1. Kumbi ŵanthu anandi mazuŵa nganu aŵika ukongwa maŵanaŵanu pa vinthu wuli?

 KUMBI namwi muwona kuti ŵanthu anandi mazuŵa nganu aŵanaŵaniya vawu pe? Mwakuyeruzgiyapu, ŵanthu anandi agwiriskiya ntchitu malu ngakucheziyapu nga pa intaneti kuti ŵanthu aŵanaŵaniyengi vaku yiwu pe kweniso kuti alongongi vo achita. Kweni mbanthu amanavi wo apereka unkhankhu kwaku Yehova Chiuta. Mu nkhani iyi, tikambiskanengi vo kupereka unkhankhu kwaku Yehova kung’anamuwa kweniso vifukwa vo tikhumbikiya kuchitiya viyo. Tisambirengi so mo tingapereke unkhankhu kwaku Chiuta wo utimuyenere ndipuso mo iyu mweneku wakankhuskiyengi zina laki pambula kuswera.

KUMBI KUPEREKA UNKHANKHU KWAKU YEHOVA KUNG’ANAMUWANJI?

2. Kumbi Yehova wangulongo wuli unkhankhu waki pa Phiri la Sinayi? (Wonaniso chithuzi.)

² Kumbi unkhankhu ntchinthu wuli? Mu Bayibolu, mazu ngakuti “unkhankhu” ngangang’anamuwa chinthu cho chingachitiska kuti munthu wawonekengi mwapade. Yehova wangulongo mtundu wa Ayisirayeli unkhankhu ukulu pati pajumpha waka mazuŵa ngamanavi kutuliya po wanguŵataskiya kutuwa ku ukapolu ku Ijipiti. Ŵanaŵaniyani vo vinguchitika: Ayisirayeli mamiliyoni nganandi, anguwungana musina mwa Phiri la Sinayi kuti akavwi vo Chiuta wakhumbanga kuŵakambiya. Pavuli paki, phiri losi lingubulumutizika ndi mdima. Mwamabuchibuchi, panguchitika chidilirisi chikulu, charu chingusukunyika, limphezi lingung’anima ndi kugululusa kweniso kunguvwika chiwawa chikulu cha kuliya kwa mbata. (Eki. 19:​16-18; 24:17; Salimo 68:8) Kukamba uneneska, Ayisirayeli ŵenaŵa atenere kuti anguzizwa ukongwa kuwona unkhankhu ukulu wo Yehova wanguŵalongo.

3. Kumbi tingapereka wuli unkhankhu kwaku Yehova?

 ³ Isi nasi mazuŵa nganu tingapereka unkhankhu kwaku Yehova. Tingachita venivi mwakukambiyaku anyidu vakukwaskana ndi nthazi zaki zakuziziswa ndipuso mijalidu yaki yamampha. Tikankhuska so Chiuta asani tithamika iyu pa vinthu vo tifiska kuchita chifukwa cha nthazi zaki. (Yesa. 26:12) Fumu Davidi ntchakuwoniyapu chamampha pa nkhani yakupereka unkhankhu kwaku Yehova. Davidi wachipemphera pa masu pa Ayisirayeli, wangukambiya Chiuta kuti: “Yimwi Yehova, ukulu, nthazi, kutowa, unkhankhu ndipuso ulemu vinu, pakuti chechosi kuchanya kweniso pacharu chapasi ntchinu.” Davidi wati wamaliza kupemphera, “mpingu wosi unguthamika Yehova.”—1 Mbiri 29:​11, 20.

