NKHANI YAKUSAMBIRA YA NAMBALA 5
SUMU 108 Chanju Chaku Chiuta Ntchambula Kumala
Kumbi Tiyanduwa Wuli ndi Chanju Chaku Yehova?
“Khristu Yesu wanguza pacharu chapasi kuzitaska ŵanthu akubuda.”—1 TIMO. 1:15.
FUNDU YIKULU
Tiwonengi mo tiyanduliya ndi sembi yaku Yesu kweniso mo tingalongore kuti tiwonga chifukwa cha vo Yehova wakutichitiya.
1. Kumbi tingachita wuli kuti tikondwesengi Yehova?
YERUZGIYANI kuti munthu yo mutimuyanja mwamupaska mphasu yapade yo njakutowa ndipuso yakovya ukongwa. Mungaguŵa ukongwa asani munthu yo wangayikwitika waka munyumba ndi kuyiluwa. Kweni mungakondwa ukongwa asani watiyigwiriskiya ntchitu umampha ndipuso kukuwongani chifukwa cha mphasu yo. Fundu njakuti wuli? Yehova wakupereka Mwana waki kuti wazitifwiyi. Iyu wakondwa ukongwa asani tiwonga chifukwa cha mphasu yapade yo wakutipaska ndipuso chanju cho iyu wakutilongo, cho chingumuchitiska kuti wapereki sembi yeniyi!—Yoha. 3:16; Aro. 5:7, 8.
2. Kumbi tikambiskanengenji mu nkhani iyi?
2 Asani vyaka viluta, tingaleka kulongo kuwonga mphasu yo Yehova wakutipaska. Asani tingachita viyo vingaja nge kuti mphasu yaku Chiuta yeniyi tayikwitika waka munyumba mwakuti tingaleka kuyiwona ndipuso tingayiluwa. Kuti venivi vileki kuchitika, nyengu zosi tiwonengi mo tichitiya pa nkhani yakulongo kuwonga pa vo Chiuta ndi Khristu akutichitiya. Nkhani iyi yitiwovyengi mo tingachitiya venivi. Tikambiskanengi mo tiyanduliya ndi sembi yeniyi sonu kweniso mo tazamuyanduliya kunthazi. Tikambiskanengi so mo tingalongore kuti tiwonga chifukwa cha chanju cho Yehova wakutilongo, ukongwa pa nyengu yinu ya Chikumbusu.
MO TIYANDULIYA SONU
3. Kumbi pasonu panu tiyanduwa wuli ndi sembi yaku Yesu?
3 Tikwambapu kali kuyanduwa ndi sembi yaku Khristu. Mwakuyeruzgiyapu, Yehova watitigowoke maubudi ngidu chifukwa cha sembi yaku Yesu. Iyu wachichizgika cha kuti watigowokiyengi, kweni wakhumba yija. Wamasalimo wanguwonga Yehova ndipu wangukamba kuti: “Chifukwa yimwi Yehova, ndimwi wamampha ndipuso wakunozgeka kugowoka.”—Salimo 86:5; 103:3, 10-13.
4. Kumbi Yehova wakupereka sembi chifukwa chaku yani? (Luka 5:32; 1 Timote 1:15)
4 Anyaki awona kuti mbakwenere cha kuti Yehova waŵagowoke. Mbuneneska kuti tosi te akwenere nadi cha kuti watigowoke. Ndichu chifukwa chaki wakutumika Paulo wangukamba kuti wenga “wakwenere cha kudanika kuti wakutumika.” Chinanga kuti venga viyo, iyu wangukamba so kuti: “Chifukwa cha wezi ukulu waku Chiuta nde wakutumika.” (1 Akori. 15:9, 10) Asani talapa maubudi ngidu, Yehova watitigowoke. Chifukwa wuli? Iyu watitigowoke chifukwa chakuti te akwenere kugowokereka cha, kweni chifukwa chakuti watitiyanja. Asani mutijiwona kuti ndimwi ambula kwenere, mukumbukengi kuti Yehova wakupereka sembi ku ŵanthu ambula kubuda cha, kweni ku ŵanthu akubuda wo alapa.—Ŵerengani Luka 5:32; 1 Timote 1:15.
