yehova kweniso Mwana waki. Mu nkhani yakulondopu, tazamusambira mo tingayanduliya ndi sembi yaku Yesu kweniso mo tingalongore kuti tiwonga Yehova chifukwa chakutipaska sembi yeniyi.

VO SEMBI YITITISAMBIZA VAKUKWASKANA NDI YEHOVA

3. Kumbi nyifwa ya munthu yumoza yingawombo wuli ŵanthu mamiliyoni nganandi? (Wonaniso chithuzi.)

³ Sembi yakuwombole yititisambiza kuti Yehova watanja urunji. (Doto. 32:4) Chifukwa wuli? Chifukwa chakuti Adamu wanguvwiya Chiuta cha, isi nge mphapu yaki nasi tikuhara ubudi ndipuso titufwa. (Aro. 5:12) Kuti watiwombo ku ubudi ndi nyifwa, Yehova wangunozga kuti Yesu wapereki umoyu waki nge sembi. Kweni, kumbi nyifwa ya munthu yumoza wakufikapu  yingawombo wuli ŵanthu mamiliyoni nganandi? Wakutumika Paulo wangukonkhoska kuti: “Nge mo kuleka kuvwiya kwa munthu yumoza [Adamu] kukuchitiskiya kuti ŵanthu anandi aje akubuda, ndimu so kuvwiya kwa munthu yumoza [Yesu] kwazamuchitiskiya kuti ŵanthu anandi aje arunji.” (Aro. 5:19; 1 Timo. 2:6) Mu mazu nganyaki, munthu yumoza wakufikapu wambula kuvwiya, ndiyu wakuchitiska kuti taŵanthu tije akapolu a ubudi ndi nyifwa. Mwaviyo, munthu so yumoza wakufikapu wakuvwiya, ndiyu wakutiwombo.

4. Kumbi Yehova wangulekiyanji kuzomereza waka kuti ŵana akuvwiya aku Adamu aje ndi umoyu kwamuyaya?

⁴ Kumbi Yesu wakhumbikanga nadi kufwa kuti watiwombo? Kumbi Yehova wangulekiyanji kuzomereza waka kuti ŵana akuvwiya aku Adamu aje ndi umoyu kwamuyaya? Kwaku isi taŵanthu ambula kufikapu, tingaŵanaŵana kuti yeniyi yatingi yiŵengi nthowa yamampha yakunozge vinthu. Kweni kwaku Yehova, wenuwu watingi uŵengi urunji cha. Pakuti Yehova ndi murunji, iyu watingi wawulekeriyengi cha ubudi wo Adamu wanguchita.

5. Ntchifukwa wuli titenere kusimikiza kuti nyengu zosi Yehova wachita cho ntchakwenere?

⁵ Asani Yehova wanguleka kupereka sembi yaku Yesu ndi kuzomereza kuti ŵana aku Adamu aje ndi umoyu kwamuyaya chinanga kuti mbambula kufikapu, mbwenu Yehova watingi walongongi kuti walondo cha fundu zaki zaurunji. Venivi vatingi vichitiskengi kuti ŵanthu ayambi kumukayikiya kuti wazamuleka so kulondo fundu zaki zaurunji kunthazi, mwakuti wazamufiska cha vo wakulayizga. Ŵanthu atingi akayikiyengi so kuti Yehova wazamufiska malayizgu ngaki ngosi. Kweni tikhumbika cha kufipa mtima ndi venivi. Pakuti Yehova wakuwonesesa kuti wachiti vinthu mwaurunji mpaka kufika pakupereka sembi Mwana waki wakwanjiwa, venivi vititisimikiziya kuti nyengu zosi iyu wachita cho ntchakwenere.

6. Kumbi sembi yaku Yesu yilongo wuli kuti Yehova watitiyanja? (1 Yohane 4:​9, 10)

⁶ Chinanga kuti sembi yaku Yesu yititiwovya kuvwisa kuti Yehova ndi murunji, kweni yititiwovya so ukongwa kuvwisa kuti iyu watitiyanja ukongwa. (Yoha. 3:16; ŵerengani 1 Yohane 4:​9, 10.) Yehova wangutuma Mwana waki kuti wazitifwiyi kuti tizije ndi umoyu kwamuyaya kweniso kuti tije mu banja laki. Adamu wati wabuda, Yehova wangumudikisa mu banja Laki la ŵanthu wo atimusopa. Mwaviyo, tosi tikuwiya kubwalu kwa banja laku Chiuta. Kweni chifukwa cha sembi yaku Yesu, Yehova watitigowoke maubudi ngidu ndipu ŵanthu wosi wo ŵe ndi chivwanu ndipuso atimuvwiya angawere so mu banja laki. Chinanga mphasonu panu, tingaja pa ubwezi wakukho ndi Yehova kweniso ndi Akhristu anyidu. Kukamba uneneska, Yehova watitiyanja ukongwa!—Aro. 5:​10, 11.