4. Kumbi Yesu wamukankhuskanga wuli Yehova?

⁴ Pa nyengu yo Yesu wenga pacharu chapasi, wakankhuskanga Awisi ndipu wakambiyanga ŵanthu kuti yiwu ndiwu amupaskanga nthazi zakuchitiya vakuziziswa. (Mariko 5:​18-20) Yesu waperekanga so unkhankhu kwaku Yehova kuziya mu vo wakambanga vakukwaskana ndi Awisi kweniso mo wachitiyanga vinthu ndi ŵanthu. Zuŵa linyaki, Yesu wasambizanga musinagogi. Ndipu pagulu la ŵanthu wo amuvwisiyanga, penga munthukazi munyaki yo wenga ndi mzimu uheni wo ungumutamisa kwa vyaka 18. Mzimu uheni wenuwu, unguchitiska kuti wagoŵeki msana ndipu wayunukanga cha. Venivi venga vakupweteka ukongwa! Yesu wangumulenge lisungu ndipu wanguza po penga munthukazi yo, ndi kumukambiya kuti: “Wamunthukazi yiwi, wafwatulika ku nthenda yaku.” Pavuli paki, iyu wanguŵika manja ngaki pa munthukazi yo ndipu nyengu yeniyo, wangunyoloka ndi “kwamba kukankhuska Chiuta.” Munthukazi yo wanguwonga ukongwa kuti Yehova wangumuchizga. (Luka 13:​10-13) Munthukazi mwenuyu wenga ndi chifukwa chakuvwika chakukankhuskiya Yehova, nge mo so viliri ndi isi.

NTCHIFUKWA WULI TIKANKHUSKA YEHOVA?

5. Ntchifukwa wuli tikhumbika kumupaska ulemu Yehova?

⁵ Tikankhuska Yehova chifukwa titimutumbika ukongwa. Te ndi vifukwa vinandi vakumupaskiya ulemu. Yehova we ndi nthazi zikulu ukongwa, ndipu wavuka cha. (Salimo 96:​4-7) Zeru zaki zapachanya ziwoneke umampha kuziya mu vinthu vo wakulenga. Iyu ndiyu wakulenga vinthu vamoyu ndipuso wativiphwere. (Chivu. 4:11) Iyu ngwakugomezgeka. (Chivu. 15:4) Vosi vo wachita vitenda umampha ndipuso nyengu zosi wafiska vo walayizga. (Yoswa 23:14) Ndichu chifukwa chaki mchimi Yeremiya wangukamba vakukwaskana ndi Yehova kuti: “Pa ŵanthu wosi azeru wo ŵe pakati pa mitundu ya ŵanthu kweniso pakati pa maufumu ngawu ngosi, palivi yo wayanana ndi yimwi.” (Yere. 10:​6, 7) Kukamba uneneska, te ndi vifukwa vakuvwika vakuŵapaskiya ulemu Awusefwi akuchanya. Yehova ngwakwenere kulonde ulemu ukongwa chifukwa chakuti we ndi mijalidu yamampha yo yichitiska kuti timuyanjengi.

6. Ntchifukwa wuli titanja Yehova?

⁶ Tikankhuska Yehova chifukwa chakuti titimuyanja ukongwa. Ŵanaŵaniyani mijalidu yinandi yo Yehova wenayu yo yichitiska kuti timuyanjengi. Iyu ngwalisungu. (Salimo 103:13; Yesa. 49:15) Wakwaskika ukongwa, mwakuti asani vinthu vinyaki vititiŵaŵa mumtima, nayu so vitimuŵaŵa. (Zeka. 2:8) Iyu watitiwovya kuti timuziŵengi kweniso kuti tijengi nayu pa ubwezi. (Salimo 25:14; Machi. 17:27) Iyu ngwakujiyuyuwa, ndipu ‘wakotama kuti walereski pacharu chapasi ndi kuchanya. Iyu wasoska munthu wakusika kutuwa mufuvu.’ (Salimo 113:​6, 7) Chifukwa cha mijalidu yosi yeniyi, ndiyani yo wangaleka kukhumba kukankhuska Chiuta widu mukulu?—Salimo 86:12.

7. Kumbi te ndi mwaŵi wapade nuwu?

⁷ Tikankhuska Yehova chifukwa tikhumba kuti ŵanthu amuziŵi. Ŵanthu anandi atiwuziŵa cha  uneneska wakukwaskana ndi Yehova. Chifukwa wuli? Chifukwa Satana wabulumutizga maŵanaŵanu ngawu mwakuwandisa maboza ngakukwaskana ndi Chiuta. (2 Akori. 4:4) Satana wachitiska ŵanthu kugomezga kuti Yehova wagowoka cha, watitiphwere cha ndipuso kuti ndiyu wachitiska masuzgu ngosi ngo nge pacharu. Kweni isi tiziŵa uneneska wakukwaskana ndi Chiuta widu! Mwaviyo, te ndi mwaŵi wakukambiya anyidu uneneska wakukwaskana ndi iyu. Venivi vingachitiska kuti Chiuta wakankhuskiki. (Yesa. 43:10) Buku la Salimo 96 likankhuska Yehova. Po tikambiskana mazu ngo nge mu Salimo lenili, ŵanaŵaniyani nthowa zo mungapereke unkhankhu kwaku Yehova wo utimuyenere.