5. Kumbi walipu yo wakhumbika kujivwa kuti ngwakwenere kulonde lisungu laku Yehova? Konkhoskani.
5 Palivi yo watenere kujiwona kuti iyu ndiyu wakwenere kulonde lisungu laku Yehova chifukwa chakuti wamuteŵete kwa vyaka vinandi. Mbuneneska kuti Yehova wawonga kuti tamuteŵete mwakugomezgeka kwa vyaka vinandi. (Ahe. 6:10) Iyu wakupereka Mwana waki nge malipiru nga uteŵeti wo titimuchitiya cha kweni nge mphasu yawezi. Kungaŵa kunanga kuŵanaŵana kuti chifukwa chakuti tamuchitiya vinthu vinandi pakumuteŵete ndikuti te akwenere kuti Yehova watigowoke. Asani tiŵanaŵana viyo, vingaja nge tikamba kuti Khristu wakufwa waka kwabuli.—Yeruzgiyani ndi Agalatiya 2:21.
6. Ntchifukwa wuli Paulo wachitanga phamphu pakuteŵete Yehova?
6 Paulo waziŵanga kuti Chiuta watingi wamugowokiyengi chifukwa cha uteŵeti wo wachitanga cha. Nanga ntchifukwa wuli wachitanga phamphu pakuteŵete Yehova? Iyu wachitanga viyo kuti walongo kuti ngwakwenere cha, kweni kuti walongo kuwonga chifukwa cha wezi ukulu waku Yehova. (Aefe. 3:7) Nge Paulo, nasi tilutirizga kuteŵete Yehova kuti iyu watichitiyi lisungu cha, kweni kuti tilongo kuwonga.
7. Kumbi ndi nthowa niyi yinyaki yo tiyanduliya ndi sembi yaku Yesu pasonu panu? (Aroma 5:1; Yakobe 2:23)
7 Nthowa yinyaki yo tiyanduliya ndi sembi yaku Yesu pasonu panu njakuti tingaja pa ubwezi wakukho ndi Yehova. a Nge mo nkhani yajumpha yingukambiya, tichiwaku tenga pa ubwezi cha ndi Chiuta. Kweni chifukwa cha sembi yaku Yesu, tingaja pa “chimangu ndi Chiuta,” ndipu venivi vingachitiska kuti tije nayu pa ubwezi.—Ŵerengani Aroma 5:1; Yakobe 2:23.
8. Ntchifukwa wuli tikhumbika kumuwonga Yehova chifukwa cha mwaŵi wo tenawu wakupemphera?
8 Pempheru ndi mwaŵi wapade wo tituŵa nawu chifukwa chakuja pa ubwezi ndi Yehova. Yehova watuvwa mapempheru ngo tipereka pagulu pe cha, kweni watuvwa so mapempheru ngo weyosi wapereka pakuyija. Pempheru lingatiwovya kuti tije ndi chimangu chamumtima ndipuso kuti tilekengi kufipa mtima ukongwa. Kweni chakukhumbika ukongwa ntchakuti lititiwovya kuti tije pa ubwezi wakukho ndi Chiuta. (Salimo 65:2; Yako. 4:8; 1 Yoha. 5:14) Pa nyengu yo wenga pacharu chapasi, Yesu wapempheranga kaŵikaŵi chifukwa waziŵanga kuti Yehova wavwisiyanga kweniso kuti pempheru limuwovyengi kulutirizga kuja pa ubwezi wakukho ndi Awisi. (Luka 5:16) Tiwonga ukongwa kuti tingaja mabwezi ngaku Yehova kweniso kulongoro nayu mu pempheru chifukwa cha sembi yaku Yesu.
MO TAZAMUYANDULIYA KUNTHAZI
9. Kumbi ŵanthu wo asopa Yehova mwakugomezgeka azamuyanduwa wuli ndi sembi kunthazi?
9 Kumbi ateŵeti aku Yehova akugomezgeka azamuyanduwa wuli ndi sembi yaku Yesu kunthazi? Yehova wazakuŵapaska umoyu wamuyaya. Ŵanthu anandi awona kuti venivi vingachitika cha chifukwa taŵanthu tikwamba kali kufwa. Kweni Yehova wakhumbanga kuti ŵanthu ajengi ndi umoyu kwamuyaya. Asani Adamu wanguleka kubuda, palivi yo watingi waŵanaŵanengi kuti venivi vingachitika cha. Ndipu chinanga kuti vingaja vakusuzga kugomezga kuti tazamuja kwamuyaya, kweni tingagomezga kuti venivi vazamuchitika nadi chifukwa tiziŵa kuti Yehova wakupereka Mwana waki nge sembi, wo ndi mtengu ukulu ukongwa.—Aro. 8:32.