7. Kumbi kusuzgika kwaku Yesu kutitiwovya wuli kuvwisa kuti Yehova watitiyanja ukongwa?

 ⁷ Tingavwisa umampha kuti Yehova watitiyanja ukongwa asani tingaŵanaŵaniya mo vingumupweteke kuwona Mwana waki wachipereka umoyu waki nge sembi. Satana wakamba kuti palivi mteŵeti waku Chiuta yo wangalutirizga kuja wakugomezgeka kwaku Iyu asani wakumana ndi masuzgu. Kuti walongo kuti Satana ngwaboza, Yehova wanguzomereza kuti Yesu wasuzgiki wechendafwi. (Yobu 2:​1-5; 1 Petu. 2:21) Yehova wachilereska, alongozgi achisopa angumunyoza Yesu, asilikali angumukhwapa kweniso angumukhoma pachimiti. Pavuli paki, Yehova wanguwona Mwana waki wakwanjiwa wachifwa nyifwa yakuŵaŵa ukongwa. (Mate. 27:​28-31, 39) Yehova wenga ndi nthazi zakutondekeske vosi venivi kuti vileki kuchitika. Mwakuyeruzgiyapu, pa nyengu yo ŵanthu akususka akambanga kuti: “Wamutaski cha yo Chiuta asani watimuyanja,” Yehova watingi wachitengi nadi venivi. (Mate. 27:​42, 43) Kweni asani Chiuta wangumutaska, mbwenu sembi yakuwombole yatingi yiperekekengi cha ndipu tatingi tiŵengevi chilindizga. Mwaviyo, Yehova wanguzomereza kuti Mwana waki wakunthiyepu masuzgu ngosi mpaka po wangufwiya.

8. Kumbi Yehova vingumuŵaŵa kuwona Mwana waki wachisuzgika? Konkhoskani. (Wonaniso chithuzi.)

⁸ Tingaŵanaŵananga cha kuti pakuti Chiuta ngwanthazizosi zosi, ndikuti watuvwa kuŵaŵa cha mumtima. Yehova wakulenga taŵanthu munthowa yakuti tikwaskikengi ndi vinthu. Ndipu chifukwa chakuti Bayibolu likamba kuti tikulengeka mu chikozgu chaki, ndikuti nayu wakwaskika ndi vinthu. Bayibolu likamba kuti Ayisirayeli “amuguŵiskanga” kweniso ‘amuchitiskanga chitima.’ (Salimo 78:​40, 41) Mwaviyo, kumbi Yehova wanguvwa wuli mumtima kuwona Mwana waki wachisuzgika? Ŵanaŵaniyani vo vinguchitikiya Abrahamu ndi Isaki. Yehova wangulamula Abrahamu kuti wapereki sembi mwana waki yumoza pe. (Gene. 22:​9-12; Ahe. 11:​17-19) Aŵanaŵaniyani waka mo Abrahamu wanguvwiya pa nyengu yo wapenjanga kubaya Isaki ndi chimayi. Kweni Yehova vingumuŵaŵa ukongwa kuwona M wana waki wachitombozgeka mwankhaza ndi ŵanthu ambula kopa Chiuta mpaka kufwa!—Woneriyani vidiyo yamutu wakuti Yezgani Chivwanu Chawu—Abrahamu, Chigaŵa 2 pa jw.org.

9. Kumbi musambiranji pa lemba la Aroma 8:​32, 38, 39 vakukwaskana ndi chanju chaku Yehova?

⁹ Sembi yaku Yesu yititisambiza kuti Yehova watitiyanja ukongwa kuluska munthu weyosi, kwali ndi mubali widu pamwenga mubwezi widu wa pamtima. (Ŵerengani Aroma 8:​32, 38, 39.) Ndipu Yehova watitiyanja ukongwa kuluska mo titijiyanjiya taŵeni. Kumbi mukhumba kuzija ndi umoyu kwamuyaya? Kweni Yehova ndiyu wakhumbisiska kuti muzije ndi umoyu kwamuyaya. Kumbi mukhumba kuti wakugowokiyeni maubudi nginu? Yehova wakhumbisiska kuti wakugowokiyeni. Ndipu kuti venivi vichitiki,  iyu wakhumba ŵaka kuti tilongongi kuti tiwonga mphasu yo wakutipaska, tije ndi chivwanu kweniso timuvwiyengi. Sembi yaku Yesu ndi mphasu yapade nadi yo yilongo kuti Chiuta watitiyanja ukongwa. Ndipu mucharu chifya, tazamusambira vinandi vakukwaskana ndi chanju chaku Yehova.—Waku. 3:11.