KUMBI TINGAPEREKA WULI UNKHANKHU KWAKU YEHOVA WO UTIMUYENERE?

8. Kumbi tingamukankhuska wuli Yehova? (Salimo 96:​1-3)

⁸ Ŵerengani Salimo 96:​1-3. Tingakankhuska Yehova kuziya mu vo tikamba vakukwaskana ndi iyu. Mu mavesi yanga, ŵanthu aku Yehova apempheka kuti ‘ambiyengi Yehova,’ ‘athamikengi zina laki,’ ‘apharazgengi uthenga wamampha wa utaski waki’ ndipuso ‘apharazgengi unkhankhu waki pakati pa mitundu.’ Zosi izi ndi nthowa zo tingakankhuskiya Awusefwi akuchanya kuziya mu vo tikamba. Ayuda akugomezgeka kweniso Akhristu a mu nyengu ya akutumika akhumbisiskanga kukambiya anyawu mijalidu yamampha yo Yehova wenayu kweniso vinthu vamampha vo iyu waŵachitiyanga. (Dani. 3:​16-18; Machi. 4:29) Kumbi isi tingaŵayezga wuli?

9-10. Kumbi mwasambiranji kwaku Angelena? (Wonaniso chithuzi.)

⁹ Ŵanaŵaniyani vo vinguchitikiya Mzichi Angelena, a yo waja ku United States. Iyu wanguchita chiganga kukamba vakukwaskana ndi Yehova pakampani yo wagwira ntchitu. Pakuti Angelena wangwambapu waka sonu kugwira ntchitu pakampani yeniyi, iyu wangupempheka kuti wakajepu pa nkhumanu ya ŵanthu wosi wo angwamba waka sonu ntchitu. Pa nkhumanu yeniyi, weyosi wangupaskika mwaŵi wakuti wakambiyi anyaki vakukwaskana ndi iyu. Angelena wangunozga kuti wakalongo vithuzi pakukonkhoska mo wakondwe kuja yumoza wa Akaboni aku Yehova. Kweni nyengu yaki yechendakwani kuti walongoro, munthu munyaki yo wagwira nayu ntchitu wangukamba kuti wakulereka ndi apapi ŵaki wo Mbakaboni aku Yehova. Iyu wangwamba kunyoza vo tigomezga. Angelena wangukamba kuti: “Ndinguchita mantha ukongwa. Kweni ndingujifumba kuti:  ‘Kumbi ndizomerezengi kuti munthu munyaki wakambengi vinthu vaboza vakukwaskana ndi Yehova? Pamwenga ndiŵakambiyengi uneneska wakukwaskana ndi Iyu?’”

¹⁰ Munthu yo wanyozanga vo tigomezga wati wamaliza kulongoro, Angelena wangupemphera chamumtima. Pavuli paki, wangukambiya munthu yo mwaulemu kuti: “Tiyananaku ndi yiwi. Nani so viyo ndikulereka ndi apapi wo Mbakaboni aku Yehova, ndipu mpaka sonu ndeche yumoza wa Akaboni aku Yehova.” Chinanga kuti penga viwawa, kweni Angelena wangulutirizga kuja wakuzika. Iyu wanguŵalongo vithuzi vo wangujambulisa ndi anyaki achiteŵete Yehova mwakukondwa ndipu wanguchita vinthu mwaulemu pakuvikiliya vo tigomezga. (1 Petu. 3:15) Ntchinthu wuli chinguchitika? Angelena wati wamaliza kulongoro, munthu yo wanguthera. Pavuli paki, munthu yo pakwamba wanyozanga vo tigomezga wangukamba kuti nayu wakumbuka vinthu vakukondwesa vo vachitikanga we munamana pa nyengu yo wawungananga ndi Akaboni aku Yehova. Angelena wangukamba kuti: “Yehova ngwakwenere kumuŵikiya kuvuli. Ndi mwaŵi ukulu kukambiya ŵanthu uneneska wakukwaskana ndi iyu.” Nasi te ndi mwaŵi wakuthamika Yehova kweniso kumukankhuska chinanga kuti ŵanthu anyaki atimuthamika cha.

