Kumbi Mazu Ngakuti Vinthu Vikuchita Kusambuka Ngang’anamuwanji?
KUMBI MAZU NGAKUTI VINTHU VIKUCHITA KUSAMBUKA NGANG’ANAMUWANJI?
Mazu ngakuti “kusambuka” ngang’anamuwa: “Kusintha kwa vinthu munthowa yinyaki.” Kweni mazu yanga ngagwiriskikiya so ntchitu munthowa zakupambanapambana. Mwakuyeruzgiyapu, atingagwiriskiya ntchitu pakukonkhoska vinthu vambula umoyu vo vingusintha ukongwa ndi kupanga chilengedu chosi. Mazu yanga atingagwiriskiya so ntchitu pakukonkhoska kusintha ko kuchitika mu vinthu vamoyu nge ŵanthu ndipuso vimiti, asani vinthu vasintha pamalu ngo vili. Kweni kanandi mazu yanga ngagwiriskikiya ntchitu pakukonkhoska chisambizu chakuti umoyu ukutuliya ku tinthu tinyaki timanatimana tambula umoyu to tingusambuka ndi kuja maselu. Yiwu akamba kuti maselu yanga ngangwamba kupanga maselu nganyaki ndipu ngangulutilizga mpaka kupanga vinthu vamoyu kusazgapu ŵanthu. Fundu yachitatu iyi ndiyu mazu ngakuti “vinthu vikuchita kusambuka” ngo ngagwiriskikiya ntchitu mu nkhani iyi ngang’anamuwa.