10. Kumbi Akhristu akusankhika kweniso a mbereri zinyaki alindizganji?
10 Chinanga kuti kunthazi tazamulonde umoyu wamuyaya, kweni Yehova wakhumba kuti tiwuŵanaŵaniyengi pasonu panu. Akhristu akusankhika alindizga kuchija ndi umoyu wakunozga kuchanya, ndipu yiwu azamulamuliya charu chapasi limoza ndi Khristu. (Chivu. 20:6) A mbereri zinyaki alindizga kuzija mu Paradayisu pacharu chapasi kwambula vakuŵaŵa ndipuso chitima. (Chivu. 21:3, 4) Kumbi yimwi mwe mugulu la a mbereri zinyaki ndipu mulindizga kuzija ndi umoyu wamuyaya penipanu pacharu chapasi? Iyi ndi mphotu yimana cha! Ndivu Yehova wakhumbanga pakwamba wati walenga ŵanthu. Mwaviyo, tazamukondwa ukongwa kuzija pacharu chapasi kwamuyaya.
11-12. Kumbi ndi vitumbiku wuli vo tilindizga mu Paradayisu? (Wonaniso vithuzi.)
11 Ŵanaŵaniyani mo umoyu winu wazamuŵiya mu Paradayisu pacharu chapasi. Mwazamufipa mtima cha kuti mutamengi pamwenga kufwa. (Yesa. 25:8; 33:24) Yehova wazakukupaskani chinthu chechosi chamampha cho mwazamukhumba mpaka kukhorwa. Kumbi mukhumba kuzisambiranji? Kumbi mupenja kuzisambira vakukwaskana ndi vinyama, tiyuni, sumu pamwenga kujambula? Tikayika cha kuti mu Paradayisu, mwazamukhumbika ŵanthu wo aziŵa kupanga mapulanu nga nyumba, vakuzengazenga kweniso alimi. Kwazamukhumbika so ŵanthu wo aziŵa kunozga vinthu ndipuso wo aziŵa ntchitu zakupambanapambana nge kubika chakurya, kupanga vidya vakugwiriya ntchitu kweniso kupanda maluŵa ndi kungaphwere. (Yesa. 35:1; 65:21) Pakuti mwazamuja kwamuyaya, mwazamukuŵa ndi mwaŵi wakusambira ntchitu yeyosi yo mwakhumba.
12 Tazamukondwa ukongwa kulonde ŵanthu wo azamuyuskika! (Machi. 24:15) Mwazamukondwa so kusambira vinandi vakukwaskana ndi Yehova kuziya mu vinthu vo wakulenga. (Salimo 104:24; Yesa. 11:9) Ndipu chakukhumbika ukongwa ntchakuti, mwazamukondwa ukongwa kusopa Yehova kwambula kunangisa kanthu kekosi. Kumbi mungakhumba kusinthanisa umoyu wenuwu ndi “likondwa la ubudi la kanyengu kamanavi”? (Ahe. 11:25) Mungachita cha venivi! Vinthu vamampha vo tazamukondwa navu viluska chinthu chechosi cho tingasaniya mu charu ichi pasonu panu. Kumbukani kuti tijaliyengi waka kulindizga Paradayisu cha. Pambula kuswera yapa venivi vifiskikengi nadi. Ndipu vosi venivi vazamufiskika chifukwa chakuti Yehova watitiyanja ukongwa, ndichu chifukwa chaki wakupereka Mwana waki kuti wazitifwiyi.
Kumbi ndi vitumbiku nivi vo mukhumbisiska kuziwona vichifiskika mu Paradayisu? (Wonani ndimi 11-12)
VO MUNGACHITA KUTI MULONGO KUTI MUWONGA
13. Kumbi tingachita wuli kuti tilongo kuti tiwonga chanju chaku Yehova? (2 Akorinto 6:1)
13 Kumbi tingachita wuli kuti tilongo kuti titimuwonga Yehova chifukwa chakutipaska sembi? Tiyesesengi kuŵika vinthu vakukwaskana ndi ufumu pa malu ngakwamba. (Mate. 6:33) Yesu wangufwa “kuti ŵanthu wosi wo mbamoyu aleki kuja umoyu wakujikondwesa ŵeneku, kweni wakukondwesa yo wakuŵafwiya ndi kuyuskika.” (2 Akori. 5:15) Tingakhumba cha kuti wezi ukulu waku Yehova utipambi.—Ŵerengani 2 Akorinto 6:1.