11. Kutuwa kali, kumbi ŵanthu wo asopa Yehova mwauneneska alondo wuli ulongozgi wo we pa Salimo 96:8?

¹¹ Ŵerengani Salimo 96:8. Tingakankhuska Yehova ndi vinthu vidu vakuzirwa. Ŵanthu wo asopa Yehova mwauneneska akwamba kali kumutumbika mu nthowa yeniyi. (Nthanthi 3:9) Mwakuyeruzgiyapu, Ayisirayeli angupereka ndalama ndipuso vinthu vawu vakuzirwa kuti azenge nyumba yakusopiyamu kweniso kuyiphwere. (2 Mafu. 12:​4, 5; 1 Mbiri 29:​3-9) Akusambira anyaki aku Yesu aperekanga “chuma chawu” kuti awovyi Yesu ndi akutumika kusaniya vinthu vo akhumbikanga. (Luka 8:​1-3) Akhristu a mu nyengu ya akutumika nawu angupereka chovyu kuti chiwovyi Akhristu anyawu pa nyengu yo kwenga nja. (Machi. 11:​27-29) Mazuŵa nganu, nasi tingakankhuska Yehova mwakupereka vakupereka vidu.

12. Kumbi vakupereka vidu vikankhuska wuli Yehova? (Wonaniso chithuzi.)

¹² Tiyeni tikambiskani vinthu vinyaki vo vinguchitika vo vilongo kuti vakupereka vidu vikankhuska Yehova. Mu chaka cha 2020 ku Zimbabwe kwenga chilala cho chinguto nyengu yitali. Mwaviyo, ŵanthu mamiliyoni nganandi kusazgapu mzichi Prisca, ŵengavi chakurya. Chinanga kuti kwenga chilala, Prisca wapharazganga mbwenu pa Chitatu ndi pa Chinkhondi  peposi, ndipu wachitanga venivi chinanga ndi mu nyengu yakulimiya. Maneba ngaki ngamunyozanga chifukwa chakuti walutanga mu uteŵeti mumalu mwakuluta kumunda kuchilima. Yiwu akambanga kuti: “Ufwengi ndi nja.” Prisca wakayikanga cha kuti Yehova wamuphweriyengi ndipu waŵamukanga kuti: “Yehova wakuŵajowopu cha ateŵeti ŵaki.” Pati pajumpha nyengu yimanavi, nayu wenga mugulu la abali wo angulonde chovyu cho gulu laperekanga. Chovyu chenichi chingusanirika chifukwa cha vakupereka vidu. Maneba ngaku Prisca nganguzizwa ukongwa, ndipu ngangumukambiya kuti, “Chiuta wakujowo nadi cha. Nasi tikhumba kusambira vinandi vakukwaskana ndi iyu.” Ndipu ŵanthu 7 angwamba kuwungana.

13. Kumbi tingachita wuli kuti tikankhuski Yehova? (Salimo 96:9)

¹³ Ŵerengani Salimo 96:9. Tingakankhuska Yehova kuziya mu vakuchita vidu. Asembi wo ateŵetiyanga pa nyumba yakusopiyamu yaku Yehova, akhumbikanga kuja akutowa mwakuliŵavu. (Eki. 40:​30-32) Kweni chakukhumbika ukongwa, akhumbikanga kukhwecha vinthu vo Yehova watinkha. (Salimo 24:​3, 4; 1 Petu. 1:​15, 16) Bayibolu likamba kuti titenere kuzuwa “umunthu wakali,” ndi kuvwala “umunthu wufya.” Ivi ving’anamuwa kuti tikhumbika kuyesesa kuleka kuŵanaŵana vinthu viheni ndipuso kukhwecha vinthu vo Yehova watinkha. Mumalu mwaki, tikhumbika kuŵanaŵana mu nthowa yo yingalongo kuti tiyezga Yehova kweniso mijalidu yaki yapachanya. (Ako. 3:​9, 10) Chinanga tingaŵa ndi mijalidu yiheni wuli, Yehova wangatiwovya kusintha ndi kuvwala umunthu wufya.

