1. 1. SATANA DYABOLI. Satana yo ndi mungelu wakugaruka, ndiyu wachitiska kuti ŵanthu atinkhanengi mazuŵa nganu. Chiuta wazamubaya Satana ndi ŵanthu wosi wo atinkha anyawu nge mo Satana wachitiya.—Salimo 37:38; Aroma 16:20.

2. 2. CHARU CHIHENI CHAKU SATANA. Chiuta wazamutuzgapu vinthu vo vichitiska kuti ŵanthu atinkhanengi, kusazgapu andali kweniso alongozgi a visopa wo achiska kutinkhana. Chiuta wazamutuzgapu so amalonda ambunu, achinyengu kweniso akubiya ŵanthu.—2 Peturo 3:13.

3. 3. KULEKA KUFIKAPU KWA ŴANTHU. Bayibolu likonkhoska kuti ŵanthu wosi akuhara ubudi ndipu venivi vichitiska kuti aŵanaŵanengi kweniso kuchita vinthu viheni. (Aroma 5:12) Kutinkha ŵanthu anyaki ntchimoza mwa vinthu viheni venivi. Chiuta wazamuwovya ŵanthu kuti aleki kuchita vinthu viheni venivi ndipu pavuli paki, kutinkhana kwazamutuzgikapu kwamuyaya.—Yesaya 54:13.

1. 1. KWAZAMUŴAVI VINTHU VAMBULA URUNJI. Ufumu waku Chiuta wazamulamuliya charu chapasi kutuliya kuchanya ndipu wazamuzisa urunji kwamuyaya. (Daniyeli 2:44) Sankhu kweniso kupambana maŵanaŵanu kwazamuŵavi. Chiuta wazamutuzgapu vinthu vosi vambula urunji.—Luka 18:7.

2. 2. WEYOSI WAZAMUJANGA MWACHIMANGU. Palivi munthu yo wazamusuzgika chifukwa cha viwawa kweniso nkhondu. (Salimo 46:9) Charu chapasi chazamukuŵa malu ngamampha ngakujamu, chifukwa mwazamukuŵa ŵanthu wo atanja chimangu pe.—Salimo 72:7.

3. 3. WEYOSI WAZAMUJA KWAMUYAYA MUCHARU CHAMAMPHA. Ŵanthu wosi pacharu chapasi azamulongo kuti atanja nadi anyawu. (Mateyu 22:39) Palivi yo wazamuguŵa chifukwa cha maŵanaŵanu pamwenga kukumbuka vinthu viheni. (Yesaya 65:17) Asani kutinkhana kwazimala, ŵanthu “azamukondwa ukongwa ndi chimangu chikulu.”—Salimo 37:11.

Kumbi mungayanja kuzija mucharu chaviyo? Chinanga ndi sonu, ŵanthu anandi asambira mo angaleke kutinkha anyawu, mwakugwiriskiya ntchitu fundu za mu Bayibolu. (Salimo 37:8) Venivi ndivu Akaboni aku Yehova mamiliyoni nganandi achita pacharu chosi. Chinanga kuti atuliya mu vyaru kweniso mu midawuku yakupambanapambana, yiwu atanjana kweniso akoliyana.—Yesaya 2:2-4.

Akaboni aku Yehova angayanja kukukambiyani vo asambira pa nkhani ya mo mungakunthiyapu vinthu vambula urunji kweniso kusankhana. Vo mungasambira vingakuwovyani kuti muleki kutinkha ŵanthu ndi kwamba kuŵayanja. Mungaziŵa mo mungalongore lisungu ku ŵanthu wosi kusazgapu wo mbambula kuwonga pamwenga wo atinkha anyawu. Ivi vingakuwovyani kuti mukondwengi kweniso kulutirizga kwanjana ndi anyinu. Ndipu chakuzirwa ukongwa ntchakuti musambirengi vo mungachita kuti muzihari Ufumu waku Chiuta pa nyengu yo kutinkhana kwazamumaliya limu.—Salimo 37:29.