VO SEMBI YITITISAMBIZA VAKUKWASKANA NDI YESU

10. (a) Ntchifukwa wuli Yesu vingumuŵaŵa ukongwa kuti wabayikengi? (b) Kumbi Yesu wangulikankhuska wuli zina laku Yehova? (Wonaniso bokosi lakuti, “ Yesu Wangukankhuska Zina Laku Yehova Chifukwa Chakugomezgeka Kwaki.”)

¹⁰ Yesu wafipiyanga mtima mbiri ya Awisi. (Yoha. 14:31) Yesu vingumuŵaŵa ukongwa chifukwa chakuti ŵanthu amumbanga mulandu wakuti wanyoza Chiuta kweniso wakuti wayukiya boma. Venga viyo chifukwa chakuti venivi vatingi vinyozesengi zina la Awisi. Ndichu chifukwa chaki wangupemphera kuti: “Ada, asani nkhwamachitika, kapu iyi yindijumphi.” (Mate. 26:39) Kweni chifukwa chakuti wangulutirizga kuja wakugomezgeka kwaku Yehova mpaka po wangufwiya, Yesu wangukankhuska zina la Awisi.

11. Kumbi Yesu wangulongo wuli kuti watiŵayanja ukongwa ŵanthu? (Yohane 13:1)

¹¹ Sembi yaku Yesu yititisambiza so kuti Yesu waŵanaŵaniyanga ukongwa ŵanthu, ukongwa akusambira ŵaki. (Nthanthi 8:31; ŵerengani Yohane 13:1.) Mwakuyeruzgiyapu, Yesu waziŵanga kuti vinthu vinyaki vo wazamuchita pacharu chapasi vazamuja vakusuzga limu, ukongwa nyifwa yaki yo yenga yakuŵaŵa ukongwa. Kweni Yesu wanguchita vinthu vakusuzga venivi kuti ŵaka wafiski vo Yehova wangumutuma cha, kweni chifukwa chakuti wayanjanga ŵanthu. Yesu waŵayanjanga ukongwa ŵanthu, ndichu chifukwa chaki waŵapharazgiyanga, kuŵasambiza kweniso kuŵawovya. Chinanga mpha usiku wa zuŵa lo wangufwiya, Yesu wangusambisa maphazi nga akusambira ŵaki, wanguŵachiska ndipuso wanguŵapaska ulongozgi. (Yoha. 13: 12-15) Ndipu pa nyengu yo wenga pachimiti chakutombozgekiyapu, Yesu wangukambiya chigaŵenga cho chingupayikika limoza nayu kuti chazamuja mu Paradayisu. Iyu wangulongo so kuti wafipiyanga mtima anyina mwakuti wangupempha Yohane kuti waŵaphweriyengi. (Luka 23:​42, 43; Yoha. 19:​26, 27) Mwaviyo, Yesu wangulongo kuti watanja ŵanthu mwakuŵafwiya pe cha, kweni wangulongo so kuziya mu vakuchita pa nyengu yosi yo wachitanga uteŵeti waki panu pasi.

12. Kumbi Yesu walutirizga kutichitiya vinthu vamampha nivi?

¹² Chinanga kuti Khristu wangufwa “kamoza pe mbwenu,” kweni iyu walutirizga kutichitiya vinthu vinandi. (Aro. 6:10) Kumbi iyu wachitanji? Iyu walutirizga kuchita vinthu vinandi vamampha kuti sembi yakuwombole yigwirengi ntchitu paku isi. Aŵanaŵaniyani vo iyu wachita. Iyu wateŵete nge Fumu yidu, Wasembi Mura ndipuso ndi mutu wa mpingu. (1 Akori. 15:25; Aefe. 5:23; Ahe. 2:17) Iyu walongozga pa ntchitu yakuwunganiska Akhristu akusankhika kweniso a mzinda ukulu, ndipu ntchitu yeniyi yazamumala chisuzgu chikulu chechendamali. a (Mate. 25:32; Mariko 13:27) Kweniso wawonesesa kuti ateŵeti ŵaki akugomezgeka ŵe ndi chakurya chauzimu chakukwana mu mazuŵa nganu ngakumaliya. (Mate. 24:45) Ndipu pa nyengu ya Ulamuliru wa Vyaka 1000, iyu wazamulutirizga kutichitiya vinthu vamampha. Kukamba uneneska, Yehova wakupereka nadi Mwana waki kuti watifwiyi kweniso kuti watichitiyi vinthu vinandi vamampha!

KULEKA CHA KUSAMBIRA

13. Kumbi tingachita wuli kuti tilutirizgi kuŵanaŵaniya vakukwaskana ndi chanju cho Chiuta kweniso Khristu ŵe nachu paku isi?