14. Kumbi mwasambiranji pa vo vinguchitikiya Jack? (Wonaniso chithuzi.)

¹⁴ Tiyeni tikambiskani vo vinguchitikiya Jack. Iyu wenga munthu wankhaza kweniso wakofya ukongwa, ndipu ŵanthu angumukweza zina lakuti Chiŵanda. Chifukwa cha milandu yo Jack wenga nayu, angumupaska chilangu chakuti amunyongengi. We mujeri wachilindizga chilangu chaki chakuti zuŵa linyaki wazamunyongeka, mubali munyaki yo walutanga kujeri kwenuku wangumupempha kuti wasambirengi nayu Bayibolu, ndipu Jack wanguzomera. Chinanga kuti Jack wanguchitapu vinthu vinandi viheni ukongwa, wanguzuwa umunthu wakali. Ndipu pati pajumpha nyengu wangubatizika. Jack wangusintha ukongwa mwakuti pa zuŵa lo wanyongekiyanga, alonda ajeri angudira masozi achilayilana nayu. Wapolisi yo wagwiranga ntchitu kujeri wangukamba kuti: “Pakwamba Jack wenga mukayidi muheni ukongwa. Kweni sonu ndi  mukayidi wamampha ukongwa.” Pati pajumpha sabata yimoza kutuliya po Jack wangunyongeke, abali wo anguluta kujeri kuti akachitiski maunganu angukumana ndi mukayidi munyaki yo kenga kakwamba kuwungana. Ntchifukwa wuli wanguza kumaunganu? Iyu wanguchiskika limu wati wawona kuti Jack wasintha nkharu yaki ndipu wapenjanga kuziŵa vo wakhumbikanga kuchita kuti wasopengi Yehova. Venivi vilongore limu kuti vakuchita vidu vingakankhuska Awusefwi akuchanya!—1 Petu. 2:12.

KUMBI YEHOVA WALIKANKHUSKENGI WULI ZINA LAKI PAMBULA KUSWERA?

15. Kumbi Yehova walikankhuskengi wuli zina laki pambula kuswera yapa? (Salimo 96:​10-13)

¹⁵ Ŵerengani Salimo 96:​10-13. Mavesi ngakumaliya ngenanga nga Salimo 96 ngakonkhoska kuti Yehova ndi Fumu kweniso Wakweruzga waurunji. Kumbi Yehova walikankhuskengi wuli zina laki pambula kuswera? Iyu wazisengi urunji. Pambula kuswera yapa, Yehova wabwanganduwengi Babiloni Mukulu yo wanyoza zina laki lakupaturika. (Chivu. 17:​5, 16; 19:​1, 2) Ŵanthu anyaki wo azamuwona Babiloni Mukulu wachibwangandulika, angaziyamba kusopa Yehova. Pakumaliya, Yehova wazamutuzgapu charu chosi chaku Satana pa nkhondu ya Aramagedoni, ndipu wazamubaya ŵanthu wosi wo atimususka kweniso kunyoza zina laki. Kweni wazamutaska ŵanthu wosi wo atimuyanja, kumuvwiya ndipuso kumukankhuska. (Mariko 8:38; 2 Ate. 1:​6-10) Pavuli pa kuyeseka kwakumaliya, ko kwazamuŵaku pavuli pa Ulamuliru Waku Khristu wa Vyaka 1000, Yehova wazamukuŵa kuti walitowese limu zina laki. (Chivu. 20:​7-10) Pa nyengu yeniyo, “charu chapasi chazamuzaza ndi kuziŵa unkhankhu waku Yehova nge mo maji ngazaziya nyanja.”—Haba. 2:14.

16. Kumbi mwasimikiza kuchitanji? (Wonaniso chithuzi.)

¹⁶ Vazamuja vakukondwesa ukongwa asani weyosi waziyamba kupereka kwaku Yehova unkhankhu wakwenere zina laki! Kweni pasonu panu, titenere kuyesesa kukankhuska Chiuta widu nyengu yeyosi yo tasaniya mpata. Kuti tiziŵi kuti fundu yeniyi njakukhumbika ukongwa, Wupu Wakulongozga wasankha Salimo 96:8 kuja lemba la chaka cha 2025, lakuti: “Perekani kwaku Yehova unkhankhu wakwenere zina laki.”