14. Kumbi tingalongo wuli kuti tithemba ulongozgi waku Yehova?
14 Tingalongo so kuti tiwonga chanju chaku Yehova asani tithemba ulongozgi waki. Kumbi tingachita wuli venivi? Asani tikhumba kusankha vakuchita pa nkhani ya masambiru nga kucharu pamwenga ntchitu yo tingagwira, tikhumbika kuŵanaŵaniya vo Yehova wakhumba kuti tichiti. (1 Akori. 10:31; 2 Akori. 5:7) Asani tilongo kuti te ndi chivwanu, titimugomezga ukongwa Yehova, ubwezi widu ndi iyu ukho ukongwa kweniso tija ndi chilindizga chanthazi.—Aro. 5:3-5; Yako. 2:21, 22.
15. Kumbi tingalongo wuli kuti tiwonga chanju chaku Yehova pa nyengu ya Chikumbusu?
15 Tingalongo so kuti tiwonga chanju chaku Yehova asani tingagwiriskiya ntchitu nyengu yinu ya Chikumbusu kuwonga Yehova chifukwa cha sembi. Kusazgiyapu pa kuzisanirikapu pa Chikumbusku tingadana so ŵanthu anyaki kuti nawu azisanirikepu. (1 Timo. 2:4) Akonkhoskiyeni ŵanthu wo mwaŵadana vo vazamuchitika pa Chikumbusu. Mungaŵawonesa so mavidiyo ngo nge pa jw.org nga mutu wakuti, Kumbi Ntchifukwa Wuli Yesu Wangufwa? kweniso yakuti, Mukumbukiyengi Nyifwa Yaku Yesu. Ŵara akhumbika kudana Akhristu akufoka. Wosi wo ŵe kuchanya kweniso isi tosi panu pacharu, tikondwa ukongwa asani mbereri zinyaki zaku Yehova zo zingulanda zachiskika kuti ziwere so mu gulu laki! (Luka 15:4-7) Pa Chikumbusu, tiwonesesengi kuti titawuzga weyosi yo waza pa Chikumbusu, kusazgapu asonu pamwenga wo akuzaku kali ukongwa. Tikhumba kuti ajivwengi kuti mbakulondereka!—Aro. 12:13.
16. Ntchifukwa wuli tikhumbika kusazgiyaku vakuchita mu uteŵeti pa nyengu ya Chikumbusu?
16 Kumbi mungachita vinandi pakuteŵete Yehova pa nyengu ya Chikumbusu? Yeniyi yingaŵa nthowa yamampha yakulongore kuti tiwonga vo Chiuta ndi Khristu akutichitiya. Asani tisazgiyaku nyengu yakusere mu uteŵeti, tiwonengi kuti Yehova watitiwovya ukongwa ndipu vitiwovyengi kuti timuthembengi ukongwa. (1 Akori. 3:9) Kweniso mulondongi ndondomeku yakuŵerenga Bayibolu ya nyengu ya Chikumbusu yo ye mukabuku ka Kukambiskana Malemba Zuŵa Lelosi pamwenga mutchati cho che mukabuku ka Unganu wa Umoyu Widu Wachikhristu Ndipuso Uteŵeti. Mungagwiriskiya so ntchitu Malemba ngenanga pakusambira pakumwija.
17. Kumbi Yehova wakondwa ndi vinthu wuli? (Wonaniso bokosi lakuti “ Mo Mungalongore Kuti Muwonga Chanju Chaku Yehova.”)
17 Nyengu zinyaki, mungachita vinandi cha pakuteŵete Yehova chifukwa cha mo vinthu viliri pa umoyu winu. Kweni kumbukani kuti Yehova wayeruzgiya cha vo yimwi muchita ndi vo anyinu achita. Iyu wawona vo ve mumtima mwinu. Ndipu wakondwa asani mulongo kuti muwonga kutuliya pasi pa mtima chifukwa cha mphasu ya sembi yo wakutipaska.—1 Samu. 16:7; Mariko 12:41-44.
18. Ntchifukwa wuli tiwonga Yehova ndipuso Yesu?
18 Yehova wangatigowoke maubudi ngidu, tingaja nayu pa ubwezi ndipuso tingazija ndi umoyu wamuyaya chifukwa cha sembi yaku Yesu. Mwaviyo, nyengu zosi tilongongi kuti tiwonga chanju chaku Yehova, cho chinguchitiska kuti watipaski vitumbiku venivi. (1 Yoha. 4:19) Tikhumbika so kulongo kuti tiwonga Yesu, yo wakutiyanja ukongwa mwakuti wangupereka umoyu waki nge sembi!—Yoha. 15:13.
SUMU 154 Chanju Chimala Cha