¹³ Asani mulutirizga kuŵanaŵaniya vo Yehova Chiuta ndi Yesu Khristu akutichitiya vingakuwovyani kuti mulutirizgi kusambira vakukwaskana ndi chanju cho atitilongo. Ndipu pa nyengu ya Chikumbusu cha chaka chinu, mungaŵerenga buku limoza la Uthenga Wamampha pamwenga kujumpha. Kuŵerenga machaputala nganandi cha pa nyengu yimoza. Kweni muŵerengengi machaputala ngamanavi ndi kuŵanaŵaniya fundu zinyaki zo zilongo vifukwa vo tikhumbikiya kwanja Yehova ndi Yesu. Ndipu muyesesengi kukambiyaku anyinu vo mwasambira.

14. Mwakukoliyana ndi Salimo 119:97 ndipuso mazu ngamumphata, kumbi kufufuza kungatiwovya wuli kuti tilutirizgi kusambira vakukwaskana ndi sembi yaku Yesu kweniso nkhani zinyaki? (Wonaniso chithuzi.)

¹⁴ Asani mwaja vyaka vinandi mu uneneska, mungajifumba asani pe vinthu vinyaki vasonu  vo mungasambira pa nkhani zo mukuziziŵiriya kali nge urunji waku Chiuta, chanju chaki, ndipuso sembi yaku Yesu. Uneneska ngwakuti nyengu zosi paŵengi fundu zasonu zo tingasambira pa nkhani zenizi kweniso zinyaki. Mwaviyo, kumbi mukhumbika kuchitanji? Muŵerengengi kweniso kusambira nkhani zinandi zo zisanirika mumabuku ngidu. Asani pe vinthu vinyaki vo muleka kuvivwisa, mutenere kufufuza. Pavuli paki, nyengu zosi muŵanaŵaniyengi vo mwasambira vakukwaskana ndi Yehova, Mwana waki kweniso chanju cho ŵe nachu paku yimwi.—Ŵerengani Salimo 119:97 ndi mazu ngamumphata.

15. Ntchifukwa wuli mukhumbika kulutirizga kufufuza fundu zakuzirwa za mu Bayibolu?

¹⁵ Kudandawula cha asani muleka kusaniya fundu zasonu pamwenga zakukondwesa pa nyengu yo muŵerenga pamwenga kufufuza. Mujengi nge munthu yo wapenja golidi. Kanandi, munthu yo wapenja golidi wafufuza kwa maora pamwenga mazuŵa nganandi kuti wakasaniyi golidi. Iyu watufwa daka cha, kweni walutirizga kufufuza chifukwa waziŵa kuti golidi yo wangasaniya ngwakuzirwa ukongwa kwaku iyu chinanga tingaŵa tivibanthu timanatimana. Kweni fundu yo tingasaniya mu Bayibolu ndiyu njakuzirwa ukongwa kuluska golidi! (Salimo 119:127; Nthanthi 8:10) Mwaviyo, muzikirengi ndipu zuŵa lingajumphanga cha kwambula kuŵerenga Bayibolu.—Salimo 1:2.

16. Kumbi tingamuyezga wuli Yehova ndi Yesu?

¹⁶ Asani musambira, muŵanaŵaniyengi mo mungagwiriskiya ntchitu vo musambira. Mwakuyeruzgiyapu, muyezgengi urunji waku Yehova mwakuleka kwanjiya pa kuchita vinthu ndi ŵanthu. Muyezgengi so Yesu pa nkhani yakwanja Awisi kweniso ŵanthu. Mujengi akunozgeka kusuzgika chifukwa cha zina laku Yehova ndipuso kuchitiya vamampha Akhristu anyinu, chinanga kuti nyengu zinyaki vingaŵa vakusuzga kuchita venivi. Kweniso muyezgengi Yesu mwakupharazgiya ŵanthu kuti nawu aje ndi mwaŵi wakuziŵa vinthu vo Yehova wachitiya ŵanthu ndipuso kuti aje ndi chivwanu mu sembi yaku Yesu.

17. Kumbi tikambiskanengenji mu nkhani yakulondopu?

¹⁷ Asani tilutirizga kusambira vakukwaskana ndi sembi yakuwombole, timuyanjengi ukongwa Yehova ndi Mwana waki. Venivi vingachitiska kuti nawu atiyanjengi so ukongwa. (Yoha. 14:21; Yako. 4:8) Mwaviyo, tiyeni tilutirizgi kugwiriskiya ntchitu vinthu vo Yehova watitipaska kuti tilutirizgi kusambira vakukwaskana ndi sembi yaku Yesu. Mu nkhani yakulondopu tikambiskanengi vitumbiku vo tisaniya chifukwa cha sembi yaku Yesu kweniso mo tingalongore kuti tiwonga chanju cho Yehova wakutilongo.