Asani ndi viyo cha, mutenere kuti mwawonapu ŵanthu achitinkhika mu nthowa zinandi. Nkhani zinandi zilongo kuti ŵanthu atinkhana chifukwa chakupambana mtundu, charu pamwenga chifukwa chakuti agonana anthulumi pamwenga anthukazi ŵijaŵija. Ivi vichitiska kuti maboma nganandi ngajalikiskengi marangu ngakuti munthu weyosi yo wasanirika ndi mulandu chifukwa chakuti watinkha mtundu unyaki wa ŵanthu, walangikengi ukongwa.

Ŵanthu wo atinkhika, kanandi nawu so atamba kutinkha ukongwa anyawu. Ve viyo chifukwa yiwu atamba kuja ndi mtima wakukhumba kuweze vinthu viheni vo ŵanthu atiŵachitiya ndipu venivi vichitiska kuti kutinkhana kuleki kumala.

Panyaki ŵanthu akukuchitiyanipu sankhu, kukuwonani mwambula kwenere, kukunyozani kweniso kukuwofyezani. Kweni kanandi kutinkha ŵanthu kujumpha penapa. Kanandi ŵanthu afika mpaka pa kupumana, kunanga vinthu, kukolere kweniso kubayana.

Magazini iyi yimukengi mafumbu ngo nge mumphata ndipuso yilongongi vo tingachita kuti timalani ndi jalidu la kutinkhana:

• Ntchifukwa wuli ŵanthu atinkhana ukongwa?

• Kumbi kutinkhana kungamala wuli?

• Kumbi yazamuŵapu nyengu yo kutinkhana kwazamumaliya limu?